بنتي بتروح رابعه ... واهي ضعيفه بالانجلش..شسوي؟؟؟؟

[نور الفنر]

السلام عليكم...


شلونكم ....


لما استلمت شهادة آخر السنه مالت بنتي ... تفاجأت ان نزل مستواها بالانجلش,,, ضاق خلقي حيييييييل ...والي سمعته ان

رابعه صعبه ويبيلها...وانا مااااا احب ولا افضل ادخلهم دروس تقويه بالصيف ...ما احب اضغط عليهم ...

فودي من الامهات الخبيرات او المدرسات يفيدوني ....اشلون اقويها بالبيت ....بدون نوادي تدريس ..بالبيت بجهدي انا

شوي شوي كل يوم .... عشان اذا الله احيانا وبدت الدراسه تكون احسن ....

انا ادخلها مواقع على النت حلوة ...بس اهي تاخذها على سالفة لعب ...فانا ابها تفهم ويرتفع مستواها واسسها شوي

شوي...


ناطرتكم بنات ......................

 

[mr000]

حبيبتي في وايد معاهد تدرس انجليزي آنا كنت دايما أدخل عيالي وعلشان مايحسون أنه دراسه كنت أشركهم على شكل برنامج يعني ساعه كمبيوتر وساعه انجليزي وساعه ترفيه رسم وأفلام أو رحله مره بالأسبوع في وايد أماكن جذي بالصيف وآنا أنصحج بنوادي المدارس الأجنبيه مثل المدرسه البريطانيه والكويت الأنجليزيه بسلوى ماراح تحس أنه دراسه لأنه برنامج متنوع ومن ضمنه الأنجليزي والمدرسين أجانب فراح تستفيد وايد! والله أحنا مجربينهم عيال خواتي دايما يسجلونهم بالعطل!

 

[نور الفنر]

مشكورة اختي ما قصرتي ....

بس ودي اعرف اشلون ااسسها بروحي ؟؟؟ ادري شاقيه عمري بس انا قلبي حار ..وودي اباشرها واشوف تحسنها على ايدي

 

[mr000]

أختي روحي مكتبة جرير أو المكتبات اللي بالمثنى وفيه مكتبه أسمها مكتبة العائله بالسالميه القديمه راح تلاقين وايد شغلات مفيده تقويها بالأنجليزي مثلا قواعد وقصص وعقبها أسئله وشغلات وايد كنت بكل أجازه أشتري حق ولدي على حسب صفه هو بمدرسه أمريكيه بس علشان لاينسى بالأجازه وهم تقويه زياده وهم خليها تقرا قصص أنجليزيه كل ليله قبل لاتنام ترى الياهل عالتعود للأسف مدارس الحكومه ماتشجع عالقراءه بس بالمدرس الأجنبيه في ورقه شهريه نوقع فيها كل يوم أنه الطفل قرا قصه لمدة نص ساعه!

 

[أمواج البحر]

حبيبتي ليش يضيق خلقج

بالعكس تعرفين الحين ان مستواها ضعيف احسن الف مره من انج ما تدرين

اول شي اشتريلج لوحات الاحرف والكلمات الانجليزيه

يبيلها الكتب التعليميه اللي فيها كلمات بسيطه

ودايما خليها تقرا بروحها ... وعلميها لما تكتب الكلمة تقراها

حاولي تييبين كتب الانجليزي مالت رابعه

خليها تتعلم تجاوب على الاسئله اجابه كامله ... تتعلم شلون تربط الجمل مع بعض

وفعلا ترى رابعه المفروض تعرف تقرا الكلمات من غير مساعده

شدي حيلج معاها بالعطله وان شاء الله تتقوى

 

[حلم الطفولة]

ولا يضيق خلقج حبوبه ولا شي ,, تكبر وتنظج قدراتها بالتدريج ,,
وهذا رابط الموضوع المثبت ( موسوعة المواقع المفيدة لطفلك ) http://www.q8yat.net/showthread.php?t=321322
إن شاء الله تستفيدين منه ,, عندج مكتبة المثنى الكبيره تحت فيها كتب مفيده عملي أو نظري ,, روحي شوفيها ,,
وأنصح بمجموعة قصص ليدي بيرد اللي معاها شريط ,, اختاري المستويات الأولى ( مثلا مستوى الصف الأول ) مو عشان بنتج ضعيفه , بس لأن الكتب هذي مخصصه لنظام المدارس الانجليزيه ومستواها أصلا عالي شوي بالنسبه للحكومه ,, وبالتوفيق .

 

[الحراير]

وانا بعد ولدي يبي يروح رابعه وضعيف في الانجليزي والله العظيم اني احاتي وحاطه ايدي علي قلبي ياليت الامهات يفيدونه بتجاربهم

 

[Um Hasan]

نصيحة ... اذا مستواها ضعيف شركيها كورس انجليزي خل تتقوى ... الكورس كله شهر وساعتين باليوم ... وعندها باجي اليوم كله لعب وفوقهم شهرين فاضية ... مهما راح تحاولين ما راح ترفعين مستواها نفس الكورسات ..

 

[نور الفنر]

mr000

امواج البحر

حلم الطفوله

ام حسن

والله مادري اشلون اشكركم ... احس رتبتولي افكاري...وان شاء الله امر المثنى واشوف المكتبه ...صح اهي تحب تقرا بس المدارس للاسف ما تشجع....ويمكن عقب ما اخلص من البيت ادخلها كورس اذا اهي حابه...مشكورين

حراير ..... احسن لج بلشي من الحين على الراحه عشان ما ينصدم برابعه ....موفقه

 

[الحراير]

هلا نور والله ولدي دخلته القاعده الحلبيه وسجلته عربي ورياضيات وانجليزي ولا استفاد شي لانهم يجمعونه مع بعض في صف واحد يعني اولي وثانيه وثالثه ورابعه مع بعض والله احترت

 

[oum^zozo]

انا ماعندي عيال بس من تجربه انا و لا شي قوااني غير الرسوم المتحركه بالانجيليزي
من و انا ياهل اطالعهم بدون ترجمه ليما صرت حيل قويه

 

[نور الفنر]

او زوزو ... مشكورة بس الي مضيق خلقي فيها انها تتعييز وتتملل بسرعه معاني الاحظ انها نبيهه وشاطرة ... حتى لما احط لها مواقع انجليزي تعليمي مثل موقع :ستار فل

وغيرة .... مايمديها كلش ... تقول لا مابي ابي عربي ... تستثقل الشغله ... والله يهداها ويعيني....

 

[البرنسيسه77]

شوفى حبيبتى اسمعى نصيحتى لج لانها عن تجربــــــــــــــه لا تدخلينها تقويه ولا نادى ولا هم يحزنون لانج ما تدرين شقاعدين يعلمونها
كل اللى تسوينه هو انج تجيبين لها مدرسه خصوصيه فى البيت وتخلينها تفهمها القواعد اهم شى مع اعادة ترتيب الجمل مع المواقف وانتى تكونين قاعده معاها وتسمعين المدرسه وتفهمين منها ولما تروح انتى اقعدى عيدى عليها شوى شوى لما تفهم وبعد اسبوع او اسبوعين جيبى المدرسه مره ثانيه علشان تفهمها الباجى صدقينى هذى احسن طريقه لانج راح تضيعين وقتج وما راح تعرفين من وين تبدين وهذى طريقتى جبت المدرسه مرتين بالسنه بس والله فهمتنا اشياء ما كنا نعرفها جزاها الله خير

 

[78MariMar78]

قاعدة اشوف الردود لأني عندي مشكلة مثل مشكلتج بس الفرق انهم وليدين ضعاف بالانجليزي

الله يرحمنا ويهدنا لعمل الصواب...

 

[أم عبووووود]

حبيبيتي انا معاج انج تعلمينها بالبيت وايد احسن وافضل

حبيبيتي ابدي علميها من الصفر الكلمات البسيطة وكل ماتشوفينها تقوت زيدي مستوى الكلمات وخليها تكون جمل بسيطة وانتي حاولي تكلميمها انجليزي وقت اللي تدرسينها

حبيبتي انا كاتبة موضوع عن موسوعة المواقع المفيدة وثبتوه الاشراف جزاهم الله خير دخلي وتجولي بالمواقع راح تستفيدين وايد ان شالله

طبعي لها القصص اللي معاهم صور للتلوين وايد نفعوا عيالي يقوون القراءة عندهم وبنفس الوقت يستانسون بالتلوين

لاتنسين تركزين لها على اصوات الحروف بالقراءة علشان تقدر تقرى

ان شاء الله اكون فدتج واي سؤال انا بالخدمة

 

[princesse X]

جربي المعهد البريطاني دوراتهم قصيرة ومعظمها لعب ومضطرة تركز مع المدرسات لان محد يتكلم عربي، عاليين بس ما سمعن عن احد دخل عياله وما استفادوا

 

[eman12]

هلا ياقلبي
حبيبتى
في عندج معهد بحولي مقابل مجمع البحر سنتر مو فيه جم محل يسون ديكووورات حق البيت
المهم في يمهم معهد اسمه مجد الاندلس روحي ودى بنتج مستواهم وااايد ممتاز
انا بنتى كانت بحضانه خاصه وتعرف الاحرف والكلمات
بس لما راحت الابتدائى حكومه الابله تقولى ماتفهم على ونزلت مستواها
وحطيت لها ابله خااااصه
ويت امانه لله حليوة الابله اذا تبين رقمها
بس الحين حاطتها تتعلم قبل المدارس وااااايد استفادتة لانه يبين يعطونهم امتحانات فيبين مستوى الطفل ان يحل عدل
وانشالله الله يوفقها