بنات عفيه ساعدوني ارتب غرفتي ماعرف :(

[music_teacher88]

قووووه بنااات

والله لاعت جبدي من غرفتي انا مغيرتها من رمضان الي فات
مومكفيتني

يعني الكبت كبييير وراااهي بس مايكفي اغرااضي يعني حاولت ملابس السهره والبدل الرسميه الي حق زوارات وهالسوالف حطيتهم بكبت امي
بس هم في وااااايد
والهدوم القديمه والوسيعه والي ما ابيها هم صفيتهم
في ملابس وبيجاماات وااايد مصفطين يم الكبت مااحب جذي





وكتب الكليه واورااق الموسيقى كفايه لووويه
حطيتهم بفايلات بس شسوي فيهم
اشتري كبتات صغار ؟؟مابي يصير الاثاث مرقع انا اثاثي لون الخشب الي فاتح
وماعندي مكتب دراسه عشان احط فيه اغراض الكليه

وغرفتي كبيره الحمدالله بس مابي اترسها اثاث وكبتات تخزين احب اشوف فراغ بالغرفه اشرح

ياليت تساعدوني :0bee2e8d89:

 

[العاذرية]

انا كبتي كان كبييييييييييييير بس مايكفي شييي

من غيرته شريت اصغررر صار يكفي وزود

انتي مو منظمتهم عدل امممممممم قسميهم الصيفي طليعيه الحين والشتوي خزنيه فوق الكبت بصناديق او جنطه او بمخزن الكبت اذا فيه

والنفانيف اللي ماتبينهم من سهره وغيرهم حاولي تصرفينهم بيعيهم افضل

وطريقة التسفيط هم تساعد بالمكان يمكن انتي ماتسفطينهم عدل تكودينهم فوق بعض؟؟


مادري يمكن بالصوره نقدر نفيدج

ماحبيت ادخل وما ارد

ان شاء الله البنات مايقصرون حبيبتي

 

[music_teacher88]

يسلمو حبيبتي على الرد
لاوالله صفطتهم كثر ماقدر وخليت الملابس العمليه ملوت الكليه اهما الي بالكب حتى اغلب الشتوي والجاكيتات الي ياخذون مساحه وديتهم عند امي

انشالله سالفه الهدوم احلها والكتب والاوراق احط ارفف من ايكيا ولا؟

 

[كرستال 2008]

شوفي ملابسج مره ثانيه مااعتقد انج تحتاجينهم كلهم .. اذا عندج قطعة مرة عليها سنه ما انلبست احذفيها بدون تردد
شللي يكود الملابس عندنا الا هالشي( جايز البسه وجايز احتاجه) وترددين وآخر شي ماتحذفيه وينترس الكبت

 

[كويتيه بالرياض]

اب اب اب

 

[zoozoo]

نفس المشكلة

 

[سمرة كويتية]

عندي لج اقتراح

ليش ما تسوين لج دار مخصوصة وتحطين فيها كذا كبت .. ؟؟؟؟

 

[hatoona]

انا رايي تشترين مكتب عنونو مو عود وايد وتثبتين فوقه رفين من ايكيا ترصين عليهم كتبج ودثرة الدراسه وبالنسبه للهدوم عندج الشوفنيره حطي فيها ملابسج الداخليه والملابس الخفيفه وجذي كبتج راح يتنفس ويصير في مجال لان احنا البنات لويتنا وايده ولازم اشياء مساعده للاثاث ولون اثاثج متوفر بكل محلات الاثاث فلا تحتارين

 

[كيوت_25]

وااااااااااااااااااااااااااااي

ما اعتقد كثر دثرتي

انا لويتي شي موووو طبيعي

و يا اختج على كثر ما اقطط بهالخلاجين والاوراق على كثر ما تزيد :eh_s(1): جنهم يتكاثرون !!!

تصدقين بدال الكبت شريت اثنين

و يبت نجار زادلي فيهم ارفف

و بدال الشوفنيره شريت 2 و كل وحده منهم فيها 5 ادراج كبار

و حطيت داخلهم علب ايكيا الصغار عشان تفصل الاغراض و يكونون مرتبين


<<<<<<<< طل بعيني مرتبين :tomato2:

و كوميدينتي فيها يرارتين

و تسريحتي 4 يرارات

و حاطه فوق التسريحه الكبتات الصغار عشان ترتيب الميك اب و التناتيف الصغار

2 بلاستيك و 2 زجاج


و مع كل هذا اللويه مالها والي

و الكبت بينبط

والادراج مفتحه جنها حلج خبله

و الحوسه حوسه

و الصوفا الي بداري صايره جنها جبل أحد من الهدوم و الاوراق الي فوقها


اووووووف لاعت جبدي


ودي اغمض افتح ألقى كل يراراتي فاااااااااااااضيه



سوري ادري قرقتج بس شسوي ضغطتي على الوتر الحساس :0bee2e8d89:

 

[Doodoo.star]

انت مبين محتفضة بهدومج الكبيرة عليج قطيهم
يعني وديهم صدقة للجنة احسن
وشوفي الي راحة موضتة
والقديم
وملبوس وايد ونشاف من الكل
والذايب
قطيهم
والي ماتلبسينة كلش
قطيه

 

[دلوله_العسوله]

سوي مثلي انا عندي مخزن بسرداب اخاف اقط شي واحتاجه بعدين كتب قديمه مجلات ملابس مادري شلون صايره وايرات مادري شلزمتهم او حق اي جهاز اخمطهم خمط وحذفهم بكرتون ونزلهم بسردااب وأذا تذكرت اني محتاجه شي قديم انزل السرداب وحوس بقشي والله العظيم عندي نفانيف صارلهم اكثر من 10 سنين الي يكون بالصدر نفس قلب الحب والجموم كبااار مدورين ومن تحت كشكش كشكش كشكش ومن ورا حزااام فيونكه امبيه مادري شلون كنت البسه .....ولا النفنوف الثاني ستاااااان وفيه فتحه لي الركبه كل ماحوس بغراضي واشوفهم اموت من الظحك شكلي بلبسهم بناتي اذا تزوجت مو يقولون الموضه كلمالها وتررجع قري

 

[وبعديين]

قطي الباهت والمحبب
وجمعي كل الملابس اللى
ماتبينهم في جناط قديمه
ودقي على جمعية البرياخذونهم
والكتب حطي لها ارفف
والجزم
حطيها في كبت صغيرعند باب الغرفه
وحطي فوقه تحف واشيا حلوه

 

[عاشقة الكاكاو]

والله انا كنت نفسج

حطيت غرفة خاصه حق الملابس وصرت كل شهرين او 3 اشهر اسوي تصفيه حق ملابسي القديمه

 

[أم ناصر البحرين]

شوفي ملابسج مره ثانيه مااعتقد انج تحتاجينهم كلهم .. اذا عندج قطعة مرة عليها سنه ما انلبست احذفيها بدون تردد
شللي يكود الملابس عندنا الا هالشي( جايز البسه وجايز احتاجه) وترددين وآخر شي ماتحذفيه وينترس الكبت

هذي الفكرة هي عين الصواب، ومرة في برنامج أوبرا كانت حلقاتها عن سوء التنظيم والتكديس، والخبيرة اللي استضافتها قالت نفس هالكلام بالضبط، بدون لا تردددددين ولا تفكرين ولا ثانية، تخلصي من الملابس اللي مرت سنة وما لبستيهم، وصدقيني ولا بيجون على بالج بعدها، بتنسينهم :eh_s(6):​

 

[شكليطه]

حبيبتي انتي لازم تكونين حدددددددددج حددددددددددج جاده ومعزمه على الترتيب وخلي قلبج قوي ههههههه

انا قبل كنت احتفظ بملابسي واحس انهم يعزون علي وماقدر اقطهم...حتى وصلت لي درجه والله والله ايدي تعورني لما ادور قطعه بين الملابس
ماااا اقدر احركهم مضغوووووووطين من كثرهم


قمت وقلت خلالالالالالالالالالالاص

شفت في ملابس من زمان مو لابستهم بس متحسفه اقطهم......انزين والحل؟

مسكت القطعه وقلت بيني وبين نفسي ممكن ألبسها الحين لو بطلع؟

اكتشفت الجواب: لأ

اذن|: بااااااااااي بااااااي قطعتي الحبيبه مع خالص الود

واقط واقط

بس للامانه اللي قطيتهم طلعت عالاقل نص قيمتهم....وماقطيتهم فسق وتبذير لا حشا


والحمدلله اررررررتحت......قمت عقبها اخذ لي جم قطعه واكررررررفهم وبعدين اقطهم وألقى الكبت فيه مجال حق هدوم يديده

والله ارتحت عقب ماسويت هالطريقه


وطبعا غير هدوم المواسم.....يعني الشتوي عقب ما اتأكد من نظافته اصفطه واحطه بجناط او اعلقهم كذا بدله واجيسهم بجيس المصبغه الخفيف وفوقه الجيس الخام مال البدلات الغاليه......وبعدين احطه بالرف على طولهم.....يعني جني فارشتهم.....والله وفروا علي مكان وايد
وقدرت احط اكثر من 30 بدله برف واحد والله يعافيه هالطريقه السهله


وشي ثاني اذا على سالفه الهدوم اللي كبار عليج وانتي ضعفتي ومتحسفه عليهم
لا حبيبتي ..قطيهم ولاتخشين شي الا قطعه او ثنتين للذكرى هههههه

اصلا لما تضعفين مالج خلق تلبسين شي قديم ويذكرج بالماضي...ودج كل شي يديد


وان شاءالله اكون افدتج

 

[SwaaRii]

انا نفس حالتج لوول :/ الله يعين بس