بنات شنو اليلوه انا حدي متوهقه مادري شسوي

[عـ نوفمبر ـروس]

السلام عليكم

شلونكم بنات


بنات شنو اليلوه وشسالفتها بعد عن جد انا ضايعه

توهم حمولتي داقين علينا وقالولنا انهم راح يسولي يلوه بصاله افراح قبل العرس بليله

بنات انا ماعرف شي عن اليلوه ولا شي ولا عمري شفت احد سواها

بنات ساعدوني شسوي

قالولي لازم تلبسين اخظر ؟؟
وابي اعرف راح يدخل المعرس ولا لا ؟؟

بنات ابي التفاصيل بالضبط تكفون


وامانه ادعولي

 

[عـ نوفمبر ـروس]

بنات يعني لازم البس جذي

لا وع مو حلووو


وانا مابي انغش ايدي احس انها موضه قديمه وع

 

[انا الغلا]

لا فديتج المعرس بهاليوم مايدخل وهي ليله الحنا في ناس يسونها قبل العرس بيوم وفي ناس يسونها ليله العرس

 

[انا الغلا]

اي تلبسين نفس اللي بالصوره او بالتصميم اللي تحبينه المهم يكون لونه اخضر وفيه ذهبي
وتلبسين ذهب

اي وتذكرت خلي مكياجج يكون حددددددددددده ناااااااااعم وخفيف بهاليوم

 

[عـ نوفمبر ـروس]

مشكوووره حبيبتي

بس شلون انا راح يصير بليل

يعني متى ادخل الصاله

وراح اطول ولا لا

وفي اغاني ولالا


تكفوووون ابي بالتفاصيل الممله

 

[خاتم الماس]

حبوبة الجلوة هي ليلة الحنا تلبسين اخضر او احمررر سوي الموديل اللي يعجبج بس بستايل القديم ممكن تسوين اليد قصيره بحاول احط لج صورة تقريبيه وتدخلين القاعه الساعه 8 وتكونين متحنيه وخالصه في اغاني بعدين تقعدين على كرسي في الوسط ودار مادارج الناس ويجيبون الشيله اللي عليج تكون كبيرة او انتي تشوينها كبيرة ويودونها بنات ويهفون عليج تراااااا ونااااسه ويغنون امينه في امانيها ومادري عقب ماعرف تكملة الاغنيه خخخخخخخخ بس وناسه وحاولي تكوونين ناعمه لاتحطين ميكب وايد عشان يوم العرس يكون في تغيررر بشكلج وتكونين مميزة سووي تنورة وقميص ستايل طبعا هندي مع شااال وذهب نفس الهلال على الشعر ينحط ومرتعشه يعني شغلات قديمه بس صج ليلة الحنا احلى من العرس لانها محدوده اتمنى اني وصلت لج شي بحاول ادور لج صورة حق ليلة الحنا نموذج الستايل شلون

 

[خاتم الماس]

هاي بعض الصور ان شالله تطلع ماعرف انزل عدل اخربط خخخخ بس ان شالله تطلع

 

[عـ نوفمبر ـروس]

فديت قلبج


حبيبتي طمنتيني الله يعطيج الف عافيه


الله يسهلها


بس مادري ليش ماعجبتني الفكره

 

[خاتم الماس]

ان شالله يعجبونج

 

[a7la_7b]

لازم تلبسين أخضر وهامه وذهب وينقشون لج حنه
وناسه امي تقولي خليني أسويلج قبل العرس بيوم أنا قلت لا لأنه راح يكون تعب علي
الله يهنيج حبيبتي

 

[حبيبت عزوز]

مثل ماقالو لك البنات موفقه خيتوو..

 

[جود الجوري]

بالاول موفقةةةةةةةةةةةةةةةةة انشالله وربي يهنييج ويسعدج
اليلوة الحين يلبسون بدلة عرس حلوة على ستايل فخامة يعني لونها اخضر ومشغولة بالذهبي نفس ستايل بدل السهره اللي نفشة او موديل السمكه اللي تحت الركبة نفشة
ولبسي طقم ذهب اصفر
وهامة ذهب ونقشي ايدج بالحنة بنقشة ناعمة وميك اب نااااعم والحمرة حمرة او مشمشي
ودشي الصالة ع الساعه 8.30 مثلا
وبالتووووووووووفيق

 

[زبوطة]

جوفي حبيبتي حظج وايد زين ان اهل زوجج من نفسهم بيسوون لج العادة يا اهل العروس يطلبون او اهل العروس يسسون حق بنتهم
هاذي الليلة عاد عجيبة مو لازم تلبسين شعبي اذا مو حابة في شغلات وايد في السوق ستايل واغلب البنات في البحرين يلبسون لبس شعبي او هندي ومرة رحت جلوة العروس لابسة فستان زفاف اخضر حلو بس الناس اذواق جوفي اللي يعجبج

تحني وخلج جاهزة ال 8 ونص 9 عشان تبتدي الجلوة
وامينة في امانيها مليحة في معانيها الله الله تجلت وانجلت حقا سألت الله يهينيها الله الله

واحنه في البحرين عندنا جلوة بحارنة وايد حلوة وتنقز الحين هابين فيها بناتنا ساعات الوحدة تسوي هالجلوة وتسافر ماتسوي عرس
ويقولون فيها
افضل الصلاة والسلام عليك يا حبيب الله محمد ((طبعا مع الردحة والطبول))
تالي تقول موال وتسأل البنات اللي حواليها
العروسة سمرة يردون عليها لالالا لالالا لالالا لالالا
العروسة حمرة يردون عليها لالالا لالالا لالالا لالالا
العروسة بيضة يردون عليها ايييييييييييه
و ترجع تردح افضل الصلاة والسلام عليك يا حبيب الله محمد
نورة رفاعية يردون عليها لالالا لالالا لالالا لالالا
نورة منامية يردون عليها لالالا لالالا لالالا لالالا
نورة حدية يردون عليها لالالا لالالا لالالا لالالا
نورة محرقية يردون عليها اييييييييه
و ترجع تردح افضل الصلاة والسلام عليك يا حبيب الله محمد

 

[روحي تفداكـ]

عليييييييييييييج بالعافيه ><


عقبال ماأسوي لي جلوه انا بعد


الصراحه حلو هاليوم .. يبيلي اقترح على حبي يسوي لي

 

[روحي تفداكـ]

عليييييييييييييج بالعافيه ><


عقبال ماأسوي لي جلوه انا بعد


الصراحه حلو هاليوم .. يبيلي اقترح على حبي يسوي لي

 

[Nafnooofa]

اهم شي بهاليوم انج تلبسين اخضر مع ذهب .. رفيجتي كانت شايفه بدلات عند زياد انطوان لونهم اخضر روحي شوفي او اجري منه .. وانا شايفه بدلات لونهم اخضر عند ام خالد الفوزان اللي بغرب مشرف هم اتأجر .. وانا رفجيتي سوّت يلوه ومادشت واهيا تمشي .. حاطينها بصندوق كبيييييير فيه عواميد وحاطين فوقه الشرشف الاخضر اللي يمسكونه البنات فوق راسها .. بشرح ثاني كانو شايلينا فليبينيات ملوت السيرفس بصندوق مثل الهودج اللي يحطونه فوق البعير الللي يقعدون داخله الحريم عرفتيه بس اهوه مفتوح على الاجناب عشان لما تدخل الصاله الحريم يقدرون يشوفونها ,, وحطوها بنص الصاله وعقب تيمعو عليها البنات وسولها امينه في امانيها .. وعادي اهيا دشت 9 جنه بس انتي اذا عرسج عقب يوم سويه مبجر عال8 او 8 ونص عشان يمديج ترتاحين عقبها وتردين البيت وتقدرين تخلين شعرج مفلول وتحطين هامه فوق راسج .. او تسوين تسريحه .. بس انا افضل انج تفلينه وتحطين هامه او اي اكسسوار تبينه لان عقب يوم عرسج وبتسوين تسريحه فخلي شكلج غييير وترى مو شرط موديله على دراعه انا شفت وايد بنات منفووش او موديل الحوريه اللي من فوق ضيييج ومن تحت منفوووش .. اذا كان نفنوف عرسج منفوش اخذي نفنوف اليلوه ضيج .. اما اذا كان نفنوف العرس ضيج اخذي منفوش نفنوف اليلوه .. وتدشين اتوقع على اغنية هب السعد لان الموضووع كلاسييييك ... والله يوفقج ويهنيج وانشالله قدرت افيدج

 

[Athwaq]

بالعكس وناسه اليلوه و حيل مؤثرة .. البنات ماقصروا بالشرح والتوضيح

اذا تبين لبس اليلوة انا عندي واحد عارضته للبيع يايبته من البحرين .. روووعه

 

[نيو سيدنى]

البنات ماقصروا

موفقة حبيبتى