بنات جامعة الكويت بلييييييييييز هيلب مي؟

[فراولة خضرا]

بناااااااااااااااااااااات مثل مانتوا عارفين السحب والاضافه مابقى عليه شي
وانا باخذ ماده "مقدمه في الادب" ومحتاره بالدكاتره ياليت بنات تفيدزني من ناحية الشرح وكل شي بالتفصيل


الدكاتره
- خالد الجنفاوي
- ايمان القلاف
- لميس البستان
- يسر مدني
بليييييييييييييييييييييييييييز بناااااااااات لازم اجيب درجه عاليه بهالماده عشان اتخصص انقلش :0bee2e8d89:
وابي دكتوووووور زين بالدرجات اذا تعرفون غير اللي ذكرتهم قولولي

 

[نور وضي القمر]

رفع رفع

 

[فراولة خضرا]

نووووووووووووور
ثااااااااااااااانكس عالرفع

 

[Strawberry Shortcake]

والله ما اعرف اتمنى من البنات ان يفيدونج
up

 

[الفراشه الورديه]

مااعرفهم

 

[Amano]

شنو خالد الجنفاوي منزل حق الكورس الأول مقدمة في الأدب ؟؟!؟! أنا سجلتها عند ابتهال الخطيب لأن ما لقيت غيرها !
بس لو خالد الجنفاوي منزل سجلي عنده أحسن شيء .. و لميس البستان بعد زينه

 

[فراولة خضرا]

ثانكس حبايبي
امانو مادري اذا منزل او لا

انا بس بشوف احسن دكتور عشان اذا منزل اسجل عنده ..
طيب ليش خالد الجنفاوي احسن شي مجربته؟
واذا تعرفين طريقته بالشرح والدرجات فيدينا
وشكرا

 

[Kadin Cligin]

لميس البستآن أحسن وحده


يسر مدني انحآآآشي منهاآآ

 

[KaToMa]

دكتور خالد بس منزل حق شباب
انا ماخذه عند ابتهال لان وايد مدحوها ويسر قالولي شوي شديده ولميس الي سمعته ان زينه بس مادري

 

[نور اهلها]

بعطيج موقع حق تقيم الدكاتره سجلي فيه وان شاء الله تستفيدين


http://www.kuniv.net/

بس يبلج وقت على ما ايفعلونج فبقتبسلج آراء الطلبه لاني مو بالأداب

د- ايمان

1- اللي يعرف هالدكتورة عن قرب عمره ماراح يندم انه اخذ عندها مقرر في الجامعة
في الكلاس تكون شديدة على التحضير والمشاركة والحضور وتحب تشوف الطالب او الطالبة يايين مستعدين للمحاضرة مو مايدرون وين الله قاطهم .. وخلال المناقشة اللي تصير في الكلاس تضيف معلومات وتشرح اشياء غير واضحة
قمة الاخلاق اذا عرفت ان اللي جدامها محترم وخلوق وطالب مجتهد .. دايما تشجع وبالنسبة لي حببتني بالادب .. بكل بساطة عن طريق تشجيعها لي للقراءة ... لان قبل كنت اعتمد على الدكتور في الشرح اما في محاضراتها .. نعتبر جنه احنا اللي قاعدين نشرح الدرس وهي تكون عون لنا ..
باختصار عند الدكتورة ايمان
تحضير+مشاركة+حضور+دراسة للامتحان= امتياز مع درجة الشرف


2- الدكتور ايمان وايد حبوبه.. اسلوبها راقي..
انسانيه وايد.. يعني حلو التعامل وياها

خذيت عندها مادتين.. اسلوب شرحها يعتمد تماما على النقاش بين الطلبه.. وطبعا اهيا تشارك وترسم الاشياء الاساسيه..
متساهله الى حد ما.. وتعطي وايد فرص للتعويض..
من بريزنتشنات.. الى ريسبونسات.. و الفورم

بس عيبها انها تعتمد عليك وايد في البحث عن المعلومه.. يعني ما تعطيك اياها جاهزه..
تدخل الامتحان متوقع كل شي.. بس عاده امتحاناتها سهله ومناسبه



3- الدكتورة زينة و شينة اذا كان في احد يبي يتاسس خل ياخذ عنها لأنها علمتنا شلون نكتب critical response in MLA )style) و انا صراحة كنت ضعيفة في كتابة المقال و استفت منها واايد
اما طريقتا في الشرح فكانت تخلينا نقرا و تسالنا شنو فهمنا بعد اهيا تزيد على معلوماتنا و عندها فورم (منتدى) نشارك فيه و نزد معلومات على الي خذيناه و عليه درجات بس مو وايد بس 5
كل وحده سوت برزنتيشن على المواضيع الي ناخذه و كان عليه 5
و احلى شي انها كانت تعطينا مهلومات ثقافية و اجتماعية عن كل شي ناخذه و هذي المعلومات صعبة تلقاها يعني مثقفة و ما تنوم
كل الشغل الي سوناه كنا نحطا في فلاش ميموري( المقالات,بريزنتيشن,الي كتبناه في الفوورم)
اما امتحاناتها كانت زينة المشكله كانت في المدتيرم كان مستواه صعب لانا ما كنا نعرف طريقة الاسئلة بس الفاينل كان صدمه!! كان حده سهل وااايد بنات الي زفتوا من قبل في المدتيرم و ما شاركوا في الفورم و مقالاتهم نص نص يابو B_ وانا منهم بس صارت لي ظروف في الفاينل و ما قدمت زين و كان مجموعي C و لكن عطتنا كيرف و صرت B- و منو قالي ما تعطي كيرف!!
انا صراحه ما كنت ابي اخذ عندها لاني سمعت كلام مو شي عنها مثل انها ما تعطي درجات و ما ترفع الخ...
بس كنت مضطرة اخذ عندها لان شعبتها الشعبة الوحيدة الي كانت مفتوحه و ما كان لي خاق اروح حق باي فورس
و خذيت عنها و الحمدالله على كل شي


4- الدكتورة إيمان محترمة جدا و راقية في تعاملها ،طبيعة محاضراتها إنها تعتمد في الشرح على الطلبة ومع أن هذا الأسلوب مفيد في تطوير مهارة التحدث ولكنه ذو أثر سلبي جدا من ناحية الامتحانات،لأن كمية المعلومات التي تطرح في المحاضرة كبيرة جدا و هي غير موجودة في الكتاب،و بالتالي من الصعب استيعابها كلها وحفظها وهذا يؤثر طبعا على الدرجة النهائية.


المختصر المفيد- معظم الطلبة يقولون
5/3.4 >> هذا تقيمه
ان مستوى الاختبارات صعب
وشرح المدرس شرح متوسط
والأغلبية حصلو على تقدير C
بإختصار ننصح به


​

 

[نور اهلها]

د- خالد
1- أروع دكتور مر علي ، شي خيااااااااااال مو طبيعي
ودي أعيد المادة عشان ادرسها عنده
مبسط المادة لأبعد الحدود بعكس بقية الدكاترة اللي يدرسون هالمادة ، مافي إلا خمس كوزات طول الكورس وكلهم صح و خطأ أو اختياري
و في شغل باوربوينت بس مو برزنتيشن عليه 10 درجات
و فيه اخر الكورس تقرير واحد بس
عجيييييييب هالدكتور أنصحكم فيه

2- خووووووووووووش دكتور وانصحكم فيه بقوه !!

دكتور طيب وحبوب ومتسامح ويساعدك تاخذ اعلى قريد ممكن انك توصله !
للأمانه انا اخذت D لأني ماعطيته الجورنالز وكان عليها 10 درجات @.@
اذا تبون الــA عليكم بالآتي !

- خلوه يحفظ اساميكم
- شاركو بالصف غثووووه لأنه يسجل اسامي الطلبه الي يشاركون ويعطيهم درجات
- سوو الأساينمنت بنفسكم اخذو فكر من النت لكن اكتبو باسلوبكم وعلى فهمكم وتاخذون درجه
- امتحاناته سهله لكن ركزو معاه بالشرح
- اهم شي عطوه الــjournals لأنها اهم شي عليها 10 درجااااات لا تستهينون فيها نفسي

وتضمنون الــA بأذنه تعالى
موفقين واخذو عنده من غير تردد

مشكوووووور يا دكتور :*


المختصر المفيد- معظم الطلبة يقولون
5/5
ان مستوى الاختبارات سهل
وشرح المدرس شرح جيد جدا
والأغلبية حصلو على تقدير B
بإختصار ننصح به

 

[نور اهلها]

د- لميس

1- دكتووووووووره ولا اروع
ماشالله عليها اخلاق وفصاحه .. وكل شي
تعاملكم مثل رفيجاتها .. مرحه وقلبها ابيض
شرحها مرتب ومنظم ..
كوزاتها حدددده سهلين تسويلكم كويز مفاجئ بالدرس اللي خذيتوه قبل .. يعني يبيلكم تراجعون كل شي بيومه
وو .. الميد تيرم هم سهل .. اهيا تراجعلكم كل شي بوقته
بس راجعو شاركو معاها .. وكل شي اوكي
انا عن نفسي اللي خلاني اخذ a عندها اهوا الكوزات اللي تعطينا اياهم كل يوم .. غير الريدر رسبونس .. وهم حضروو وجذي تييبون a
thx dr lamees
انشالله اخذ عندها مواد الكورس الياي ..


2- بصراحة الدكتورة قمة في الروعة..حبوبة وطيوبة و خبيرة في التعامل مع الطلبة..ساعات ننسى انها دكتورة ونتعامل معاها كصديقة لأنها سلسة وبسيطة لأقصى الحدود..لو كل الدكاترة مثلها جان صارت الجامعة جنة..نجوم الدنيا كلها ما توفيها حقها..الله يكثر من أمثالها..

3- اهي الدكتورة زينه وتعطي بونصات بالهبل
سريعة بالشرح ما تعرف انت وين
الاسئلة بالامتحان وايد ودقيقة يعني لازم تقرا التاريخ كله حتي إللي ماذكرته

المختصر المفيد- معظم الطلبة يقولون
5/4.2
ان مستوى الاختبارات سهل
وشرح المدرس شرح جيد جدا
والأغلبية حصلو على تقدير b
بإختصار ننصح به

 

[نور اهلها]

د- يسر

1- بصراحة انا ولا مرة ندمت كثر ماندمت لاني اخذت عندها,,

تصلح حق الانجلش سكول واللي عايشين بأمريكا بس!!

عصبية وتحقد على السيكشن كله بسبب بنت وحدة عاادي..!!

2- الدكتورة الفاضلة يسر من ناحية التعامل والأسلوب:راقية ومحترمة جداً وتقدّر الطلبة المجتهدين وتشجعهم,وتستخدم أحدث الأساليب في توصيل المعلومة,عفوية وطيبة


من ناحية الإختبارات والواجبات المنزلية:إختبارين Midterm
الدكتورة تقوم بوضع الأسئلة المهمة وتوزعها على الطلبة,90% منها تأتي في الإختبارات

الإختبارات غالباً تكون عبارة عن أسئلة إختيارية (ذات الأسئلة الموجودة بالأوراق)

أما بالنسبة للأسئلة الأخرى ,فهي تتمثل بتحليل إحدى القصص القصيرة(الدكتورة تشرحها بالكامل مع الأجوبة ماعليكم غير الحفظ والفهم)

بشكل عام ,الأسئلة من الأوراق التي تقوم بتوزيعها الدكتورة,والباقي من المحاضرة (نسبة قليلة)

هناك موقع لقسم اللغة الإنجليزية تضع فيه الدكتورة ملخص لجميع الدروس وهو مهم جداً

بالنسبة لإختبار الفاينل:لايوجد به أي سؤال إختياري ,مع هذا سهل وبسيط جداً,لمن استوعب الدروس,عبارة عن بضعة أسئلة فقط


الواجبات المنزلية بسيطة وسهلة جداً ومفيدة كذلك(مهمة جداً)



لضمان الدرجة الكاملة ببساطة شديدة,عليكم الدراسة بإجتهاد والتركيز على الأسئلة التي تقوم الدكتورة بتوزيعها,التركيز بالمحاضرة,المداومة على الحضور,تقديم برزنتيشن جيد



إستفدت بشكل كبير من المقرر,شاكر للدكتورة القديرة جهودها,الله الموفق

3- بصراحة الدكتورة مافيها زود وأستغرب من اللي مدحوها !!

صح انها تعطي بونص .. وشرحها حلو وسلس ..بس فعلاً خلتني أغير فكرتي في التخصص في الأدب الانجليزي والسبة مادتها الثقيلة جداً .. بس للأمانة الاختبارات كانت سهلة نوعاً ما .. بس المقالي كان شي مو طبيعي .. اتييب أسئلة من بين السطور !!

ما تراعي أبداً .. ووايد تسولف عن نفسها .. وتمدح روحها .. يعني بصراحة احنا بصرح أكاديمي
هذا غيض من فيض .. ولكم الحكم !

4- كلمة حق بقولها بهالدكتورة
بصراحه اول مااخذت عندها لاعت جبدي حسيتها مملله
وكانت عالقه بمخي تعليقات البنات عنها فكنت ماتقبلها
بس والله بعدين طلعت خوش دكتوره ومحتــرمه حيــل
واللي حبببني فيها البونص اللي بالامتحانات تعطي بونص بالهبل غير البرزنتيشن والبروجكت اللي عليه اضافي
صراحه ساعدتني حيل
الله يطول بعمرها ويوفقها ان شاءالله ..



المختصر المفيد- معظم الطلبة يقولون
5/3.4
ان مستوى الاختبارات متوسط الصعوبة
وشرح المدرس شرح جيد جدا
والأغلبية حصلو على تقدير C
بإختصار ننصح به


سامحيني على الطواله وان شاء الله اكون فدتج واذا حابه تقرين بعد التعليقات دشي على السايت
موفقه ان شاء الله حبيبتي

 

[فراولة خضرا]

مشكوووووووووورين بناااااااااااااااااااات
ومشكوووووووره نور اهلها ماقصرتي يالغلا

 

[نور اهلها]

العفو انا برسم الخدمه