بنات انا بامريكا و ودي ارد معاي بضاعه شنو تقترحون علي ؟؟؟

[Bnt-USA]

السلام عليكم

مثل ما قريتو بالعنوان

ابي بضاعه ما تكلف علي وزن وموموجوده بالكويت ،، وغريبة

وسهله اصرفها :eh_s(9):​

 

[д7βk βşķάť]

جيبي شي ماقل وزنه يعني شي مايكلف عليج شي واجد​

يعني جيبي شي خفيف لاكنه شي ذرب ومرتب ​

مثلا يبي اشياء حلوه وغريب للبيبي حركات وسوالف عربنات بيبي اشكالها غريبه نفانيف للصغار ​

علاقه المصاصه بس تكفين موتيبين هاذي الي كانها فلم رعب الي مطلعين ضروسهم ويع موحلوين يبي شي حلو ذرب ​

يبي شي حلوو ينفع حق رمضان والعيد شالات غريبه او بدل وتكون فري سايز عشان ترتاحين يبي حمر ماركات موموجوده بالخليج يبي شي حلو حق المطبخ سوا كان قفاش او مواعين ​

يبي اقلاصات حلوه وشكلها ذرب ​

يبي شباصات حق البنات الصغار شكلهم حلو ويونس ​

بس هذا الي عندي انشاءالله فدتج لو بشي بسيط ​

وصدقيني لو نويتي تيبين بضاعه ويبتيها بنيه صادقه وبدون غش ع الناس ربي بيسهل عليج بيعتها وبيسخرلج خلقه وبرزقج من حيث لاتعلمين ليش لانج وكلتي ربج اولا وثانين نيتج كانت صافيه ​

لاتسوين نفس بعض البنات الله يهداهم يقصوون ع المسكينات الي مايقدرون يسافرون ​

ويدوبلون السعر بشكل مبالغ اهم عارفين واحنا عارفين انهم يجيبونها برخيص لاكن يدوبلون السعر عشان تطلع فايدتها وزود ​

اهو موحسد لا والله بس حرام الاستغلال مايجوز انج تستغلين الناس عشان هم محتاجين هاشي ​

انا ادعم التاجره الكويتيه واحب ازيدها مانقصها لانها اختي وبنت ديرتي
يعني مثل ماحب لنفسي بحبلها بس بعيد عن هالامور يعني لانخلي وصخ هادنيا هي اكبر همنا ​

من الي شفته بانستقرام والاسعار غاليه ع شي مايسو قلت ليش ما اروح بنفسي ويب حاجتي ارخصلي ​

كل شي حلو بالقناعه لو الانسان ماقنعه شي القليل مستحيل يقنه الشي الكثير وسلامتج ​

 

[Mrs.H]

بامريكا موجود كونسيلر نيتروجينا وفاونديشن نيتروجينا بالكويت مافي
واعتقد نفس الشي بالنسبة لاولاي عندهم ميك اب


وبالنسبة للبيبيات عندهم نفس مصاصة تقيس حرارة البيبي و وحدة ثانية حق الدوا .. ثنتينهم ينباعون مع بعض

وملابس اليهال في التيشيرتات اللي لازقين بالتبانات حلوين

 

[<miss botamba>]

ميك اب وشغلات تجميل ( كريمات - لوشنات - شغلات لشعر .. الخ)

ملابس اطفال (مواليد )

استكرزات الطوفه و الدرايش

استكرزات اللاب توبات

اكسسوارات ماركات امريكيه

قمصان نوم او ارواب

عطور تكون مو موجوده بالخليج بس اخذي مثلا بس 3 حبات علشان ما تتوهقين


شغلات تكون خاصه لـ ديبارتمنت ستور معين مثلا ساكس او بلومنغ ديلز او نوردستروم و كلهم الحين عندهم خصومات حلوه

 

[<miss botamba>]

هالعطر وايد حلو ومو موجود بالكويت

تلاقينه في نوردستروم

وفي منه هذا بس مو شامه ريحته

 

[جذابه بنت ذيابه]

ميك اب

شغلات للجهال ملابس

جناط شالات للشتا

 

[اللّہ معي ، ♡]

امممم ودي اساعدج بشيء يفيدج

مثلا مجوهرات او كفرات ايفون غريبه حقتهم اللي على اشكال دباديب حبيتها ومب موجوه عندنا
انا شاريتها من هناك

فساتين بنوتان من سنه ل ٥ سنين
اشياء مميزه
مثلا كلاتشات ماركات

كفرات ايباد
ملابس اطفال

 

[Bnt-USA]

مشكورين بنات علىى الردود و سامحوني طولت بالرد نسيت الموضوع


صح كلامج اختي


انا كرهت اشتري من تاجرات الكويت بسبة الغش اللي اشكرا

يشترون الخام ب دينار بو طقه و يبيعون القطعه ب ثمانين و وفوق


التجاره يبيلها ضمير و حب للناس مشكورين ع الافكار

 

[Mrs.H]

بس نصيحة المكياج اخذي الاشياء العجيييبة

يعني ماركة هارد كاندي.. عندهم لمعة الغلو لونين وعندهم كونسيلر معرووف وعندهم غلوس

وفي ماركات مثل ذا بالم عندهم لمعة حلوة

والايلاينرات الغليتر والملونين حييل هبة الحين واخذي الالوان اللي تمشي تيفاني ازرق ذهبي سيلفر

في غلوسات ليب تار او كرايم لايم اعتقد بس مادري اذا امريكية او اوروبية بس هابين قيهم

اذا لقيتي كحل قلم ملون والوانهم ثابتة وقوية واسعارهم رخيصة اخذيهم

مسكرا ملونة بعد.. اضاءات ولمعات

واختاري ماركات رخيصة لاتاخذين من الغالي

 

[91 hellokitty]

السلام عليكم
حبيبتي يبي ترينقات ومكياج وعطور فرش مكياج بيجامات كريمات
اتوقع هذول اللي يمشون بس لاتيبين كميات كبيره جربي اول
وان شاء الله تربحين حبيبي.