بنات استفسار عن شحن الطيارة .. ماليزيا

[C O L O R Z]

حبيباتي السلام عليكم

بسألكم بنات .. اذا بطير من سيلانجور الى بيننج
قالولي ان راح يكون الشحن بالطيران الداخلي حيل دقيق
ويحاسبون على كل شي فيطلع علينا مبلغ

عموما .. في ناس انصحوني ان اخلي الفندق في اول وصولي اهو نفسه الي ارجع منه اخر الايام
فاخذ معاي بيننج ولنجاوي فقط الملابس الي احتاجها
القصد اخلي اغراضي بامانات الفندق واخذ جنطة بخمسة كيلو فقط

بس المشكلة ان هذا مايحصلي
وصولنا يكون السكن بصن وي لاجون
وعقب الجزر يكون السكن بكوالالمبور

محتارة .. الخبيرات عطوني شور .. وتسلمون

 

[كوكا كولا]

انا جذي سويت سكنت اول شي في كوالالمبور ولما رحت جزيره لنكاوي خليت الجناط بامانات الفندق وخذينا جنطتين صغار وردينا عقبها لنفس الفندق وايد اريح هالحركه

 

[mafio98]

ليش كل هذا !!! الطيران الداخلي اذا كان اير اسيا مسموح لج تشتري وزن لي 40 كيلو او اكثر وسعره رخييييييص ال 30 كيلو ب6 دنانير ريحي نفسج وشتري كيلوات مع التذكره علاقل تامنين على اغراضج معاج

 

[أحلى همبه كويتية]

انا بقولكم تجربتي بأخر سفرة
حجزنا على طيران اسيا
والتذكرة العادية تسمح ب 20 كيلو بس
واحنا عددنا كبير ما شاء الله عايلة وجناطنا كثيرة ​

وكل وحدة وزنها يمكن 30 كيلو ​

وحجزنا الطيران من مطار كوالالمبور اول ما وصلنا
واللي حجزنا منهم قالت لااااااااااااااا تاخذون زيادة كيلوات على التذكرة عشان تمر جناطنا كلها
لأن لازم تدفعين زيادة ​

وطعناها ​

ولما صارت رحلتنا
توهقنا صار الوزن زيادة وايد
وهم فعلا دقيقيين جدا بالملي ما يطوف لج نص كيلو زيادة ​

دفعنا جزء من الكيلوات زيادة كاش على الكاونتر
والباقي معانا 3 جناط ​

والحمد لله ربي سخر لي من العمال اللي ينظفون في المطار قال فيه شنط صغيرة بمحل بالمطار
مقابل الكاونترات
تعالوا اشتروا
شرينا 6
قيمة الواحدة 17 ريجنت ​

صج تحسفنا انه احنا طعناها اللي احجزت لنا التذاكر وما دفعنا زيادة وشرينا كيلوات زيادة على تذاكرنا​

وتعالي شوفي اشكالنا بنص المطار قاعدين نوزع الأغراض على الشنط الصغيرة
عشان كل وحدة لازم بس 7 كيلو ولا نتفه زيادة
وراح نشيلهم بيدنا ندخل فيهم الطيران ​

وعند البوابة فيه ستاند مخصص تحطين فيه الشنطة اذا صارت نفس القياس
تمرين وتعدين بسلام ​

وااااااااااااااااي اللي يقيس يننااااااااااا والله بغيت اذبحه
كل شوي يوزن الشنطة ويردها عشان تدخل بالستاند ​

وبعد عذاب نص ساعه كأنها دهر
مرينا وركبنا الطيارة ​

ومثل ما قالوا الخوات اللي فوق
اذا بترجعين كوالا روحي الفندق اللي بتسكنين فيه ودفعي حسابك مقدم عشان يضمنون انك راجعه
وتحطي باقي جناطك بالأمانات ويعطونك وصل فيهم ​

انا سويت هالحركة بتايلند وصج مريحة ​

والقرار الأخير لج ​

 

[C O L O R Z]

تسلمولي حبيباتي عالردود
كوكاكولا ونافيو وهمبتنا اللذيذة
اشكركم ويارب ييسرلنا ولكم كل امورنا

همبة خوش درس وصج لي قالو كل طراق بتعلوم ..
احنا كليناها بلندن .. قمنا نفج الجناط ونعزل بهالاغراض عالارض
اشوة مافي كويتيين زود والا جان قصة وي هههههههه
الحمدلله عدت

 

[قوس قزح]

اي بالفعل دقيقين حيل بالملي بس بصراااحه على الخليجيين ولا الاسيوين والله شوف عيني جنطتة اكبر من الستاند ودخله واحنا لعب فينا لعب الماليزي دفعنا فلوس وهم فضينا الجناط