السلام عليكم
شلونج بنات شخباركم
عساكم بخير ,
صارلي فتره اتابع القسم من بعيد عجبني ان اذا انطرح موضوع الكل يتفاعل !
ومو غريبه على كويتيات ..
بنات انا من متابعتي للمواضيع الي اهني حبيت اطرح مشكله تخص رفيجتي ,
وياليت القى تفاعل اكثر من الناس الي جربوا
تقدرون تقولون انها زميله اكثر من انها رفيجه , والصراحه من كثر شكاويها صحيح اني اتحمل واقول عادي , وان اخفف على الناس همومها عشان الناس ترتاح وانا استانس بس هالبنت اوفر !
رفيجتي وحده عايشه ببيت مع اخوانها الي متزوجين وامها مره كبيره كل واحد لاهي مع زوجته وبجناحهم , ابوها متزوج وحده2 وقاعد دوم معاها ..
بالمختصر محد يعطيها ويه بالبيت , ماكو طلعات ولا روحات ولا ييات قاعده بهذا البيت 24 ساعه !
وكله تحن ياليت اتزوج , فحصل مره ان في ناس قالوا نبي وحده وجذي دزيتهم لها , اخوانها ماخلوا عيب بالعالم ماطلعوه بالريال وغيره ...
وتبون الصج هذيل ناس مايعجبهم العجيب ...
يعني انا استغربت الصراحه , هم مو عرب قطريين بس مو عرب ..
لاتقدم لهم واحد اصيل وولد قبايل قالوا لا مانعطي حق ناس قبايل باجر يعاير بنتنه انتي مو اصيله , ولا يالهم واحد ايراني بالعربي الفصيح قالوا لا مانعطيج نخاف ع نستقبلج وهكذاا...
طبعا الحين هي تقول انا متفقه مع امها ان لو يالها حد بتاخذه بدون علمهم فقط بعلم ابوها وامها ..
واهما اصلا محد يعرفهم مالهم معارف وكذا مره اقولها ليش ماتكلمين خطابه تخاف من اهلها ..
اقولها مدام محد يعرفج دقي على الخطابه شنو فيها وجذي , بس انا الصراحه حياتي ماتعاملت بهذا الشي ولاعرفته ,
وبنات انا شخصيا زهقت منها يعني تخيلوا شخص معاكم لمده 24 ساعه يحن ويتشكى وفلان سوالي وعلانه قالت لي ..
فياليت يا بنات الي جربت انها تتعامل مع خطابه او شي تقولي حتى لو تجارب ناس ثانيين مو شرط تقول انا تزوجت من خطابه حتى لو جنها تتكلم عن احد ثاني , لان الصراحه انا تعبت من اني كل يوم اروح الجامعه الصبح واجابل ويها من صباح الله خير لما العصر واهيا تحن زهقت ...
ودي تتزوج وتروح تفك عن ويهي !
لان ماتتخيليون شنو تعبت انا منها كلمتها بكل انواع الطرق بس مايفيد
الله كريم بس
وياليت تفيدوني ,
