بنات ابي اسأل سوأل و اتمنى الاجابه بصراحه :(

[contessa]

قوه بنات شلونكم

بدش على طول بالموضوع
انا عروس صارلي شهر اوكي
و ريلي يحب مطاعم سلايدر و البدع و الدوانيه طبعا شي مقدس عنده !
المهم اول ايام كان يقولي انا رايح المكان الفلاني
الحين يقول غيرت رايي انا اللي علي اقولج رايح الدوانيه و بس
و اذا بطلع من اهناك ف عادي
انتي دقي و سأليني
بس مسألت اني ادق اقولج وصلت الدوانيه
انا رايح المطعم
انا طالع من المطعم مرح اسويها
اما انتي لازم تسوينها لانج مسووله مني و انا رليج بس انتي ما تحكميني و ما استأدن منج
قلتله مو استأن بس عل اقل اعرف وينك
يقول يعني ماكو ثقه عيل ؟
انا اللي علي اقولج انا رايح الدواينه و اللي اسويه اهناك مو لازم تعرفينه بالملي اهم شي ارد الدوانيه
و انا ما اشوف ربعي كل شوي يدقون يسأذنون من حريمهم
انكون احنا قاعدين يقول واحدد شرايكم نروح البدع نقول يله و نطلع ما اشوف وحده شوت نفس الشي
عموما الحريم كلهم ما يحبون هل شي بس راضين بأمر الواقع
انتو شرايكم
وايد احس عنده سوالف اللي انا اللي كلمتي تمشي و انا اللي اسوي و كل شي بيدي
انا كلمته قلتله مايصير احس عقليتك رجعيه
يقول عقليتي حالي حال غيري انتي اللي مخج وايد فري و لا تنسين انا ريلج
يعني قصبن عليج تنستأذنين مني


راسي يعورني والله مادري شلون اتصرف معاه
اهيا مو سالفت ماكو ثقه بس ابي اعرف وين يروح و يرد

هل اللي طلبته غلط؟
ولا وايد فيه ريايل نفسه ؟
بنات مادري شلون اتصرف معاه والله
ومابي اقول حق اهلي باجر بيقولون توهم مالجين قامت تصير مشاكل
حاولت افهمه الموضوع مضايقني بس مو هامه

ردو علي ناطره ردودكم
واللي نفس وضعي تقول واللي كان نفس وضعي و تغير تقول

 

[contessa]

​

 

[سويرة بنت خالد]

وانتي الله يهديج شحقه معورة راسج وياه يروح مكان ما يروح شحقة ذابحة عمرج !!

يعني شنو فايدة معرفتج بتحركاته خليه براحته ولا تخنقينه وحقريه لا تخلينه يستفزج بالكلام الي يقوله .. اخذي على قد عقله وقولي له طبعا انا مسؤلة منك وضروري تعرف تحركاتي من خوفك وحرصك علي . شوي شوي بتنتهي هالمشكلة بس يبي لها صبر وحكمة وحسن تصرف

الله يسخره لج

 

[Mrs Al-Nasser]

عادي
السالفه عاديه حبيبتي

اذا عنده بي بي او ايفون خل يكلمج بالوتس اب مثلا يقول لج ترا انا رايح المكان الفلاني
واذا هم ما يبي اذا شفتيه طول مثلا ساليه وينك

ولما يرد مع السوالف قولي له وين رحت اليوم
مافيها شي لا تكبرين السالفه وانتو توكم متزوجين
​

 

[شقرديـه عالطل]

والله الاغلبيه نفس ريلج وصعبه اتمشين الريال علي كيفج
بس لاتشديييين معاه وااايد عشان ماتتعبين

 

[شموخ احساسي]

ترا عادي اغلب الرجاجيل ما يقولون وين رايحيين ووين جايين وانتي اذا بتعرفين وينه اتصلي عليه او طرشيله مسج عادي لا تكبرين الموضوع

 

[strong faith]

انا مع سويره

انتي ليش بتعرفين اهو وين , الله معاه و الله يحفظه عطيه حريه لا تضغطين عليه

و بالنسبه اهو يعرف انتي وين , هذا حق , و مع الايام بيطخ

نصيحه اخذيها من اخت خليه على راحته وين ما يروح يروح اذا انتي متاكده من أصحابه انهم صالحين بإذن الله

لانه اغلب المشاكل تصير بخصوص هالموضوع بالنسبه لي انا
ومع الايام , ما قمت اسأله اهو يقول لي من غير ما أسال و اذا سالت يقول شنو مو واثقه فيني

و الحمد الله حاليا اروح ما اقوله , بس بداية الزوج طبعا لا وين ما اروح اخذ أذن و مسبقا بعد (( هذي المشاكل احس انها تمر على كل متزوجين حديثا و بذات اذا كانوا كبر بعض بيفرض شخصيته انا المسيطر يعني )) عطيه على قد عقل بيطح و يمل ....لا تركزين على هالموضوع بعدين يكبر و الله يوفقج يارب و يسخرلج ريلج

 

[نونو العصله]

لا تسالنيه وايد
ترا بيمل
خليج على خفيف
اشغلي نفسج عنه
عن نفسي يعلمني بتحركاته اول بول
من نفسه مو انا اساله
للفضفضه
انا صرت اعرف شيسوي
ترا الريال ما يحب الحنه و الرنه
هم يستحون يتحجون مع حريمهم جدام ربعهم
مرات ادق يقولي دقي بعد شوي
او يطلع يكلمني من بره
مو معناها انه يسوي شي غلط

 

[حلوه بكيفي]

انتي قلتي ان صارلكم شهر متزوجين فطبيعي جدا هالشي
اهو يبي يفرض شخصيته ويوريج ان هو الريال
وانتي بعد لا تكبرين الموضوع وتسالينه ترا الريال ما يحب الخنقه و لا يحب انه يكون محاسب على تحركاته
وهم تفكيرهم ان اذا تزوجوا المره بتراقبه وبتحكره
عكس تفكيرنا احنا ان اذا تزوجنا نبي ازواجنا يشاركونا بكل شي

 

[مناير ...!]

من صجج انتي تبينه يعلمج بكل تحركاته
ويدق عيج قبل يطلع ؟ وين حبيبتي عالمج الوردي خخخ
ماما كلهم جذي وبيني وبينج حدها شينه شنو ريال بين الرياجيل كل شوي داق على مرته
بطلع وبروح وبجي شنو مرته او امه واهو بالمتوسطه؟؟
اما انتي طبيعي اتعلميه وتستاذنين منه انتي المره

 

[*E.B.D.A.3*]

انتي خليها على مبدأ اني احبك
مو بغرض اني اخليك تستاذن بس احبك ويهمني اني اعرف تفاصيلك يعني

اما الموضوع التفرقه بين الرجل والمراه، المرة يكون الرجل سيد عليها
واهيه ماتملك حق تساله بشي
فهذا منطق مرفوض، مثل ماهوه يبيها تستاذن منه بكل شي
اهوه لازم يتحمل نفس الشي

لكن مثل ماقلتلج ، هذا واايد هااب بموضوع انا الريال وانا وانا وانا
فانتي لا تخلينها من باب اني ابي اعرف قد من باب انا احبك ومع الكلام الحلو
ترى هالريايل الي من هالنوعيه عباره عن تفاخيه ، تشوفينها شكبرها بس داخلها هوى !! ماكو شي!!
كلمه حلوة تييبه وتوديه ، وتصفطينه تحت ذراعج لي تدلعتي وتميعتي ...

اغلب هالاشكال اهمه الي اخر شي ينتهي فيه المطاف سكانه مرته
لان مايسعى لفرض رجولته الا ناقص الرجولة اصلا والي يحس ان رجولته تهددها عباره استئذان من مرة !!

فــ كسبيه بالدلع والشطانه ، انتي المستفيده لانج راح تمارسين شي من انوثتج يعني هههههه وراح تخلينه يسوي الي تبينه انتي

 

[shak!shoka]

اقول خل يستريح احسن

اشهالسخافه


مرتك و بعرف وين تروح و وين ترد


بس انت داش باخلاقي و شاااق مخي وييين و ليش و شحقه و متى

يالله عاد صج ما ينعطون ويه

سوي نفسج هبله و عبيطه و دقي عليه مالح شغل و جنج ما سمعتيه

يقهرون صراحه
الخبال زايد عندهم هاليومين

فاهمين الرجوله غلط الله يعافيهم

 

[Reham 84]

عادي يمكن يستحي قدام ربعه كل شوي يدق ولا يرسل
تعرفين تعليقات الشباب خصووووصا تووه متزوج
اهههههم شي يقوول قبل مايطلع انه بيروح هالوقت ويرجع هالوقت
أنا بالنسبة لي مهم اعرف متى تقريبا بيرجع
عشان مااقعد انطر

احس الرجال يبي يعرف زوجته وينها ووين بتروح خوفا عليها لاقدر الله صار شي مدري مااحسه تحكم

 

[Gifts&Occaions]

الله يعينج

 

[al-gadel_777]

اخذي الامور بعقلانيه....ولاتتعبين نفسج وانتي توج اول المشوار....ربي يوفقج.....

 

[انثى عاشقة]

ياعمري انتي اغلب الرجال في بداية الحياة الزوجية جذي
يبون يفرضون سيطرة وانا الريال وكلمتي تمشي ومن هالسوالف
انتي مشي معاه وصدقيني راح يتغير احاكيك من تجربة
ويختي ربي اعطانا كيد النسا ليش ما نستخدمه ؟؟!!
يعني مثلالما يخرج لا ترسلين ولا تدقين
خليه هو الي يحاتيج شفيها مختفية ما تدق وجذي
سوي روحج لاهية عنه وكأنج تبينه يخرج عشان عندج شي مهم من وراه
خخخخخخخخخخخخخخ يموت الرجال خوف من هالاحساس
تلقينه هو الي يلاحق اتصالات ومسجات ويرجع البيت بدري بعد
اخذيها قاعدة المرة الي تلاحق زوجها يهرب منها
والي تثقل عليه وتلف حولها الغموض يموت ويعرف شنو عندها
هو الي يلحقها
واحنا فقيرات مسكينات آل غموض آل تلقينا شابكين ع كويتيات
او نسولف مع رفيجاتنا ع الجوال ههههههههههههه
بس حسسيه ان عندج شغلة مهمة وتبينه برة البيت
هالشعور يخلي الريال يستخف وبيرد البيت لو بس من باب الفضول
وهو الي راح يدق ويرسل مسجات وقتها حققي معاه بكيفج
وينك الحين وبيجاويج
​

 

[بطوووطة$بيضة]

انتي اسلوبج غلط

قوليله حبيبي ابي اعرف وين تروح لاني احاتيك واااايد وااااايد

ومخي مايكون معاي وانته طالع اخاف عليك

اذا تبي تريحني باباتي عطني خبر ابمسج انزين يايمه يالله الله معاك

وبس انتهى الموضوع

اما سالفت تستأذن وليش ما استأذنت مني غسلي ايدج منها



الريال مايحب الشي ايي سيده من المرة يحب اللف والدوران علشان اتوصلين المعلومة

 

[جوري 2007]

ريلج يبيج ادقين اشكره قالج

دقي عليه وسالي عنه وتدلعي عليه ووصي يدير باله على روحه وخلاص

لاتعورين قلبج ولا تفكرين وايد وشغلي وقتج

 

[om3abod]

حبيبتي .. انا تقريبا ريلي جذي .. ما يحب يقولي تفاصيل وين بيروح ويين بيييي وهالسوالف..
اول الايام كنت اتضايق من هالموضوع كنت اقوله ابي اعرف وينك لو احتجت شي او لو صارلك شي الا انا عارفه وييينك

طبعا ما اقتنع ...
شسويت؟؟
ما قمت اساله .. بس يقولي طالع اقوووله درب السلامه وخل بالك واذا بتطول طرشلي مسج عشان لا انطر,,, بعد فتره قام اهو يقولي انا رايح الدوانيه او القهوة وجذي...
النقطه انج لا تركزين واااايد طبيعه الرياييل جذي ما بحبون يحسون انه في احد مراقبهم ..

 

[بهبهانيه]

عادي كل الرياييل نفس الشي
المهم يوم تدقين بيرد عليج