بشنو ممكن تقنعوني عشان احول لي macbook؟ واللي ماينصحون فيه هم ليش؟

[^^ROSE^^]

السلام عليكم

انا عمري ما استخدمت شي من شركه Apple لا ايفون ولا اي باد ولا غيره

فمعلوماتي عنهم صفر

بس ودي احول من لاب توبي العادي لي macbook
لحد الحين مادي لان ماعندي احد يشرحلي بالضبط الفرق وشنو اللي يميزه خصوصا ان السعر وايد غالي
فلازم يكون في مبرر حق عقلي عشان يتقبل فكرة اني ادفع هالمبلغ على كمبيوتر بينما الماركات الثانيه وايد ارخص

ابي ناس بالهم طويل وشوي شوي يشرحون لي الفرق والمميزات
واللي ماينصحون فيه ابي اعرف رايهم و اسبابهم


وشكرا

 

[TBOOLA]

شوفي حبيبتي
شنو استخدامج للابتوب بشكل عام؟
اذا وورد انا اقولج ترى نظامه يختلف لازم تتعلمين عليه
اما من ناحيه التصفح وعرض الافلام والصور والجرافيك والتصاميم انصحج بالماك اكيييد
توني ماخذه ماك الصراحه تكنلوجيا حسيت الوندوز بدائي مافي اكشنات نفس الماك
بالنسبه للبرامج مو نفس الوندوز بس الي تبينه راح تحصلينه واحلى مافيه الحين نزلو له ستور تقدرين تنزلين منه البرامج يا انج تشترين او تنزلين بعض البرامج ببلاش
او انج تروحين ديجيتز ينزلونلج البرامج المهمه الي تبينها
واذا كلش كلش توهقتي بالجهاز تقدرين تحطين فيه ويندوز وهالشي صار رسمي من شركة ابل يعني ماراح يخرب الجهاز كلش ولا را ح يبطئ
يعني لي بغيتي تشغلين الجهاز انتي تختارين تبين تدشين على نظام ويندوز ولا ماك؟
واهم من هذا كله حمايه الماك قويه ووايد سريع
اذا عزمتي عالجهاز انا راح اضبطج بالسعر لا تحاتين

 

[وسن 11]

وانا بعد ودي اغير وابي معلومات عنه
بعد اذن صاحبه الموضوع


tboola مشكوووووووووووووره علي الشرح

 

[بلبل حياتي]

شوفي الله يسلمج أنا رحت محل i city اللي بالأفنيوز يم الغانم وسألتهم عن جهاز macbook وسألته عن كل شي وبالأخير ما عجبني الكلام ولا إقتنعت بالجهاز وطلعت من المحل وما شريته فمثلا قال لي الموظف اللي هناك : مو كل البرامج تلقين منها نظام mac يعني ممكن تاخذين برنامج مشابه له ... والجهاز ما يشغل cd وأعتقد حتى الفلاش ميموري ما يشغله لأني سألته عن ال i pad 2 ونسيت ... إنتي روحي لهم وإستفسري منهم على حسب حاجتج للجهاز ...

 

[^^ROSE^^]

لا امبلا يشغل الفلاش
يمكن قالج الاي باد مافيه مكان يدش فيه الفلاش صح بس الاب توب عادي رفيجتي تحط فلاشها مافيه شي

 

[بنت حمووله]

احم روز لاحقتج لي هني لاني احب لابتوبات ماك و مستحيل ارد علي الويندوز بقولج اللي بجعبتي
macbook air مافيه فلاش ولا CD لان فيه ميزت انه واااايد ضعيييف ووزنه خفيييف و اتوقع اهو ارخص واحد فيهم
بس الانواع الثانيه فيهم فلاش و سي دي عادي و مميزاتهم بالغالب البطاريه فوق ٦ ساعات و الكيبورد يشب بالظلمه وللحين ما صادفت برنامج مافيه نسخه حق ماك
يعني لا تحاتين سالفة البرامج ما عدا مايكروسوفت اوفس موجود بس مافيه عربي "يعني اذا انتي نوعج تحتاجينه حق شغل او جامعة ما يصلح" ...ما يحوشه فايروس مستحيييييل صارله سنتين عندي ولا مره وديته سويتله فورمات كلش ما يحتاي...سريع ومايعلق...في ٣ احجام من كل نوع بو ١٣ او ١٥ او ١٧ انش الشاشه...انا مالي ١٣ انش و حجمه مناااااسب...وطبعا احسن نوع منهم اسمه macbook pro واهو اعلى سعرا
قطع غياره سعرها مو هين...يعني توني شريت شاحن ب ٤٠ دينار
اتمني فدج

 

[^^ROSE^^]

هلا هلا والله نورتي حياج لحقيني p;
اي انا شايفه 13 انش عند رفيجتي مجكنم شحلاته

ممم اي انا احتاج العربي مالهم نيه يضيفونه بالمستقبل؟ p;

اي سالفه الاب ديت و التعلق اللي بالويندوز تبط الجبد

مشكورة عالمعلومات ماقصرتي

 

[QueEn S]

بالنسبه للعربي امبلا اكو خبر ان راح ينزل رسمي .. بس في ب احد المنتديات واحد منزل شغله تضيفينها ويتحول الماك كله عربي ..

بس الماك حلااته انجلش

بقولج شي
انا صارلي سنتين اجمع معلومات عن الماك ..

وربي وربي احلى تجربه ب النسبه لي .. حتى اني مركبه الويندوز عشان المسن بايخ ب الماك .. لكن في برنامج اسمه اي مسن حلووو تقريباً قريب ل ماسنجر الويندو
بس وربي الويندو كلش ماابطله هههه .. طاح سوقه !!

وكل البرامج بالويندوز لها بدائل بالماك .. و الماك تجربه .. ويكفي يكفي .. انه جهاز يحمي نفسه ب نفسه !
اذا بتاخذين اخذي ماك بوك برو 13 انش اخف واحسن ..

انا خذته من اي سيتي ب تاريخ 21-2 كانوا مسوين خصوماات .. وانا رايحه عساس سعره القديم خخخ
ماخذه 630 .. اخر شي طلع 580 بس اللي يقهر لما رديت البيت لقيت موعد نزول الماك برو الجديد
وبعدها ب فتره نزل انقهررت بس عادي

انا خليتهم ينزلون لي برامج بس تحسفت مع انه مجاناً .. اذا بتنزلين نزليهم انتي
وبعدها ب يوم وديت جهازي يزكبون الويندوز ب 15 وهم تحسسسفت لان سويته لرفيجتي وانا قاعده ببيتنا هي بالسعوديه خخخ وسويت لها كل شي لاني داخله ع جهازها
طلع تنزيل الويندوز اسسسهل شي !

وحتى البرامج سهله ..

ف اخذيه وانتي مغمضه :eh_s(7):

 

[^^ROSE^^]

لا مابي الجهاز يتحول عربي ويطلعلي انقر هنا لوووووووووووول قصدي الوورد و جذي لازم يكون فيه عربي ان قصدي اقدر اكتب عربي بس

مشكوره عالمعلومات
جاري بحث الموضوع لووووووول

 

[مناته]

خذي الماك وانتي مغمضه
لي استخدمتيه تحسين الوندوز تخلف
بس انا عني ما استخدم برامج يعني حدي اتصفح واتابع يوتوب
بس عادي يكتب عربي ونظامه حلو وبسرعه تتعودين عليه
والحمدلله ما يخرف مثل الاتش بي وربعه