اهلين حبيبتي
بنصحيك تسكني ببيروت احسنليك قريبة لكل الاماكن وبتكون نقطة انطلاق لباقي الاماكن لانو اكيد كل يوم رح تجي ع بيروت وساعتا وقتيك كلو رح يكون عالطرقات عجئة سير من جونيه لبيروت وخاصة بوقتا فترة عيد
لو حابة شي عالبحر عنديك فندق موفنبيك ولو شي اقل وعالروشة عنديك لانكستر هوتيل او لانكستر سويت
وعنديك روتانا ارجان روشة
الاجواء بشهر 12 كتير حلوة
بالنسبة للبرنامج رح اعطيكي برنامج حلو لمدة 6 ايام ورح اترك يومين كرمال لو حبيتي تتسوقي او ترتاحي او تكزدري ببيروت وان شاء الله بالوقت الي رح تجي فيه عالارجح في تلج لأنو اليوم عنا عاصفة ورح يتساقط التلج لمدة يومين واكيد ان شاء الله بوقتا بيكون نزل التلج
- اليوم الاول زيارة مغارة جعيتا والتلفريك ومتحف المشاهير وبعدا جونيه والغدى بمطعم مانويلا او مخلوف وبعدين فيكن تروحوا على اسواق الزلقا والكسليك او زيارة الستي مول او ال ABC مول عشية بما انكم ببيروت فيكن تنزلوا على بيروت سوق بالسوليدير .
- اليوم التاني : زيارة فاريا كنت بحطا بنفس يوم جعيتا بس برأيي فاريا بدا يوم كامل لحالا لأنو ما رح تقدروا تستمتعوا بالمناطق التانية لأنو رح تكونوا تعبانين لهيك بفضل يوم كامل لفاريا .
- اليوم التالت زيارة الشوف قلعة موسى وبيت الدين وبعدين بتطلعوا على الباروك ومنها لو بتحبوا تمروا على بحمدون وعاليه رح يكون بس مرور الكرام لأنو بوقتا بيكون كل شي مسكر ببحمدون وعاليه
- اليوم الرابع زيارة جبيل قلعة جبيل البحرية والسوق العتيق ولو بتحبوا فيكن تعملوا جولة بحرية بالقارب والغدى بيكون بمطعم لوكندا بجبيل ولو حابة تعمل شوبينغ عندك عدة اسواق ببيروت متل سوق فردان وسوق مارالياس وسوق فرن الشباك وسوق الحمرا وسوق برج حمود ...
- اليوم الخامس زيارة صيدا القلعة البحريةوكمان تتمشوا على كورنيش صيدا وتقعدوا بشي كافيه او تتسوقوا من سوق صيدا وتتغدووا بمطعم الحان بصيدا وكمان فيكن تعملوا جولة بالقارب بالبحر كمان في مدينة ملاهي صيدا لو بتحبوا تزوروها ولو بديك فيكي تكملي على جزين في شلالات جزين وفي مطعم اسمو نبع مرشد كتير حلو
- اليوم السادس: فيكن تطلعوا على الشمال بحيرة عين السمك ولو بدكن تروحوا على طرابلس في سوق طرابلس وكمان جيبوا حلويات من عند الحلاب بطرابلس .في خيار تاني لو بدكن فيكن تزوروا قلعة بعلبك وزحلة (برأيي ما تروحوا على هالاماكن لوحدكن خدوا حدا من اهل لبنان معكن لانو بعيدة )
وفي خيار تالت فيكن تطلعوا على برمانا تتغدوا هونيك بمطعم فخرالدين او مطعم الجنة او برج الحمام الخيارات كتيرة وعشية بتنزلوا على بيروت عالروشة على كورنيش الروشة ولو بدك تاخدوا حلو معكن عندك حلويات البابا او امل بحصلي او الحلاب ...
بالنسبة للتسوق في كتير اسواق منها اسواق السوليدير كلها ماركات وعنديك سوق الزلقا والكسليك وسوق مارالياس حلو وفيه اشياء حلوة وما غالي كتير وكمان سوق فرن الشباك وعنديك سوق فردان وسوق الحمرا وفي سوق للأرمن رخيص اسمو سوق فرن الشباك وعنديك abc مول والبايروت مول والستي مول وفي سوق بربور وكمان فيكن تضيفوا السينما ببرنامجكن لليل .
كمان هيدا الرابط بيفيديك كتير
http://www.q8yat.com/t1000735.html
ولو حابة تستأجري سيارة هيدا رقم شخص بيأجر سيارات اسعارو حلوة 0096170767383
بالتوفيق حبيبتي
