هلا فيج اختي
قصدج gulf hotel اللي حجزتي فيه؟؟
هاي من احسن الفنادق في البحرين وبالعكس الا كل شي جريب منج ومن احلى ما يكون غير المطاعم اللي في الفندق حلوة ( الايطالي والمكسيكي والايراني والياباني بس مطعم البوفيه مو ذاك الزود والاحلى انكم تطلعون للريوق)
انتي بتكونين في العدلية يعني في الوسط وكل شي جريب منج والمنطقة اللي بتكونين فيها ما فيها مشاكل ... المشاكل داخل في القرى مالتهم الله يبعد عنا الشر
المهم ، راح اقترح عليج الأماكن واقول لج وين موجودة وطبعا انتي يا بتكونين مع تاكسي او إذا بتأجرين سيارة تقدرين تستفسرين عن الاتجاهات من الفندق وراح يدلونج:
- الشارع الي مجابل فندقج هاي شارع المطاعم وفيه مطاعم حلوة ... تقدرين اول يوم تروحين كوفي شوب ليلوز حلوياته لذيذة ، من المطاعم اللي هناك وحلوة كوكوز ولو اني ما انصحج تروحين الخميس هالممطعم لأنه واااااايد زحمة ولازم تنتظرين ، ينرفز الوضع ... في cafe Italia , salad boutique ، meat company .
- عندج النادي البحري منتزه الدولفين لليهال إذا للحين فاتح!!! والمتحف اكيد فيه شي لأنه ربيع الثقافة!!
- الأسواق عندنا المجمعات السيتي سنتر وفيه مختلف المستويات والماركات بمختلف الأسعار وفيه العاب حق اليهال وفيه بعد حديقة مائية داخلية اسمها واهوو وسينما طبعا وإذا تحبين دهن العود والبخور كل المحلات موجود في السوق منطقة المصلى ... بالمختصر السيتي كل من يروحه ، عندج مجمع السيف اهدأ من السيتي والحلو اللي فيه انه عندهم كذا مكان تقدرين تحطين عيالج بكل امان داخل وتروحين تتسوقين مثلا عندهم محل حق تلوين الخزف يعطونهم صحنولا كوب ولا اي شي واليهال يقعدون يلونونه ولما يطلعون ياخذونه معاهم اما حق اليهال الصغار في بعد مكان اللي اليهال يلعبون دور الاطفائي والدكتور والموظف ... الخ ياخذهم الوقت وانتي تاخذين راحتج ، هالمكانين موجودين في التوسعة اليديدة في السيف فوق فورايفر 21 ويم مايا كافيه ، وعلى طاري مايا إذا انتي من محبين الجوكليت ما راح تقاومين قعدة مايا وفوندو مايا اللذيذ .
إذا تحبين الماركات عندج مجمع العالي بعد
يوم الجمعة والسبت من كل اسبوع عندنا سوق البسطة في حلبة الفورملا ون ، سوق حلو واللي يشاركون فيه بحرينين اصحاب مشاريع صغيرة راح اعطيج اكاونت الانستغرام يوضح فكرته والمشاركين فيه كل اسبوع وبعد يسوون فعاليات حق اليهال albasta_market@
عندنا فعاليات ربيع الثقافة وفي الأيام اللي انتي موجودة فيهم للأسف ما في غير شي واحد اهوه ( عرض لفرقة بهلوانية صينية ) يناسب العائلة هالعرض مطلوب تذاكر تاخذينهم من مجمع السيتي سنتر والعرض من الخميس الى السبت الساعة 6 ونص في قلعة عراد.
- نرجع للمطاعم ونروح منطقة منطقة :
المنطقة الثانية للمطاعم الجريبة لج اهيه الجفير شارع الشباب ... المطاعم ذاك الصوب متنوعة وفي منها اللي يناسب قعدة الشباب وفي منها الي يناسب العائلات ومجرد ما تمرين الشارع كل شي واضح، شخصيا لوجبة الريوق احب اروح مطعم لوباتو يصير يم ستارباكس
السيتي سنتر ، ان بغيتي هندي مالج الا اشاز ، ان بغيتي تركي ومشاوي وخفايف عندج غوزي باجي ، ان بغيتي صيني بي اف شانج، ايطالي (كافي ايتاليا + فابيانو + باستاريتو ) تحبين امريكي ( فدركرز ، فرايديز ، تشيليز) وطبعا ساحة المطاعم فيها كل الي خاطرج فيه واكثر وحق اليهال داخل السينما في مكان يبيعون حلويات تاخذ القلب .
المطاعم اللي ورا العالي ( ليلى - المطبخ اللبناني - ليلوز "نفسه اللي في العدلية ونسيت اقول لج مساعة عن ريوقهم اللذيذ - نينو - وغيرهم )
منطقة المحرق ماقلناها!!!! عندج سوق المحرق وسوق القيصرية بس اللي لازم تروحين له اهوه منطقة امواج في مطاعم وفي سياكل حق كبار وصغار للتأجير المكان حلو ويشجع واشهر مطعم/كوفي شوب هناك اهوه نادي الشاي حق المزاج ودام الجو للحين حلو لا تفوتين القعدة والجولة هناك . في المحرق بعد في ممشى عراد وفي حديقة الأمير خليفة في الحد احلى وفيها زوارق صغيرة اللي تحركينهم بريولج وهاي بعد للكبار والصغار بس الكبار يستانسون اكثر فيها ههههههههههه
سوق المنامة وبالأخص مجمع باب البحرين اليديد وإذا تحبين تطلعين حق ريوق شعبي داخل المجمع عندج كافيه ناصيف + زعفران "زعفران موجود في قلعة الرفاع وسوق القيصرية بعد"
في الرفاع إذا قررتي تروحين سوق البسطة تقدرين تتغدين /تتعشين في الرفاع فيوز ( gusto ايطالي - elevation burger - dome - وبعد كوفي شوب هناك .
او تروحين منطقة البوكوارة في the walk اهوه مكان صغير بس في جم مطعم .
او مجمع انماء وفي le chocolate الاكل والقعدة حلوة او إذا خاطركم في بابا روتي موجود فوق
تقدرين تروحين محمية العرين حق اليهال وبعد في حديقة دلمون المائية
شارع البديع بعد فيه مطاعم حلوة بس هناك ساعات تصير سوالف شغب فيعني إذا ما تعرفين للطريج ما انصحج تجاكمين تروحين
وعندج آخر شي منطقة سار في مطعم اسمه فيلاماماز اذا رحتي حق ريوق بعد عندهم اشية شعبية حلوة واذا رحتي حق غداء او عشاء بعد لذيذ خصوصا المضروبة والبيتزا ومقبلات الباف باستري اللي على طمام مجفف يمي وزوجي يحب طبخة ايرانية من عندهم اسمها شبزي شي جذي!!!
وبعد في مجمع يديد في سار ما رحته بس يقولون في العاب لليهال وللحين المحلات قاعدة تفتح فيه يعني إذا خاطركم تقدرون تروحون.
وبس سلامتج هاي اللي اذكره حاليا واذا عندج اي استفسار ما يردج الا لسانج
