بالون المعدة عفية بسرعة بنات

[Danao0o]

السلام عليكم شلونكم كويتياتنا :tek:
بنات الله يعافيكم منو سمع فيها ومنو سوتها تخبرني
( عملية بالون المعدة بالنسبة لكلام الدكاترة انا حفظته بس يقولون اسأل مجرب
يلا يا بنات فزعتكم اجرب والا لأ ؟؟؟؟
وين ومنو اي دكتور وبجم ؟؟
اهم شي بجم :dddds:
اي ترا الميزانية خرمانة حبتين الله يسلمكم
يلا بنات بليز ماله داعي ابجي عشان تصدقون اني تعبانة :0bee2e8d89:
انطركم حبيباتي لا ياخذكم جو الانتخابات وتنسوني _03BA:
ترا مفهومة كلهم خمس دوائر يعني حدها واضحة :dddds::dddds:​

 

[OM 3ABOD AL 7LOO]

ما حبيت اطلع من غير ما ارد

والصراحه ما عندي معلومه عن الموضوع

انشالله البنات يفيدونج


موفقه

 

[Danao0o]

مشكورة حبوبة يزاج الجنة

 

[ام علاوي الالماسه]

حبيبتي لا يقصون عليش انا سويتها من سنتين عند الدكتور موسي خورشيد في مستشفي السلام طبعا انتي تشترين البالون ومع اجرة الدكتور والمستشفي يعني يوصل تقريبا 750 دينار المهم ماطول عليش سوالى العملية الدكتور ماخذ الوقت نص ساعة بامنظار المعدة وبعدها حبيبتي العصر ياني الدكتور وقال راح تحسين بثقل ولوعة ثلاث ايام بلكثير اسبوع وبعدين كلة تمام وعطاني ابرة مسكن وقال خلاص روحي البيت بليل انا وصلت البيت وانا بغيت اموت قال زوجي نطري مثل ماقال الدكتور وكان كل دقيقة تمر علي احس ان قاعدة اموت شي مثل الصخر ساد معدتي وحتي النفس مو قادرة اتنفس المهم ثالث يوم زوجي دق علي الدكتور وقالة هذي قاعدة تموت شكلها خالصة قالة عادي قالة اشلون عادي ثلاث ايام بس ترجع ولاقادرة تتنفس بعدين قالة اشتبون قال اطلع البالون قال اوكي انا راح اراعيكم وما اخذ اجرتي بس لازم تدفعون للمستشفي وخذوني بلاسعاف وطبعا مرة ثانية عمليات ودفعنا فلوس ومابغيت الا الفكة

 

[رهوف]

واااااااااي من بالون المعده انقهر لما احس ان بس احد يفكر تفكير بهالبالون

الله يسلمج انا بال2005 حطيت البالون كان وزني 85 وكان سعرها 750 عند د.عياش بدار الشفا

طبعا بنج وبالمنظار يحطون البالون قعدت من البنج بس ارجع ... اسمحولي الموضوع يلوع الجبد

طبعا اول يوم كل ساعتين ارجع وما اقدر اشرب حتى الماي

طلعت من المستشفى وما اشتهي اكل والترجيع مستمر لمدة اسبوعين وبعدين بدا يخف

اول اسبوعين نزلت 4 يعني انجاز بالنسبة لي

المهم بدت المعدة تتعود عليه وبديت اكل اكثر بس نزلت بال6 اشهر 9 كيلو وصار حزت شيلتها وبهالوقت تقريبا كان اكلي عادي مو خفيف حيل مثل البداية

المهم شلتها عند نفس الدكتور ب250

نسيت اقولج ان البالون يطلع ريحة مع الاكل يعني على طوووووووووووووووول لازم تشربين ماي وجاي اعشاب عشان الاكل يتيمع عليها وييييييييييييييييييييييع ذكرتيني صج كرهت نفسي والعلوج ما تطيح من حلجي

انيي الحين للمهم بعد ما شلتها معدتي توسعت بطريقة رهيبة لأن قبل كان حجم المعدة اصغر فلما انتي تملين المعدة بالبالون وتبدين تاكلين شوي شوي تتوسع المعدة

صرت ماااااااااااااااااا اشبع وبس ابي اكل وزاد وزني خلال شهرين ووصلت لأول مره بحياتي لل95 وتميت فترة اعاني مع هالوزن الحين ضعفت شوي بس للحين اعاني من معدتي

هذي مأساتي

 

[أرموشا]

انا اشتركت بهالمنتدى بس عشان ارد عليج

حبيبتي لا يقصون عليج وتسوينها انا سويتها العام عند د الهيفي بمستشفى السلام بحوالي 1300

والصراحه تحسفت الم :cxxxp: ولوعة جبد وآخرتها ضعفت 2 كيلو بس :0bee2e8d89:

وعقب ماشلتها صرت اكل اكثر من اول احسها وسعت معدتي ومتنت وااايد عقبها

والراي بالاول والاخير لج

 

[Danao0o]

ام علاوي من صجج انتي
انا احمد ربي اني مفلسة
بصراحة عندي بس فلوس البالون بس خاطري اركبه بالعسكري
عشان لا ما ضبط ما اتحسف نفسكم
واعلية قصصكم حزينة وايد انتي على رهوف على ارموشة فديتها اللي سجلت بس عشان ترد علي بعد عمري والله
سمعو الحين ابي المفيد انا قريت من وايد بنات منتديات ثانية انه اوكي الحال ماشي وضعفو بس المشكلة الريحة على قولتكم
وعوار اول اسبوع وترجيع لين تتعود المعدة
تهقون احنا الكويتيات غير اجسامنا
ياربي بنات ابي تفاصيل دقيقة شنو حسيتو فيه امبيه راح ابجي
خوفتوني اهي اهي اهي

 

[mrmr mrmora]

حتى لو رحتي العسكري تشترينها وتيبينها اعرف وحده قريييبه مني سوتها هناك شرتها ب350 وركبولها أياها وإهي بالمنظار اختنقت ونزل عندها الاكسجين وطلعو المنظار وريحت شوي وردو حطولها وعقب حطوها تحت المراقبه بالمستشفى و4 ايام وإهي ترجييييع وماتقدر تتنفس لين قالت لهم بس شيلوووووهاااااااااا

صج كان عذاااااب

يامن شرا له من حلاله عله

 

[ام علاوي الالماسه]

حبيبتي لا تسوينها واللة ان شالوني بلاسعاف وعيالي يبشون وانا شبة ميتة لاكن شقول هذا رزق الدكاترة حبيبتي التزمي مع اخصائي تغذية وان شاء اللة تضعفين

 

[أحلى همبه كويتية]

جنوووووووووووووووووون
خليج بصحتك احسن
بلا بالون بلا تفاخية
كلها خرابيط وعوار وغثا ومرض لا يقصون عليج
أنا سبع سنوات والله أحاول أقنع زوجي بالتحزيم وما يرضى
والحمد الله الحين ماشية برجيم وان شاء الله انزل بس بصحتى
العمر مش بعزأه
سوي رجيم مع دكتور وخلاص
الا إذا انتي بايعة عمرج شي ثاني ؟

 

[afesa]

انتي من صجك ....اكو احد يروح يسوي عمليه بريوله لا لا تسوين ولا شي حرام لاتلعبين بنفسك ومهما كان هذي عمليه مو لعبه انا كنت مفكره اسويها عند د احمد الفضلي بس اهوه قالي ما انصحك فيها مو زينه وفيه وايد ناس ما يتحملونها وفيه خطوره ان البالون ينفجر بالمعده ويسكر الامعاء شاللي جابرك سكري حلجك اشويه واخذي الحبوب اللي يتكلمون عنها البنات وطولي بالك الريجيم يبيله صبر والله يسهل امورك

 

[جوجو.]

انا كنت مفكره بالبالون بس بعد اللي سمعته هونت مشكورين عالنصايح

 

[Danao0o]

بنات خو بس انتو اللي تقولون جذي روحو شوفو جوجل بس كتبو بالون المعدة شوفو شكثر النتايج روحو اقرو المجلات الطبية يقولون وايد سهلة وبالنسبة انها تنبط يعني تنثقب عادي لأنها تحتوي على مادة ممكن تتحلل تالي بالمعدة عرفتو ؟؟
يعني وايد خرعتوني
امبيه اقرا ردودكم وابجي شفيكم بنات ماعندي حل لاعت جبدي خواتي اجسامهم تهبل بس انا الوحيدة اللي شمتني
ياربي عيزت احلم بللووو وست يارب مرات وايد اقول يارب اموت وارتاح يعني شسوي بنات حدي مأيسة
كلمن شافني قال واعلية متنج مكبرج وايد والا ويهج بيبي فيس
ياربي والملابس الداخلية لوعة والمايو خاطري ميتة البس مايو واروح المسيلة ما اقدر عفية شسوي يعني لا عملية ولا حبوب
لا طبنا ولا غدا الشر

 

[أرموشا]

حبيبتي اللي تقرينه بنتايج البحث شي واللي احنا اصحاب التجارب نقولج ياه شي ثاني

وكل شي بايدينج انتي تختارين

يا تقتنعين بكلامنا ولا بالكلام اللي قريتيه

وعلى فكره انا عندي خواتي 2 مسوين عمليه التحوير والحمدلله مايعانون من اي شي تقدرين تسوينها وان شاءالله ترتاحين وتلبسين اللوو ويست

 

[AFRoDiT]

البالون حق الي وزنها فوق الـ 100
يعني يائسه من الريجيمات

مرت اخوي مسويتها

صج تعبت وايد
حرمان من الاكل في البدايه
و فتره عقب العمليه بس سوائل ماتاكل


بس الحمدلله الحين مافيها شي
وضعفت جسمها اينن ماشالله


بس معدتها تعودت ع الاكل القليل
يعني من تزيد في مقدار اكلها ترجع ماتتحمل

وضعفت تدريجي مو مره وحده ..


بس الصج انها تعبت نفسياً و جسدياً في البدايه


بس الحين خلاص الجسم تعود

والمرحله عدت الحمدلله

 

[دلــــوعــــة]

اهم شئ الصحة يعني تكسبين الرشاقة وتفقدين الصحة واحتمال يصير فيج بلاوي الله يكافيج شرها

يعني معقوله ماتقدرين تمسكين نفسج عن الاكل لاتاكلين واشتركي بنادي واصبري

مو كل شئ يجي بسهوله هالشحوم اللي تراكمت سنين تبينها تروح بيومين

تهقون احنا الكويتيات غير اجسامنا

لاحبيبتي لان احنا رقيقات ودلوعات ومانتحمل ههههه

هذولاك فيله مايصير فيهم شئ

 

[جوجو.]

انا بعد اللي قريته من البنات فكرت مااسويها

دورولنا حل اخر انا هلي مايرضون انام بالمستشفى واسوي تحزيم مع ان ودي

 

[حمدة الله]

حبيبتي صاحبة الموضوووع ليش ماكليتي من الحبووووب التخسيس اللي تمدحينهم وتقووولين ينزلووون بالوزن

انا قريتهم بمواضيعج واتمنى تجاوبيني

 

[yam_yam]

لا تسووووووووووووووووووووووووووووووووونه

انا سويته عند الهيفي قعدت بالمستشفى 5 ايام بغيت أموت و اختنقت و ماطلعت إلا لما شالوه حقي
يعني ماستفدت و لا شي
دير بالكم

 

[جوجو.]

بعد بنات عطونا اللي جربوها

ومنو سوت ربط وشالفرق بين الربط والتحزيم والحلقه ؟؟؟