ايها المتزوجة .. لا تنسين صديقاتج :(

[منطلقة بطموحي]

السلام عليكم و رحمة الله و بركاته

اهلا و سهلا فيكم خواتي و عزيزاتي

اليكم يا المتزوجات ..

ليش لما الوحدة تتزوج ، تنسى صديقاتها ؟ او انها ما تنسى ، بس حيل تخف العلاقة بينهم .

لهالدرجة الزواج يشغلها ؟؟

ترى مو صعبة انج تجمعين بين الزواج و بين علاقاتج الاجتماعية ..

صحيح انني مو متزوجة ، و لكن ما اتوقع انه صعبة السالفة لهالدرجة !

يمكن الحين تقولون انه لااا شدعوة كا احنا عندنا رفيجات مافينا شي ..

اوكي عندكم رفيجات ، بس فيه ناس وايد كان علاقاتهم الاجتماعية كبيرة ، فجأة عقب الزواج اختفوا .. شدعوووووووة .

و الله احيانا اشك انه فيه بنات بس يـبـيـنوون قبل الزواج عشان ينخطبون ، و لي تزوجوا نسوووا الناس .

انا تعقدت من هالشي لأن اكو وحدة من المتزوجات قالت لي هالشي انه خلاص زواج و تزوجنا فا لازم نخفف من العلاقات الاجتماعية لان الزواج اهم .. يعني بصريح العبارة نفس اللي انا قلت لكم انني اشك فيه فوق ..


نصيحة لكم يا المتزوجات ، ترى صديقاتكم يحبونكم وايد ، لا تخلونهم ..


و السلام عليكم و رحمة الله و بركاته


اختكم Dr. HaPpY

 

[Brounzi_girlly]

مشاركة: ايها المتزوجة .. لا تنسين صديقاتج

ليش ماتقولين إن الزوج له تأثير على علاقات زوجته الإجتماعية والحياة الزوجية غير عن العزوبية
مع تحيااااااااااتي............

 

[مسك 3]

مشاركة: ايها المتزوجة .. لا تنسين صديقاتج

صح المفروض الوحده ما تقطع عن صديقاتها
بس خل أقول لكم شي مثلا كنا نشبك الخط بالليل ونسولف الظهر يميع ونطلع بالويك اند أو الظهاري عالغدا ألحين صعبه
ومع اليهال وايد بنات ما يبون البيبي يقعد معاهم اذا زاروج أو خلنطلع ونخليه يعني ترى مرات هم الصديقات المو متزوجات ما يقدرون التغيير اللي صار ويتزعلون اذا قلتي أكلمج بعد شوي وما قدرتي تتصلين انا ما أقول تقطع صداقتها بس هم المسؤوليات تكسر المزاج وأول الزواج الله يهداهم بعض الرييايل لا تروحين واذا خبروا انج متيمعة مع صديقاتج ارتزوا بالبيت كنت أعاني من هالحاله قبل لا أتزوج عندي صديقتي زوجها ما يرد الا 12 بالليل يوم اللي نزورها تسع ونص يرد البيت فشلون نخرب عليها لا نطلع وما رده عقب مده بنتأقلم مع المسؤوليات ونرد نتيمع المهم ان الصديقة تدري بمعزتها ما تغير فيها شي
يعني مثلا عيدميلادها والسؤالعنها بين فتره وفتره والنقصة الحلوه
والله يخلي لنا الناس اللي يحبونا من قلب ويبعد عنا الناس اللي يبونا ربع وناسة وبس

 

[هاهاهي]

مشاركة: ايها المتزوجة .. لا تنسين صديقاتج

و الله صاجه ما قلت شي غلط الوحده من تتزوج تنسى الدنيا كلها بس مو كلهم اكو بعضهم ما شاء الله واصليييييين

 

[واحشنى موت]

مشاركة: ايها المتزوجة .. لا تنسين صديقاتج

صح كلامج الزواج يأثر عالصداقه كثير - واحنا نستسلم لهالشى بس لازم الوحده تحتفظ بصداقاتهاا القديمه وتحاول تتواصل معاهم .......... يسلموووووووووو

 

[أميرة الورد]

مشاركة: ايها المتزوجة .. لا تنسين صديقاتج

بنات الزواج التزام وحياتج قبل الزواج مو مثل بعد الزواج يعني تبين تطلعين وتردين مع ريلج وزوزارات وسوالف وانا ما اقول تقطع الوحده عن رفيجاتها بس تتواصل معاهم والمفروض اهم يقدرون هالشي والله يوفق الجميع

 

[رفرف]

مشاركة: ايها المتزوجة .. لا تنسين صديقاتج

والله مرات على حسب الزوج نفسه تلقينه مثلا كله قاعد بالبيت او يبي مرته معاه طول الوقت او بعضهم مايحب طلعات ويمعات البنات بعد شتسوي الوحدة ..

بالنسبة لي الحمدلله مو جذي بس جم وحدة من رفيجاتي عندهم هالمشكله مع رياييلهم فالبنية ودها بس مابيدها شي

 

[مووونيك]

مشاركة: ايها المتزوجة .. لا تنسين صديقاتج

ماتعرفين معدن الوحدة الا لما تتزوج!
احس شخصيتها الحقيقة تطلع عدل!
يعني اتحسينها اتشوف نفسها وتكتشفين ان علاقتها فيج كانت لمجرد تسلية وضحك وسوالف لا اكثر ولا اقل!
واتعرفين اللي صج معتبرتج صديقتها واللي معتبرتج مجرد وسيلة لتمضية الوقت!

 

[الحــــــلا كله]

مشاركة: ايها المتزوجة .. لا تنسين صديقاتج

مو شرط ان الوحده تقطع من نفسها بالعكس في ظروف وايد تمنعها
ترى الزواج مسؤوليه وكل ريال عن ريال يختلف
وغير العيال والمسؤليات الي فوق راسها

 

[سارا ديور]

مشاركة: ايها المتزوجة .. لا تنسين صديقاتج

أنا عن نفسي من تزوجت ليما الحين علاقتي بصديقاتي

ماتغيرت بالعكس توطدت أكثر لأن فعلا ماكووو شي قوي يخليج

تلهين عن تواصلج بصديقاتج ... عادي أتكلم معاهم بالتيليفون

وأطلع معاهم ... ونزور بعض

 

[ظلال القرآن]

مشاركة: ايها المتزوجة .. لا تنسين صديقاتج

شوفي حبيبتي انا بشرح لج الحياه بعد الزواج >>> ماكو فايده تموت على الشرح ياشين المدرسات

البنيه قبل الزواج اشعندها الله يخليج غير رفيجاتها

بعد الزواج زوج طاف فيها ويبي يطلع معاها ويسولف معاها وحموله لازم توجبهم وتزورهم وتروح حق مناسباتهم واهلهم وهذي والده وهناك عزا ومناك حجاج ..بعد جنه ما يعذرونها هذا غير الاستقبالات والولادات وابطيخ وبلاوي مسيجينه تبي تراضي الكل

هذا غير اهلها هم توله عليهم وتبي تزورهم وخلاص بعد صارت مره ينشره عليها يعني تروح وتوجب الناس الي من صوب اهلها وعزايم واستقبالات ونفس الموال واذا ما راحت كلو ويها

زين حملت وتنست وتعبت ولدت وبعدين نفاس وياهل متوهقه فيه ياله قاعد تعلم فيه وترقع زين

بالله عليج هذي وين عندها وقت تجابل صديقات المفروض تعذرونها

 

[عشق]

مشاركة: ايها المتزوجة .. لا تنسين صديقاتج

اول الايام تلاقين البنت مسغوله بالتجهيز وبالطلعات فتلاقينها تنسى الدنيا وما فيها علشان هالريل

على الاقل اول الايام علشان تعرف شخصيته وتعرفه عدل

وبعدها ترد العلاقات عادي

انا عن نفسي انقطعت فتره حتى عن الدوام وعن البنات وعن اهلي بعد بس بعدين ارجع عادي على الاقل فتره التجهيز

واغلب رفيجاتي الحين رفيجات الدوام بس لان رفيجات الدراسه تزوجوا قبلي وانقطعوا عني

فريلي الحين عادي يوديني واييبني بس قال لي بيوت رفيجاتج ما احبج تروحين لهم بس وانا قلت له اوكي لاني من اول مو متعوده اروح عند احد بس رفيجتي اللي معاها حيل واهو يعرف هالشي يخليني

 

[مي الحلوة]

مشاركة: ايها المتزوجة .. لا تنسين صديقاتج

فعلا ترى المتزوجة عندهااا مسؤوليات ..هذا الزوج من صوب والعيال من صوب
والاهل من صوب والحموله بعد..بس في النهاية الموضوع يعتمد على قوة علاقتها
مع رفيجاتها..الحمد الله انا للحين متواصلة مع رفيجاتي..والله يديم هالصلة ان شاء
الله على الخير والمحبة..

 

[اعييز]

مشاركة: ايها المتزوجة .. لا تنسين صديقاتج

صلو على النبي ..

كل ما هذا قالو ظروف ومواجيب ..!!!!!

ماما انتو عبالكم البنية ماعندها مواجيب مثل ما المتزوجه عندها؟!!!!

غير اشغالها .. ترى على فكره يعني البنيه عندها اشيا تشغلها غير رفيجاتها !!! استغرب من اللي عبالهم انها انسانه فاضيه!!!!


عموماً اللي قاعده تقول الظروف والظروف اهيا اللي مخليه الظروف تتحكم فيها وهالشي غلط .. المفروض ان احنا اللي انتحكم بالظروف صح والا لأ؟!


الوحده يكون الوضع يديد عليها في بداية زواجها .. لأن المسؤوليات يديده .. والنظام بكبره يديد .. فلازم تضبط نفسها وترتب شغلها واوقاتها وصدقوني ماراح تشتكي من هالظروف ، لكن اللي اتعذر اسمحولي اقول إنها كسوله ومالها خلق تحط نظام حق روحها سواء متزوجه او غير متزوجه

 

[منطلقة بطموحي]

مشاركة: ايها المتزوجة .. لا تنسين صديقاتج

مشكووورين كلكم على المشاركة .. لي عودة مرة ثانية و ارد عليكم وحدة وحدة ..

جزاكم الله كل خيييييييييييير


بس عندي تعليق سريع على اختي ظلال القرآن ..
ترى اللي مو متزوجة مو معناتها فاضية !! عندنا اشياء وايد نسويها ، دراسة ، طموحات نشتغل لها ، الدعوة الاسلامية .. و غيره من الامور .

و عدل كلام اختي اعييز .. مو معناته اللي مو متزوجة يعني فاضية !!!

 

[نفنوف كشكش]

مشاركة: ايها المتزوجة .. لا تنسين صديقاتج

ايه والله مادري ليش جذيه ؟
اي ظروف هاذي اللي تمنعها انها اترد علا مكالمات ارفيجتها ؟ انزين وانتي طالعه من الدوام رفعي السماعه قبل لاتنامين معقوله ماعندها دقيقه اتسلم ؟ الله يعافي المسجات انا سبق وقلت سالفتي مع رفيجتي هاذي انا اعتبرها اعز واقرب صديقه واحنا ربع من عمر بس تزوجت مادري اشصار فيها الله يهينها بس صج حز ابخاطري وبجيت من حركتها كذا مره دقيت عليها ودزيت لها مسج كنت ابها اتشوف شغله بالتلفزيون معقوله ماشافت المسج والمكالمات ؟
انا قلت بخليها ابراحتها متا ماتبي اتدق عندها كل ارقامي
وبعدين ترا حتا البنت عندها ارتباطات ومسئوليات بس ماننسا اقرب الناس لنا كلش موعذر هاذا اللي ابقلبه صلات ماتطوفه بس في ناس ايصيرون ملاقه وعلا فكره هم حطيتلها اعذار عشان جذيه قلت بخليها علا هواها

 

[الأصيله]

مشاركة: ايها المتزوجة .. لا تنسين صديقاتج

والله علاقتي برفيجاتي للحين الحمدلله على أحسن ما يكون

على العلم أن كلهم متزوجات وبين فتره وفتره ندق على بعض

على حسب علاقتج برفيجتج أن كانت زينه ليش تنقطع

وتحياتي لكم