السلام عليكم
بنات الله يخليكم فيدوني إذا تعرفون - و ياريت الأبلات يشاركون
بنتي بأولى ابتدائي صارت لها سالفة بأول اسبوعين دراسة
كانت يوميا ترد البيت تقولي بنات كبار طقوني
وانا الصراحة كنت أقول لها اللي يطقج طقيه - بس أدري فيها خوافة -
كانت تقولي لما يطقوني أقول حق الأبلة هاذي طقتني الأبلة تقول لها أكيد انتي شيطانة :rgewrg:
لي ثاني اسبوع ردت ودقت علي وانا بالدوام ميتة من البجي سالتها شفيج قالت :
اقروا و انتوا حكموا :
قالت إنها كانت بالفرصة الأولى - و تمشت مع رفيجاتها ثنتين و ياتها وحدة من بنات رابع أو خامس
طقتها ورفيجات بنتي انحاشوا و طق الجرس بنتي تقول آنا وقفت مكاني خايفة منها لانها كانت واقفة بعيد تطالعني و تضحك علي وآنا بعد ضيعت وين صفي
لي ما لقتها أبلة و سألتها عن صفها و وصلتها (بدون ما تسألها ليش تبجين)
و دخلتها صفها ولا عليها (انجليزي) الأبلة قالت لها دشي قعدي مكانج ليش متأخرة
بنتي قالت لها بنية طقتني وانا خفت و ضعت مادليت صفي و الحين بروح الحمام حصرانة
قالت لها الأبلة الثولة - قعدي قعدي ماكو حمام روحي بالفرصة الثانية (يعني عقب ساعتين تقريبا)
و بنتي قعدت و سكتت و لما يه وقت الفرصة الثانية بنتي تقول خفت مابي اطلع و قعدت بمكاني
لي وقت الهدة راحت الخدامة تاخذها بس شافتها قامت تبجي تقولها وديني البيت بسرعة أبي ابول بطني يعورني !!! حيااااتي بنيتي :eh_s(2):
و للأسف كان يوم خميس ولا لو يوم ثاني جان رحت و شخلتهم
الأحد رحت معاها و دشيت عالوكيلة (كنت ناوية عالناظرة بس بعدها ماداومت)
حاجيتها و قلت لها كل شي وانا حدي معصبة و هددتها بالشكوى و الوزير و قالت لي مايصير خاطرج إلا طيب
و طبعا من يومها و بنتي كااااااارهة مادة الأنجليزي و تحاتي كل يوم تسألني قبل النوم علي باجر انجليزي مابي مابي ما أحب الأبلة و تبجي
و اساسا ليلحين تقولي مايخلوني أروح الحمام ولا اشرب ماي بالصف حتى لو من مطارتي !!!
تكفوووون علموووووني شسوي لهم !! و صج ممنوع الطالبة تروح الحمام و تشرب ماي وقت الحصة !!!
طولت عليكم بس والله عادتكم خواتي و بتنصحوني :eh_s(7):
