اودي ولدي مدرسه خاصة ولا حكوميه !!!!!

[كيفي ادلع]

السلام عليكم


محتاره؟؟؟؟!؟



الكثير في الاونه الاخيره يرجح المدرسه الحكوميه لي
وللاسباب عده
والمدرسه الخاصه محتاره الان في مستوهم ووووووووواخلاقيات !!!!
محتاره بين عده اسامي
الرؤيه والرساله والمستقبل والنجاه النموذجيه

ساعدوني بارائكم والاجابه علئ اسالتي
1-هل يفرق الجنس اذا ولد ولابنت ؟؟؟؟؟عموما ولد
1- تويدين تدريس الخاصه ولا حكومه ------لماذا؟؟؟؟
2-ماهي اسعار الان مدارس الخاصه
3- شنو الخلل في تدريس الحكومي اي ماده اوبطريقه الشرح المدرس؟؟؟؟؟
4-ماهي أفضل مدارس حكوميه بالنسبه لك
5-ماهي افضل مدرسه خاصه بالنسبه لك؟

 

[كيفي ادلع]

شدعوه مافي احد يقدر يدلو بدلوه بالموضوع




وينكم بنات عفيه ابيكم تساعدوني في هالموضوع وين فزعتكم

 

[عتآق الخيل]

لو اني بالكويت كان ساعدتك
ربي يوفقك وان شاء الله البنات يساعدونك
up.~

 

[منـــاي]

مدرسه خاصة بدون اي تردد انا تلقيت تعليمي بأفضل المدارس الخاصه بالكويت تحديدا المدرسه البريطانيه واكسفورد وقبلها عشنا سنين طويله بايرلندا وابوي اختار مدرسة اكسفورد عشان ندرس فيها هناك ولسوء الحظ بعدها حولنا فتره مؤقته عالحكومه بحكم ان امي مدرسه بنفس المدرسه ما اقدر اوصفلج شعوري بهالفتره تحسين البيئه كلش مو راقيه ما تشجع على العطاء تحسين ناس فاقده طعم الحياة يعني كافي البنات والفاظهم وحركاتهم الصبيانيه كل انواع الانحراف والهمجيه شفتها هناك ولا المكتبه الي تسد النفس ولا احد يطل فيها ولا المقصف الي يتفاقصون فيه البنات كنت اطالعم من بعيد واشفق عليهم ولا المعلمات الي يفتقدون اسس الثقافه وما يستحقون اسم معلمه ادري التعميم مو انصاف بس الحق ينقال نظام مدارس الحكوميه فاشل لابعد الحدود كافي مدرساتنا الانقليزي بالحكومه ما يقدرون ينطقون جمله سليمه بدون بدليات وان صلحت لهم بدلياتهم احقدوا علي لان عقولهم لازالت في طور النمو كافي نفسية الياهل واهو يتحمس يدش مدرسه ويتكلم عن انجازاتها ونفسيته تكون سليمه المدارس الخاصه تعملج الف حساب ويخافون على سمعتهم وتهمهم نفسية الطفل ويحاولون يدخلونه بانشطه ويحمسونه عالدراسه اما مدارس الحكومه فحدث ولا حرج وكافي باجر اذا سمالله عليه كبر يتكلم انقليزي بثقه وطلاقه اذكر في طفل كان معانا باكسفورد كان يسب بس الفاظ عاديه طردوه بعد فتره عشان هالسبب ولما رحت الحكومه مدرسة الانقليزي سبت البنات نفس السبه الي سبها الطفل! اذكر كان ولد معانا باكسفورد بايق اقلام كل الصف لوول في يوم ما انبه ضميره وراح عند المدير واعترف بالسرقه كافئه المدير باليوم الي بعده على صراحته وصفقناله كلنا ورجعت لنا الاقلام واذكر مره في مدرستي البريطانيه استدعوا امي وابوي واثنينهم استأذنوا من دوامهم (للعلم ابوي دكتور وطلعته من دوامه تعني تأجيل المراجعين) وكاناو خايفين علي وايد جن يقولونهم ان بنتكم ما تشرب حليب !واهما دايما يوزعون مفن كلكاو وحليب على كل الاطفال وانا كنت اكل الكاكو بس ما اشرب الحليب نهائيا وهالشي كان يقلقهم اتمنى بعد كل هالكلام تكونين عرفتي تختارين المكان الانسب لطفلج

 

[koko99]

اذا تحبين عيالج وديهم مدارس خاصة
لاتنسين مدارس الحكومة الصبيان كله يتكافخون والمدرسة والاخصائية قاعدة تشرب جاي وتاكل حب شمسي
ولا يهمهم شي مافي نظام
اخوي صار فيه عقدة نفسية لأنة قلناله المدرسة زينة وحلوه واذا احد طقك قول حق الابلة ومسكين كان يقول حق الابلة بس الابلة ماتسوي شي
ويروح حق الأخصائية واهي تقولة اذلف صفك
مدارس حكومة مافيها اسلوب ولا تعامل سواء كبير او صغير

 

[انسام الكويت]

اذا ولد أحسن شي خاص لانه مدارس الحكومه للصبيان من خلوا الابتدائي حريم يدرسون وصارت اكس لا تعليم لا مستوى لا غيره

لكن البنت عادي ماعليها خوف اذا كانت بحكومه تمشي عدل وتتدرس وتجتهد عكس الولد اذا بالابتدائي مامشى أوكي يتبهدل وتصير

دراسه عنده ازمه

 

[كويتية صغيرة]

بالنسبة لي الحكومة أفضل
خصوصا اذا المدرسة ناظرتهم زينة والادارة زينة
واذا تهمك اللغة الانجليزية دخليهم معاهد بريطانية بالصيف
اما بالنسبة لباقي المواد الحكومة افضل بكثير
من تجارب صديقاتي ومن تجربتي ( انا جربت الاثنين)
تبين ولد شخصيته قوية ...... والا ولد (مايع) ما يعرف يتصرف اذا صارت له مشكله وكل شي عنده بالمسطرة والقلم
تبين ولد يتعلم على الهالوين والكرسمس والبوي فرند ........ والا تبين ولد يتعلم على اصول ديننا الاسلامي
(هذا اذا فكرتي بالمدارس البريطانية والامريكية ...... شوفي مخرجاتهم وشوفي الطلبة المتخرجين منهم وشوفي منطقهم وانتي حكمي .وفي النهاية احنا عايشين بالكويت مو عايشين ببريطانيا)


اما المدارس الثنائية اللغة .... فهذا حسب المدرسة لان اكثرهم اختلاط وما ادراك ما الاختلاط ..... هناك مدارس سمعتها زينة حرصي عليها اذا انتي تبين خاص
اما المدارس العربية ....... اكثرها وافدين وشطار والصف فيه 40 طالب وما في اهتمام لان المدرس ما يلحق( في مدارس الحكومة اي صف لايتعدى 25 طالب )


اذا تفكرين بالاهتمام ......... دخليه مدرسة خاصة ( لان الحكومة يعاملونه كطالب عادي حاله حال الناس مو شخص مميز لانه دافع فلوس وهذا لا اؤيده لان الحياة ليست دائما حلوة لازم ولدي يجرب كل انواع الناس علشان ياخذ خبره وبعدين يختار الزينين وهذا جربته علي عيالي فعلا وشفت نتيجته الحمدلله مع مراقبتي الدائمة لهم .انا لا اؤيد الاهتمام الزائد بالطفل لان هذا يعطي نتيجة عكسية لما يكبر يصير ماعنده خبره بالحياه ويعتقد ان الكل يهتم فيه نفس ايام المدرسة والحياة مثل الحلاوة المصاصة كل شي فيها حلو . الحياة فيها الحلو والمر . والمدرسة حياة مصغره )

اذا تفكرين باللغة الانجليزية فقط ....... دخليه خاص

اذا تفكرين بالمستوى العلمي بشكل عام ........ دخليه حكومة ....... لا تاخذين كلام الامهات اللي عيالهم صغار ...... سألي دكاترة بالجامعة لانهم درسو الجيلين وشافو المخرجات ...... مناهج الحكومة (خصوصا الحديثة) صعبة جدا وتخرج طالب ملم بكل العلوم ....... والدليل أغلب طلبة الطب والهندسة المتفوقين اغلبهم جايين من الحكومة ....... اما طلبة الخاص فهم متفوقين في اللغة الانجليزية فقط اما باقي المواد مستواهم نفس طلبة الحكومة....... من تجربتي ...... الشاطر شاطر وين ما تحطينه ....... والدليل اغلب طلبة الطب جايين من حكومة ...... انا اكلمك عن الجيل الحالي المخرجات الحديثة من مصادر مقربة

في النهاية القرار قرارك اختي وليس قرار احد اخر وكل شخص له رايه مع احترامي للاخرين

 

[Nokia N95]

انا كنت محتارة مثلج .....

وبالاخير قررت
الحضانه مدرسة خاصة
والروضة و الابتدائي و اللي بعدهم بالحكومة


اولا
المصاريف
اذا عندج ولد واحد مو مشكلة
بس اذا اكثر من واحد .... الصراحة ميزانية كبيرة

ثانيا
المكان
مدارس الحكومة يم البيت

ثالثا
ابي عيالي يتعاملون مع كل فئات المجتمع .... مو فئة معينه

وبخصوص الانجليزي ....
النوادي و المعاهد و التلفزيون .... يساعدون وايد


ومدارس الحكومة بدت تتعدل ....
بدا يصير لكل مدرسة موقع .... و يدخلون مسابقات علمية .... ويسوون اجتماع مع اولياء الامور يناقشون فيه التدريس والمواد

اهم شي تكون الادارة زينه و شديدة

 

[PuPa^^SWeeT]

انا اعطيج الفرق بين الحكومة و الخاصة

وبالاخير يعطيج رايي

الخاصة طبعا لها عدة مميزات منها

• دوامهم لي الساعة 3وشوي
• عندهم حصة باليوم يحلون واجباتهم
• كتبهم ماترد البيت
• اعتمادهم على المدرسين كبير مو على ولي الامر
• تحصيل لغة انجليزية عجيب

عيوب الخاص

• دوام منهك للطالب خصوصا الصغار روضة و ابتدائي
• اعتمادهم على المدرس مو على ولي الامر فولي الامر مايعرف نقاط ضعف ولده
• تقييدهم لج باجتماع يوم واحد فقط وبساعة محددة ان ماييتي مايتجدد الموعد الا بشق النفس
• ما تقدرين اتدرسين ولدج انتي اذا انتي حريصة و تبين ولدج يتميز
• تحصيل لغة عربية ركيييك
• لما يعطيج درجة ولدج مثلا انقول c وانتي اتحسين انه مستوى ولدج اعلى ماكو نقاش خلاص حطو الدرجة و ماتقدرين اتناقشينهم
• وقفتهم مع المعلم اكبرمن وقفتهم معاج
• لي حسو انه ولدج مايرضي انجازات ومعايير المدرسة عادي يفصلونه منها على اخر السنة و تعالي انتي دوري مدرسة خاصة تقبل بطالب مفصول من مدرسة خاصة
• طبعا وازع الاطفال اللا اخلاقي فيها و الاختلاط و اعياد الاجانب فيها ( حتى لو احنا انشوفه عادي احنا مانحتفل باكثر من كلمة هابي نيو يير او يمعة عايلة على كيكة اهم كريسماس و ايستر داي و هالوين و مادري شنو )
• كل سنة يزيد غلاء هذا المدارس و رواتبنا اللي ماكلينها اندش جمعيات ولا يصير نزاع بين الزوجين وكلمة ماعندي مطروحة دايمن
• تشددهم الدائم تجاه سلوكيات الطلبة يعني يعتبرون الحركي هذا واحد يبيله ترويض ويبيله علاج و تخدير

انيي للحكومة


طبعا بقولج مساوئها اللي حدت العالم تروح خاص

• توقيت الدوام فاشل يعني الروضة و المواحل الاخرى قبل دوام الوزارات و همن طلعتهم قبلهم بوايد
• مافي مراعاة الفروق الفردية بسبب كثرة الطلبة بالفصل الواحد يعني صف من 23 لين 27
• كثرة التدقيق على المعلم اتخلييه مايقدر يعطي و يبدع بمجاله لانه همهم انتهاء المنهج مو فهم الطلبة
• عودة الطلبة بواجباتهم و شغلهم و ايضا مطلوب مراعاة الاسرة لهم و متابعتهم بالبيت

المميزات حسب ما انا اشوفها كوني معلمة

• الطفل او الطالب الافضل انه يكون تحت رعاية امه من ناحية الواجبات و هالسوالف والاختبارات ( حتى لو الام ماتعرف ولا ماتحب مادة معينة لازم يكون الطالب تحت رعايتها اهيي لانه اهي الوحيدة اللي بتعطي من قلب )
• تقدرين تجتمعين مع المعلمة بكل وقت مطلووب عادي مو مثل الخاص
• عيالج بيتمون بالمدرسة بيتمون ولو حست الحكومة انه الطفل مو قادر ينجح على مر السنين يحولونه مسائي ولا تربية خاصة وهذا شي زين انه عالاقل ياخذ شهادة بالاخير ولو انفصلت طالبة من مدرسة ينقلونها مدرسة ثانية ( بعييدة اكيد عن بيتكم بس عالاقل اتكمل تعليمها )
• مناهج الحكومة الحين اتواكب الخاص بواااااااااااااااايد و مناهج الحكوومة تعتمد على 3 المعلم و الطالب و ولي الامر وهذي الحلقة الدائرية مطلوووبة و ممتازة
• بالاخير الادارة دايمن مع ولي الامر واتحمل المعلم مسالة عدم التزام الطلبة
• تساهل الحكومة في مسالة غيابات الطلبة يعني ماينفصل الطالب على غيابات الا مدرسة وحدة اعرفها بس الباجي عادي
• ببلاااااااااااااااااش
• صج بالروضة و الابتدائي اييج اتصال بديع من اخصائية بنتج ولا ولدج سوو جذي ويحاولون يتصرفون مثل الخاص .. بس اتلاقينه بس كلام يعني قصبن عليها اتحمل و اتحاول اتدور طريقة للتعامل مع الطالب

وبالاخير اقوولج اللي انتي ترتاحين له


بس بالنسبة لي كوني معلمة حكوومة


افضل مدارس الحكوومة


احنا خريجيين حكوومة من قبل


و كانا ماسكين وظايف حلوة من هندسة و دكاترة و مدرسين و بعد وظايف زينة


كونه الديوان رمى ببعضنا بوظايف ادارية هذا مو سبب


والاهم


بالحكوومة ولدج ولا بنتج جداام عيونج بمنطقتكم مو بمدرسة بعيدة عنكم ماتدرون شيسوون فيهم

 

[M!SS.LOBY]

الحطومي افضل

 

[miss_uk]

الحكومه مو شينه بالعكس تعطيج تحصيل علمي زين وحلو
لكن الشخصيه والاخلاق مو مضمونه وتنميه الذات وهالنواحي الاخرى الغير علميه

يعني الحكومه تحصيل علمي وبس

المدارس الخاصه مو الكل لكن التوب عندهم بناء شخصيه ومهارات حياتيه

انا بالنسبه لي ولدي حساااس ويحب التشجيع
مدرسته فاهمته وعارفه قدراته ويعاملون عل هالاساس يعني الاهتمام شخصي مو جماعي
النتيجه انه ولدي المدرسه والتعليم عنده وناسه مو ضغط
الحكومه الاهتمام غالبا جماعي مو شخصي

انا معلمه انجليزي وافضل المدارس الخاصه

هذا رأي شخصي مو معناته ما احب مدارسنا بالعكس افتخر فيهم
بس ما اضمن كل سنه احصل معلمات يخافون الله بالطلبه

 

[كويتية صغيرة]

خل اقولكم شي يضحك
و هذا الشي لاحظته على عيال صديقاتي
خصوصا المدارس الأنجليزية والبريطانية
توقعي ولدك أصدقائه الفلبيني والهندي والانجليزي والامريكي ........ مع احترامي للجنسيات هذي كلها
اما المدرسة الحكومية كلها من اهل ديرتك ........
انا النقطة اللي اتكلم عنها ليس انتقاص في الجنسية ولا تقليل بل احترامي لكل الجنسيات
لكن اتكلم من ناحية العادات والتقاليد ...... لان الطالب خصوصا في المراهقة يتأثر بأصدقائه أكثر من اهله
وحدة من صديقاتي ولدها بالبريطانية ..... تقوللي ولدي يبي يسوي حفلة الهالوين مع اصدقاءه الاجانب..... ووقت رمضان ما يعترف بالقرقيعان مسوين قرقيعان بالبيت و ما يبي يقعد معانا يسميه تخلف. فيروحون اللي كبره من العايلة كلهم الا اهوا ..... بينما اعياد الاجانب يحرص عليها لان اصدقاءه نفس الشي. حتى دروس التربية الاسلامية ما يحرصون عليها مثل صلاة الجماعة وغيره فصار ما يهتم و ما يعرف يقرا قراّن .

فأخواتي اللي عيالهم مدارس خاصة وحتى الحكومة
حرصو على الصحبة الصالحة
لا يصير اهتمامكم بس اللغة الانجليزية وبس
حرصو على تعليم الدين بالبيت
حرصو ان ما ينسى اللغة العربية وان يتقوى فيها لان هذي لغتنا لغة القراّن
حرصو على عاداتنا وتقاليدنا ان ما ينساها

انا اسفة اني رجعت للموضوع مرة ثانية بس كلمة بقلبي حبيت اقولها ....... لان الكل صار اهتمامه لغة انجليزية او اهتمام وبس وقل الاهتمام بالامور الاخرى

 

[الشيخه فطامي]

حبايبي في نظام يديد يتبع في مدارس الحكومه اسمه النجاح اعتقد كل شي بالنظام عل الايبادات او الكمبيوتر او تشوفين التحصيل العلمي حق الطالب منه بس مو كل مدارس الحكومه يتبعونه مدارس معينه انا سمعت بالنظام بس مو عارفه

 

[M!SS.LOBY]

الحكومى افضل

 

[ام عماري]

كل واحد فيهم له مميزات وسلبيات انت لج القرار اللي ترتاحين له

 

[برونزية رشيقة]

حاليااااااااااااااا (بعد تطوير المناهج والكتب + إعطاء دورات مكثفة للمعلمات والناظرات والإداريات+ الاهتمام بالطلبة المتفوقين) الحكومة أفضل

وأللي بس تبي عيالها أقوياء باللغة الأنجليزية على حساب الناحية الدينية وعادات مجتمعنا الكويتي من حرام وعيب خل تتم بالخاص .

 

[شانيل نمبر 5]

انا عيالي بالخاص
ومدرستهم ما تحتفل بالاعياد الانخليزيه
وشخصيتهم مافيها اي نوع من المياعه والدلع
وكانهم من المدرسه الحكوميه
وهذا يرجع بسبب اختياري للمدرسه الصح
كلهم كويتين
واعرف مدرسات ابد ابد ماكو اهتمام بطلبه هذا عيب الحكومه

 

[شانيل نمبر 5]

واللي يسال عن مدرسه عيالي
التكامل العالميه

 

[دارسين]

التكامل قليل اللي يمدحها ياليت تنورونا بنات

 

[ام رينـاد]

انا عن نفسي افضل الخاص مادري ليش ارتاحلهم

بناتي بالخاص وكلهم بسن الحضانة ...بس اذا صارو بالابتدائي راح احولهم حكومه لان ميزانيتي ماتستمحلي للاسف