انقذوني حياتي الزوجية

[قمر العسل]

السلام عليكم قصتي طويلة واريد حلا سريعا ( انا عشت قصة حب لمدة 9 سنين وانتهت بزواجي منه لكن اهله لم يكونوا راضين عن الزواج لأني غريبة وهو كويتي بدوي فتحدي اهله وانا تحديت اهلي لانه هو غريب وقلت لاهلي انا اريده او اموت نفسي وبعد سنة زواج تفاجات ان كتب كتابه علي بنت عمه وهي اصغر منه 14 سنة وهو كان يخاف يعرف اهله بزواجنا فطلب مني أني أتحمل واصبر علشان يخبر اهله وانا ما احب المشاكل وهذيل اهله ما اقدر اعمل مشاكل علشانه وتفاجات اخته الكبيرة تخطب بنت عمه لانهم يعرفون ان هو مو متزوج ولازم يزوجونه ولما كتب كتابه كنت عروس وكنت حامل خبرني انا كتب كتابي قلت له كيف تكذب وتضحك وتخدع الناس قال انا اخطات وكنت خايف ووافقت شسوي قلت حقه راح تظلم إلبنت انت ما تحبها ولا تبيها قالي خلاص ما اقدر اسوي شي لازم أتزوج قدام الناس وانهم بدو فكرت اما حكيت وانا اروح والدي متوفي وما عندي إخوان وما عندي احد سكت وقلت أوكي شسوي ويوم زفافه انا جنيت ومت والله الله يعلم شصار فيني وتحملت والحين هي ما تدري ان متزوج وما يعملها معاملة حسنة قالي انا ما أبيها ومو حلوة قلت طلقها قال لا ما اقدر قلت حقه أوكي قول حق اهلك أنت متزوج راح قال حق خواته قال أوكي تبيها وتخلي الثانية وهذيك خست ان زوجي ما يعاملها معاملة زينة فعرفت بوجودي وكان يناديها باسمي وقال لها انا ما ابيج وراح اطلق كلمته قلتله ليش تظلمها هذي صغيرة خلها تشوف حياتها وهي ما تدري ان متزوجني قبلها وقاعد يخدعها وهو قاعد يظلمني بحقوقي وطلبت الطلاق وقلتله خلص عيش معها واتركني ما يبي يقول انا احبك وابيج وانا زهقت كل يوم ابكي وأقعد بروحي ما عندي احد من اهلي غير ربنا شسوي واذا عرفوا انا موجودة بحياته راح اطلق وتقعد بنت عمه شسوي ساعدوني *

 

[شادن33]

لا حول ولا قوه الا بالله الحين كل شي طاح فوق راسج! حبيبتي إحنا ما راح نساعدج لان الوحيد اللي يقدر يساعدك اهو زوجج اللى سوى الخربطه هاي كلها عفوا لازم يكون رياال وقد افعاله الحين اهو متزوج ثنتين ولا يقدر يبتعد عنهم لان الاولى يحبها والثانيه بعد بنت عمه حرام ماتدري باللى سواه فخليه يقول حق اهله عنج اذا يبي يستمر معاج وتعيشين حياه طبيعيه وبنفس الوقت يعدل بنج وبين بنت عمه حرام هي مالها ذنب !!!فالخلاصه الموضوع كله أبيد زوجج وهو للأسف يتهرب من المسووليه الله يهديه

 

[a7la_7b]

هو الغلطاااان شنو في بهالزمن رجال يخاف من اهله المفروض كان يقولهم انه متزوجج بدل لايظلمج ويظلم بنت عمه الله يهديه بس ويصبر قلبج *

 

[سفيره الكويت]

عشان جذي انا ضد العادات والتقاليد لانها تحكمنا رجال ونساء وافكارها باطله ومالها لا صله بالدين ولا بالواقع لو كل شخص ياخذ

لي يبيها كان افضل حالنا...!

خليه يختار حياته وقولي له مو زين تقصر معاها لا تظلمها وانا ادري تحبني بس اذا ماتبيها ليش تحطها على ذمتك وتاخذ ذنوب بسبب معاملتك

انا اعرفك ريال طيب وانت تزوجتني بالحلال وباجر اهلك بيكونون امام امر الواقع ويتقبلوني

 

[مغرورةبس معذورة]

الله يعينك ياقلبي

 

[حشمه]

الله يعينج بس لازم زوجج يبلغ اهله انه متزوج وخلاص بنت عمه ومتزوجها وبعدين شخاف منه

ريال شكبر وقريب بكون عنده ياهل لازم يعلن زواجكم وخبر حملج بعد ويعدل بينكم حتى لو مايحبها

وهم بنت الناس مو لعبه يتزوج ويطلق ويعاملها مو زين الله يهديه ذكريه بربه وان لايظلم ترا دعوه المظلوم مجابه

 

[كلآم نواعم]

الله يعينــج حيــاتي على بــلوآج , والله مـادري شقـولج بس عمــرج لا تخسريــن اهلــج عشـــان
واحــد تعــرفتــي عليــه , لآنــه بي اليـــوم الــي بتحسيـــن فيــه انـــج نــدمــانه على كــل شي
الله يسيـــــر امـــورج و ويرزقج بـ ( الولد ) الــي زوجج يفتخــر فيــه وبسببه يعتـــرف فيــج وفيــه جدام الكــل

 

[om-3azo-83z]

الله يعينج والله ماكو حل غير انج تقنعينه يعترف فيج لا يظلم لازم يعدل بين الثنتين
انتي حامل باي شهر؟
اعتقد اعتقد ان الحامل ما تتطلق الا لما تولد مادري صح ولا لا فــ لا تخافين اهله ما يقدرون يخلونه يطلقج
خيريه بينج و بينها عشان لا يظلمج ولا يظلمها

 

[flawar]

الله يهدية زوجج غلطااان
ليش ماتكلم من الاول ظلم البنت معااه الله يسامحة
ع الاقل انتي عارفة ان بيتزوج. بس الثانية فوق ظلمة شلون راح تكون الصدمة لما تعرف ان متزوج قبلها
خلاص اللحين كل شي صار لازم يعترف انج زوجتة ويعترف بكل شي عند زوجتة الثانيةواهلة
علشان الكل يعرف طريقة ويعرف يتصرف
الله يعينكم

 

[كليـ دلعـ]

الغلط منج انتي

ليش تسكتين له!؟

يوم قالج انا ملجت ع بنت عمي!؟

ليش ترضين وتسكتين!؟

وين قاعدين!؟

ماعندج ردت فعل!

عادي عندج!؟

قالي ملجت!!!

هذا كلام بالله!؟!؟


المفروض قالبه الدنيا ع راسه

شكووو يتزووج؟؟!

ش عذره!؟!!

خوش عذر لازم اتزوج خايف من اهلي وجدام الناس!


انت ماهموك الناس

ومتحديهم ومتزوجي

والريال شايل عيبه

ويمشي بكيفه واراادته

محد يمشيه!!

فلا يخدعج بقمممه الخديعه!


بعدين تعالي!

شلون متحدي اهله وماخذج

وهوخاشج عنهم!

شلون متحديهم واهم مايدرون فيج!؟!

دام مايدرون عن زواجكم معناته ماتحدا احد

ولاضحى بشي!!

فلا توهمين نفسج

اهم جذي يحبون ويموتون وليوصلو للي يبون

كشروو عن انيابهم

والا ش اللي يخليه يتزوج عليج وانتي عروس حامل!؟!

العذر شنوو!؟!

ويعذربها عندج واهو متمسك فيها!!!!!!!!

شدراج انه مايعاملها زين!؟

شفتي بعينج!؟

سمعتي بذنج!

والا قاااال لج!؟

اذا اهو اللي قال

ترا يجذب وترا يخدعج

واللي يخدع مره يخدع الف مره!!

وانتي الغلطانه اللي ساكته عنه ومخليته يتزوج

وانتي بقممه البرووود

شتنطرين من زواجه يعني!

بيقرب لج اكثر؟!!

بيصونج اكثر!؟

بيحبج اكثر!

شي عجيب!!!

انتي لازلتي ف البدايه

اليوم مايبي يطلقها

باااجر يتعلق اكثررر

وكل مالها تزيد اهميه

وبتيب عيال

وبيرووح لها ويخليج

وبتفعدين

تبجين ع اللي كان!!!

لومايبيهاا ماملج عليها

ولو مايبيها جان طلقهاا

مويقعد يجذب عليج مابيها موحلوه

شنو موحلوه!

يعني لوكانت حلوه راح تاثر فيه. !!!

اهو مويحبج انتي. ؟

ع قولته!؟

اهو ومتزوجها واجهه اجتماعيه لاا اكثر! ور

عيل شكووو يتكلم بالشكل والجمال!؟!

المفروض مايهمه ليصارت مشاعره الحقيقيه معاج!؟!؟!؟

فهمتي!؟

استوعبتي!؟

لوصج يحبج جان مافكر فيها تكون حلوه والاجيكره

فهمتي!

لاتصيرين ساذجه

لاتخسرين اكثر

انتي بعظمه لسانج تقولين كله قاغده بروحج!!

شفتي!؟

هذا واهي مايابت عيال!!

هذا واهي لازالت يديده!!

عييل لما اتمكن اكثر شبيصير!؟

الله يهديج وييسر امرج. ويوفقج

حاولتي تشوفينها بعينج!؟

عشان تكتشفين اهي حلوه والا جيكره ع كلامه!؟!


شوفيها وانا متاكده انها حلووه

وانه يجذب

عموما

لاتسكتين

علميها انج زوجته

علمي اهله انج زوجته

دقي الحديد واهو حامي

لايستغفلج اكثر

لاايستغلج اكثر

ماصانج اهوو

تزوج عليج وانتي عروس بقمه فرحتج

ماهميتيه


خلاص لايهمج

علميهم

وطلعي بالصوره

وسنعي حياتج بيدج. لاتنطرين رحمته

لاتعيشين بالظل

وتخسرين حقوقج

ونصيحه

اللي سوا جذي

لاتصدقين منه حرف

الالما تتاكدين بعينج وباذنج

 

[المرتاحة]

الله يكون بعونج

 

[صمــت_ALsHfaaH]

انا مع كلي دلع

كلامها عيين العقل

الله يكون بعوونج ويكتب لج الخييير

 

[بنت حظوظ]

خلكم انتوا الثنتين على ذمته بعد شتسوون

 

[ماحب اتدلع]

والله مادري عندج برود والا انج تبين احد يصرف عليج بس مادري في مرة يتزوج ريلها تقول خلني اسكت بعد شسوي الحمد لله والشكر خلاص مشكلتج مالها حل وخله يطلقج هذا اذا فعلا متزوجج

 

[سارة ة]

وووااي الله يعينش

 

[غيــرة انثى]

خل يطلق بنت عمه كلش مالها داعي الياهل

 

[أحلام مؤجلةة]

معنا كلامه اهلي وزوجتي الي اختاروها لي هذا المهم عنده وانتي طقي راسك في الجدار
انتي ياقلبي رخصتي نفسك من البدايه ورضيتي تتزوجين بالدس
وهو وش عليه اخذ البنت الي كان يحبها واتزوج بنت عمه وماخالف كلامم اهله
وانتي وشلون بترضين بالمهزله ذي عليك وع الي في بطنك
عاد ذا شي بيدك
انا لو مكانك اخليه يعترف بزواجي والي في بطني ويطق راسه هو في الجدار رجال اناني من جد

 

[دندونه@@@]

والله من البدايه باين نوع الرجال اللي ما احترم اهله وما دور رضاهم لا تتوقعين يدور رضاج صحيح نحب لحد الجنون بس ما نضحي برضى اهم اثنين هم الوالدين وما اعتقد انج اغلى من والدينه حتى لو كان حبج بقلبه كبير