انتي ابلة عربي؟؟ لا ومتوسط؟؟ عيل دخلي على طول

[البندري22]

السلام عليكم













حبايبي ابي اعرف منو ابلات العربي متوسط غيري عشان نستفيد من بعض


ونحقق الهدف من هالمنتدى اللي اهو التقارب والتعاون:eh_s(3):



وانا عن نفسي ما راح ابخل بافكاري على خواتي بنات هالمنتدى الروعه



اتمنى ماتطنشون لاني اول مره اكتب بمنتدى المعلما ت وحاسه نفسي مستحية منكم احسكم تعرفون بعض وانا ماتعرفوني:eh_s(6):

 

[¤§ زيتونة §¤]

حبيبتي البندري




احنا تحت امرج باي سؤال او استفسار


حياج الله

 

[البندري22]

هلا ومرحبا


شلونج ياقلبي



والله انا مشكلتي مشكله وقصتي قصه بعدين بقولها بس الحين بسال ماعندكم برنامج اذاعه حلو عربي متوسط

 

[¤§ زيتونة §¤]

هلا حبيبتي


عن شنو بالضبط تبين؟




عندي فكرة بس ما ادري تناسبج ولا لا ؟؟




موفقة

 

[البندري22]

هلا حبيبتي اي موضوع او اي فكره

انا ودي احسن الصوره


انا تعينت الكورس اللي طاف وكنت بالشهر السابع وشقيت الغياب شق وبعدين ولدت واخذت اجازة وضع فملفي اسود بسبب الغياب وودي احسن الصوره

 

[¤§ زيتونة §¤]

شوفي حبيبتي


استعملي البطاقات الملونة في التفريق بين همزة الوصل والقطع -
من خلال مشهد تمثيلي بين اختين يشتكون حق بعض وكل وحدة تشتكي انها مثلا ما ينطقونها والثانية ما يكتبونها

او

برنامج التوائم الذين انجبتهم اسرة اللغة العربية
مثلا اللام الشمسة والقمرية بحيث انه تبداين البرنامج بخبر عاجل ان اللغة العربية رزقت بتوام من الاسماء هما اللام الشمسية والقمرية او اي اثنين تختارينهم وبعدها يبدا المشهد انهم يلعبون ويبداون بالمشاجرة على ان كل وحدة منهم تبي الحروف كلها حقها فتقومين انتي وتفرقين بين حروف كل وحدة باللام القمرية والثانية الشمسية وتلبسين البنات البطاقات بخيوط هذي لها لام قمرية تاخذ الحروف القمرية والثانية الشمسية ويدخل الاب اهوا يوزع بينهم بعد ما يهاوشهم على الازعاج اللي مسوينه ههههههههه







وعندج برنامج الافعال تلاقينه بموقع وزارة التربية باسم الحقيبة الالكترونية اعتقد




واتمنى اني افدتج

 

[البندري22]

الله عجبتني سالفة الهوشه هههههههههههههههه


بس شكلي ما راح افرقهم بقولهم تهاوشوا بعيد عنا هههههههههه


ما قصرتي حبيبتي وكل ماتخطر ببالج فكره على طول ما وصسيج حطيها:eh_s(3):

 

[¤§ زيتونة §¤]

البندري


ليش برنامج اذاعي بس؟؟

سوي درس ريادي مو نموذجي؟؟ داخلي بين زميلات القسم والادارة بس

ولا تتكلفين فيه وايد يعني شي بسيط ووسائل حلوة



اي صف تدرسين يمكن افيدج

انا بسوي ريادي هاليومين
ونموذجي بعدين بشهر 4 يمكن



حق ثامن و سادس





ترى الدرس احسن واضمن للتقارير



شرايج؟

 

[البندري22]

اقسملج بالله يازيتونه اني ودي



وانا الحمد لله شاطره بالعربي حيل والناظره والموجهه دشوا مره علي ومدحوني يقولون وقفتج حلوه ولغتج فصيحه وتفهمين

وانا احب التدريس بس البلا في المشرفه المصريه الاستغلاليه اللي تكره الكويتيات ووايد حاطه علينا

وتخرب علينا


وودي ابين نفسي واثبت وجودي

وودي بدرس ريادي

انا ادرس سادس وسابع

 

[¤§ زيتونة §¤]

اشعليج منها انتي قولي لها بسوي وزهبت شغلي قصي عليها
وبلغي الموجهة باي يوم قررتي تسوينه واذا احتاج الامر كلمي الناظرة خليها اهيا تطلبه منج بشكل رسمي وما تقدر المدرسة الاولى تعارض لان من الناظرة

والدرس الريادي حلو للي تبي تثبت نفسها لانه محد له كلام بعدها



سوي في سادس
موضوع ليتني كنت معهم انا بسوي هالاسبوع ريادي فيه حصة حليوة ووسائل الحج وشغلات مالت الحج واعزم زميلاتي والناظرة وافتك منه وما يبيله شي كله اشياء موجودة وبسيطة




فكري بالموضوع حبيبتي لا تقص عليج هالمصرية مصيبة ما تبيكم تترفعون ولا تبينون نفسكم

 

[البندري22]

شنو فكرة درسج انا يوم السبت بدخل في درس ليتني كنت معهم

 

[¤§ زيتونة §¤]

هلا حبيبتي




انا سويت مشهد الدرس

عايلة متيمعين
جدامهم تلفزيون كرتون مفرغ

ومن وراه البنات لابسين احرام ويطوفون حول الكعبة

ييبي الكعبة من قسم الاسلامية


وخلي المشهد حوار بسيط مختصر مقتبس من الدرس نفسه


وشوفي اذا عندج مجسم الكعبة مال الحج حطي فيه ككاو ووزعيه عالضيوف

وخلي البنات اييبون لج حتى لو علب ماي زمزم فاضية حطيها على طاولة بروحه مع اوراق عن الحج وشوفي خبرة الحج بالروضة اذا عندج احد انا خذيت منهم مسابقة توصيل الحاج الى الكعبة بمتاهة يعني كانه ركن الوسائل للدرس عرفتي؟

انا يابولي متروسة والله يهبلون بناتي وسووا مجسمات حلوة للكعبة حقهم ويابو كاميرات الحج وزعوها عالابلات



يعني جذيه الدرس حلو وفيه افكار وايد





هاااا شرايج؟؟





عاد عطيني افكار انتي بعد خل يصير تبادل

 

[البندري22]

انا يديده والى الان ماعندي شي اللهم مجلة وبقولج مواضيعها


بس على فكره وحده معانا بالقسم بتسوي درس نموذجي الاسبوع الياي عاد بكتبلج كل شي فيه اهيا تدرس ثامن

 

[¤§ زيتونة §¤]

هاا ابلة شخبارج هههههههههههههههه

يعطيج العافية



اي شوفي شنو بتسوي عشان استفيد منها حق درسي النموذجي بشهر 4

وللحين ما عرفت اي درس والله
ولا كتبت ولا زهبت محتارة بين ثامن وسادس




بس ثامن احسن عالاقل يريحوني ويسوون اللي ابيه لانهم يعرفون شنو يعني درس نموذجي

 

[¤§ زيتونة §¤]

ما قلتيلي شنو مواضيع مجلتج يمكن ابوقهم




انا اسوي مطويات ولا اصدارات عن الكويت ولا اي مناسبة تمر هالكورس بس لليوم ما بديت باي شي

مادري ليش كسلانة والله هالايام

 

[البندري22]

هلا والله

المجلة سوت نص مواضيعها وحده سوريه وانا علي الباجي وقاعده افتح هالمنتديات وادور ةركزت اكثر شي على الكويت معاني اسماء مناطقها ونبذة عنها وصور عن العيد الوطني وقصيدة وليما الحين ما خلصتها

وبالنسبة للدرس النموذجي راح يكون يوم الاربعاء وصف ثامن


انتي تبع اي منطقة تعليميه


اذا غير عنا انصحج تسوين نفس موضوعها وتفكين عمرج اذا كان حلو

بكتبلج اهدافها واعلمج شسوت

بس هذا اذا كان موضوعها حلو وان شاء الله يكون حلو

 

[¤§ زيتونة §¤]

هلا حبيبتي



انا بمنطقة مبارك الكبير

ومو مشكلة اذا تشابهت الدروس عادي كيفنا نسوي باللي نبيه



انا مفكرة بدرس شعر اسمه
لا يشكر الله من لا يشكر الناس




واهوا حلو موضوعه عن الصداقة واثر الصديق بالحياة واعجاب الشاعر وحبه لصديقه






الله يسهل ان شاءالله


انتي شنو نويتي تسوين؟؟
ليتني كنت معهم ولا غيرتي؟؟


موفقة

 

[البندري22]

عجبتني فكرتج في ليتني كنت معهم بس احس مايمديني لان بدخل بالدرس السبت

 

[¤§ زيتونة §¤]

مو لازم كل شي اول حصة

طلبي من البنات حق الحصص الباجي وقولي لهم راح اعزم الابلات ابيكم تبيضون ويهي وتييبون وسائل حلوة عشان يقولون انتو شطار

واذا تعرفين احد بقسم الاسلامية طرشي ييبي منهم مجسم الكعبة

يعني خللي الوسائل حق باجي الحصص








اي شي تبين لا تترددين قولي

 

[البندري22]

يا بعد عمري عساج ذخر



تصدقين ابي اقدم نقل شنو احسن مدرسة متوسط بمبارك الكبير؟:eh_s(8):