اتوقع الخوات بيدخلون و يكفون و يوفون عن الاسواق .. انا مو وايد احب الاسواق
الترفيه : عندج حديقة الشعب ، حولي بارك ، أرض الاطفال ( هذي حلوة لليهال خصوصا اذا تبين مكان مسكر و دافي ) ، المدينة الترفيهية .
المتاحف : عندنا متحف الفن الحديث ، عندنا بيت لوذان يسوون فيه معارض فنية و صور فوتوغرافية من وقت للثاني ، المركز العلمي انصحج جدا جدا جدا بزيارته يعني اذا ما رحتيه ما كأنج زرتي الكويت لأنه صج شي نفخر فيه ، فيه اكواريوم و قاعه سينما ثلاثية الابعاد و قاعه الاستكشاف تهبل تهبل حق اليهال و حق الكبار هم بعد ...
وعندنا المتحف العلمي بس هذا تحت الصيانه ...
المسرحيات الحين ماكو غير مسرحية طارق العلي اسمها خاربة خاربة بس مادري اذا حلوة او لأ .. اذا تحبين طارق العلي أتوقع بتعجبج
و عندنا ابراج الكويت .. اهي فيها مطعم . و فيها قاعه دوارة .. بتعجبج خصوصا اذا رحتيها الصبح حق الريوق .. وايد جوها حلو
و حاولو تنظمون لكم رحلة حق جزيرة فيلكا ... تسافرون لها بالعبَارة ..
و عندج الواجهة البحرية جدام مارينا مول هذي وايد حلوة تتمشون فيها و تقعدون و تستانسون .. و فيها حدايق و ساحات حق الاطفال اذا يحبون يلعبون كره سله ..
و عندج أرض المعارض في منطقة مشرف .. هذيل كل فتره و الثانية يسوون معارض حلوة و الحين مسوين معرض العطور و الساعات
و اكو مكان وااايد حلو بصراحة انا وايد أحبه
اسمه سوق المباركية
اهو سوق تراثي و شعبي كويتي ... وايد حلو .. فيه مطاعم و فيه قهاوي و ساحات و محلات تراثية حق الدشاديش ( الكندورات ) و العبايات و البراقع و البشوت و النعل و المسابيح و العطور و البخانق و الاثواب و كلللل شي تراثي .. و اذا رحتي بالنهار سئلي هناك عن سوق الحريم ... كل الي يبيعون فيه حريم لابسين براقع و يبيعون أشياء حريمية قديمة ... ملابس .. مكياجات .. حنه .. و هالسوالف الحلوة .. و التمشي هناك طبعا عجيييييييييييييب و حلو و تحسين بجو الكويت الاصيل و الحلو
اما عن المطاعم .. انصحج تروحين مطعم : فريج صويلح .. هذا أكل كويتي و وايد حلو و حتى ديكوراتهم تراثية
و عندج شوكليت بار .. اذا كنتي تحبين الكاكاو .. أنصحج تروحينه و هذا موجود في مارينا كريسنت ( مجمع صغير جدام مارينا مول كله مطاعم ) .. كللللللللللله أشياء كاكاوية و فناااتك و مشروبات و مأكولات روووعه
و وسائل التنقل في الكويت اما انج تأجرين سيارة .. او تاخذين تاكسي أسهلج اذا ما تدلين
و عندج منطقة السالمية كلها حلوة فيها وايد مجمعات و اسواق ..
و مجمع الافنيوز كلللل شي فيه .. مطاعم و العاب و محلات و كارفور
عندنا صالة التزلج عالجليد ..
و ما نبي الا سلامتج .. بس وصلي سلامنا لعياييز الفريج و بوسيلي ام خماس و ام سلوم ..<<<< اموت بهالثنتين والله !!
