امـانـه اللـي راحـت مـالـيزيـا اش تـنـصـحـنـي فـيـه ! !

[بيت التوت]

السلام عليكم ورحمةالله وبركاته


شلونكم يا احلي كويتيات

بنات ديرتي ابي فزعتكم اذا الله قسم بنسافر ماليزيا

واول مره بنروح لها اش تنصحوني فيه وين ناجر؟؟؟ وشنوآخذ معاي

من لكويت ؟؟؟ وشنو انطباعكم عن شعبهم قريت ردود بعض الخوات

يتكلمون عن تايلند وانهم احتراف نصب وسرقه اخاف ايكونون مثلهم

وجم كلفتكم السفرهوجم قعدتو فيها ؟؟

تكفون قولولي تدرون اول مره وابي استفيد منكم


لاتبخلون علي وحتسبو الاجر والدين النصيحه

 

[لموية العسولة]

هلا حبيبتي ماليزيا تهببببببببببل حق اليهال قبل الكبار وتينن حق التسوق واحلى شي الشحاطات تكرمين هههه ماعليه طشيت عن الموضوع ...المهم

قوليلي جم المدة وجم اعماركم وانا اضبطلج احلى برنامج ...على فكرة اهي رخيصة حيل بس وايد ناس يقولون تغيرت وصارو نصابين بس احنا الحمدالله ماصادفنا اشياء جذي ...ودخلي بعد على منتدى المسافرون العرب وبتلقين كل اللي يسرج عنها

 

[الالماس واللولو]

ماليزيا وايد روعة واكثر من روعة

انا اضع بين يديكي الغاليتين هذا الرابط وانشاء الله يعجبك يالغالية:eh_s(15):

www.daleel-malaysia.com/

ولا تنسين تروحين العجلة الدوارة مثل اللي في لندن (عين لندن)

لكبار الشخصيات. ارتفاعها 60 متر ومجال الرؤية 20 كم. والرحلة تستغرق 12 دقيقة.
الرسوم: 15 رنجت للكبار , 8 للصغار (3-12) و (55 سنة وفوق), الاطفال اقل من 3 بلاش.
اوقات التشغيل: 10 ص - 10 م. اوقات بيع التذاكر: 8 ص - 6.5 م
تقع علي بحيرة تيتي ونسا...قريبه من وسط العاصمة..

http://www.eyeonmalaysia.com.my/home.html

وراح افيدكم بالكثير اذا كان عندي وقت:eh_s(17):

 

[lolo77]

مشكورة اختي الماس والولو على هالمعلومات واحنا ناطرين المزيد

انا زرت ماليزيا مرتين والحمدلله المرتين استمتعنا بوقتنا واليهال استانسوا وايد
ترى ماليزيا سنه عن سنه تغلي وترتفع اسعارها والافضل طبعا تحجزين من اهني بالكويت الفنادق والطيران ا لداخلي
شعب طيب وحبوب ومحد له شغل بالثاني
احنا من سنتين طلع تذاكرنا مع اقامتنا بالفنادق 2 كبار و2 صغار كله 1200دينار وسكنا كله بفنادق 5 نجوم امثال تايم سكوير وفندق سن واي لاقون
وانتي وحسب نوعج تحبين المشترى عليج الحساب
ومثل ما قالت اختي ان احسن شي عندهم الشحاطات والجنط بعد سعر وجوده
وطبعا الجو رطب ممطر بس رطوبه حلوة
واكثر الرحلات لازم تروحيلها من الصبح لي المغرب كل شي يسكر

هذا اللي اذكره
اي نسيت يعرفون اشوي عربي والاكثر انجليزي
وما تحاتين التكسي من تركبين اهو يقولج الاماكن السياحية وين
دوله صج ونيسه
هاها

 

[مزيونه وشقره]

ماليزيا تينن روحي مجمع ميجا مول

تايم سكوير

تون تور

ماينس وندر لاند




مع تحياتي يا حياتي

مزيونه وشقره​

 

[أوركيد]

تونس ماليزيا ..وعلى قولة البنات للصغار قبل الكبار ..

عيبها ماليزيا جوها الحار والرطوبة ...غير جذي تهبل

افاموزا حلو وتقضين فيه يوم كامل ..

طبعاً كوالالبور العاصمة للشوبينغ والمجمعات (التوين تاور- تايم سكوير- ميغامول - الحي الصيني- صن واي لاغون ..وغيرها واايد)

جيتنتنغ..مرتفعات وبارده ...جوها عجيب وفيها مدينه العاب ..

جزيرة لينغاوي..ماعجبتني ..صج طبيعة تينن ..بس وايد رطبة ومافيها مجمعات او العاب وما تصلح لليهال

 

[النبيطة]

لوبتروحين جزيرة بينانج استمتعي بالاعاب المائية والبراشوت والمناظر
انتبهي يقصون عليك وتروحين حديقة فواكه واسماك >>>>صكة قوايل وشموس وذبابين ووسخ ويوم ضايع على شجرة
كل عالتعب وتصير شجرة معروفه عندنا <<شغل سياحه
يعني خلي بينانج منتجع فقط عندك قولدن سانسزتابع لشانجريلا روعه
موتيارا بس هالسنه يرمومونه
بارك رويال على السوق الليلي غلوه بسب الترميمات

 

[شهدQ]

شوفي مواضيعي وبتلقين الي يسرج

 

[الالماس واللولو]

وازيد من الشعر بيت

حديقه الحيوان/ حديقة الطيور/ حديقة الفراشات/ مصنع الكاكاو/ مجمع الماينز هذا داخله نهر تركبين طراد من داخل المجمع ويطلع فيج برع للتنزه وفيه 3 رحلات اما البحيره الصغيره او الكبيره او كلهم انا خذيت الكبيره بس وتمشينا عالبحيره الي فيها فندق الخيول الذهبيه / بتروجايا في هناك بحيره العشا عالمركب حدا رومانسي مطعم خيمة الصحراء عراقي / كنتاكي وايد حلو عندهم/ ماكدونالدز/ جوني روكز عجيييب في شارع العرب هذا مطعم/ منتجع افاموسا هذا رحلة يوم كامل من الصبح وفيها كل شي حلو حق اليهال فيه طيران شراعي وفيه ركوب الخيل وفيه عالم سفاري جزيرة القرده وعالم الكابوي عروض وكرنفال مساءا وعالم الماء سباحه ووناسه ونقزه بالماي./ سن وي لاقون حجزي لها يوميين فيلا مع حمام سباحه خاص وااايد حلو وفيه مدينة ملاهي ومدينة العاب .مطعم المناره رومانسي في اعلى برج المناره لازم تحجز علاقل قبلها باسبوع عشان تلقا حجز الفنادق الحلوه اهي جي دبليو ماريوت وعندج فندق بعد حلو وزين خمس نجوم اسمه استانا انا سكنت رتز خلف شارع العرب صغير وهادي/ وسكنت رينيسنس بس بعيد عن شارع العرب.
مرتفع جنتج ليله كافي حق اللعب وفيه التلفريك والعابهم حلوه./ جزيره لنكاوي عالاقل 4 ليالي اذا عرسان بس اذا يهال ووووويع .رحلة المنقروف البحريه / رحلة صيد/ رحلة سن ست./ رحله الى بحيره العذراء الحامل / حديقة التماسيح/ حديقة الثعابين./ مقام مهسوري. رحلة بحرية كهف التماسيح وكهف الخفافيش./ الرحلات البحريه اول ما توصل الفندق تسأل الكونسييج عنهم يعطيها الاسعار وتاخذها مع الرحلات الجماعية اونس / وفيه بعد في لنكاوي سوق الليل وجم مجمع يمه بس جدا عادي وفيه الكابل كار التلفريك مادري شنو اسم المكان بس كان بجانت الفندق الي سكنته برجايا بيتش حمام السباحه عندهم عجيب بس بحرهم عادي الشاننج بيتش فيه اكواريوم وفي مطاعم مأكولات بحرية واللوبستر عجيييب الكاميرون هايلاند مكان وااايد حلو 5 ساعات من كوالالمبور بالتاكسي هذه المنطقه حق الرحه ريلاكسيشن ما فيها شي بس الجو غجيب وفيها حديقة الفراوله تاكل الفراوله لذيذه خيال وكبيره شوي وحيقة الزهور ومعبد بوذه حديقة الفراشات وتقدر تسأل الفندق عن رحلة الغاباااات انا رحتها بس مو مالت يهال لأن فعلا واااايد خطره عادي اتمر حيه ولا سحليه عادي الطيحه بالطين والتزلق حدا آكشن بس كان رعب لأن ان دشيتي لازم اتكملين لأن مستحيل العوده بروحج ويبيلها سندل ولبس خفيف ./ حديقة النحل عسل طبيعي./ جزيره بيننج ليلتين كافي / معبد الثعابين ومعبد بوذه وكلها مصانع نرجع ب كوالالمبور في بحيره وااايد حلوه بس خطره لأن كلها تماسيح اسمها بحيره الحشرات المضيئة سبحان الله حشرات فيها لمبات اتشوفينها عالشجر كأن شجرة اكرسمس من كثر ما اهي اتشب ولازم بليل عشان يبين بالنهار لألألألألأ وعندج اكواريا بمجمع التوأم بالسردات فيه يوم مخصص تقدر تسبح مع القرش واتوكله وبس مو قادره اتذكر مخي قفل هذا ولاشي خلها اتشوف الجداول وتختار انا الجداول ما استغنييت عنهم:eh_s(17):

 

[توت عنكبوت]

شوقتوني لها والله انها بخاطري الله يسهلها ونروح

 

[؛؛ أم الغلا؛؛]

يا حلو ماليزيا وياحلو سوقها اتونس هالديره شرحة وماتملين منها ،، ديره فيها حياة من الصبح لغاية الليل ،، روعة بعطيج خلاصت تجربتى
اهم شى تاخذين ملابس قطنية وشورتات داخلية عشانج بتمشين مشى بالسوق من كثر ماهو حلو،،
وحاولى تسكنين بشارع العرب كله فنادق نظيفة واهم المولات فيه ومطاعم عربية وبجذيه ماتحتاجين لسيارة الاجرة الا للرحلات ولزيارةبرج التوأم وسوق الليل( بالعاصمة كولالمبور )
واذا رحتى جزيرة بيننج احجزي بالفنادق اللى المطلة على الشاطى
مافى داعي تشيلين جنطتج اللى فيها البوك معاج بالرحلات ،، خليها بالسيفتى بوكس
واذا طلعتى للتسوق اخذي جنطتج وخليها باليد اللى يم ريلج واخذي فلوس اللى تكفيج للتسوق فى اليوم الواحد ،،جذيه تضمنين انه اذا انسرقت الجنطة ولا ضيعتيها ما توهقين
والجوازات لا تشيلينها وتمشين فيها مثل رفيجتى سرقها واحد صينىوتبهدلت
حطيها فى صندوق الامانات بالفندق
والله يتمم لج الرحلة على خير ان شاء الله

 

[؛؛ أم الغلا؛؛]

عجبنى الموضوع :eh_s(20):
اذا تبين نصحيتى خلى ترتيب الرحلة كالتالى
ترفيه وراحة واستجمام بعدين تسوق
يعنى اول ماتوصلين روحي سكنى بالفندق اللى بالصنواي ليغون( المدينة المائية ) هالمنطقة عبارة عن مدينة العاب مائية وجسر معلق بالهوا خيالى ومدينة العاب ومول كبير احجزي يومين الى ثلاثة .
وبعدين سافري مره ثانية بالطيران الداخلي لجزيرة لنغاوي( يكفيلها يومين ويوم الوصول خليه للراحة حلوه للمعاريس ومملة للاطفال)
وجزيرة بيينج ( بصراحة يبيلها خمس ايام الى اسبوع )اسكنى بالشارع اللى فيه فندق الهوليدي ان ( اختاري الفندق على حسب الميزانية بس اهم شىء يكون مطل عالشاطى هذا ) الشاطى يونس من الظهر للين تغيب الشمس تركبين البراشوت ،والبنانا ، الجتى سكى ،الخيل .
وبالليل يفتح سوق الليل الصينى تطبى وتخيرى جناط كبابيس تي شيرتات كل شى حلوورخيص بس كاسريهم
وبعدين روحى للعاصمة كولالمبور عشان التمشى والرحلات والتسوق وانتى بالعاصمة احجزي رحلة لمرتفعات جينتج من الصبح لليل ماتسوي تنامين فيها يوم واحد يكفى.
اذا تبين ارقام سايقين اجره ثقة ومسلمين حاضرين

 

[\ بدوية ذووق /]

عسى الله يسهلج سفرتج انشاء الله وتستانسين فيها :eh_s(8): وبصراحة ماليزيا ديرة ماتملين منها ابد :eh_s(15): ياحلوها وياحلو ايامها ذكرتيني بذكرياتي الحلوة فيها:eh_s(22): بس انا انصحج انج تاخذين ملابس قطنية خفيفة ونظارة شمسية مو غامجة حيل يعني حماية وكشخة لانه جو ماليزيا ماينفع معاه مكياج بالمرة لانه رطوبة وجو استوائي:eh_s(18): واهم شي نعالج تكون مرييييحة وانسي الكعب هناك لانه كله مشي ولازم يكون عندج لياقة شوي ولاتنسين تروحين وندر لاند وتركبين القارب اللي يدخل فيج للسوق بصراحة تجربة ممتعة ووناسة:eh_s(9): واذا رحتي السوق الصيني كاسريهم بالاسعار كثر ماتقدرين يعني اذا قالولج السعر 100 انتي قوليلهم 40 وصدقيني راح ينادونج عشان تشترين وبعد شنو ياربي :eh_s(10): ايه في عندهم كشكات وسوق بالشارع اللي نفس شارع العرب عندهم شغلات حلوة واشكالها غريبة , بس احب احذرج من المحلات اللي يسون مساج وتلقينهم واقفين بالشوارع وماسكين اعلاناتهم ديري بالج تدخلين عندهم لان يقولون لج في قسم خاص للحريم بس اغلب اللي يسون مساج من الجنس الثالث اللي ماتدرين اهو رجال والا مره واذا حابة تجربين المساج تلاقين في اغلب مجمعاتهم حاطين كراسي مساج روعة يونسون لايطوفونج وتروحين وتردين بالسلامة ان شاء الله وادري طولت بردي بس من جبتيلي طاري ماليزيا حنيت لها:eh_s(22):

 

[ساره ستايل]

ماليزيا روووووووووووووووووووووووووووووووووووووووووعه
ابي ارووووووووووووووووووووووووووووووووووووووووووووح

جوها : رطب وممطر قليلا والحراره مرتفعه نوعا ما .. بس مو مثل حرارة الكويت طبعا .. اقل ابوايد

اسعارها : خبري فيها من سنتين كانت زورينه .. وشهر عسلنا قبل 3 سنوات
كان ارخيصه .. والحين يقولون ارتفعت ارسعارهم

الشعب : طييييييييييب حبوبين واخلاق ومحترمين جدا

الاسواق : بالاضافه حق اللي امذكروا .. عندهم مجمع اسمه ( ون أوتاما)
مجمع اكبييرررررررر وكشخه كلله ماركات .. نفس مستوى الصالحيه والرايه عندنا

 

[سيد-الغنادير]

الله ذكرتوني بأحلى الايام قضينااها بماليزيا عندي نصيحه لا تروحين حديقة الحيوان حر وخيسة وذبابين جنتنج روعه وجزيرة بيننج حلوة بس وايد عليها 4 ايام فيها البراشوت والجتسكي والبانشيات وخيول وشاطي القردة وفي كوالالمبور التسوق عجيب اما المطاعم مافي غير الطربوش بشارع بوكت بنتانج اكله حلو وماكدونالدز وفي مطعم ايراني بنفس الشارع بس ريحتهم خلتنا نطلع ما قدرنا..... انا وزوجي قضينا فيها 17 يوم كلفتنا 1600 دينار هذا غير تسوقي صرفت تقريبا 500 دينار جناط وجواتي واكسسوارات وهدايا