حبيبتي
تركيا الحين باردة من جم يوم كان ثلج بس الحين مشمس
تقدرين تراجعين حالة الطقس بتركيا من خلال الاترنت
اسطنبول مايبيلها اكثر من اسبوع
لذا تبين ثلج وتلفريك وتزحلق روحي بورصه
واذا تبين علاج طبي روحي يلوة
نصيحة انا توني راده من تركيا
قعدي باسطنبول بشارع تقسيم الي فيه كل الويه والمطاعم والكافيهات لا تقعدين بفندق غالي مايسوى لان كل فنادق اوروبا صغار وريحتهم لج عليها وبالنسبه لي الافضل فندق بارك رويال تقسيم خدمته خياليه لكن حمامه صغير وايد وعنده مصعد واحد فقط لكن ايجابياته كثيرة وليلته ب ٤١ دينار
تمشي بتقسيم كله مشي وانا رحت بتاكسي لي منطقهالسلطان احمد الي فيها المتاحف مثل ايا صوفيا والمسجد الازق والقصر العثماني و متحف اثار الرسول صلى الله عليه وسلم
سعر الخط من شركة فودافون من المطار ب ١١٠ ليرة للانترنت واتساب و ١٤٠ لخدمة البلاك بيري يشتغل بعد ساعتين من شرائه
ونصيحه قعدي في تقسيم ٣ ايام تمشي فيها بعدين قعدي بشارع السلطان احمد لان يوم واحد مو كافي عليه راح تتعبين وتكاسيهم غاليه فحجزي بفندق الليدي ديانا للامانه مارحتله بس الريتنج عالي فيه بسايت بوكينق ومنها نزلي المتاحف مشي وروحي السوق المصري وسوق البازار فقعدي ٣ ايام واليوم الاخير باسطنبول روحي مجمع فوروم اسطنبول فيه متحف الثلج شي غريب وحلو سعر تذكرة دخول الشخص ٢٢ ليرة والصورة الصغيرة ١٠ليرة والكبيرة ١٥ ليرة
وبعدين دخلي اكواريوم نفس المجمع سعر التذكرة ب ٢٨ ليرة للشخص ويسمح التصوير فيه وباخر الشخص يكون فاتح متحف الديناصورات بنفس المكان لان انا مالحقت عليه وتقدير تتسوقين وتاكلين هناك علما ان اسطنبول الظهر والمغرب وايد زحمه والتكاسي عالعداد
اسعار التاكسي من تقسيم الى سلطان احمد من ٢٠ الى ٣٠ ليرة
من المطار الى تقسيم من ٤٥ الى ٥٥ على حسب الزحمة لكن لا يتعدى ذلك
من تقسيم الى فوروم اسطنبول ٣٠ ليرة بالكثير
اسعار المطاعم في شي عادي وفي غالي
انصحك برحلة في البسفور باخرة تتجول مع عشاء كامل يشمل المقبلات والحلوة والمشروبات وحفلة غنائية راقصة يسمح التصوير مدتها لا تتجاوز ٣ ساعات ممكن يتم حجزها عن طريق الفندق او اعطيج رقم المسؤولة اسمها نسرين وتشمل المواصلات من والى الفندق
وبالنسبه لي اسعار المتاحف نصيحه لا تروحين مع قروب لويه وزحمه ويضيع يومج ماتحتاجينهم الدخله للقصر العثماني ٢٠ليرة ولمتحف الاثار ١٥ ليرة وفيه سماعات شرح وترجمة ب ١٠ لكل واحد منهم فاخذي ١ ب ٢٠ وتشاركي مع ريلج لان مايسوى كلش
في مطعم سيفود عالبسفور يشمل خدمة التوصيل
للامانه كل هالخدمات وفرها لنا الفندق
شي اخير الفيزا للدخول من المطار ب ١٥ يورو_ للشخص والوزن على التركية ب٣٠ كيلو وطيران لج عليه شوي
ونصبحه عشان لاتنصدمين كثري من العطورات لانج راح تنصدمين من الروائح في كل مكان سواء عامل جرسون اوغيرهم
اتمنى اكون ساعدتج ولاي معلومه انا حاضرة
