الي حضر أزمة الخليج .. شاركونا هنا,,

[واحد على واحد]

مساء /صباح الخير ....​

وشلونك ؟؟ وش أخباركم ؟؟ ,,,,,,,,​

بدخل بالموضوع على طول​

اليوم زوجة خالي وبناتها كلهم عندنا:082502bye_prv::eshrab: صار لهم يوميين زايرينا من الكويت المهم كنا حاطين على قناة الوطن وجاء برنامج يوميات حرب الخليج وتركنا السوالف والأكل وقعدنا نطالع التلفزيون وأول ماأنتها البرنامج ​

:eh_s(11): قامت زوجة خالي تويل وتذكر وتسرد لنا قصتها بيوم أزمة الخليج وتقول (( ماطلعنا الى من تالي قامت جدتي وأمي دفنوا ذهبهم وفلوسهم والأشياء الغاليه بالأرض وركبنا أبوي مع أخوي الصغير وقال أنحاشوا للسعوديه وأنا ببقى هني
وتقول وصلنا حدود الخفجي ولقينا عراقيين صاكين الحدود وفتشونا وقالوا لنا روحوا للطريق الثاني وبعدها مشينا مع طريق صحراء ماندري عن أرضنا من سمانا وأخوي صغير توه بادي يسوق وأمي تويل وتدعى عليهم المهم وحنا نمشي وأبعدنا ألا وتجينا ذيك الدبابه مقبله علينا ومسرعه .. وقلوبنا طاحت من الخوف ​

وقفت قبالنا ومتنا من الخوف ونطالعها وندقق ونشوف علم السعوديه عليها وهم قاموا يطالعونا ووقفوا
كأن أحد صب علينا ماي بارد كنا ضايعين ماندري وين قبلتنا المهم نزلوا وقربوا عندنا وطالعوا أخواني الصغار وخواتي وأمي الي يتويل والي يصيح والي يبكي والي طايره عيونه
وجاء واحد من الجيش السعودي وركب معنا وساق السياره عن أخوي الصغير ووصلونا ونزلونا بمدرسه ووقفوا سيارتنا وجابوا لنا فرش وبطانيات وأكل ألا فيه بالمدرسه معنا عوايل كويتيه من حالنا وكلن منهم له قصه شكل ....​

وأنتهت قصتها
(( طبعنا أنا أكتب بلهجتي ))​

وبغت تبكي علينا وتقلب الزياره مناحه :eh_s(11):​

بما أن كل واحد منكم له قصه ومننا حنا بالسعوديه (( الرقعي القيصومه الخفجي وحفر الباطن ))
(( أنا وأهلي هجينا لمــكه كلنا ألا أبوي خدم بالجيش ذاك الوقت ..))​

(( الي حضر الأزمه أكيد له قصه شاركونا هنا وأكتبوا قصصكم ))​

تنذكر ماتنعاد ​

 

[الصواني]

رد : الي حضر أزمة الخليج .. شاركونا هنا,,

up
up up
up up up

 

[∫ ∫ ∫ ∫ جــوان ∫ ∫ ∫ ∫]

الله لا يعود هذيك الايام

سورى حبيبتى والله ما احب اعيد ذكراها ولا اسولف فيها

حتى يوميات حرب الخليج ما احب اشوفها بالتلفزيون على طول اغير

الله يديم علينا نعمه الامن والامان ويرد كيد الحساد بنحورهم

 

[ام الدرر]

تصدقين حتى انا يجيني اكتئاب لما اتذكر هذيج الايام
بدت معناتي بالقولون العصبي من الازمة
الله لا يعودها
والحمدلله اللي ربي أظهر الحق وإنتقم من الظالم​

 

[monmon12]

حبايبي حرب مدتها 7 أشهر مو قادرين نتذكرها

عيل فلسطين المحلتة شنو يسوون الي هاليوم يعانون؟؟

أيام الغزو كانت سيئة جدا صحيح كنت طفلة بس كنت واعيه أيامها وأتذكر أحداثها والحين لما كبرت فهمت شنو كانت تعني

ياخذون الشباب من قبال بيوتهم يعذبون الناس قبال أهاليهم


يبوقون بيتهم حلاله ولازم الواحد يقولهم غصب عليك بالعافية

لكن المنظر الي ما انساه طول حياتي منظر الجندي العراقي الي طلعو من جيبه بسكوت مكسر خاشه من اليوع منظر مبكي ويعور القلب

منظر الجندي الي مات وايهو مثل ما ايهو لأنه استخدمو قوات التحالف قنابل يورانيوم

على فكره كانو في جنود عراقيين أعمارهم 15 سنة ما يعرف حتى يستخدم سلاح



لازم تعرفون حبابيبي شي مهم

انه الأجانب كانو هناك يقولون لنا انتو قاعدين يلعبون فيكم لعبة القطو والفار وانتو كنت بس الجبنة عشان يصيدون الفار فيها

الغزو العراقي كاني غزو على كيان وحقوق الانسانية الكويتيه والعراقية معا


والله ان شاء الله يحرق الي كان السبب فيها

 

[غلطة زمن]

رد : الي حضر أزمة الخليج .. شاركونا هنا,,

أنا سعوديه بس أذكر لما كنت صغيره ألعب بالصاله فجأه
أهتز باب ودرايش البيت يمه كأنها زلزال وكلنا تجمدنا أنا كنت
أحسبها عصابه ماأعرف غزو طلع صاروخ راسلته العراق على
السعوديه كانت أيام رعب الله لايعيدها
والله ماألومك اللي تقول مابي أتكلم عن الغزو شي صعب والله يرحم الشهداء
ويرحم الملك فهد والشيخ جابر لحد الحين لما أشوف المشهد لما يسجد على تراب الكويت
تدمع عيني والملك فهد ماتعب الا بعد حرب الخليج جته الجلطات من الهم الله يرحمهم

 

[غدووور الكويت]

رد : الي حضر أزمة الخليج .. شاركونا هنا,,

الله لا يبلي أحد صج ايام كريهه

 

[بوغاتي88]

الله لايعود ذيك الايام احنا ماطلعنا كلش من الكويت كنا صامدين لحد ماتحررت الكويت وكان عمري يومها 4سنين يعني مااذكر الغزو بالضبط بس اللي اذكره شي واحد وماني قادره انساه اني شفت واحد رشوه بالمسدس جدام امه وخواته ومت من الخرعة وتالي غطوه بعلم الكويت وبس بعدين مادري شنو صار صج هالمشهد من اتذكره نفسيتي تتعب وايد عسى الله يحفظ ديرتنا من كل شر ويحفظ شيوخنا ويطول بعمر بابا صباح اللهم آمين xxxxxxxxxxxxxxxxxxxxxxxxxxxxx

 

[سنيني]

رد : الي حضر أزمة الخليج .. شاركونا هنا,,

اذكر نجتمع في صالة البيت وملزقين النوافذ بلزق ونجيب موية خيفين من كيماوي وذكر طلعنا من الرياض ورحنا براء الرياض عشان الصواريخ الي تطيح على الرياض -او مانسمع الانذار نجتمع كلنا في الصالة الي تحت كنت صغيرة

 

[جيفارار]

رد : الي حضر أزمة الخليج .. شاركونا هنا,,

الله لا يعودهااااااااااااااااااااااااااااا

والله يحفظ الكويت من كل مكروه


والله يرحم زوج اختى الشهيد ابو مشارى ويرحم جميع شهدااء الكويت

 

[dnyay_mll]

رد : الي حضر أزمة الخليج .. شاركونا هنا,,

صج ايـام صعبـه

كنت صغيـره لكـن اذكـر كـل شـي جنـه اليـوم صايـر

كـل الايـام اللي مـرت عليـنا صعبـه وكنـا صامديـن ومحد رضـى يطـلع من الديـره

اصعـب يـوم مـر علينـا لمـا كـان خالـي رحمة الله عليـه بالمقـاومـه والعراقيين يدرون عليـه اهـو وخوالـي الباجي

العراقيين وصلهم خبـر انه بالبيت وشايفينه ناس وقعدنـا ندعي وسبحان الله دخلـو البيـت واهو كـان منخـش بالسطح ولا شافـوه كأن الله عمى عينهم عنه هذا موقف ماانسـاه ابـد

واصعـب لحظـه عشـتها يوم تحرير الكـويت صج صج ماانسى صوت الطيارات واطلاق النـار

كل الايام كانت صعبـه وكئيبـه ماكـو كهربا واللقمـه نتقاسمها كلـنا وامي ماكانـت تاكـل اهم ما عندها احنـا نشبع

ومرت علينا ايام نتقاسم الخبزه بيننا

الله لايعودها من ايـام ويحفظ كويتـنا ويبعد عنـا كل عدو وظالم

 

[A7la KatkoOota]

رد : الي حضر أزمة الخليج .. شاركونا هنا,,

الله لايعودها من ايام ويحفظ الكويت يارب

 

[::كيك وعسل::]

رد : الي حضر أزمة الخليج .. شاركونا هنا,,

الله لا يعودها من ايام
كنت صغيره بس سبحان الله ايام لاتنسى
اللي اذكره جدي كان مايبي يطلع من الكويت
لمن تجمعنا في بيته وقال ماراح اطلع وخلي ديرتي حيل تأثرت بصراحه
على اني صغيره بس مانسيت هالكلام وخالي كان مع المقاومين
والله يرحم شهدائنا والله لايبيحك ياصدام دنيا واخره

 

[سمو]

رد : الي حضر أزمة الخليج .. شاركونا هنا,,

اللهم صل علي محمد وال محمد


سوري اسمه غزو ....لا اهوه حرب الخليج ولا اهوه ازمه الخليج


غزو .... ولباجر احنا الكويتين نسميه غزو .... ونعلم عيالنا انه غزو مو حرب .... احنا ما دشينا حرب علشان نكون مستعدين قبل لا يغتصبون ارضنا .... دشوا علينا حراميه ...ما عطونا فرصه للاستعداد نفس الحروب ... دشوا علي بيوتنا وعيالنا ...حراميه ... مرتزقه .... باقوا كل شي بالديره ب 7 اشهر



ورجاء اللي تقارن الكويت بفلطسين ..... خو احنا بمنتدي كويتي ... مو قاعدين نشتكي احوالنا بمنتدي فلسطيني ... وما نبي نتكلم بقضيه فلسطين لان وايد ناس فلسطينيين راح يزعلون من الحقائق ..... احنا نتكلم عن غزو عراااقي للكويت

 

[منو انا]

ماحظرت هالايام بس قريت قصصكم وقلت الحمدالله اني مو مولوده وقتها

 

[واحد على واحد]

رد : الي حضر أزمة الخليج .. شاركونا هنا,,

يسلمووو حبايب

 

[نور مغليها]

رد : الي حضر أزمة الخليج .. شاركونا هنا,,

انا كآن عمري سنه وشي ما اذكر منها اي شي
بس الحين عقب ما كبرنا ماكو شي ما عرفناه
شفنا وسمعنا كِل شي

 

[amami al-kuwai]

رد : الي حضر أزمة الخليج .. شاركونا هنا,,

انا كان عمري سنتين وقت الازمه بس اسمع اهلي دايم يسولفون عن الغزو

دايم امي تقول انها قعدت الصبح علشان تسووي لاختي الحليب وتقعدت تسمع اصوات نار وصواريخ وبعدها قعدت ابوي وقالت له صدام سواها وابوي ماصدقها لما قعدت وسمع الاصوات عرف ان الموضوع صج

راحو وقعدوا جدي الله يرحمه وبعدها راحو لبيت واحد من الاهل هو اكبر من جدي واتفقوا انهم يقعدون بس الحريم قعدوا يبجون ويصيحون ويقولون عندنا بنات باجر يسوون فيهم شي

اول شي الرياييل ماردوا عليهم وبعد يومين لما شافوا الحريم نفسيتهم تعبت قالوا يلا تجهزوا لشان نروح السعودية ومشينا