الى خبيرة الاعشاب

[om_talal]

صباح الخير عضوات المنتدى :eh_s(18):
هذي أول مشاركه في المنتدى وأعتقد راح اتكون مهمه لكم بالاخص اللي عندها عيال وأرجو انكوم تفيدوني في هذى الموضوع بالاخص خبيرة الاعشاب تدرون شنو أدري اني طولت عليكم
((الشتاء والربو والبلغم))
أرجوكم انكم تنصحوني في أعشاب تفيدني لازمة الربو والبلغم حق ولدي ولا راح أقضي الشتا كله في المستشفي ولا راح أروح البروالحين بدات أعراض البلغم هيهأرجوكم ساعدوني.

 

[الغاليه نونو]

حق البلغم تاخذين من الحواي لسان الثور وينسون وعناب وبمبر

تفوحين شويه من لسان الثور والينسون وتحطين حبه وحده عناب وحبه وحده بمبر
وتالي شخلي بالمشخال وعطيه ولدج وماعليه الا العافيه
واذااعندج زيت زيتووووون من بطنه اصلييييييي دهني صدره وظهره ومناسم خشمه ودفيه وماعليه الا العافيه انشاءالله ماتحتاجين طبيب ابد ابد وماااايشوف شر يارب

 

[om_talal]

مشكورة اختي الغاليه ويعطيج الف عافيه من باجر راح أجربه

 

[بتبوتااا]

مشكووره الغاليه نونو حتى انا ريلي بلاعيمه حيل تعوره خذت حيلي

 

[بنات حواء2]

و الله ما عندي خبره بس انشاله البنات يفيدونج اكثر

 

[روائع الالم]

ام طلال ما يشوف شر الغالي
بس عند الحواج في شي اسمه ورق جوافه عند الحواج فوحي واضيفه له سكر نبات وشربيه ترى ممتاز جدا جدا عن تجربه شخصيه

 

[بسكوته وفراوله]

صباح الخير عضوات المنتدى :eh_s(18):
هذي أول مشاركه في المنتدى وأعتقد راح اتكون مهمه لكم بالاخص اللي عندها عيال وأرجو انكوم تفيدوني في هذى الموضوع بالاخص خبيرة الاعشاب تدرون شنو أدري اني طولت عليكم
((الشتاء والربو والبلغم))
أرجوكم انكم تنصحوني في أعشاب تفيدني لازمة الربو والبلغم حق ولدي ولا راح أقضي الشتا كله في المستشفي ولا راح أروح البروالحين بدات أعراض البلغم هيهأرجوكم ساعدوني.

السلام عليكم ورحمة الله وبركاته

ماتشوفين شر يا الغاليه وانا عندي طريقه مجربه صديقه الوالده قالت لها وجربتها والحمدلله طلع منها البلغم وريح صدرها والطريقه :
بغل ( كراث ) يقطع قطع صغبره مثل التبوله ويوضع عليه عسل يغطي لمده ساعه تقريبا ثم يصفى ويشرب الماى ولا تقطين الباقى خليه لما يطلع الماي وبعدين شربيه

 

[* عباية راس *]

عندي طريقة مجربه وزينه

أخذي ثلاث بصلات وفوحيهم بماي لين يتغير لون الماي ويصير لونه بني وعقب اشخلي الماي وحطيه بمطارة ماي وكل شوي شربي ولدج من ماي البصل وحليه بالعسل او سكر نبات ومايشوف شر

 

[om_talal]

مشكورين حبايبي ويعطيكم الله كل خير

 

[نجمة البحر]

حبيبتي لسان الثور وايد يمدحونه حق البلغم ومو تنسين شرب المشروبات الساخنه

 

[غادةالكاميليا]

انا اعاني مثلج مع عيالي
قمت مااسبحهم الا مرة بالاسبوع
ومن الحين ينامون بدون تكيف
البرد ( الايس كريم ) ممنوع منعا باتا
الماي يشربونة دافي مو من البراد
وبالليل البسهم طويل
اذا حسيت ها بيصير فيهم شوية برد كثفت العناية الطبية واعطيهم ادول وادهنهم فيكس واشربهم دوا كحة
اذا ماسوي جذي......... يروحون فيها
واايد حساسين مايتحملون النسمة

 

[ombaza]

عندج بعد ماي الجزر بشري جزره كامله وصبي عليها ماي مغلي وغطيه بعد مايفتر شربي دافي
جربيها والله زينه