النـاس ماتخلـي احـد بحـاله ..~

[miss_sanfoora]

سلام عليكم ...
شلونكم وشخباركم..؟!
ساعات نضطر نسوي اشياء مانبيها واراء مانقصدها ولانحبها ونقول اشياء مومقتنعين فيها بس عشان نرضي الناس !!

وساعات نختلق الاكاذيب(دفاعيه)

بس عشان نرضي الناس

ومنو اهما الناس !!

وساعات نحسب لهم الف حساب بس لان احنا خايفين من رده فعلهم وعشان نرضيهم

صج ان الناس ماتخلي احد بحاله !! بس هم لازم يكون عندج الشخصيه انج ماتهتمين لـ راي الناس لج وانج تثقين بنفسج

واللي راح يهتم ويلاحظ حجي الناس ماراح يخلص ولا راح يرتاح بدنيته !!

الاسئله :

تخافين من حجي الناس ؟

صارلج موقف محرج من الناس؟

اذا كان الجواب اي ,, هل اثرت في شخصيتج ولا ماهموج؟

شنو رده فعلج حق اللي يخاف من كلام الناس ورده فعلهم ؟

عندج الشخصيه اللي تخليج ماتخافين من حجي الناس؟
​

 

[داناتا]

لا شنو اخااااااف من كلام الناس بس اكيد ان في عاااااادات وتقاليد نمشي عليها مو يعني ان بالحرف الواحد لان احس هالعادات قامت تنقرض والناس يا مالهم من الحجي كيفهم خل يتكلمون ويقولون اللي يقولونه دام انا ماشيه صح وراضيه الله مو مهم رايهم لان اللي يسمع كلام الناس راح يتعب عطي طااااااااااف

 

[miss_sanfoora]

منوره قلبووو
صح كل كلامج وعلى عيني وراسي ومشكوره على الرد الحلوو ^ـــــ^
:****

 

[ليمونه بارده]

والله اوقااات يأثر فيني حجي النااس
وأوقااات لاا بس شخصيتي اي تأثرت وتعبت
مدري كيف أصير عاادي وماأهتم

 

[am faisal]

تعلمت بس متاخر انك ضيعت حياتك لترضى الجميع لكنك لن تجد اى منهم فى وقت شدتك وعندها ضربت بالناس عرض الحائط وقلت بالعامية باللعنة

 

[عاشقة هواك]

تعلمت بس متاخر انك ضيعت حياتك لترضى الجميع لكنك لن تجد اى منهم فى وقت شدتك وعندها ضربت بالناس عرض الحائط وقلت بالعامية باللعنة

اي والله حتى انا وقت الشدة محد وقف وياي ولا ساعدني ولا وجهني الكل يهمه مصلحته

 

[Angel-Lady]

تخافين من حجي الناس ؟

لأ خلي حجيهم و عاداتهم و تقاليدهم حقهم بسوي الي مقتنعه فيه بما انه ما يغضب ربي و زوجي و اهلي راضين عني

فالناس و حجيهم اقوى طاف... هذي حياتي مو حياة الناس

صارلج موقف محرج من الناس؟

لا

شنو رده فعلج حق اللي يخاف من كلام الناس ورده فعلهم ؟

اختي دايما امذيتني كله خايفه من كلام الناس و دايما ازفها لووول

عندج الشخصيه اللي تخليج ماتخافين من حجي الناس؟

الحمدلله

 

[عنزروته]

اعتقد ثقافتنا بهالموضوع غلط ..... يعني احنا دربنا نفسنا وعيالنا نقول اناس وناس وهو الموروث هو الي خلانا نفهم انة نخاف ,.... اعتقد محد يخاف من احد بس العرف السائد الي هو اقوي من العادات والتقاليد بعد هي اللي حاكمة اناس وهم فاهمين انهم خايفين ,,,

 

[غيدآء]

في مقوله تقول

" ارضآء آلناس غايه لا تُدرك "

يعني مهما سويتي وقلتي وفعلتي ..الناس بتتحجى تتحجى ..ويطلعون فيج الف عيب..!

بس اخذيها سياسه امشي عدل يحتار العدو فيج..يعني لا تلتفتين لحجي الناس خصوصا بهالزمن محد بيفيدج غير روحج انتي واهلج..سوي الي يرضي ربنا بالاول وعقب يرضيج انتي ذاتيا ويرضي اهلج..وخلي الناس تعيب وتقول لانه ما يتحجى ويعيب غير المعيوب واللي في بطنه ريح ما يستريح ..!

ومردهم يسكتون لا طال الحجي ..لانه مامنه فايده

وبالنسبه لاسئلتج

الحمدلله ماصارت لي مواقف لاني انا بطبعي ما اعطي مجال من الاساس

وبس احس تكلمت كثييير :/

 

[حولة مركزة]

تعلمت بس متاخر انك ضيعت حياتك لترضى الجميع لكنك لن تجد اى منهم فى وقت شدتك وعندها ضربت بالناس عرض الحائط وقلت بالعامية باللعنة

:eh_s(15)::eh_s(15):
وانا ائيدج

 

[بنت العقربيه]

فية مثل يقول امش زين عدوك يحتار فيك

كلام الناس لابيقدم ولا ياخر مقولة صحيحه 100%

 

[manoooram]

كان وفي خبر كان
همي رضا غيري واللي حوالي أضغط على عمري وأجامل على حساب راحة بالي
لكن اكتشفت بالوقت الضايع ان محد يستاهل كل هالمجهود لأن ماكو بالمقابل شي
فبالنهاية لا طبعا .. صار كلام الناس آخر اهتماماتي ..
ما عدا الكلام اللي يتعلق بسمعة البنت هذا لا خلاف فيه
وعلى قولتهم (( امش عدل يحتار عدوك فيك ))
دام ان ماشية بحالي وأسوي اللي يرضي ربي ويرضيني ..
بس هذا أهم شي وخليقولون اللي يقولونه ومايشوفون شر
اذا بلتفت لهم ماراح نخلص

 

[PuPa^^SWeeT]

صاجة العالم ماتخلي احد بحالة

احلى سكيب لهم

لأنج مجرد ماتخلينهم واتردين بيتج بين اهلج و احبابج

بس نسيتيهم


ليش احطهم اببالي قالو ولا حطوو


بالعكس احلى عيشة بليا شوفتهم

واحلى لحظة يوم اسكر الباب و اقعد اببيتي ولا افكر فيهم




تقبلي مروووري


موضوعج قمة صراحة

 

[منو انت]

طبعا اهتم لكلام الناس لاني عايشه بينهم بس مو يعني شغلي الشاغل لا

وعقليات الناس تختلف مو كل الناس تخاف الله ولا كل ناس عندها ضمير

في ناس ابسط شي عندهم الظلم يعني ابسط شي تحكم على فلانه وتحط بشرفها بدون اي دليل والسبب تقولج احساس عندي احساس انها مو محترمه

وفي ناس اقسم بالله مهما اقولج عن وقاحتهم وقلبهم الميت مااقدر اوصف لج المستوى اللي اهم فيه


علشان جذي دايم نقول الله يكفينا شر هالنوع اللي محسوبين علينا من الناس والله يكفينا شرهم

(( لكن في شغلات تخصني مااقدر احترم الناس فيها لانهم ماراح ينفعوني بشي مثال اعرف لج وحده عايشه حياتها مع واحد بطريقه بشعه شايفه منه انواع الضيم والحسره وماتبي تنفصل عنه علشان ماتكون مطلقه تقول كلام الناس وقرار الطلاق وهذا اعتبره غباء لما يوصل الشي لحياتي ومستقبلي لا طقاق يطق هالناس ))