الناس كل ما شافوني اسالوني,,,,,,,شاسوي مليت وانجرحت

[strawberryq8]

قوة بنات شخباركم يا خواتي عساكم بخير



بنات


والله الله العالم انني مااحب افضفض الا لكم

بنات


يدتي كل ما شافتني

ها ماكو شي بالطريج؟؟؟
اقولها لا اديده الله كريم تو الناس

تقوللي روحي راجعي

اقولها ان شا الله

تقول زوجج اخاف يمكن فيه لانه ضعيف(جسمه ضعيف)

اقولها لا اسم الله عليه ماعليه الا العافية والحمدلله تونا ما صارلنا سنة لاحقين عالمسؤولية والتعب والشقا

تقول لا روحي

وانتي متنانة
اقول اي جذي احلى
(وانا محترقة من داخل ما تدري انني اعالج وان العلاج خلاني ازيد شوية بالوزن)


وانا البس على طول العبي الوسيعة بامر من سي السيد

فا على بالهم حامل يقولولي
الله يهون عليج

هني ما تدرون شيصير فيني
احس معدتي تحتتتتتتتتتتتتتتتتتترق

وانا اصطنع الابتسامة واقولهم ماكو شي واحط ايدي على بطني

واديده بعد عمري ادري انها تحاتيني
لانهاتدري شكثر احب البيبيات من زماااااااااااان من قبل لا اتزوج

وجنها حاسة تقوللي

ودج تيبيلنا توام

اخاف مع الابر صج احمل بتوام
اقولها جان زين


تقول لاااااااااااااا الله لا يقوله

شاسوي؟؟؟؟؟؟؟؟؟؟؟؟؟؟؟؟؟؟؟؟؟؟؟



وحتى الاهل يسالوني خالاتي بنات عمي بنات عمتي رفيجاتي

ادري لانهم يحاتوني بس لو انتي مكاني واحد سالج شنو تردين عليهم


انا اللي يدري انني اعالج

امي واختي وخالتي اخت امي

وباجي خالاتي مايدرون

اااااااااااااااااااااه ياقلبي
(((مع العلم ان زوجي الحمدلله مافيه شي انا اللي فيني ضعف في التبويض بس ماارضا على زوجي احد يقول عنه شي)))

ادعولي الله يخليكم
واله محتاجة دعائكم تكفون​

 

[كويتيه مذهله 87]

انتي تقريبا مثلي

الكل يمسكني ويسألني من الاقاارب وارد مثل جوااابج


شنسوي بعد!!

وكلا روحي راجعي روحي راجعي
اقولهم مدامي احمل طبيعي ماله داعي اروح الطبيب بس يمتنوون فيني

والله كريم

عندي خالتي اعتبرها يدتي وامي الثاانيه

بالعيد قالتي شي عورت قلبي قالتلي يالله متي تحملين ابي اشوف اعياالج قبل لا اموت


شسووووووووووووووووووووووووووووووووووووووووووووووووووووووووووووووووووي انا بسم الله توني بالنفاااس انا

 

[$غــ(ز)ــل$]

حبيبتي ستروبري..انتي قاعد تسوين اللي عليج والباجي بايد ربج سبحانه
انتي توكلي على الله وباذن الله ربي ماراح يخيب ظنج


كلنا نمر بنفس الحاله(السؤال من الاهل)
بس شنسوي مجبورين نتحمل هذا شي ربي كاتبه لنا واهو الوحيد القادر انه يغيييره

وباذن الله تبشرينا بحملج قريب حبيبتي
وتحملين بتوأم تقر عينج بشوفتهم بصحه وعافيه

 

[strawberryq8]

يا بعد قلبي


الله كريم
ووعسا الله يرزقنابالذرية الصالحة يارب


ما قصرتو خواتي

 

[Coffee-Girl]

حياتي خليج واثقه من نفسج وانتي مو اول ولا اخر وحده يجيها ضعف عادي كلن عنده مشكلته وانتي انشالله مشكلتج بسيطه لا تعظمينها

ريحي بالج واذا عن السؤال عادي بردي قلبج واذا احد اسالج لا تعطينهم مجال قولي الله كريم او اقولي الله ماكتب انشالله خير وسكري الموضوع عشان محد يتمادى معاج بالاساله

انا كنت نفسج اذا احد سالني اتضايق حيييييييييييييييييييييل وحتى لما ايقولولي الله يرزقج احترق من الضيقه واصطنع الابتسامه
لدرجة اني صار لما احد يسالني اجذب واقول مو فكرين الحين تونا اصغار واحيانا اقول زوجي مايبي الحين
بس المشكله ان حالت زوجي صعبه اتوقع اناس الي قتلهم جذيه بيقولون ماصارت كل هالوقت مو فكرين يعني راح ايجكوني اني اجذب وانا ما احب اجذب بس انا سويت جذيه عشان مابي احد يدري عني لان انا حييييييييل حساسه
بس حاليا انا مقرره ان اذا احد سالني بقول الله ماكتب واسكت

 

[Coffee-Girl]

ستروبري ليش ماجربين اعلاج ام بجاد ماشالله اكثير احملو عليه

 

[روزالكويت]

الله كريم الله اكرم من خلقه صدقيني والناس متكلمه متكلمه والله لو كل سنه نحمل ونولد قالوا بس بس بسج عيال رحمي حالج يعني بالحالتين جذى حالهم والله يهديهم يارب وترى طبيعي السؤال عادي لاتاخذين بخاطرج انا كنت قبل اتضايق بس اللحين خلاص وكلت امري لله ولله كريم بسم الله صج ماصار لنا سنه عبالهم كل الحريم يحملون من ليلتهم لا عادي من عمر الدنيا في حريم بسرعه يحملون في حريم ياخذون 5 شهوروفي حريم اكثر شي من ربي سنه عادي ياربي هذى ارزاق ب بعد الله اللي كاتبه بيصير سبحانه وتعالي..

 

[^noonaa^]

الله كريم ان شاءالله

اللي يسمعهم جنه ابكييفنا وانا مادري

كل شي بيد الله

والله يرزقج ان شاءالله الضناا الصالح

 

[A7la-SmiLe]

الله كريم
وياقلبي لاتتظايقين اهم شي النفسيه وداومي على العلاج واذا عالاسئله ترى مارح اتخلصين بس انتي خلج قويه وردي عليهم رد مقنع وعسى الله يعطيج على قد نيتج
عسى الله يرزقج بالذريه الصالحه عاجلا غير اجلا يارب ونفرح فيج وتصيرين ام لاحلى توينز ​

 

[Emanova]

بيبتي اذا تبين تسمعين كلام الناس و الاهل ما راح تخلصيين ...لا تعطينهم مجال ان يناقشوم الموضوع معاج لان اهني القثا راح يبلش ...

كانوا يسئلوني ليش ما حملتي لحد الحين؟ اقولهم الله ما رزقني يردون علي ليش ما رزقج؟!؟!؟!

اقولهم يعني اتهاوش مع الله ليش ما رزقني ما رزقني و خلاص ...و عسى ما شافوني اشمتنج وين الجسم الحلو انتي اشفيج صرتي جذيه و الله العالم شنو فيني ..

و الحين لما سويت الحقن المجهري و حملت بلشنا جم كلفت عليكم وين تبين تولدين متى تعرفين شنو في بطنج وين تبين تسوين استقبال .....

و اسئله ما تنتهي ...فلا تعطين مجال علشان لا يتعبون نفسيتج مع العلم ان الاوادم اللي يسئلون يعانون اكثر منج بس محد يدري عنهم..

عليج بالاستغفار و الصدقات بنيه الحمل و الدعاء بالسجود و انتي واثقه ان الله راح يستجيب لدعائج ...

و ان شاء الله تحملين بدون علاج و بدون شيء و تبشرينا بحمالج يا رب

 

[فتكات بنت كيداهم]

انا بعد مثل حالتج بس عندى ولد واحد وصار عمره 4 سنوات وابى له اخ الله يعينج ويعينا كلنا

 

[فتكات بنت كيداهم]

انا بعد مثل حالتج بس عندى ولد وابى له اخ الله برزقنا قولى امين

 

[om-7amod]

الله يرزق الجميع عاجلا غير اجل

 

[bant_alnoor]

شوفي حبيبتي هذا ابتلاء من رب العالمين والحمدالله لان الله سبحانه وتعالى اذا حب مؤمن ابتلاه واذا على كلام الناس كلامهم مايخلص انا 8 سنين وانا اسمع واحس باحراج جدام الناس خاصة هناك ناس يتقصدون يسمعونج هالكلام لكن والله ماارد عليهم وليومج وانا اسمع الكلام اللى يحر القلب ويعور القلب بس شسوي لحد قبل يومين كانت خالتي ام زوجي الله يسامحها قاعدة وانا وحمواتي وحريم حمواني قاعدين خلت الناس كلهم وجاتني وتقولى تعرفين فلان واحد باكستاني يشتغل عندهم قلت اي شفية قالت يبي يسافر حرام مسكين ماعنده عيال قال ابي اجمع فلوس عشان اروح اعالج وتكلمني وتطالع بناتها وتنغمزلهم وتقول ياحرام ماعنده عيال مسكين فقير تدرين شسويت في لحظتها تمنيت الارض تنشق وتبلعني بس وهي تكلمني طنشتها وقمت اكلم مرت حماي انا وياها شي واحد وعيالها يموتون فيني واسولف وياها واقعد اضحك والله انقهرت مني بس هم حزت بقلبي من داخل ودي ابكي بس شسوي ماابي ابين لاحد ضعفي

واللى ابيه منج طنشي على قد ماتقدرين اي احد يجيبلج طاري الموضوع ويبي يتعمق فية غيري الموضوع وسولفي عادي لاتخلينهم يحرونهم والله مايسون دمعه من عيوناااا

 

[المهذبه]

الحمدلله علي كل شئ ياأختي لي 6 سنين أسمع الكلام هذا ولا في أيدي شئ أسويه ألا الدعاء والصبر والحمدلله علي العافيه وللحين أسمعه وأنشالله فرج الله قريب لنا أمين ياااارب العالمين...

 

[مرمريتوو]

شوفي عشان تبردين قلبج
اي احد يسئلج قوليله اذا ربي كتب شي بتكونين اول وحده تعرف لا تحاتين و تسئلين و ببببببببببببببببببببببس

 

[m e m e]

وييه ماعندج سالفه تضيقين خلقج و اتطنشين

بالنجليزي المعرب اقولج اياها عطيهم طاااااااااااااااف t.o.z

 

[شموخ العجمية]

ياقلبي كلنا نفسج بس شنسوي ........
والله انا ابكي من داخل بس الله كريم ........

 

[برميـت]

حبيبتي مشكلتج حيل بسيطه ومسألة وقت بس وحتى العلاج فيه سهل وتصير لشكثر بنات والحمدلله الحين عندهم درزن عيال

وبعدين اللي يسألونج شعليه مستعجلين ! توج بأول سنه يعني ماطولتي بالعكس حلاة الوحده تحمل بثاني او ثالث سنه

اللي يسألج لا تزعلين او تأثرين قوليلهم لا تو الناس توني ماستانست مع زوجي لاحقين على العيال

وكملي علاج واذا حسيتي مانفع علاجج روحي طبيب ثاني يكون ثقه وتعرفين ناس ثانين نفس مشكلتج وعلاجه جاب نتيجه معاهم

والله يرزقج يارب بـ 10 بنات و 10 اولاد ..................... الله يعينج لول

 

[strawberryq8]

ياااااااااااااااااااااااااااااا بعد قلبي انتو والله
عساني ماانحرم منكم

وعسا اربي يستجيب دعائي
يارب يا مجيب الدعوات ياارحم الرحمين يارب العالمين يارحيم يارحيم

ارزقني بالذرية الصالحة المتعافية السليمة
وارزق كل وحدة ردت علي بالموضوع
وحتى اللي ما ردو علي ارزقهم بالذرية الصالحة يارب


اللهم لا تذرني فردا وانت خيرالوارثين


عساني ماانحرم منكم ياخواتي