الميزانية ماتكفي والفلوس تطير !!

[snfora99]

السلام عليكم


شلوونكم شخباركم


...


في مشكله انا اعاني منها .. انا طالبة عمري 13 سنة
ابوي يعطيني بالشهر 50 دينار غير فلوس النجاح والعيد
وووو .. وحتى امي تعطيني فلوس نجاح وعيد واخواني وجذي

بس المشكله الفلوووس تطييير ماقدر ايمع منها ولا فلس

وابوي مايقصر اذا محتاجة فلوس بس مايصير كل شوي
اقوول ابي فلوس وابي فلوس ..

انا واختي نروح بين كل جم شهر نفصل عبي وانا كله ماعندي فلووس

يعني ال50 .. تقريبا 20 حق الصرف اليومي مطاعم .. و 15 اقول بيمعهم حق شي يسوا او عشان اسوي عبي او اشتري شغله .. و15 اذا بغيت اشتري شغله ملابس عطر شيلات ..
وبالاخير 15 اللي يمعتهم اصرفهم لانه الفلوس تطيييير

( شلوون اقسمهم خصوصا انه العبي مصاريف وامي تساعدني فيهم تسويلي 2 او وحده بس هم مايكفي ..

ولاتقولون توج صغيره والمصاريف شويه (

 

[اميره بكلمتي]

شوفي اذا ماعندج حساب بالبنك افتحي حساب وخلي الوالد يسوي استقطاع من معاشه على حسابج وخلي بطاقتج عند امج وكل مانزل معاشج خلي امج تعطيج على قد حاجتج وبس عشان لاتقعدين تصرفينها كلها

جربي هالطريقه وان شاء الله بتحصلين مبلغ حلو وزين

 

[>الحنان كله<]

حاولي توفريت حبي ♡

 

[سفييره الكويت]

حطي من الخمسين مبلغ عشرين دينار كل شهر على جنب والله يوفقج حبيبتي

 

[ga6wa90]

حبيبي تقدرين توفرين المطاعم مو شرط يوميا

مثلا مره كل اسبوعين كافي

و حاولي تقتصدين الأشياء اللي مالها داعي كنسليها

 

[black rose BH]

شووفي انه ابوي قبل يعطيني مثلج 50

المهم كنت اصررفهم ولا ايي نص الشهر الا مفلسة ! لووول

المهم الحين توني صارلي شهرين قمت اول مايعطوني مصروفي

اخذ 10 منه او 15 على حسب الي اقدر عليه

واعطيه امي اقولها يوديه ولاتعطيني اياه لو شيصيييييير

وصج اتم على الباقي واحاول قد ماقدر انسى ان عند امي فلوس لي !

:> وصارو يتيمعون وبس < :$

 

[منورة الكويتية]

قسمي الخمسين علي ٣٠يوم ةومالازم مطاعم كل يوم
وتصدقي لو بزبع دينار وربي يباركلج

 

[أم رغده]

عليييج بالصدقة لانها تزيد المااال :eh_s(7):

 

[Patcholli]

حطيلج حصاله ماتتبطل وكل شهر قطي فيها 5 ولا 10 على حسب شنو عندج هالشهر وشنو مصاريفج
وبالنسبه للمصروف اليومي ليش ماتاخذين معاج اكل من البيت انظف واحلى واوفرلج مدام ودج تيمعين ؟؟
خلي يوم مطعم ويوم من البيت
والعبي مو كل شهر تفصلين

 

[غراوي]

سوي جمعيه مع رفيجاتج ب ١٠ دنانير
انا ماشفت احسن من الجمعيه لحفظ الفلوس

دوري ٥ رفيجات ثقه او حتي خواتج وامج قولي بسوي جمعيه لمدة ٥شهور وكل شهر تستلمها وحدها يطلع لج مبلغ ٥٠ واخذيها اخر وحده

لان لا امج ولا حساب التوفير بيفيدونج
امج بتكسرين خاطرها وبتعطيج وحساب التفير بتروحين تسحبين منه

 

[عادت ذكرياتي]

حبيبتي خلي عنج المطاعم خليها بالأسبوع مرة او مرتين كافي ماكو أنظف من اكل البيت وتحسين له طعم وبجذي وفرتي تقريبا خن نقول أقل شي 10 د.ك وعشرة على عشرة ... إلخ تحصليلج مبلغ حلو



وجربي هالطريقة وشوفي ...

 

[روانتي 12]

مو لازم مطاعم وبجذي بتكونين وفرتي ع نفسج شوي

 

[حجيه هيونه]

اول شي حطي هدف حق التجميع عشان يكون عندج حافز

ثاني شي تعودي اكلج تاخذينه معاج


والعبي دام على الوالدة ما منهم مصرف ان شاء الله


واتفقي مع امج تيمع لج بحساب او عندها ولي صار مبلغ حلو اشتري الى بخاطرج

 

[snfora99]

thanx bnaal ally rdaaw

up up

 

[swanyway]

20 على مطاعم وايد تنفخ على الفاضي وخسارة فلوس خليها 10 او 12 , عطور و عبي كل شهر بتاخذين عطر وعباة ؟؟؟ مفروض شهر عباة مثلا و شهر اشياء ثانية ( ملابس ولا عطور الخ ) , حطي للصدقة لازم مثلا 5 دنانير , والباقي وفرية عشان تشترين شئ عليه القيمة مثلا ساعة ماركة ولا شنطه ولا موبايل

 

[مُخملْ]

حبيبتي : محّد يقدر ينظم ميزانيتجْ لأن هالشي بيدج أنتي .
شوفي الأشيا الضرورية اللي تحتاجينهاْ واستقطعي من مصروفج
مبلغ كل شهر واخذي اللي تبينه .
المطاعم حددي لها يوم أو يومين بالأسبوعْ عشان تقدرين توفرِينْ .
أوسوّي جمعيةْ وياخواتج وأمج أضمن لجْ وأحسَنْ عشان لايروح المصروف ..


ربي يبارك لجْ ويسهّل أمرجْ وييسره لج

 

[قمر بيت أبوها]

شوفي أنا وخواتي الفلوس ماكانت تقعد معانا ليله تخيلي نطيرها كلها
بعد فتره اتفقنا انا نسجل كل شي بمذكره صغيره تخيلي طلع أغلب فلوسنا تطير علي شي تافه
بالأخير صرنا قبل كل نهاية شهر نشوف وش نبي هالشهر لبس جديد ولا عطر ولا نخطط علي سفره
وبالاخير صارنا نسلف اللي بالبيت
ونقطه ثانيه لما يصير خصومات بوقت معين فصلي عباتين بدال الوحده وينزل عليك من سعرها واجد
والعطور أطلبي أرخص بكثير من المحلات وسعر المبالغ فيه
والمطاعم حددي ايام بس تأخذين منها
ومنها تجمعين بس نصيحه عاقبي نفسك عشان تصيرين تمام مع المصروف شريتي شي زايد الشهر هذا اللي بعد لا تشترين شي

 

[حلوه بس هبله]

شوفي حبيبتي
انتي تقولين امج تساعدج وعندج مصروف 50 دينار
لازم النص الاول مثلا20 للمصرف والعبي
بس حبيبتي غلط كل شهر عطر وميك اب ومطاعم وانتي تبين توفرين
لازم تنظمين جدولج مثلا مره كل شهرين تشترين شي نفسج فيه وتحاولين بسعر اقل صعبه تشترين مثلا عطر ب 30 وباقي مطعم وطلعات والخ
لازم حبيبتي تنظمين جدول مشترياتج العطور والميك اب شي مو ظروووووري حيل عشان تعيشين عليه
الحمد الله عندج عطور اذا حيييل اشتري وقت المناسبات شي غالي ونص الباقي من فلوسج جمعيها
لا تلعبين بالفلوس لان الي يعطيج اياهم ابوج ترا نعمه بس انتي مو عارفه شلون تصرفينهم لاني الاحظ من كلامج كله عن عطور ومطاعم وعبي
والمشكله تقولين يخلصون
شي طبيعي بيخلصون لان العطور الي تبينهم مو رخيصه والمطاعم هم مو رخيصه لازم تنظمين جدول مشترياتج وطلعاتج لازززم

موفقه حبوبه

 

[د-سوسه]

حلوه فكره الجمعيه..وتوفير مصرف المطاعم مطلوب ..ومدام تلبسين عباه يعني المفروض مصاريفج اقل لانه موديلاتها ماتتغير بسرعه ..
عندي لج خطه :فكري ان الشهر مجرد ايام وبسس..
اخذي مصروف الشهر الياي ,,قللي من المطاعم كثر ماتقدرين وبهالشهر مسكي نفسج لاعباه ولاعطور ولاشي استخدمي الي عندج لمده 28 يوم بس وبعدها راح ينزل مصروف الشهر الياي ..خليج علي خطتج بتخفيف المطاعم وشوفي اغراضج الي عندج هل مازلتي مومحتاجه تشترين اشياء يديده !!! الشي الي خلص روحي اشتريه والي ماخلص خليه ..جدامج 28 يوم يمكن ماتحتاجين تستخدمينه وشوفي اشكثر تقدرين تيمعين ..
الحين يمعنا المبلغ وخلصنا ..اذا بغيتي تشترين شي لنفرض ب30دينار ..اخذي 20 من مصرفج الحالي و10 من الي يمعتيهم وبجذي تتسلفين من نفسج وبنفس الوقت ماتكسرين ميزانيتج الشهريه ..و لما تحسين نفسج غنيه مراح تصيرين ملهوفه عالسوق انتي الحين تصرفين لانج خايفه الفلوس تخلص وتحتاجين لكن لما تتطمنين ان معاج فلوس راح تفكرين انتي محتاجه للشغله الي بتشترينها او لا ..
صدقيني هالطريقه بتضبط ميزانيتيج..وبتكتشفين ان عندج اشياء وايد موجوده بخزانتج انتي موشايفتها..
لاتنسين الصدقه ..والله يباركلج بفلوسج ..

 

[حالة حنان]

كل الكلام اللي قالوه البنات مانفع معاي
انصحج تقرين كلام الله عن الانفاق والله اتخليج اتوبين كثير اشتكيت وانصحوني بس ماأتوب ضليت أصرف أقول وين فلوسي
كنت مثلج وبعدها قريت بالنت ان الله سبحانه أمرنا بالاعتدال في المأكل والمشرب والانفاق واننا سنحاسب
عليه يوم القيامه مرتين من اين اكتسبته وفيما انفقته وان المبذرين كانوا اخوان الشياطين صدق الله العظيم
قريت شغلات اكثيره وصرت اقرى خلتني أتوب والحمد الله يارب وعندي خير الحمد الله ومستانسه وأقول الحمد الله
محد قدر يخليني أتوب عن الاسراف غير كلام الله سبحانه وتعالى والقصص والعبر عن الاسراف خلتني أحس ابقيمة الفلس
وعليج بالصدقه تزيدج خير السموحه على الاطاله.