المنفصلات خصوصا والمتزوجات عموما.. رايكم بنات

[ملكهـ علي عرشي]

السلام عليكم ورحمة الله وبركاته

وصلاة وسلام على سيدنا محمد وعلى اله وصحبه اجمعين ..

ابي افتح معاكم موضوع عن الخطابه << بعد برنامج مسائي بالراي الى استضاف خطابه

قعدت افكر بينى وبين نفسي هل خطابه هذي من بي عندها ...؟ الامراء والوزراء ولا الناس الى ع باب الله وحالتهم تعبانه << خلونا صريحين وشفافيه مطلوبه بالموضوع
انا عن نفسي مابي امير او وزير ولابي الفقير الى امشي اطر انا وياه او واحد ايب عله على قلبي مره ثانيه

الى عانت من زواج سابق لها وتعبت لين تطلقت ووحمدت ربها انها ماحملت ولا جفو اعيالها ابوهم واهو جذي ،،، راح تفهم قصدى وهلخوف الى فينى

طبعا انا لابروح عند خطابه ولاشي مافكر حاليا ع الاقل بس من حقي اجوف حياتى افكر بمستقبلي هل اظل جذي طول عمري اقلب باوراق الماضي واندم ع اختياري الغلط او ضروفي الى حطتنى مع انسان مايستحقنى ،،،

بس بنات انا عند خووووووووف مسيطر علي اخاف اتزوج مره ثانيه واكرر الغلط اخاف اختار انسان غلط وتكون هذي رصاصه الاعدام بنسبه لى اعدام بطيئ لانه ماقدر اطلب الطلاق مره ثانيه يعنى موووووووت .. مو تشاؤوم ولاكن خوف من الخافي والاختيارالغلط


الحين سوؤالى لكل منفصله ،..

* معاير اختيارج لزوج المستقبل .؟

*اذا بتزوجين تروحين عند خطابه << شدراج انها بتيب لج الانسان الزين الى يعوضج عن الى جفتيه . واهم شي تستمر الحياة مع بعض .؟

*هل الانسان الدين اهو المعيار او الغنى او الطيب او المركز .. لانه وايد ناس بويهين واخر شي يطلع العكس وجوفي انواع والوان الظلم ..

*واذا لقيتى مواصفاتج شدراج باجر يطلع لج مركز عالي وعنده بلاوى بالسر محد يدري عنها ..

اترك لكم المكرفون والكي بورد وغردووووووووو
​

 

[Miss McDonald]

رد : المنفصلات خصوصا والمتزوجات عموما.. رايكم بنات

.



وعليكم السلآم وآلرحمه ,


الخطآبة اغلب اللي يلجوؤن لهآ , البنات اللي طآفهم قطار الزواج , اللي يبي يتزوج 2 و3و 4 , مطلق , أرمل ..
يعني حآلات خآصه !


والاسئلة مآقدر اجاوبج عليهآ


آلله يرزقج بالريل اللي يعوضج =)

 

[قاهره عذالي]

رد : المنفصلات خصوصا والمتزوجات عموما.. رايكم بنات

شوفي لا تندمين على شي

الزواج قسمه ونصيب بالنهايه



ثاني شي

اللي يخطب

لازم تسألون عنه عدل من جميع النواحي
عدل عدل

لان الناس بالخطبه تطلع الزين وتخفي الشين
وفي اشياء حتى جيرانهم مايعرفونها ولا زملائه بالدوام
فالسؤال عدل عدل

هو الطريق لاختيار صحيح

 

[ملكهـ علي عرشي]

رد : المنفصلات خصوصا والمتزوجات عموما.. رايكم بنات

شاكره مروركم الغالي .. وردودكم

الله يجازيكم الخير والجنه امين

 

[Sama Kuwait]

رد : المنفصلات خصوصا والمتزوجات عموما.. رايكم بنات






انا لا يمكن ألجا لخطابه لاني ما احب اعرض نفسي اللي يبيني بيلقاني ببيت اهلي

و الصراحه اخاف من الخطابه تكون نصابه تاخذ فلوس على الفاضي ولا تلزقج بأي احد ما يسوى

و الزواج الثاني بالنسبه اذا صار حياه الله واذا ماصار عادي مارح اموت لان زواجي الاول كان كافي ان يكرهني بالزواج و الرياييل كلهم

وانا دايما اقول ان شاالله ياربي تكتبلي اللي فيه الخير لي سواءا بالزواج ولا من دونه


و انا اتمنى واحد يخاف الله فيني ويكون انسان وعنده احساس و طبعاا يكون على دين ويتحلى بالاخلاق و متربي عدل وهذا الشي الشخص اشك ان موجود بهالدنيا

بسبب اللي مريت فيه واللي اسمع عنهم

و اذا موجود الله يقربه ان شاالله ويكون من نصيبي

 

[روحي زوجي]

رد : المنفصلات خصوصا والمتزوجات عموما.. رايكم بنات

مافيها شي الخطابه

ومثل ماقالت احد الاخوات لازم السؤال عن الرجال وعن اخلاقه

 

[بخـــارى]

رد : المنفصلات خصوصا والمتزوجات عموما.. رايكم بنات

نصيبج راح اييلج من غير خطابه

فريحي راسج من سوالفهم

 

[Vouge]

رد : المنفصلات خصوصا والمتزوجات عموما.. رايكم بنات

الزواج نصيب
الطلاق قرار !


مهما حاولتي تختارين و تسئلين و تتحرين ما تدرين شنو بالنفوس !
نصيب!

 

[قلبي القرآن]

رد : المنفصلات خصوصا والمتزوجات عموما.. رايكم بنات

انا ما أيد الخطابه كلش لأن احس جني عارضه نفسي للبيع سوري على الكلمه
وهي تقعد تعرض لفلان وعلان كأني سياره وتقوله مواصفاتي وتعرض للبيع
وحتى باجر لا تزوجني بكون غير مو نفس اللي هو طالبها من بيت اهلها من غير خطابه
يمكن يفكر اني معنسه ولا طايحه بجبد نفسي مو نفس اللي خاطبها من بيت اهلها من غير خطابات
اتمنى تتقبلين وجهة نظري واذا ربي كاتبلج انج بتزوجين راح اتزوجين من غير خطابه
وكل شي قسمه ونصيب
وحبيبتي لاتفكرين وتحاتين واذا تقدملج واحد خلج واثقه واهم شي الظن الزين المتفاؤل
مثل ماقالنا سبحانه وتعالى أنا عند ظن عبدي بي فخلي ظنج ان ربي بيعوضج بواحد
أحسن من الأول وبيوفقج معاه والله يكتب لج اللي فيه الخير والصالح

 

[الأميرة جوري]

رد : المنفصلات خصوصا والمتزوجات عموما.. رايكم بنات

اللي الله كاتبه بيصير سواءا طريج خطابه او لا بس ماعليج الا الدعاء والله يعوض ويرزق بنات المسلمين

 

[DooLy88]

^^

معاها

 

[ديانا سبنسر]

انا مايد الزواج عن طريق الخطابة احس انها نصابة

 

[الغاليه نونو]

اقول حبوبه تعالي يمي اشوي وسمعي كلامي ومايصير الا الخير بإذن الله"

انتي الحين فشلتي بزواجج الاولاتي وهذا قدر وربي كاتبه عليج التشاؤم قطيه ورا ظهرج وبدال ماتطقين باب الخطابات طقي باب اللي خالقج سبحانه وتقربي من الله اكثر بتنحل كل امورج محد يدري وين اللي يسرج من اللي يضرج غيره سبجانه وصدقيني حتي لوتكونين محبوسه بين اربع اطوف وماتطلعين من باب الحوش ومحد شايفج ابد ابد بييج نصيبج اذا ربي كاتب لج تعرسين

اول المعايير علي قولتج بانج تعرفين الريال زين والا موزين لازم يكون خايف ربه مصلي مسمي ومن عايله تخاف ربها واهله ناس سنعين ومعروف عنهم العقل والحكمه
لي ياج واحد بهالمواصفات ثقي بالله تماما انج بتعيشين ملكه في بيتج ومملكتج اذا عرفتي اشلون توظفين عقلج وقلبج مع هالريال بكل ايجابيه

الخطابات فيهم الزينين وفيهم الشينين بس نصيحتي ماتروحين لاي خطابه ونطري نصيبج من رب العالمين يمكن الخيره انج تقعدين وماتعرسين علشان تبرين والدينج وربي يختص بعض عباده لهالشغله واحتمال تكونين انتي وحده منهم
يعني باختصار مايصير لج شي من رب العالمين الا فيه حكمه لج قولي الحمدلله علي كل حال يمه

 

[المستبــده]

* معاير اختيارج لزوج المستقبل .؟
اذا كان قصدج شنو ابي تكوون مواصفاته
ف اكيد من عقب فشلي بزواجي الاول اكتسبت خبره وان شاء الله اعرف اختار هالمره صح
و ان شاء الله ربي يعوضني ويعطيني على قد نيتي

*اذا بتزوجين تروحين عند خطابه << شدراج انها بتيب لج الانسان الزين الى يعوضج عن الى جفتيه . واهم شي تستمر الحياة مع بعض .؟
لا طبعا مستحيل
*هل الانسان الدين اهو المعيار او الغنى او الطيب او المركز .. لانه وايد ناس بويهين واخر شي يطلع العكس وجوفي انواع والوان الظلم ..

*واذا لقيتى مواصفاتج شدراج باجر يطلع لج مركز عالي وعنده بلاوى بالسر محد يدري عنها ..

اخر سؤالين
هالشي مو بيدنا هالشي بيد ربي العالمين
احنا ما نعلم الغيب بس مو عشان فشلنا اول مره معناتها
انه خلاص نحط ايدنا على خدنا ونقول اكيد بنفشل مره ثانيه
لا المفروض نكون تعلمنا من زواجنا الاول عشان ننجح بزواجنا الثاني
وخليج متفائله وثقي بالله
انه الله يعوض عن اللي شفتيه​

ولا تنسين الدعاء

 

[مجنونة بس عاقلة]

اقول حبوبه تعالي يمي اشوي وسمعي كلامي ومايصير الا الخير بإذن الله"

انتي الحين فشلتي بزواجج الاولاتي وهذا قدر وربي كاتبه عليج التشاؤم قطيه ورا ظهرج وبدال ماتطقين باب الخطابات طقي باب اللي خالقج سبحانه وتقربي من الله اكثر بتنحل كل امورج محد يدري وين اللي يسرج من اللي يضرج غيره سبجانه وصدقيني حتي لوتكونين محبوسه بين اربع اطوف وماتطلعين من باب الحوش ومحد شايفج ابد ابد بييج نصيبج اذا ربي كاتب لج تعرسين

اول المعايير علي قولتج بانج تعرفين الريال زين والا موزين لازم يكون خايف ربه مصلي مسمي ومن عايله تخاف ربها واهله ناس سنعين ومعروف عنهم العقل والحكمه
لي ياج واحد بهالمواصفات ثقي بالله تماما انج بتعيشين ملكه في بيتج ومملكتج اذا عرفتي اشلون توظفين عقلج وقلبج مع هالريال بكل ايجابيه

الخطابات فيهم الزينين وفيهم الشينين بس نصيحتي ماتروحين لاي خطابه ونطري نصيبج من رب العالمين يمكن الخيره انج تقعدين وماتعرسين علشان تبرين والدينج وربي يختص بعض عباده لهالشغله واحتمال تكونين انتي وحده منهم
يعني باختصار مايصير لج شي من رب العالمين الا فيه حكمه لج قولي الحمدلله علي كل حال يمه

كلام صحيح

 

[تاجره كويتيه]

الجاي الي رب العالمين وخلي موضوع الخطابه لان الزواج قسمه ونصيب ممكن تحطين عند الخطابه ويجيج نصيب احسن من برا وبعدين انتى توج طالعه من تجربه وتات تات بختيارج الثاني
وعطي نفسج فتره راحه واستجمام من الريل
انا نفسج ماصارلي نصيب مع الاول والحمد لله من غير عيال بس ماكان على البال الثاني وماكنت ناويه لاني تعبت بس سبحان الله كان نصيب يكون ابو عيالي ولله الحمد عوضني عن كل شي

 

[بنت الفوزان]

رد : المنفصلات خصوصا والمتزوجات عموما.. رايكم بنات

نصيبج راح اييج سواء من خطابه ولا من غير خطابه

 

[Lemon Juice]

قبل كل شي لازم يكون عندج يقين تام انه التوفيق من الله سبحانه , وهو الرزاق الكريم سبحانه

اشلون تعرفين اذا الريال زين ؟

السؤال عنه عالراحة حتى لو فتره طويله .. وخلي اخوج اذا عندج اخو كبير يتعرف عليه ويصاحبه ويقوي علاقته معاه

تسألون عنه بالفريج والمسجد والدواوين والشغل

طبيعي الخوف اللي فيج كونج مريتي بتجربة , علينا نسعى ونسأل ونتعب ونبذل كل اللي قادرين عليه والتوفيق من الله

وهالكلام ينطبق لكل بنت سواء منفصلة أو ما سبق لها الزواج

الله يوفقج ويرزقج زوج صالح تقي حليم يسعدج دنيا وآخرة يا رب

فوضي أمرج لله ولا تحاتين المستقبل

 

[ام شووووق]

رد : المنفصلات خصوصا والمتزوجات عموما.. رايكم بنات

مافيها شي الخطابه

 

[ملكهـ علي عرشي]

رد : المنفصلات خصوصا والمتزوجات عموما.. رايكم بنات

انا لا يمكن ألجا لخطابه لاني ما احب اعرض نفسي اللي يبيني بيلقاني ببيت اهلي
و الصراحه اخاف من الخطابه تكون نصابه تاخذ فلوس على الفاضي ولا تلزقج بأي احد ما يسوى
و الزواج الثاني بالنسبه اذا صار حياه الله واذا ماصار عادي مارح اموت لان زواجي الاول كان كافي ان يكرهني بالزواج و الرياييل كلهم
وانا دايما اقول ان شاالله ياربي تكتبلي اللي فيه الخير لي سواءا بالزواج ولا من دونه
و انا اتمنى واحد يخاف الله فيني ويكون انسان وعنده احساس و طبعاا يكون على دين ويتحلى بالاخلاق و متربي عدل وهذا الشي الشخص اشك ان موجود بهالدنيا
بسبب اللي مريت فيه واللي اسمع عنهم
و اذا موجود الله يقربه ان شاالله ويكون من نصيبي

حاسه فيج ياقلبي..لانه الى مريت فيه كافي يكرهنى باي ريال

بس لابد انه حتى لومنفصله راح افكر بالزواج حتى لوكرهت الزواج عقب الى مريت فيه .. بس حلو الاستقرار

وحلو انه يكون في امل .. كافي تشاؤوم وكافي نقلب بدفاتر الماضي بس هشي مومعناه انا مارح نتخذ اي قرار بعقل وتركيز وتفكير واستعانه بالله بالاولى والاخيره

وربي يرزقج بالى تبينه ونفرح فيج جريب انتى وكل منفصله انظلمت بحياتها امييين
​