الللي عندهم خبره في دبي يدخلون ضروري

[غلا الاحساء]

مساء الورد عليكم حبيبات قلبي

كيف حالكم مع البرد

انا طالببتكم طلب وابي منكم مساعده

انا مسافره دبي في شهر فبراير باذن الله

مع زوجي وولدي عمره 4 سنوات

ابي منكم جدول حق 5 ايام

ترا ماعرف في دبي شي يعني فهموني ههههههه

اهم شي القريه العالميه متى تفتح ومتى تسكر كلن يمدحها ابي اشوف وش هي

والي اعرف كيف الاجواء في شهر فبراير برد ولا حر لانو معاي ولدي اخاف عليه

وياليت اللي بتقول لي عن مثلا دبي مول تقول لي وش فيه هالمول ابي اكون على علم

وابي افضل المطاعم والفنادق نظام شقق اي شارع في دبي يكون حلو ورخيص

انتظركم ضروري

 

[ياهم لدي رب]

وعلسكم السلام

الله يسعدج ياااارب ويكتبلج احلا سفره

القريه العالميه السنه اللي طافت كانت تعش من شهر ٣ ومو على مدحهم عاااااديه جداً وتعب مشي كبيره حيل حاطين عوالم عالم باسم كل دوله وبعض العوالم حاطين جدامه عن الدوله رقصه ومهرجين ومو كل العوالم لكن لادخلتيه البضايع مالها علاقه بالدوله يعني مو منتجات الدوله يمكن محل محلين الباقي لاااااا والمحلات متكرره بكل عالم

اما المطاعم بصراحه ما اقدر افيدج ناسسسيه اسمائهم احنا مأجرين سايق معانا واهو يودينا يعني انقول نبي مطعم هندي كباين يودينا او صيني وهكذا
وبالفندق نطلب من المطعم مطعم جيلي رااائع جداً عموما احنا حجزنا بشقه فندقيه بس والله والله فندق ٧نجوم شيء رااائع وراقي وفخم اسمها كومفرت انا شفت تعليقات بالنت انها نفس الفندق شوفيها في بوكننق وماكانت غاليه جنه كانت الليله ب٥٥٠درهم على مستواها بلااااش وع فكره كانت كبيره مطبخ فيها وغساله شغل نظيييييف وجديد
بس عيبها باب الحمام زجاج لكن فيه طوفه تعزل السرير والمطبخ عن الحمام بس خوفج من ولدج ياهل يتمشى


روحي دبي مول فيه النافوره الراقصه وكبييييير حييييييل فيه ماركات وفيه نفس لولو هايبر مادري شسمه فيه حركات حلوه كاكاو غريب على مجسمات حلو مع الصوايغ اذا بتاخذين صوغه
وفيه محل روووعه يسوي استاند زجاج داخله صورتج ثلاثية الابعاد يعني جنج مجسم من ورا وقدام جسمج طالع ما ادري شلون افهمج يعني جنج انتي عالطبيعه مصغرينج ومدخلينج داخل قالب زجاج ههههههه طبعا انا ليش ذكرته لج لاني حسافه ماكان معاي صوره وناسه صور زفافكم اكيد لها اسم هالتقنيه بس انا اعليميه بهلامور وهما عندهم مطعم لذيذ جداً يطل عالنافوره الراقصه لكن اوبن ايريا يعني مكشوف والناس هناك والاجانب كلهم كامرات ديجيتال وفيديو

ومول الامارات هم حلو وفيه مطاعم وكوفي شوب بكثره
وفيه مجمع صغيرور اسمه فن تايمز على ما اعتقد حلو حق اليهال كله العاب وفيه محل كوفي كله جليد بس ما اعتقد يصلح بشهر٢ الجو بارد

رحت اتلانتس ما اعجبني مفاصيخ الاجانب تفصيخات قووويه وفيه مكان على ما اعتقد نفس الديسكو المهم ماطولنا ٥دقايق وطلعنا بس كان فيه مطاعم وكوفي ومحلات ماركه

ولاااازم تروحين لاون تايم ماركات وارخص من الكويت خمي منهم يهههبل
مممممم
وقالولي عن سوق نايف رخيييص بالجمله فيه عبي وعطور وهدايا بس كله هنود والبضاعه صوايغ يعني حق نفسج مايعجبج شي بس لوووعه زحمه نفس اسواق مكه اللي مستواها بسيط جنج في مكه

اذا تذكرت شي قلتلج

 

[غلا الاحساء]

مشكوره ياقلب

انتي اللي بردتي قلبي الله يفرج همك

وكمان اذا عندك شي قولي لي

وابي فنادق نظام شقق ارخص من اللي ذكرتيه بليز

 

[غلا الاحساء]

مشكوره ياقلب

انتي اللي بردتي قلبي الله يفرج همك

وكمان اذا عندك شي قولي لي

وابي فنادق نظام شقق ارخص من اللي ذكرتيه بليز

 

[ياهم لدي رب]

مشكوره ياقلب

انتي اللي بردتي قلبي الله يفرج همك

وكمان اذا عندك شي قولي لي

وابي فنادق نظام شقق ارخص من اللي ذكرتيه بليز

من ناحية الشقق دخلي موقع بوكنق وشوفيهم طبعا انتبهي للنجوم اخذي نجمتين موغاليين
وفي طريقه اذا الميزانيه محدوده لاتقعدون في دبي روحوا لابو ضبي ارخص من دبي ومن ابو ظبي روحوا لدبي من الصبح لاخر الليل ورجعوا لابو ظبي وابوظبي يمدحونها بس انا ماجريتها ويمدحون العبي انها ارخيصه فيها

 

[دانة_ دبي]

- بالنسبة للشقق انا ما عندي خبرة كبيرة فيها بس نصيحتي خذي ارخصصصصصصصص شقة لان الاسعار جدا مرتفعة في الشتاء ف دبي .... دوري مكان يكون حيادي قريب من المولات و قريب من الشوارع الرئيسية




- بالنسبة للمولات لا اطوفين ها المولات ابدا
دبي مول - مول الامارات - مردف ستي سنتر - مارينا مول


- بالنسبة للمشي و الوناسة
ابدا ابدا لا اطوفين ها المكان

شارع جميرا - ستي ووك ( هذا ممشى فيه مطاعم و العاب بسيطة للاطفال و هو جديد ف دبي بس زحمة من حلاته ) - ذا ووك ( ممشى دبي المارينا ) فيه مطاعم و كافيهات و فنادق و قوارب و يخوت و رحلات بحرية حلوة في الغالي منها و في الرخيص و هذا الممشى جدا كبير حاسبي تلبسين كعب لان المكان كبير و وسيع


القرية العالمية ها السنة تهبل من الساعه 4 - 12 المساء و اغلب الفعاليات تكون بين ال 7 -10 المساء اقصد الفرق الغنائية لكل دولة و الاستعراضات بس الجو جدا بارد ف القرية ف البسي شي دافي
ولا اطوفين القرية التركية اطلب منهم البطاط المحشي
ولا اطوفين البان كيك الهولندي بتلقينه ف كشكات القرية
لا تنسين القرية التايلندية بتلقين مقابلها مطاعم للروبيان وااااااااااااااو



- بالنسبة للمطاعم

لا اطوفين هذا المطعم العجيب اسمه " صمد العراقي " موجود في شارع جميرا و اطلبي منه " مسكوف " و " دومنه "

و المطاعم يا حلاتها اللي ف جميرا اشكال و الوان و انتي رايحة شارع جميرا مري على ميركاتو مول هو مو كبير بس حلو و شكله راقي

- بالنسبة للالعاب

سكي دبي في مول الامارات و دبي مول
وندر لاند
وايد وادي ( العاب مائية ) تجنننننننننن الصراحة بتلقينه ف نهاية شارع جميرا



ودي اكتب لج اكثر بس تعبت ههههههههههههههههههه حياج ف دبي تنورينا و اي شي من عيوني

بالنسبة للمواصلات : استخدي مترو دبي لبعض المواصلات ل دبي مول و مول الامارات .... و اطلبي منهم بطاقة المترو اللي اسمها " نول " و من تدخلين المترو يدخلج بسرعه بالبطاقة

 

[غلا الاحساء]

دانة دبي فديتك ياقلبي

كل اللي قلتي كنت ابيه من قبل عشان تكون عندي معلومه فديتك والله

وكمان اذا ذكرتي شي قوليه هناك باقي ع رحلتي ٦ايام كل يوم بدخل عشان استفيد منك

 

[غلا الاحساء]

دانة دبي فديتك ياقلبي

كل اللي قلتي كنت ابيه من قبل عشان تكون عندي معلومه فديتك والله

وكمان اذا ذكرتي شي قوليه هناك باقي ع رحلتي 6ايام كل يوم بدخل عشان استفيد منك

 

[قطرية كشخة]

الماركات دبي مول وفي عندج السوق الصيني وعالم فراري في بوظبي

 

[غلا الاحساء]

انا مش رايحه تسويق

بس سياحه وترفيه ووناسه

وتسووق فقط بسوق نايف وش تنصحوني اخذ منه من بخورات وزعفران ضروري

 

[ام الدرر]

مادري اختي رديتو ولا بعد
بالنسبة لسوق نايف
اهم شي عن المشي مسافة كبيرة
قولي للتاكسي ودني مواقف الباصات عند سوق الذهب وخل ينزلج عند داماس
يمه سكه داخليه دشي وكملي سيده لاخر السوق المسقف وعقب لفي يسار بتحصلين محلات البخوروالزعفران
ارض الزعفرن بيصير هني عند زعفران وعطور ومعمول
وفي محل اسمه نسيم الحدائق بعد المعمول والخلطات عنده حلوه
ومحل زعفران الخيام بخور درهم​

 

[باربي شمر 87]

الله يعطيها العافيه دانة دبي ما قصرت كفت ووفت

 

[noo7a]

المجمعات البنات ما قصرو معاج

بس خلي لج يوم الصبح لي العصر روحو عالم فراري ابو ظبي بالتكسي ما ياخذ وقت طويل
و روحو يوم زياره لفندق اتلانتس فيه اكواريوم و العاب مائيه

راح يستانس ولدج بهالمكانين وايد

 

[yam_yam]

البنات ماقصروا