الكيكات المجربه والناجحه - الرجاء المشاركه من الجميع-

[مطفوقه^ملقوفه]

قوه بنات أشلونكم وشخباركم؟؟؟

بهالموضوع أبي تحطون طرق الكيكات اللي جربتوها وطلعت حلوه وناجحه ومضبوطه
بس يهالموضوع بس تحطون الكيكات اللي بالفرن مو الحلويات بشكل عام !!!!!
أنا أنشالله يبيلي قعده سنعه ومحترمه مع الكيكات بالفرن لأن الصراحه وااااااااااااايد جربت وبقولكم عن النتايج وبعد بجرب زياده
اللي تحط أسم كيكه يا ليت تحط الطريقه والمقادير ويحبذ مع الصور (طراره وتتشرط خخخخخ)
أنا راح أحاول أنزللكم صور بس هالمره بصور بالتلفون وأدزهم عالأيميل وأحاول أنزلهم من الأيميل عالمنتدى
خو الحين أنا متفرغه كل يوم بسوي كيكه غير خخخخخخخخخ
يالله بشوف تفاعل أبي يصير هالموضوع أحسن موضوع تفاعل بكل المنتديات ويويلها يا سواد ليلها اللي ما تحط طرق الكيك تره حافظه الطباخات وحده وحده
نفر نفر خخخخخخخخخخخخخ(ريا وسكينه)

 

[رفرف]

مشاركة: الكيكات المجربه والناجحه - الرجاء المشاركه من الجميع-

انا من بدت العطلة وانا صايرة سنعة كل يومين اسوي شي بس انا مو زود مع الكيك ... ماسويه الا حق بيت اهلي او حمولتي ...

جربت الكيكة الفلبينية (الشيف رقيقة) طلعت حلوة واتهبل . وللأسف ماصورتها
ةالمقادير مو مخزنة عندي اظن موجودة بالمنتدى


جربت كيكة الرهش حق السفيرة عزيزة من زمان اتينن يمكن سويتها الف مرة كل من يطلبها مني..

المقادير والطريقة مع بعض :
كيكة بلسبري (خليط الكيك الاصفر تسوينها مثل ما مكتوب عليها)
علبة قيمر نستله
قلاص صغير رهش
تخلطين القيمر والرهش مع الكيك اللي سويتيه قبل لا تدخلينه الفرن بالقفشة وتدخلينها الفرن لين تستوي ..

بس حطيت فوقها صوص من اختراعي اللي اهوه شوية حليب نستله وقيمر ورهش بدون مقادير يعني انتي وذوقج اذا ماتبينها سويت حيل تزيدين القيمر وتقللين الحليب وجذي .. وخلطتهم عدل مدل وصبيته فوق الكيكة طلع عجيب ..

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

ميرسي بوكو رفروفه أنتي للأزمات والشدائد يا بعد جبدي


أنا زعلانه لأن البنات ما تفاعلوا بس بكتب لكم أكثر من كيكه واللي تدش تكتب لو كيكة سارالي
طبعا الكيكات ماخذتهم من منتديات ثانيه وجربتهم وطلعوا رووووووووووعه


كيكة بصلصة التوفي

المقادير:
1)كاس حليب بودره محموس - كاس حليب بودره مو محموس - ملعقة طعام bp
2)كاس جوز هند - نصف كاس زيت - 3\4 كاس سكر - علبة قشطه - 4 بيضات - ملعقه متوسطه فانيلا
التوفي : كاس سكر - فنجان ماء - علبة قشطه

الطريقه:
تخلط المقادير رقم (1) جيدا وتترك جانبا
تخلط المقادير رقم (2) بخلاط الكأس حتى تتجانس وتسكب في وعاء عميق
تضاف أليها المقادير (1) وتخلط جيدا حتى تتجانس وتسكب في بايركس كبير أو أثنين متوسطين
تخبز في فرن سبق اشعاله متوسط الحراره حتى تنضج وتحمر قليلا من الأعلى

طريقة التوفي:
يخلط السكر مع الماء ويحرك على النار باستمرار حتى يصبح لونه ذهبي ثم نضيف القشطه مع التحريك بسرعه حتى يتجانس الخليط ويسكب على الكعكه بسرعه
*******

كيكة البرتقال

كوبين طحين - كوب ونصف سكر - كوب عصير برتقال - كوب زيت - 4بيضات - 3 ملاعق صغيره بيكنج بودر - ملعقه صغيره فانيلا

الطريقه:
يخلط البيض والسكر والفانيلا حتى يصبح كريمه
نضيف الزيت بالتدريج ونخلط على سرعه متوسطه
نضيف عصير البرتقال ونخلط قليلا وأخيرا نضيف الطحين والبيكنج بودر ونخلط لمدة 3 دقائق
يوضع الخليط في صينيه مدهونه ويخبز في فرن متوسط الحراره لمدة 45 دقيقه أو حتى النضج
يحمر الوجه وتخرج من الفرن وتترك حتى تبرد ثم تقطع شرائح رفيعه وتصف بشكل مائل
******

كيكة الروب (لذيييييييذه)
كوبين طحين - كوب ونصف سكر - كوب سمن - علبة روب - نص كوب جوز هند - 4 بيضات - ملعقة طعام ونصف بيكنج بودر - ملعقة صغيره فانيلا

يخلط السمن والسكر حتى يصبح كالكريمه
نضيف الروب ونخلط جيدا
نضيف البيض الواحده تلو الأخرى مع الفانيلا ونخلط لمدة دقيقتين
نضيف الطحين المخلوط بالبيكنج بودر تدريجيا ونخلط لمدة دقيقتين
يوزع الخليط في أوراق الكب كيك أو يمد في صينيه بايركس مستطيله
يخبز في فرن متوسط الحراره حتى النضج (الكب كيك تنضج أسرع) تحمر من الأعلى وتخرج من الفرن وتبرد
أذا كانت في بايركس يفضل تقطيعها مستطيلات صغيره ووضعها في صينية تقديم
*******

تشيز كيك بالفرن (روعه : البسكوت خذيت طريقته من فطيرة التفاح والكريمه اللي داخل من عندي)

المقادير (البسكوت)
2كوب طحين - 3\4 اصبع زبده 113جم - علبة قشطه - رشة ملح

تعجين جيدا ثم تفرد في صينيه دائريه وترفع على الأجناب قليلا (أنشالله فهمتوا)

مقادير الكيكه من الداخل:
5 بيضات - كوب صغير سكر - 2 جبن فيلادلفيا (200جم) 1قيمر كي دي دي

يخلط جيدا بالخلاط ثم يصب على البسكوت ويدخل الفرن من الأسفل حتى ينضج (تره راح تنتفخ أول شئ وايد من البيض لا تخترعون راح ترد تفش)
تبرد وتزين بحشوة فطيره(الفراوله والكرز أحلى شئ)
*********

نصائح وارشادات أكتشفتها وأنا أجرب بالكيك:

يفضل تبريد البيكنج باودر بالثلاجه قبل وضعه في خليط الكعك فهذا يساعده على التفاعل بسرعه ونفخ الكعكه
لذهاب زفرة البيض يجب خلطها بخلاط الكأس أو بسرعه عاليه بالمضرب السلك حتى يصبح لونها مائل للبياض وهذا يساعد ايضا على انتفاخ الكعكه
يجب أضافة البيكنج بودر مع الخليط قبل أضافة الطحين للتأكد من وصول مفعوله ألى كل خليط الكعكه
يجب أضافة الطحين على دفعات والتأكد من أختلاطه بالمزيج حتى لا تعطي الكعكه طعم الطحين اثناء تناولها
يجب خلط المكونات في جهه واحده حتى لا يدخل الهواء المزيج وهذا ما يسبب هبزط الكعكه بعد خروجها من الفرن
********
بعد عندي طريقة الكيكه الأسفنجيه بجربها لن بسوي فيها حلو المانجا مال الخباز أذا جربتها أحطها لكم
وبالعافيه مقدما

 

[رفرف]

مشاركة: الكيكات المجربه والناجحه - الرجاء المشاركه من الجميع-

مطفوقه
ماشالله طلعتي فنانة ..
عاد قبل كنت فنانة بالكيك ايام ما كان عندي ناس يشجعون ..
الحين لو اسوي كيكة محد ياكلها بس الحلو ماشالله والاطباق الباردة يطيرونها ..

بعطيج فكرة صغيرونة اذا بتسوين كيكة البرتقال جربي بشري القشر وحطي منه كمية صغيرة يعني نص قفشة صغيرة او ثلاثة ارباعها راح يبين طعم البرتقال اكثر وريحتها اتصير تهبل ونفس الشي اذا بتسوين كيكة ليمون بشري القشر وحطيه يغير طعم الكيكة بالمره ..

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

مشكوره عالمعلومه
تصدقين كله أسمع عن بشر البرتقال وبشر الليمون بس عبالي هذا شئ ينباع اسمه جذي واحوس بكل مكان أدوره ما لقيته قمت ماأحطه ببعض الوصفات مادري أنه مفعوله فتاك خخخخخخخخخ
أشرايج ببقرتي بالتوقيع خخخخخخخخخخ ولهت عليها من أيام فلورا

 

[رفرف]

مشاركة: الكيكات المجربه والناجحه - الرجاء المشاركه من الجميع-

يحليلها بقرتج جنها تغيرت ...
ذكرتيني ببقرة صبوية مسميتها كووكوو توها شاريتها من بير فاكتوري اتهبل ناعمة وحنوووووونة لا ولابسه مايوه فوشي

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

مسكينه بقرتي من كثر ما شكت بعمرها أني فارقتها قطت النظاره الشمسيه وقطعت الطعام
ما تشوفينها احولت لما رجعتلها الفرحه مو شايلتها خخخخخخخخخخخ

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

قوه بنات أنا بحاول أحط الصور أذا طلعوا زين على زين أذا ما طلعوا نسخوا الرابط وحطوه بصفحه يديده

هذي صور الكيكه الاسفنجيه سويت فيها الكيكه اللي بحلو المانجا مال الخباز طلعت روووووووعه وصج تناططين عليها من أسفنجيتها
الصوره الاولى أهي صورة الكيكه اللي حطيتها بحلو المانجا أنا سويت بس نص مقادير الوصفه وحطيت بس نص الخليط اللي طلعلي بماعون الكيك وخبزتها وصارت روعه والنص الثاني زدت عليه كاكاو وسويته بالكب كيك

مقاديرها الأصليه للي تبيها:
10 بيضات
كوب سكر
كوب ونص طحين
3 قفاش وسط bp
فانيلا
3 قفاش كبار متروسين كاكاو

الطريقه
ضربي البيض بالخلاط مدددددددددددده لين يصير مثل الكريمه مع الفانيلا بعدين حطي الشكر قفشه قفشه
بعدين حطي البيكنج بودر وبعدين حطي الطحين على ثلاث دفعات فقط لا غير
وحطيها بالفرن ولا تبطلينه الا عقب 45دقيقه بالضبط

 

[رفرف]

مشاركة: الكيكات المجربه والناجحه - الرجاء المشاركه من الجميع-

مطفوقة مو طالعة الصور ...

 

[جارة القمر]

مشاركة: الكيكات المجربه والناجحه - الرجاء المشاركه من الجميع-

مطفوقه^ملقوفه

مساء الخير

رفرف

مساء الخير

شخباركم


أنتوا بصراحه تعذيب





شغلكم روعه

وتسلم الأيادي

شوفي هذا الكيكه مأخذته من منتدى


وجربته وبعد حلوه

كيكة الشوفان الكويكر

2 كوب كويكر أو كأسه

كاسه الا ربع زيت

كأسة سكر بودره

6 بيضات

علبة قشطه


ملعقة صغيره هيل وملعقة كبيره دارسين

وملعقة ونصف كبيره بيكنج بودر


مكسرات حسب الرغبه

جوز عين الجمل أوفستقأو لوز




طبعا اول شي البيض مع الهيل والدارسين والبيكنج بادور


بعدين القشطه وبعدين السكر وبعدين الزيت


وأخيرا الكويكر


ثم تضعينه بالفرن


وبعدين تزين بالسكر البودره

وبالعافيه

ولي عوده

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

مشكوووووووره جارة القمر

رفرف ادري مو طالعه ببجي
يعني شسوي أنتف نفسي والله بنط من الفراش للأرض على ريولي (هدي لا ينكسر خشمج خخخخخخخ)
بس صج اسفنجيه طلعت تفقصينها ترد تنتفخ ومحد صدق أن مسويتها بالبيت تعرفين مفراكة اليهال الأسفنج جذي صارت

 

[جارة القمر]

مشاركة: الكيكات المجربه والناجحه - الرجاء المشاركه من الجميع-

ماشاء الله عليج


ودوم يارب بالهنشاط


شوفي هذي بعد الكيكه الرخاميه


كوبين ونصف طحين

2 كوب سكر

1 كوب حليب سائل

1 كوب زيت 3 بيضات


1 ملعقة كبيره بيكنج باودر

2 ملعقة كاكاو بودره


يخلط السكر مع الزيت بالخلاط ثم يضاف إليه البيض ويخلط جيدا وثم يضاف الحليب والطحين مع البيكنج باودر


يصب نصف الخليط بالقالب المدهون


وباقي الخليط نضيف إليه ملعقتين الشوكلاته وتخلط جيدا وتضاف إلي الخليط السابق

وتدخل الفرن



====================



كيكة البشائر


أنا مسميته جذديه علي أسم رفيجتي



1 علبة كيكه روبن هود


بخليطه العادي


وطبعا تضعين فيه قليلا من اليهل والزعفران وماء الورد


أشراح تسوين تخلطين جوز عين الجمل مع كوب جزر مبشور وملعقة دارسين

تحطينهم بالنص

تأخذين جزء من خليط الكيك تخحطينه بعدين هالخلطه

وبعدين باقي خليط الكيك


ودخليه الفرن

تطلع يم يم يم يم

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

تسلم أيدج قموره اجربها انشالله وأقولج

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

وهذي صورة الكيكه الأسفنجيه بعد عمري رفروفه الحلوه أهي اللي سوتها لي

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

يحليله هالموضوع مغبببببببببببببر
كله منكم بتقصون علي تقولولي ما تسوون كيك يعني سليحط
المهم بحطلكم طريقة كيكتين لذيذين من زماااااااااان ما خذتهم من عالم حوا وجربتهم بس صج قمة في اللذه
جربوهم وادعولي


كيكة الفستق
(1) 5بيضات - نصف كوب زيت - كوب سكر - علبة قشطه - ملعقه صغيره فانيليا
(2) كاس ونصف فستق ناعم
(3) 4 ملاعق طعام طحين - ملعقة طعام بيكنج بودر
للوجه: علبة قشطه - ظرف دريم ويب ملعقتين طعام سكر - ملعقتين طعام فستق ناعم - ملعقة طعام كاكاو مبشور

الطريقه تخلطون المقادير (1) مع بعض عدل مدل وتضيفون عليهم مقادير (2) ونخلط عدل لين يمتزجون
وبعدين نضيف مقادير (3) ونخلط عدل ونصبها بصينية فرن مدهونه ونخبزها لين تستوي ونحمرها
تبردونها وبعدين تخلطون مقادير الوجه بدون الكاكاو وتصبونها عليها لما تبرد وترشون الكلكلو (أنا حطيت فليك فتته بايدي)
وبالعافيه

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

الكيكه الثانيه حددددددددددها لذيذه
أمي قبل تسويها والحين تعلمتها من الشيف رقيقه وقمت اسوي طريقتها

قدرة قادر

المقادير
علبة كيكه روبن هود أو النوع اللي تفضلينه(بالكاكاو حلوه وبالفانيليا هم حلوه) تسوينها مثل ماهو مكتوب عالعلبه وخليها على جنب
6 بيضات
3 اكواب حليب سائل
فنجان سكر (أنا حطيت استكانة شاي) فانيليا
ماء ورد حسب الرغبه (ما حطيته)
(حطيت قفشه ماي زعفران ونتفة هيل مطحون)

مقادير الكراميل:
قفشتين أكل سكر
1ونص قفشة أكل ماي
قطرات عصير ليمون (أنا استخدمت الكراميل الجاهز اللي ايي بعلبة كريم كراميل)

تخلطين البيض والحليب والفانيليا عدل مدل وماي الزعفران والهيل

تحطين السكر عالنار مع الماي وتحركينهم لين يذوب بعدين تحطين قطرات الليمون
توزعينه بظهر القفشه على القالب وتصبين خليط البيض وبعدين صبي خليط الكيك فوقه
حطيه بجمام مائي ودخليه الفرن لين تستوي الكيكه
تبردينها ممكن بالثلاجه وبعدين تقلبينها وتنوكل بارده

وبالعافيه

يالله عاد بس أنا اسوي كيك أهو كل وحده تدلي بدلوها

 

[إمرأة مثالية]

مشاركة: الكيكات المجربه والناجحه - الرجاء المشاركه من الجميع-

تسلم يد الكويتيات المثاليات .

 

[رفرف]

مشاركة: الكيكات المجربه والناجحه - الرجاء المشاركه من الجميع-

مطفوقة هذا رابط كيكة النعناع سهله ومضبوطة

http://www.q8yat.net/showthread.php?t=11933

 

[مطفوقه^ملقوفه]

مشاركة: الكيكات المجربه والناجحه - الرجاء المشاركه من الجميع-

مشكوره امرأه مثاليه عالمرور


رفرف أفا عليج كيكتج محطوطه عالويتنج ليست بس بسبب الواسطه نجدمها جدام ونقرب موعدها خخخخخخخ
تسلم أيدج