الغازات ومادراك مالغازات

[BlackRose]

السلام عليكم

بنات انا عندي مشكلة مع بنتي وبطنها وقلت محد يساعدني فيها غيركم

انا توني والدة صار لي اقل من شهرين وبنتي الصغيرة وايد فيها غازات فقيرة ووايد تتعصر وتبجي ومتروس بطنها غازات

وديتها الطبيب قالي غيري حليبها سويه حليب ابتاميل كومفورت هذا مافيه غازات
وغيرنا الحليب وهم ماكو فايدة خفت شوي

واحط لها ماي غريب مع الرضعة ومرات احط لها دوا اسمه غاز هذا هم زين

ومرات اسوي لها حبة حلوة ونعناع

بس هم ملاحظتها تتعب الفقيرة من الغازات

شسوي لها بليز اللي عندها خبرة تفيدني

 

[عاشقة السراب]

كيف حالج سلامتها ما تشوف شر أن شاء الله اختي ما ادري شنو ظروفج ليش ما ترضعينها من سدرج حرام صارت حقل تجارب ما ألومج على ما تسوين لكن علاجها الحليب الطبيعي صدقوني في وحدة اعرفها ولدها يبجي على طول من الألم وراحت دكاترة ولم تصل للحل بس في دكتور راحت له واخذ الأدوية ورماها في الزبالة وقال في علاج سهل قالت الحقني يا دكتور قال ارضعيها طبيعي في نقطة اخرى الرضاعة من الممية ما تكون مضمونة لأن يدخل مع الرضاعة هواء ويضرها معليش كلامي فيه من التأنيب لكن والله حرصي عليج وعليها المسكينة ولا تنسي بعد كل رضاعة أن تخرجي الغازات بحيث تضعينه على بطنها وتكون على سدرج وتطبطبين على الظهر وتمسحين عليه حتى تتجشأ وبالنسبة للكمون والنعناع تعطينها شوى وخليها تنام على بطنها فترات سواء على ريلج أو سدرج آسفة طولت عليج موالله يخليها لج

 

[malak_alroo7]

الله يعينج و يعين هالفقيره والله يكسرون خاطري اليهال
لما بنتى كانت بعدها بالاربعين الدكتور قالي اقلل الحليب و اطول المده بين كل رضعه لين تخف شويه .. بس تعرفين ماكو فايده لين الحين اهي تعانى من الغازات بس احسن من قبل الحمدلله
شوفي اختى وايد يمدحون الينسون جربي و شوفي

 

[خوخة]

جربي دوا من الصيدلية عليه صورة ياهل ماركة الهيمالايا وايد زين
بس حبيت أضيف أن طريقة الرضاعة هم لها دور في تسبب الغازات
يعني لازم ترفعين الطفل في وقت الرضاعة لا تخلينه مستلقي وترضعينه

 

[روضة الصالحين]

اخواتي انا كنت بصراحة ماأنام كله سهرانه مع ولدي كله يصيح ويتلوى بس الحمدلله اولا وأخيرا ألحيناحسن بكثير بفضل الله ثم بفضل أخت فاضلة معانا بالمنتدى دلتني على رضاعات طبية ماتسمح للغازات والهوا أنه يدخل مع الحليب والحين أنا مرتاحة ولدي ينام 3ساعات متواصلة ولاعاد يتلوى وصار مرتاح..
أسم الرضاعات((( إيفنت ))) تلقينها بسنتر بونيت لاند مارك سابقاا
ولاتنسيني يااختي من الدعاء.......

 

[أم ملاك]

اختي تقريبا كل الامهات يعانون من هالشي بالمرحله الاولى ويخف تدريجي .. بما انها ترضع صناعي اول شي لازم تكون المميه من النوع اللي يمنع الهوا اللي يسبب الغازات ومنها انواع وايد ايفينت مثل ماقالت الاخت او جيكو وانا عندي منه تلاقينه بلاند مارك وانواع وايد ثانيه بالصيدليات متوفر ..

الشي الثاني الحليب في انواع ثقيله على معده الياهل او حديد فيها وايد يسوي له مشاكل انا كنت اعاني من نفس المشكله مع ولدي كل يوم بالطبيب غيرت حليبه الى ابتاميل كمفورت برتقالي بس مكتوب عليه بخصائص هضميه مريحه وارتحت وايد عليه ..

الشي الثالث لا تقطعين الاعشاب ابد موبس لما تبين تريحينها على باليوم مره ويفضل حزه النوم عشان يهديها .. تلاقين عند العطار خلطه اعشاب خاصه للاطفال .. او ملوت ميلوبا بالجمعيه واهم هالاعشاب حبه حلوه .. يانسون .. وكراويه ممكن تخلطينهم كلهم ولا كل واحد بروح بس اليانسون ممتاز ..

وربطي بطنها عشان يدفى في حزام يكون قطن خاص لليهال بس مو تشدينه لا بطريقه زينه ان ما يضايقها ولا يطيح ..

الشي الرابع ان تلبسينها على طول دسوس بيدها لانها لما تبرد ينمغص بطنها وريلها اهم شي الاطراف

الشي الخامس ممكن لما تحطين مخده لينه وتنومينها على بطنها ترتاح ..

والشي السادس ضروري تريع عشان يطلع الهوا ..

والشي السابع لما ترضعينها لازم يكون الحليب تارس الحلمه مالت المميه كلها مو نص عشان الهوا .. يفضل تظلين على الشغلات الطبيعيه وتبعدين عن الادويه ..

و ان شاء الله نسمع الاخبار الزينه عنها ..

 

["النووور"]

بنات انا توني والده صارلي 36 يوم وأرضع من صدري بس لو تشوفون ولدي شلون يتعصر ويتلوى!! صج تعوركم قلوبكم

بطنه مترووووس غازات ماطوف عليه ساعه الا ويتعصر بالنهار وبليل ولما يطلع الهوا صوته عالي يبين وايد مع ان يرضع من صدري!!

يعني عن تجربه الرضاعه الطبيعيه مالها شغل

 

[رفرف]

والله انا جربت كل شي مانفع معاي ولا شي منهم بس يمدحون الكمون والبابونج اما تخلطينهم او كل واحد بروحه بس مرت اخوي وايد نفعو ولدها وانا ماحسيت في اي تقدم مع بنتي مع انها ترضع طبيعي

 

[رومية]

انا جربت ماي غريب و (gas bimbi) قطره من الصيدليه ... تحسن ولدي ولله الحمد ..لكن الغازات مااختفت ...والينسون +الكراويه وحبة الحلوة هم ممتازين. ماراح يختفي المغص الا لما يبدا ياكل البيبي ....شنسوي لازم نتحمل.

 

[BlackRose]

يعطيكم العافية حبيباتي على مروركم

والله هالياهال يعورون القلب لمن يتعصرون تكسر الخاطر بنتي تبجي وتصرخ

بالنسبة حق الحليب انا استعمل لها ابتاميل كومفورت هم متروس غازات

وشكلي باجر بروح اشتري لها المميات اللي قلتوا عنها اعتقد في منهم في مذركير اللي بجمعية رميثية

وانا اسوي لها مرة باليوم خلطة حبة حلوة مع النعناع هم احس ان ماتريحها وايد واحط لها بالرضاعة ماي غريب او مرات قطرة اسمها gas bimbi

ولمن احطها على بطنها وايد ترتاح بس خرعوني من هالسالفة قالوا لي موزين الياهل ينحط على بطنه خو كل شي صار يخرع بهالزمن

وشكلي بشتري لها خلطة من العطار احسن

ويعطيكم العافية على تجاربكم الحلوة والله استفدت

 

[قلائـد الحمـد]

فيه دوا حق الغازات القوية اسمه ((ديسفيلاتيل))
عباره عن سبع نقط للرضع في الحليب ممتاز شويه عليه كنت اعاني مع بنتي ماتنام بس بعد فضل ربي هالدوا نفع معاها ..طبعا مو على طول نستخدمه بس تخف الغازات اوقفه ..وعلى فكره الديسفلاتيل فيه منها حبوب حق الكبار حبوب مضغ حق الغازات تهبل انا مجربتها بنفاسي ممتازه

 

[الوردة المكنونة]

عزيزتي شربيها يانســـــــــــون
وحليب نوفلاك للغازات

 

[سارةوعد]

مساء الورد
أنا قريت موضوعج وبعثتلج بالخاص قلت أسرع
بس بكتب ألحين علشان يستفيدون خواتي
شوفي تيبين شوي رشاد يعني خمس حبات وتحطينه بحلجها وتعطينها الرضعه علشان تشربه وايد زين الرشاد بس مو كل يوم إنتبهي
وتروحين للحواج وتشترين
(نونخه + حبة حلوه + يانسون + كمون)
وتيبين قفشه صغيره وبس يطبخ طفيه وخليه شوي وحطيه بالمميه وشربيها 3مرات باليوم لازم حتى لو مافيها شي أصلن زين للبطن من الأربعين ولين 6أشهر
وبعد كل رضعه لازم تطلعين الغازات إلي بطنها يعني ترعينهااااااا
وعطيها رضعة كراويه مره وبعد يومين مره
والله يخليلج بنتج ياااااااااااااااارب

 

[poneta]

جربي حليب نان وايد خفيف وخالي من الغازات
وعطيها ينسون وان شاء الله راح ترتاح عليه
وفي عند عيادة د.عفاف الرومي تلقين مميات ماركة دكتور براونز ها

 

[poneta]

جربي حليب نان وايد خفيف وخالي من الغازات
وعطيها ينسون وان شاء الله راح ترتاح عليه
وفي عند عيادة د.عفاف الرومي تلقين مميات ماركة دكتور براونز هاذي ما دخل غازات وايد زينين
وما تشوفون شر

 

[avimore]

غيري حليبها