الطبخ !

[خليجية]

مرحبا
أبغى اسأل سؤال مهم
هل تنقص أنوثة المرأة اذا كانت لا تعرف الطبخ؟
لأني بصراحة ما احبه !

 

[Miss Cherry]

مافهمت شنو القصد بتنقص أنوثتها

حبيبتي الطبخ أكيد هواية ونفس يعني مو الكل يجيد الطبخ لكن لازم تتعلمين لنفسج ممكن تحتاجين نفسج

لو تدخلين المطبخ تشوفين وتعرفين الأساسيات

 

[<miss botamba>]

لا ماتنقص طبعا ولا تزيد

بس اذا قصدج للمتزوجه اهوا شي جميل ان المرأه تطبخ لزوجها

وفي ازواج يحبون المرا تطبخ وفي ازواج مايحبون او مايهمهم

 

[M!ss CoLoRz]

قد يكون السؤال مضحك ولكن

اهوه ما ينقص من انوثتها ولكن ينقص من سنعها هالشي في عاداتنا احنا العرب وحتى الدول الشرق اوسطية الاجنبية ودول شرق آسيا لأنه هالشعوب اكيلة درجة اولى .. دليل الحب والكرم عندنا وعندهم الاكل ، الزوجة راح تصير ام وكل الناس يحبون طباخ أمهم واللي امه ما تطبخ يتحسر لأنه مافي شي يحن له بعدين مثال الهنود الام تطبخ لعيالها اللي يحبونه أطفالا ورجالا واليونانية تخز في ولدها اللي توه معرس وتعطيه غرشة زيتون تقوله ودها وياك والايطالية بعد ما يحتاي من عيالها يقولون بيزورونها تترس لج الطاولة باستا وسلطات وتيرامسو وتقول حق ولدها انطونيو شفيك ما ذاقيت من ذي وتقول حق بنتها جوليا شرايج اليوم في الغدا تراني غيرت فيها شوي واحنا الخليجين الزوارة عندنا من اول ما ندخل الين ما نطلع يا فارشين سفرة يا صابين شاي اكل في اكل وجوفي الام شلون تستانس وتجهز وتفكر وتخطط طول الاسبوع حق هاليوم من حبها لهم.

يعني من غير المعقول ومن غير اللائق انه وحدة متزوجة ما تسوي حق زوجها حتى توست بحجة انه والله الخدامة موجودة او اهل زوجها يطبخون في حالة ساكنة معاهم والزوجة المصونة كل شي يوصل لعندها .. الخدامة ما تضمنين نظافتها واهل الزوج اكيد راح ايي يوم يتعبون يتمللون يمرضون وما يطبخون .

اما في حالة كانوا ساكنين بروحهم فهاي أدهى وامر .. طبعا في ازواج ابدا ابدا ما يهمهم الموضوع بس لما يتهمونج اهله بقلة السنع الجواب راح يكون فعلا في هالموضوع يا ابيض يا اسود
المطبخ موجود ليش؟؟ عشان تسخنون الاكل في المايكرويف وتحفظونه في الثلاجة!!!
شخصيا اجوف ان الطبخ مو من واجبات الزوجة ولا اهيه مجبورة تطبخ خصوصا اذا اهيه دوامها ما يساعد ولكن على الاقل مرة في الاسبوع تدش المطبخ عشان تكسر بيضة لأنه فعلا حتى ولو كان الرجل ما يهمه لكنه بالنسبة له دليل حب زوجته له والمثل يقول الطريق لقلب الرجل معدته ولما تسألين اي واحد هالكلام صحيح راح يقول سواء كان ضعيف ولا متين طبعا

 

[برووورة]

اتقان المرأة لفن الطبخ احد اسباب السعادة في البيت وحب زوجها لها لانها به تعبر عن حبها واهتمامها لزوجها ثم ان الاكلات الحلوة اللذيذة تغير المزاج والنفسيه
حببي نفسج فيه واجعلي بيتج واحة كلها سعادة وهناء علشان تكونين زوجة كاملة والكامل رب العالمين