الزواج من كويتي !

[لتين ~]

السلام عليكم

القسم الوحيد النشيط قلت احط استفساري هنا

سؤالي للسعوديات المتزوجات كويتيين وعايشين بالكويت

عطونا تجربتكم وكيف العيشه بالكويت بعيد عن الاهل

والعادات والتقاليد ... بإختصار نبي كل وحده تقولنا تجربتها

وهل انتم مبسوطين وماشين والا لابد يجي يوم وتندمون ؟



اتقبل اراء الجميع ونصايحكم

والله يوفق الجميع :eh_s(17):​

 

[لتين ~]

وينكم بنات ؟

طيب مو شرط سعوديات نبي اراء الجميع​

 

[فتاة الكوخ]

عادات وتقاليد الكويت تختلف عنا يالسعودييين ؟؟؟؟؟
بالعكس عاداتنا وحده وديننا واحد ودمنا واحد وحتى بعض الكلمات الشعبيه جدا نقولها ويقولونها وعادات الخليج وحده وعيال الخليج عيالنا وبناتهم بناتنا الله لايغير علينا يارب

 

[الجادل الخشف]

انا كويتيه بس عندنا اهل سعودين وشكثر عندنا ماخذين سعوديات والعادات وحده ماكو شي يفرق شي بسيط يمكن
واقولج شي السعوديه اللي خذت كويتي من اللي اعرفهم ومن الجماعه تحسنت احوالها تغيرت للاحسن
ما ابالغ بس شفت بعيني نماذج
والشاطره اللي تقدر تمسك زوجها وترا البنت اذا تزوجت تبي زوجها وراح تبني معاه اسره وبيت فاهلها شي طبيعي تتعود على بعدهم وتقدر تروح لهم بالصيف والا ايام العطل شكثرها بالكويت والاعياد

 

[أميرة-]

اغلب النماذج اللي حوالينا سعوديات ماخذين كويتين تلقينها عايشه عيشه احسن مليون مره من عيشتها عند اهلها ربي يهنيهم هالكلام مو حسد والله بس فعلاً شي اشوفه

 

[لتين ~]

شكرا للي ردو


الباقيين وينكم ؟

 

[فتاة الكوخ]

ايه تذكرت ممكن بس بعدها عن اهلها بس المواصلات سهله ومتوفره

 

[انسام الكويت]

انا اشوف امي دايماً كانت تبجي لمن تكلم خوالي وكانت تنطر من صيف لي صيف عشان بس تروح وتشوف خواتها وجدتي وخوالي والكل لمن تخلص العطله عند خوالي وبيوم رده الله وكيلج كل خالاتي حولها ويدتي ويبجون لمن يودعونها والحين ماشاءالله طافت سنين وايد وكبرنا وتزوجنا وعيلنا وضلت بروحها بالبيت ويا اخوي لا ونيس لا اخت لا اخو تزروهم اللهم الجيران وبعض الاهل مع انه الحياة بالكويت الحمدلله زينه وسهالات بس الاهل محد يقدر على فراقهم هالشي ولا عن ديره اللي ربا فيها اذا انتي من داخلج قادره اتحملين الغربه وانج تبعدين عن اهلج اكثر من شهور توكلي على الله

 

[keka89]

نفس الشي كلنا خليج واحد وعادات وتقاليد ودين واحد والكويت احسن بوايد أشياء وفري

 

[رحيل المرافيء]

فيه تجمع للسعوديات شوفيه
ومن كلامهم احس متندمين ليش تزوجوا بالكويت لانهم بعاد عن اهلهم ومايعرفون احد

 

[M!SS.LOBY]

الله يوفق ويرزق الجميع

 

[ورقة ناعمة]

انا اماراتية متزوجة من كويتي وحاليا نحن مالجين

للحين مرتاحه الحمدلله منه ومن اهله وصدقيني مافي اختلاف لان خليجين فاغلب العادات وحده

توكلي على الله اذا تحبينه الريال


وشي طبيعي راح تخافين من الغربه لكن الكل يقولي راح اتعود مع الايام والحياه مستمره