الزواج الثاني..والبيت!!!

[فجرالاحساس]

مرحبا خواتي..انا متوهقه وحايسه ومالي غيركم..ابي نصيحتكم ومشورتكم لاني بجد تعبانة ومو قادرة اتحمل...

مشكلتي من البداية اني تزوجت شخص مطلق وعنده اربع عيال..وعنده بيت مقسوم الدور الاول لطليقته وعياله
والدور الارضي له

طبعا اول ماتزوجنا سكنت معاه بالدور الارضي..وياليتني ماسكنت...شفت نجوووووم القايله من عياله وكل شوي يقولون طمعانه في بيتنا..حتى مصفط السيارة علي بالحسرة..ومشاكل كثييييييييرة تسببت في اجهاضي لاول بيبي في حياتي واول فرحتي..

منها قررت يانطلع يشقة بعيدة او نطلق..
وفعلا طلعنا بشقة صغيرة..وماتتصورون السعادة اللي عشناها في هالشقه
وجبت ولدي الاول..والثاني..والثالث
والحين موقادرين نتحرك بالشقة من صغرها!!!!

و هني المشكلة؟؟؟؟؟؟؟؟؟؟؟؟؟
زوجي مو راضي يطلع من هالشقة الصغيرة لانها في بيت اخوه يقول الناس تضحك علي يقولون مخلي بيتك وعيالك ولاحق المره
واذا مو عاجبتج الشقة نرد للبيت ونرد للمشاكل؟؟؟؟؟؟؟؟؟؟


بنات عفيه انصحوني جزاكم الله خير ...انا قاعده افكر بالطلاق ماني متحمله ارد لذاك البيت ومشاكل عياله وطليقته
على فكرة زوجي طيب ومحترم وخلووق بس مشكلته البيت!!!!
وهو ماعليه قاصر فلوس..يقدر يشتري بدال البيت ثلاث..بس اهو بيضغطني عشان يسكن قريب من عياله

محتاجه محتاجه راااايكم لاتخلوني..ماني عارفة شسوي؟؟

 

[M!ss co0ol]

شلون طليقته ساكنه وياكم في نفس البيت؟؟

الله يعيينج

 

[صخر جلمود]

مو معقووله بيتم كل عمره بالشقه وأهوو عنده بيت

ردي حق بيته ومصيير الصغيير يكبر وتكبر معاها متطلباته

وماراح يقدر يسكنهم كلهم بيت واحد

يمكن بالمستقبل يطلع بيت كامل

ليش تخربين حياتج وحياة عيالج

عشان بيت ؟؟؟

 

[مندوبة ام بندر]

دام الرجال زين
لا تخسرينه
وانتي ما وضحتي لنا شنو المشاكل اللي تصير ببيت زوجج وطليقته
علشان نشوف ونحكم
اذا عاديه او لا
كل شي بالمحايل
حايليه
وبتطلعين بشقه اكبر ان شاء الله
بس لا تفكرين بالطلاقلهذا السبب
حرام عليج فكري بعيالج

 

[فجرالاحساس]

ساكنة غصبا عنه ..وثيقة البيت باسم زوجي بس اهي حاضنة للاولاد وماخذه حكم محكمة

 

[رااميس]

مايصير ياقلبي تحرمينه من عياااااله زي مانتي تحبين عياااال هم هو يحبهم

انا حااسة فيج انك تقولين البيت ضيق تحملي ضيق البيت ولاتحملين رجعة لبيتهم الثااااني لانك شفتي الضيم صح

تحملي لين الله يوسع عليكم

 

[meen_ana]

حبووبه خلي مدخلكم برووحكم مالكم شغل فيهم

 

[متلف الروح]

حبيبتي كل شي ولا الطلاق


صبري وتحملي ويبيه بالكلام الحلو والزين وحاولي تقنعينه انه يشتري بيت حقج

واذا كان قصده مايبي يكون بعيد من عياله خل ياخذلج بيت قريب من عياله

وقوليله الحق حق مثل ما الطليقه لها بيت انا بعد ابي بيت
لانه بالشرع واجب عليه انه يوفر لج سكن

والله يسهل عليج يارب وتنحل مشكلتج

 

[سفيره الهم]

تحملي واصبري بالشقه ولما تضيقون حييييييييل راح يحس اهو من نفسه راح يدور لا تتطلقين على سبب سخيف

 

[اميرة-الاحجار]

تتطلقين عشان مكانج صغير ؟؟ استغفر الله معقوله هذا تفكير وحده عندها 3 عيال ..؟؟
شوف الناس برا شلون عايشين 5 افراد بملحق وحمدي ربج ماتوقع ريلج حاطكم بغرفه وحده ..
مفروض لو وين كان ريلج تكونين معاه وتقدرين ظروفه لاتظغطين عليه يمكن اهو يبي يكون قريب من عياله بعد
انتي تقدرين تبعدين عن عيالج ؟؟

 

[دنيتى زوجي M]

ردو البيت االاول وسوو لكم مدخل خاص فيكم

وهم ياحبيبتي هذول عياله ويبي يكون قريب منهم

والله يفرجها ان شاءالله

 

[zanobita]

الله يكون بعونج حبيبتي ...
بس ولله استغربت من شي معقوله كلمة الطلاق صايره لهلدرجه سهله عندكم ؟
قاعد تقولين زوجج طيييب و حنووون و خلوووووق و يحبج و عندج منه ثلاااااث عيال و عشتو ويا بعض احلى ايامكم
معقوله تخلين سلبيه وحده تغطي على كل هل ايجابيات ؟ @@
عموما انتي مالج الا انج تصبرين و تقعدين بشقتج و تبينين له انكم مو مرتاحين بطريقه ذربه يعني مو بالهواش و النجره يا انج تحاولين تقنعينه يدور لكم شقه او دور اكبر شوي يكون بنفس المنطقه عشان يكون قريب من عياله و منكم او انج تردين للبيت و مدخلج بروحج و مالج شغل فيهم يعني تكونين منعزله بالكامل عنهم ...

موفقه انشالله ...

 

[فجرالاحساس]

مو معقووله بيتم كل عمره بالشقه وأهوو عنده بيت

ردي حق بيته ومصيير الصغيير يكبر وتكبر معاها متطلباته

وماراح يقدر يسكنهم كلهم بيت واحد

يمكن بالمستقبل يطلع بيت كامل

ليش تخربين حياتج وحياة عيالج

عشان بيت ؟؟؟

اقولج شي والله العظيم اني اكره امر بسيارتي يم شارع بيته..انا ياتني نفسية من ذاك البيت ..ماقدر اضغط على عمري وارد
اهوا بعد من حقه يراعي مشاعري..ليش لازم انا اللي اقدم تنازلات؟؟؟؟

 

[شنوووفه]

اللله يعيينج حبيبتي

 

[فجرالاحساس]

اشكر كل وحده ردت علي و عطتني رايها..حبيباتي البيت كان مقسوم ومدخلي منفصل عنهم بس المشاكل توصلني
واللي تقولي تتطلقين عشان البيت..حبيبتي هذا سكن يعني شي اساسي لي ولعيالي واللي يقهرني انه عنده خير ونعمه وعنده عماره كامله باسمه
يعني يقدر يبيع العمارة ويشتري لنا بيت..هذا اللي قاهرني ليش يستخسر فينا بيت والله منعم عليه
والله يابنات اني قلت له اني انا اللي ادفع الايجار بس خل نطلع بس ما رضى؟؟؟يقول ما اسكن عند غريب
بالله عليكم شسوي معاه؟؟؟؟حاولت بالمسايسه وياه بس مقفل مو راضي يطلعنا..
والله زهقت..الواحد بيرتاح بحياته و يونس عياله بعزه وخيره الحمدالله ماديتنا تسمح بس العناااااااااد صعب
والله قاعده افكر بالطلاق يمكن عيالي يعيشون بسكن احسن

 

[ريم @]

يقدر زوجج يامن لها شقه او نص بيت ويدفع اجاره والمحكمه ماتقدر تقوله شئ

وانتى وزوجج تعيشين بالبيت كله او تاجرين نص ونص تسكنين فيه

وعلى كلامج زوجج مقتدر ماديا يعنى يقدر يطلع طليقته وعيالها ويسكنها فى شقه او نص بيت

واذا قالج ماقدر قوليله انا اسكن بنص البيت واجر النص الثانى وبفلوس الاجار ادفع اجار مطلقتك


وبالطريقه هذى المحكمه ماتقدر تقول شئ لانه زوجج يكون مامن لها سكن

 

[ريم @]

اذا عنده عماره خل يطلع طليقته وعياله فى شقه بعمارته

واذا قالج الناس وكلامهم خل يقولهم والله طليقتى راعيت مشاكل ولا ابى اخسر بيتى الثانى

وفكرة الطلاق شيليها من بالج انتى عندج عيال غيرج صبر على الضيق والخاله الحجره

والحموات والهواش والجوع وانتى الله يهديج على طوووووووووووول قلتى طلاق مايصيررررر

كل شئ يبيله تفكير وكثر الدق يفج اللحام

 

[حياتي كلها لله.]

لالالا تفكرين بالطلاق
تخسرين ريلج وتهدمين بيتج
ردي بيتج وطنشي المشاكل
ولالا تخسرين ريلج

 

[فجرالاحساس]

حبيبتي ريم ..اهوا بيته وايد كبير يقدر يبيعه ويشتري بيتين بفلوسه
بس اهوا مايبي يطلع عياله وامهم من البيت..يقول لازم اعيشهم بنفس المستوى مابي يتغير عليهم شي!!
ماتتصورين العز اللي اهم عايشين فيه حاطلهم طباخ وخدامتين وسايق وسيارة
واحنا كل شي علينا بالحسرة..مو قادرة احط خدامة ثانية من ضيق المكان..عيالي اذا بجى واحد بنص الليل قعدو الباقي لان كلهم بغرفة!!
ليش المطلقة ماخذه حقها بالتمام والكمال وكله ىرحمهم ليش انه امهم مطلقة
واحنا كل شي بالحسرة علينا..بالله هذا شتسمينه؟؟
ريم حبيبتي لا تبخلين علي بردودج لاني ارتحت لج واحس اسلوبج منطقي وعقلاني
خليج معاي

 

[سأكسر القيود]

نصيحه حمدي الله على زوجج
في خير باعياله والله يسعدكم مع بعض
صبري الصبر مفتاح الفرج
والطلاق عذاب لج ولعيالج مو حل