الخدم على ابواب المدارس أكثر من اولياء الامور مشكلة حقيقة

[هالة الصباح]

السلام عليكم ورحمة الله وبركاته
حبيباتي وينكم يا امهات وينكم عن عيالكم ليش ليش ليش عيالكم يخاذوهم الخدم ليش ماتييبن عيالج انا ولدي بمدرسة أمريكية قلبي يدمي اشوف الخدم 90٪ يدام الباب مع سواقهم على شنو بتربونهم يعني تقولج الام ( الموظفة طبعا طبعا مو بس آنا في وايد ناس جذي )
وين وصلنا ندري انج غنية وعندج سايق وخادمة مع كل ولد وندري انج ميته على دوامج وندري انه برستيج لا يخترب آخر صيحة وموضة وندري انج تخافين مسؤولج يزعل وندري لي خذيتي مرضيه بينقص راتبج وندري انج كل المسؤولية الله يعينج
رحت حفلة ولدي في المدرسة في اليوم العالمي في صف ولدي 6 أمهات والباقي مكسور قلبهم وقاعدين ياربي يكسرون الخاطر اهاليهم ما يدرون عنهم يعني صراحة الطفل مايطلع معقد في يهال يبجون يقولون ليش امي مو يايه كا فلان امه يايه وايد يهال سرحانين والله يكسرون الخاطر الله يهدنا ويهديكم أسأل الله التوفيق للجميع

 

[موريا آدم]

صدق عنك حق
اطفالنا يحتاجون لرعاية اكثر مننا وليس من الخادمات
يحتاجون وقت اكثر لهم وهذا حقهم علينا
فهم امانة باعناقنا وليس باعناق الخادمة

 

[red dream]

فعلا كلامج عدل الامهات الحين ما لهم خلق لعيالهم -- الجيل الجديد راح يكون ---- ؟؟؟؟؟؟؟؟؟

 

[هالة الصباح]

شكرا أخواتي red dream و موريا آدم قاع افكر اكلم مديرة المدرسة تسوي اجتماع اولياءالامور انا ادري مو هامهم بس هامهم الفلوس بس المفروض يصير يوم لاولياءالامور

 

[PuPa^^SWeeT]

همن الابووو له دووور



ليش التشره على الام اكثر من الابوو ؟؟؟



بالنسبة لاخر الدوام الاغلب مايقدر خصوصا الروضة



لانه دوامهم توقيته غلط




بس الباجي اسمها مدرسة و قريبة اكيد من بيتهم


فا الخداامة توقف عادي




بس بالاحتفالات لا والله حرام الام ماتيي



ينكسر قلب الياهل

 

[سفرجل]

عدل كلامج
وانا عندي ينخصم معاشي ولا اكسر قلب اعيالي

والله يهديهم
والله يخلينا لاعيالنا ويخليهم لنا

 

[ام غازي 2012]

بصراااحه شي يعور القلب

 

[ام لعيال]

ايهههههه عاد انا انفصلت من دوامي بسبب اليهال وطلعتهم من المدرسه , ماقدر اترك اغلى ماعندي في يد الخدم اذا الذهب انحرص علييه من الخدم فما بالكم بالكنز اعيالنا , كنت اطلع واخذهم من المدارس وارد الدوام شاسوي ما رضو يعطوني اذن يومي اخذهم من المدرسه , والحمدلله الحين على طول وياهم

 

[M!SS.LOBY]

يعطيج العافيه عالموضوع كان بخاطري من زمان
صح الخدم واايد بأخر 4سنوات كثرو عند المدراس

 

[كويتيه ذربه]

صح كلامج والله نهاية الدوام عن الباب الاغلب سواق او خدم
وحتى بالاجتماع لمن نروح حتى ربع اولياء الامور مانحصلهم يايين
ياما خصموا علينا والسبه طلعتنا حق مدارس اليهال بس اكييييد عيالنا اهم
ساعات المدرس يبي ملاحظه ولا شي بيقولها حق ولي الامر يقولها حق الخدامه عشان توصلها لهم
طبعا انا ماقلت هالكلام الا شي شفته بعيني
يعطيج العافيه صاحبة الموضوع
الله يحفظ عيالنا ويوفقهم يااارب

 

[الغلاااااااكله]

معاج حق


قبل فتره وانا رايحه اجيب بنتي من الروضه شفت بنت تبجي ماتبي تركب السياره مع الخدامه والسايق وتقول له جب واهو يكلمها

ويرد عليها يقول انتي جب جب !!!!


امبيه بغيت ازفه وقفت لكن البنت اقتنعت وركبة السياره بعد ماكلمتها الخدامه

شي يعور القلب !!!!!!!!! الله يهدي الجميـع

الاطفال امانه في اعناقنا لازم نراعيهم ونداريهم


الرسول صلى الله عليه وسلم قال : كلكم راع وكلكم مسؤول عن رعيته


تشكرات عالطرح المهم ويالييت بعض الناس يحيا قلبها ...

 

[سلاسل ذهبيه]

جزاج الله خير على هالموضوع اللي كان بخاطري والحمد لله انج كتبتيه والله اني اتحسر على الاطفال كل مااروح للمدرسه واشوف الخادمه تاخذ الطفل ويطالع حواليه ينقهر من زميله اللي ماسك يد ابوه او امه والادهى والامر السايق لما يجي بروحه يطلع البنت او الولد من الروضه او المدرسه .طيب الام دوام والاب دوام بس مو مقطوعين من شجره ومو وافدين اهاليهم في بلاد ثانيه انتو حمايل لكم اهل ليش ماتجي الجده او العمه او الخاله او الجد يطلع الطفل قالو مانبي نكلف عليهم والا قالو الجده مره عوده نتعبها بالعكس راح تستانس انها مازالت لها دور .

 

[ديانا سبنسر]

إيه والله صاجة هذا السبب اللي خلاني ما توظف

 

[بنت الوفا]

والله شي يفطر القلب والله قبل جم يوم خادمتين اثيوبيات مع بنوته صغيرونه وهن يلف بجمعيه ومغازله مع السايق وضحك والبنيه بس تبجى والله حرام اتقوو الله في اولادكم