الحمام(عزكم الله) وترتيبه وتنظيمه...الكل يشارك بليز

[امون حبيبة زوجها]

قوه كويتيات
بنات عطونل افكار عشان ترتيب وتزين الحمام..عزكم الله.. يعني نبي افكار حلوه للتزين والترتيب يصير حده حلو والكل يستخف عليه وماوده يطلع
مثل حمام مرت خالي ماشالله ذاك اليوم دخلته موطبيعي فندق والله واحلى واكبر بعد مرتب حيل واللي مساعدها انها كبير ووسيع فمشتغله فيه ماشالله عليها
فنبي افكار و وتزين وهلسوالف واماكن تبيع اشياء حلوه وغريبه لاتقولون ايكيا خو كل الناس بايكيا ولاند مارك زهقنا صارت البيوت كلها مثل مثل صراحه
يلا نبي تفاعل

 

[لموية العسولة]

مشاركة: الحمام(عزكم الله) وترتيبه وتنظيمه...الكل يشارك بليز

هلا امووووون ازيك ...لج وحشة يالغلا ...عساج بعيدة وسعيدة دوووووووووم يارب

شوفي حبيبتي اهو بالاول والاخير مسألة ذوق وتنسيق وترتيب واذا تبين شغلات حلوة وغريبة عندج هوم سيلكشين اللي بالراية ..اهو نفسه اي تو زد ...وتعبي على الورد والشتلات الصغيرة تعطي منظر وايد حلو ...وشوفي سوق رامز ساعات تلقين عنده سوالف حلوة ...

 

[زيـنـه]

مشاركة: الحمام(عزكم الله) وترتيبه وتنظيمه...الكل يشارك بليز

اهم شي لا صار كل شي بمكانه يصير الترتيب ..

اشتري للحمام طقم كامل من ستاره و فوط و قلاص اللي تحطين فيه الصابون السائل و قلاص لفرش الاسنان و المعجون و سلة الزباله و انتي بكرامه .. و تلاقين هالاشياء راقيه في هوم سيلكشن بالرايه او ايه تو زد او ذا ون في مارينا مول.. و اذا ميزانيتج مو غاليه حيل .. اخذي من ترو فاليو او ايكيا او لاند مارك.. و يفضل المصنوعين من البلاستك مو الخزف عشان لا طاحوا ما ينكسرون .

اشتري الرف اللي ينحط بالدش او البانيو و يكون اما مستطيل او زاويه و مصنوع من حديد عشان تحطين فيه عل الاغراض اللي تستعملينها بالشاور مثل الشامبو و الباث جيل و الليفه و الكونديشنر و هالشغلات

اذا الحمام عندج مساحته كافيه و كبيره شوي اخذي من اكيا كبت صغير تحطينه بالزاويه او كبت فيه 3 ادراج تحطين بالكبت او الادراج كل ما يختص فيج او الاشياء الزايده مثل الصابون و الكريمات و حمامات الزيت و الفوط الصحيه و الفوط الزايده و كل ما يختص بالحمام و تبينه بعيد عن العين و لا يبين .

اشتري سلتين للملابس الوسخه .. وحده لج و الثانيه لزوجج و خليهم متناسقين مع طقم الحمام و تحصلين مرات سلال بلاستيك او قش ..و تقدرين تحطين زرع طبيعي او صناعي شتله صغيره و تقدرين اتزينين بشموع من نفس لون الطقم .

ورا الباب حطي علاق علقي عليه روبين للحمام واحد لج و الثاني لزوجج ,, و خلي معاهم نعل الحملم (و انتي بكرامه) و يكونون نفس لون الارواب او يكونون طقم و تلاقينهم بترو فاليو او ايه تو زد او الاسواق الشعبيه .

و اذا مع الطقم اللي شريته في سجاده للحمام اخذيها او كملي الطقم بسجاده تتناسب معاه .

اذا حمامج ابيض ساده المهمه بتصير سهله بس اذا الحمام ملون حاولي تنسقين لون الحمام مع كل اللي قلت لج عليه

اتوقع جذي بصير حمامج مرتب و احسن من حمام مرت خالج .. بس همتج بالذوق و التنسيق

 

[al7reyaa]

مشاركة: الحمام(عزكم الله) وترتيبه وتنظيمه...الكل يشارك بليز

انا ما انصح تشترين اكسسوارات غاليه لانج كلساع تغيرينهم
انا كل يمعه اغييرهم نفس لون الكفر علشان يصير حمامي جنه فندق
حطي طاوله مدوره بالحمام عليها السبراي والديودرنت وهالسوالف
وحطي اليرارات فيهم اشياء تنخش مو مال عرض مثل مخزن صغير فيه صابون ومعجون اسنان ومواسة حلاقه وفوط صحييه
وحطي الاكسسورارت نفس لون الفوطه بالحمام وحطي ديتول بحمامج علشان انتي تستعملينه عقب كل استخدام لو ترشين بالافرنجي والمغسله
حطي لوحات
موشرط مسمار ممكن اللزاق اللي بو ويهيين
تبين سوالف اكسسوارات
لاندمارك ارخييص وكوييس وتلقين معاهم ست زباله ومزهريه بعد ممكن تحطين زرع طبيعي بس يتاثر بالرطوبه
سيرز
اي تو زد
تروفاليو
هوم ار اس
حتى المعلم عنده اللي قوطي كامل فيه كل شي
اشتري رخيص علشان تغيرينه كل ساع ترى حلو التغيير

 

[امون حبيبة زوجها]

مشاركة: الحمام(عزكم الله) وترتيبه وتنظيمه...الكل يشارك بليز

يعطييييييييييييييييكم الف الف عافيه بنات والله استفدنا وتروفاليو وين صاير هذا؟؟
ومشكوووورين مره ثانيه

 

[نفيشه]

مشاركة: الحمام(عزكم الله) وترتيبه وتنظيمه...الكل يشارك بليز

ماقصروا البنات
بس حبيت اضيف شغلة عندج المناظر اللي تصير لزق من ايكيا احجام واشكال هم يعطون منظر مثل الفنادق وتلصقينهم مثل ماتحبين
وحطي لج سلة صغيرة للفوط الصغار ملوت الايد
واذا حمامج كبير خلي فيه ركن مفروش زوليه حلو وشيك يطلع طبعا الزل القطع مو ملوت الغرف لا في حق الحمامات ايننون من لاندمارك وايكيا
ممكن تحطين فازات شفافة وتحطين فيهم ماي ملون وشموع وتوزعينهم بالحمام يعطون منظر خيالي وحالم
ولاتبالغين وايد بالاكسسوارات يصير الحمام زحمة والحمام الصراحة حلاته يعطي انطباع بالنظافة والبساطة

 

[أغلى حبيبه]

مشاركة: الحمام(عزكم الله) وترتيبه وتنظيمه...الكل يشارك بليز

البنات ماشاءالله ماخلو شي

وهم ستي سنتر تلاقين عندهم شغلات حلوه

وبدورج صور واحطهم لج

 

[كويت 2000]

مشاركة: الحمام(عزكم الله) وترتيبه وتنظيمه...الكل يشارك بليز

وهم بعد ماكس تلقين عنده شغلات حق الحمام ورخيصه.............

 

[قهوة عربية]

مشاركة: الحمام(عزكم الله) وترتيبه وتنظيمه...الكل يشارك بليز

عندج محل نور الجنان اللي بمجمع الرحاب شغلاته راقية والفوط حلوة وناعمة

وتلقين عندهم سيت كامل من الاستاند وعلبة الكلينكس وحامل الفوط وعلبة للورود المجففة والزبالة

( أكرمج الله ) وقلاص للصابون السائل حتى علبة للكلينكس المعطر تلقين عندهم

 

[Dancing^Queen]

مشاركة: الحمام(عزكم الله) وترتيبه وتنظيمه...الكل يشارك بليز

واللي حمامها ضي والوانه خايسه شتسوي؟

 

[al7reyaa]

مشاركة: الحمام(عزكم الله) وترتيبه وتنظيمه...الكل يشارك بليز

بنات ريلي سافر الحين
لازم اذا رجع يلقى تغييرات
سنتروينت مسوي خصم بروح ازاحم خلق الله ابي بجامات حق اليهال واكسسوارات الحمام وكفر حق ولدي بسنع داره وكفر حقي

 

[كويتية أصيلة]

مشاركة: الحمام(عزكم الله) وترتيبه وتنظيمه...الكل يشارك بليز

الحمام تملين من اكسسواراته بين فتره والثانيه

فلا تشترين له اشياء غاليه

الورد المجفف حلو ترى خصوصا اذا بين فتره وفتره جددتيه وعطرتيه

وبس لما تييني افكار اقولج