الجـــزء الثـاني من قصتي ( عندالله ثم عندكم يا اهل الكويت )
مسحت دموعي والله كأني ما كنت امسحها ، اللي هي مستمرة بنزولها من عدة مشاعر انا مو قادرة اسيطر عليها
هي ( فرحتي بشوفة ولدي بعد فراق سنين ، وهي دموع خوف بان ولدي مايعرفني ) تلاطمت عندي المشاعر والافكااااار
فكرت بنفس الوقت ، أخذت ورقة وقلم وعطيته رقم تلفوني وقلت لولدي ابراهيم ( ياقرة عيني هذا رقم تلفوني واذا حسيت اني امك )
اتصل علي ، والله ياخواتي اني اقول هالكلام وانا اتقطع من داخلي ، بس اضطريت اني اتصرف جذيه علشان اجس نبض الولد
واصحي فيه احساس قاعد يحتضر اسمه ( امي ) صعب والله صعب .
رديت للمنطقة اللي فيها زوجي وانا جثة بدون روح ، يكلموني وانا اشوف الناس كلها ابراهيم يا بعد روح امك يا حبيبي ، لا كنت
اهنى بأكل ولا شرب ولا نوم ولا حياة ، مرت تقريبا سنة وانا على هالحال وفجأة يجيني اتصال كنت منتظرته على احر من الجمر
كان الاتصال من ولدي ابراهيم ، يقول لي ( يُمــــــه ) انا سويت عملية الزايدة وأبي اجي عندج ويبجي ، وكان يخاف من ابوه لا
يدري انه شافني او عرف انسانه اسمها ( امي ) ، قلت له ياولدي تصبر الله وعدني ان بعد العسر يسر ، وبعد الفراق اجتماع
وبعد الحزن فرح ، انه القادر على ذلك ، حبيبي صدقني سألت الله ان يلقي في قلب ابوك الرحمة وراح يجيبك لي يوم من الايام
بس اوصيك يا حبيب القلب والروح : انك اداوم على طاعة الله وتطلب رضى الوالدين ، ميخالف طيع ابوك واتحمل وان شاء الله
راح يأتي الفرج من حيث لا تحتسب ، خل املك بالله قوي حبيب امك ، طبعا كانت نبرات صوته فيه عبرات ، اما اا أنا فكنت اتقطع
من داخلي ، شسوي ما كان بيدي شي اسويه الا اني أُحسن الظن بالله وهذا اهم شي في حياتنا انحنا نحسن الظن بالله فيأتينا الخير
من حيث لا نحتسب .
مـــــــــــــــــــــرت الايــــــــــــــام كان ابراهيم ولدي يتصل فيني بين فترة وفترة ، مثل اللي يآخذ جرعات ( حنان ) تنقصه وتحتاجه
روحه البريئة علشان يصبر نفسه ، ويوم من الايام اتصل فيني ابراهيم وقال لي : ( يٌمــــــــــه ) وين عنوانكم ابوي بجيبني عندج
والله اني شفت لون الـــــــــدنيا غير ( شفته وردي وكأنه يوم عيد ) سجدت لله شكر ، عطيته العنوان ، قمت ابخر البيت واعطر
الغرف والممرات واهلل واكبر ، وفجأة رن جرس الباب ، ورحت افتح الباب واذا بشاب قد زانه الله بنور الايمان والصلاح ، طويل
القامة ، علامات شموخ الانسان المؤمن في تعابير وجهه ، كان ذلك الشاااااب هو ( ابراهيم ) والله لا اخفيكم سرا ، اني انا اللي
كنت ابي منه الحنان ومحتاجته مو بس هو محتاجني ، كان اطول مني ( حفظه الرحمن ) هللت وكبرت ورحبت فيه واتشرفت بخطوة
هذا الولد الصالح قبل ان يكون ولدي ،قعدنا مع بعض والفرحة تحوم علينا ، سألت ابراهيم : يا ولدي انت ما كنت تعرف ان لك ام ؟
قال لي : ابوي ما بلغني إن لي ام غير هذه المرأة اللي قدامي وهي خالتي ( ص ) وما كان يجيب لي طاري اي شي ثاني ، قلت له
انا عطيتك رقم تلفوني وقلت لك وقت ما اتحس اني امك ، اتصل علي ؟ اتصلت علي بعد سنة ، قال والله يا امي اني كنت اخاف من
ابوي وكان ابوي شديد في التعامل معي غير عن اخواني ، ويوم من الايام شفت ابوي يقلب باوراقه ورحت يمه اشوف اشعنده وابي
افاتحه بالموضوع ( هل ان لي ام غير هذي ( ص ) وكنت اقلب بالاوراق معاه وفجأة لقيت ورقة لونها ازرق وفتحتها والا مكتوب
عقد زواج بين فلا ن اللي هو ابوي وفلانه اللي هو اسم انا ما اعرفه ( اسمج )، قلت له ( يُبه : مني هذي المرة اللي انت متزوجها؟
وما نعرفها ، سكت لحظات ، وطالعني وحدق النظر فيني ، قال لي : هذي امك ( هو يقول لي / امك وكأنها صرخات داخل نفسي )
تردد امك امك ، بجيت وقلت له : زين من هي هذي اللي انا عايش معاها ؟ قال هذي خالتك زوجتي ، وانا تزوجتها بعد ما انفصلنا
انا وامك عن بعض ، قال ابراهيم : وليش يا يُبه ما كلمتني من زمان ان لي ام ( ام يا يبه ، اتعرف اشمعنى ام ) سبحان الله لانه كان
يعاني من قساوة معاملتها الحادة ، الله المستعان .
قال ابراهيم : انا لازم اروح اشوف امي ، قال له ابوه : بتشوفها بس مو الحين ، وانا راح اوديك لها بنفسي ، بس مو الحين
== كان ابراهيم يكلمني وفجأة اخنقته العبرة وانزلت دموعه بدون صوت ، قلت له : يا ولدي يا ابراهيم اذا ما تقدر اتكمل القصة
هذا دفتر وقلم ، واكتب كل اللي نفسك فيه ، وحاولت اني انسيه اهمومه واداري عليه احزانه ، رحت اسوي له من طبخي واغير له
الجو اشوي علشان ما يطول حزنه ، رحت جبت له العصير والأكل اللي يحبه من ايدي ، ولقيته خلص كتابة كل اللي كان بخاطره ،
قال بس يُمـــــه لا تقرين الورقة الحين ، بعدين ، قلت ان شاءالله يا ولدي ، كان قلبي يحترق ابي اعرف اشكتب لي ولدي واش كان
يعاني بهالسنين كلها ، وما جاء آخر الليل الا وانا على احر من الجمر علشان اقرى هالكلمات اللي طالعة من روح بريئة عانت ما
عانت ، تفاجئت وانا اقرى الورقة ، يقول لي ( امي الحبيبة : سامحيني على افراق كان بينا انا ما لي ذنب فيه ، بس كنت حاسس ان
المرة اللي اسمها ( ص ) ما كانت امي بس من معاملتها لي غير عن اخواني ، بس كنت اقول لها امي ، وبعد ما جيتيني قبل سنة
كان عندي احساس فيج ، انج امي ( ادموعج تقول لي انج امي ، لهفتج علي ، ضمتج لي بحراره كانت صج ضمة ام لولدها )
وكنت اروح المدرسة بس افكر فيج ، واحيانا كان المدرس يناديني ابراهيم ليش سرحان ، انت ولد شاطر وممتاز ، قولي لي حبيبي
اشفيك ، كنت اقول له / لا ما في شي ، لانه كان رفيج ابوي الروح بالروح ، الحمدلله يا امي ردت لي الروح من جديد بعد شوفتج
الغالية علي ، وحسيت ان الدنيا لها طعم ثاني ، واحس بفرح داخلي ما تتصورينه .
==== والله يا خواتي قمت توضيت وصليت ما تيسر لي ان اصلي لله وسألت المولى عز وجل ان يثبت ولدي على القول الثابت وان
يعوض صبره وصبري خير ، قعد عندي ابراهيم اسبوعين وسافر لابوه علشان راح تفتج المدارس ، سافر ابراهيم عند ابوه وكانه
خلع قلبي وراه ، ماكان ودي انه يفارقني ثانية ، بس هذي اقدارنا لا نخطها بأيدينا ، ولكن تكتب لنا وعلينا .
--------- بعد سفر ابراهيم لاحظت على الزوج ( خ ) اللي انا على ذمته ، انه متغير ومعاملته لي سيئة ، استغربت هذا اشفيه
انا مو مقصرة معاه ، قايمه بواجبي على أكمل وجه والكمال لله تعالى ، لاحظت انه كان بس يتذمر هاتي فلوس هاتي فلوس ، بالوقت
اللي هو بس قاعد يا نايم او يشتري ( قات ) ويروح الديوانية مع اصحابه ، بصراحه كان مهملني كزوجه ما كان يوفر لي كسوة ولا
حتى عندي مطبخ ولا حياة مثل حريم اخوانه ، بحجة انه ما عنده شغل ، قلت له زين سافر واطلب الرزق من الله ، ما راح يجي لك
الرزق وانت قاعد ، قال هاتي فلوس اسافر فيها ، قلت له : من وين لي انا ، قام يلمح على الذهب اللي هو مهري منه ، قمت اخذت
الذهب اللي عندي وقلت له ، خذ هذا كل اللي اقدر اساعدك فيه ، بس تكفى لا تنسى يوم من الايام هذا الموقف ، اني ما تخليت عنك
يوم حاجتك ، قال : ايه ايه ان شاءالله يصير خير ، هاتي هاتي الحين ، والله حسيت من لحظتها نظرة غدر من عيونه طالعه ، قلت
اعوذ بالله من الشيطان الرجيم ، يمكن الشيطان قاعد يصور لي هذا الاحساس ، استغفر الله ، اخذ الرجال الذهب وكل اللي حيلتي
على قولة اخوانا المصريين ، وراح يبيع الذهب واشوف الرجال قاعد بس يااااكل ويمتع نفسه ونوم ، ويصرف بهالفلوس ، وانا
اقول له : اش سويت حجزت للسفر علشان تشتغل وتجيب لنا لقمة العيش ، لاني فعلا تعبت من الشغل بالخياطة والتدريس على شي
ما يوكل خبز ، قال ايه ايه بس نا طرين اردون علينا بالموافقة على الفيزة للسعودية ، راحت الايام والرجال قاعد يواعدني جذب في
جذب ، وانا ما كنت اشتكي لاهلي ، لانه كان الزواج الثاني ، واي شكوى مني راح يقولون العيب فيج ،هذا ثاني زواج لج ومو
معقولة ان كل العيب في الازواج وانتي لا ، والله كانت تتصل فيني الوالدة تسأل عن حالي : اقول لها الحمدلله يا يمه بخير ونعمه
بالوقت اللي انا فيه والله جوعانه وحالتي يرثى لها الحجر الاصم ، اشتبكت مع الزوج بنقاش حاد ، اشلون انك تصرف فلوس الذهب
وانا عطيتك اياه علشان ادور لك فيزة تسافر لاي بلد وتشتغل وادز لنا اللي يكتب الله فيه المقسوم ، أأكل العيال واكسيهم من وين
انا تعبت من كثر الخياطة للحريم ، وتعبت من شيل براميل الماي على ظهري اودي لرابع دور ، تعبت من محاربة اهلك على نقابي
والتزامي باللبس الشرعي ، انا على ذمتك ، المفروض انك شايل همي وهم عيالك مو انا اللي شايله همك وهم العيال شوكلهم
شلبسهم ، ويوم عن يوم ومشاكل بين زوجي واخته المطلقة عندنا قاعده بالبيت تزيد وتكبر / وانا ما ادري شسالفة ، أسأل اشفيكم
اش صاير بينكم ، دايم لما يشتبكون زوجي ( خ ) واخته المطلقه بالكلام كانت اتهدده بشي غامض انا مو فاهمته ، بس انه يخاف و
يبعد عنها وقت الصراخ ، بدت علامات الغضب على اهل زوجي من تصرفاته اللي ما لها مبرر ، واشتغلت حريم البيت بالتوصيل
المجاني ( للحش والنميمة) ووصلوا لي الطـــــــــــــــــــــــآآآآآمة الكبرى ، ان سبب الخلاف اللي بين زوجي واخته المطلقه هو ان
زوجي هو اللي كان السبب في طلاق اخته من زوجها ، وانها حاقده عليه هي وعيالها ولازم تنتقم ، سألت شني التفاصيل خلاص
بعد ما يبي لها سكوت ، هاتوا ما في جعبتكم ، السالفة خربانة خربانه ، قالوا ان اخته بتنتقم لان زوجي قام بعلاقة غير شرعية مع
زوجة اخو طليقها وكان هذا السبب في طلاق اخته وفراقها من عيالها ، انصدمت صدمة كانت راح تودي فيني للقبر ، اي علاقة
اي انتقام ، شنو هاللي اسمعه ، مخيييييف والله رعب ، وكانت اخته على طول تتعامل مع السحرة ، الله المستعان ، فطب واتخير من
صور الانتقام اللي راح اتفنن فيه اخته طبعا ( الانتقام ) راح يشمل اخوها واسرته ، يعني انا وعيالي ، الحمدلله الذي لايحمد على
مكروه سوااااه ، طبعا بعد ما بدت السالفة تنعرف وهالتلميحات قامت يعلو صوتها ، بدل ما الزوج يخاف ويستحي لا كانت والله
النتيجة عكسية تماما ، صار جرئ اكثر من الاول ، وخاصة علي انا ، مثل اللي يبي يثبت لي شجاعته وقدرته على مواجهة الموقف
ويجذب ويقول هم اخواني واختي هذي يغارون مني ويكرهوني ، ويبون لي الهلاك ، قلت له : زين ليش يبون لك كل هذا مو انت
اخوهم ، قال بس جذيه غيره وحسد ، قلت له زين حسد على شنو ، على هالارصده اللي في البنوك انت قاعد نايم لا شغل ولا مشغله
والله كانت تمر علي الايام طعمها مثل ( العلقم المُــــر ) لا حول ولا قوة الا بالله ، مو كافي علة هالزوج وبطالته وثقلة دمه ، هم بعد
انتقام وكره ومشاكل ، اللهم لك الحمد كما ينبغي لجلال وجهك وعظيم سلطانك .
كان عندي من هذا الزوج ( ولد وبنت ) + ابراهيم من الزوج الاول ، بس اللي رزقني الله فيهم ، مرت الايام وانا اشوف بعيني
معاملة منحطة من قبل اخت الزوج وكره لي ولاخوها ، قلت له طلعني من هذي الديرة ، حرام عليك انا اشوف الشرر في عيونهم
قال لا اختي طيبة وما تسوي شي ، بس اتصارخ لها بجم كلمة وتنطم ، قلت له حرام عليك انت شمسوي بحياتك ، الله اكبر عليك
قال : كل اللي قاعدين يقولونه جذب في جذب ، هإإإإ والله كان امبين على عيونه وتصرفاته انه هو اللي جذاب ، لا والاغرب من
جذيه ان المرة اللي كان متهوم وياها بالعلاقة الغير شرعيه ، كانت اتكلمه ويكلمها عادي وسوالف وسلام وكأن ما في شي صار
( الله يعينك يا قلبي كم شفت في حياتك بلاوي )
جاني الزوج يوم من الايام وقال لي لقيت سيارة تهريب للسعودية باجر الصبح ، يالله دبري لي فلوس علشان اسافر ، قلت له : ما
عندي اي شي ، انت خذيت كل اللي كنت املكه ، قال لي : اخذي سلف من اختي والا اخواني هم يصدقونج ويحبونج ، قلت ما اعتقد
المهم ، من فرحتي انه راح يسافر ويشتغل ، قمت الفجر ( اطق طق بيت الجيران ، لوسمحتي عندج مبلغ سلف ارده لج بعد شهرين )
اللي تقول : لا والله ما عندي واللي تقول منو اللي يخلصني المبلغ ويلتزم زوجج ما عنده وفاء بالعهود ، الين لقيت وحده جزاها الله
عني خير الجزاء ،عطتني المبلغ واعطيته زوجي وقلت له روح في امان الله ، روح اقرع باب الرحمن واطلب المال الحلال .
سافر الزوج وخلّف من بعده ( هم ومصيبة الله اكبر عليه ) كره اخته المطلقه وتفكيرها الدايم انها اشلون تنتقم منه حتى لو تنتقم
مني ومن عياله ، المهم مرت السنين وانا اجر التنهيده على ارضٍ عشت فيها عزيزة ، وتنزل دموعي على اهل عشت معاهم عيشة
كريمه هم ( الكويت واهلها ) والله مو تمدح ، بس هذي الحقيقة اللي انا حاستها ، وعلشان اصبر نفسي على هالوضع السئ اللي
ان عايشته قعدت بس اقرأ القرآن واحفظ القرآن للحريم ، واعلمهم التجويد ومحو الامية ، وكنت محتسبة هذا الامر عند الله اسأله
ان يأتيني بالفرج العاجل غير آآآآجل ، مع كثرة الاستغفار يستجاب الدعاء ، حاولت الاتصال بأعز صديقه لي هني بالكويت كانت
كويتيه ، درسنا مع بعض وكانت احلى ايام طفولتنا مع بعض ولما كبرنا ، كلمتها وطلبتها ان اذا في مجال يجي الزوج عندهم وينتقل
عندهم للكويت لانه كان يتذمر من معاملة بعض السعودين في المعاملات الرسمية ، ويقول كل اللي قاعد اشقى فيه ادفعه للكفيل و
الاقامة ومعاملات لا لها اول ولا تالي ، فحاولت الحبيبة بزوجها وكانوا ولا زالوا اطيب قلبين شفتهم الله يسعدهم ويحفظهم من كل شر
الحمدلله تم ادخال الزوج للكويت عن طريق فيزة عمل ، وقعد فترة وطلبته انه يجيبني للكويت انا وعيالي ، بعد الحاح شديد وبكاء
وافق الزوج وعامل لنا على الكويت ، طبعا كان بالكويت اخوي اللي كان ( كااااااااان ملتزم ومتدين ) من اول يوم وصلت فيه انا
وعيالي لأرضي الحبيبة الكويت ، توقعت ان اخوي الكبير راح يستقبلني بالاحضان ، ويحف ويزف فيني بشوارع الكويت كلها
من فرحته فيني اني وصلت ، لكن كان العكس ، ما استقبلني ولما كلمني بالتلفون كان كلامه ناشف بدون نفس ، شنو السر في
هاللي يصير ؟؟
مريت على بيت اخوي وسلمت عليه وعلى عياله ورحت شقتنا المتواضعة ، اللي ما كان فيه غير بطانية مفروشة بالقاع ، وجدر
وقفشة بس واربع قلاصات شاي ودلة للشاي وشولة صغيرة .
سالت الزوج نبي نشرب ماي ، قال شوفي من الحين اقول لج : احنا هني بغربة ولازم نعيش عيشة تقشف حاااااااااااااااااادة ؟؟؟؟
قلت له : خير ان شاءالله ، كنا نجيب الماي البارد من المسجد ، واشوي اشوي فتح الله علي كنت امكيج بعض الخوات اللي اعرفهم
واجمع واعطيهم الزوج يجيب لنا فيها ثلاجة مستعملة انمشي حالنا فيها ، بس الصج اقوله انا ما كنت مرتاحه لفكرة عمل المكياج
لانها كانت تبي لها ميزانية ولازم اتابع الماركات العالمية والصيحات وآخر ما نزل في عالم المرآة لرسمة العين وطريقة الميك اب
شي يبي له ظهر قوي ، وان ظهري ما يتحمل ، اتجهت لي لدار القرآن اكمل تعليمي فيه ، الحمدلله كملت بجدارة ، ورحت وقدمت
كمحفظة في احياء التراث الاسلامي ، والحمدلله اختبروني ونجحت في الاختبار ، واقبلوني محفظة عندهم ، كنت في سعادة كبيرة
لاني اعلم واحفظ كتاب الله العظيم ، مرت سنين وانا احفظ في هذا المركز الطيب الاكثر من رائع ، لما فيه من مسئولات قمة في
الاخلاق والتعامل الانساني ، ( هنـــــــــــــــــاااااااااااااااا )
لما شاف الزوج حب المسئولات لي وحبي لهن ، وكانوا يساعدوني ان احتجت للمساعده ، كان يرسم شي في باله بس ما كنت اعرف
شنو ورى هالنية اللي امبيتها ، ويا ليتني ما ارتبطت بهالزوج ( بس هي اقدارنا تكتب لنا وعلينا ) ولازم نرضى فيها .
======= راح اكمل بقية القـــــــــــــــــــــــــــــصة في الجـــــــــــــــــزء الثـــــــــــــــالــــــــــــث ======
واعلمكم ان احداث هذه القصة حقيقية ، ولا زالت
اترككم بحفظ الله الى لقاء أأأأأخر مع الجزء الثالث من روايتنا الواقعية
دمتم بحفظ الله ( تقبــــــــــــــــــــــلوا مني لكم اجمل واطيب امنياتي لكم بالسعادة)
أسيــــــــــــــــــــــــــ المنتدى ــــــــــــــــــــــرة
