البليستيشن

[Blueflower84]

صباح الخير..
بنات انا متزوجة من 4 سنين و عندي طفلين.. وريلي هاب بالبليستيشن صارله سنة و انا وايد مضايقة من هالسالفة لان يقضي اغلب وقته يلعب.. يعني والمشكلة اني قاعدة بشقة غرفتين و صالة اهوا يقعد بالصالة يلعب و حزة الي يلعب لازم انا و اليهال ننحبس بالدار عشان اهوا لا يتوتر من حنتهم و حوستهم و لازم طول مااهوا موجود الخدامة ماتكون موجودة يعني بروحي اجابلهم و انا اتعب لانهم صغار و في عمر الحوسة و الحنة.. صايرة ماحب اقعد بشقتي والسبة هالموضوع و كلمته اكثر من مرة ان ينزل البليستيشن بالدوانية تحت و يلعب على كيفة مو راضي مع ان يدري اني مضايقة من الموضوع.. و اهوا وقت لعبة تقريباً من الخمس العصر لي الثمان بليل.. و طبعاً الفير بعد مايرد من الدوانية ساعات الظهر بعد مايرد من الدوام.. بس انا اضايق حزة العصر لان وقت قعدة اليهال و لعبهم.. مادري شسوي؟؟؟

 

[غارقة بأحزانها]

لا والله اهو يلعب ويستانس 3 ساعات وانتي تنحبسين
بالغرفة بروحج مع اليهال وكل الحنه هائج بدون
مساعدة
لاوالله اقعد مع الخدامه بالصاله واهو يقعد بالغرفة
اذا فيها تلفزيون ويصك على روحه متى ماشبع يطلع
لاوالسالفة بعد فيها ديوانية وعقب الديوانية سهر
لي الفير والصبح أكيد دوام
شالسالفة متى يشوفج ويشوف عياله
اوف عصبت ولو ان حالي نفس حالج
بس أنا شريجتي ياخور

 

[مولاي الفرج]

انزين ليش ماتقضين اشغالج بهالثلاث ساعات هم تخلصين شغلج وهم اهو يلعب

لان انتي سواء قاعده ولا طالعه مخه باللعبه بس

 

[FeShinGoOo]

وانتي من صجج شايله شلالتج وحاكره روحج بالغرفه ؟؟؟

خل يعصب ويتوتر عاجبه يقعد مو عاجبه يشيل قشه ويروح مكان ثاني غير سالفه هاذي بعد حكرو روحكم ليما اخلص لعب

والله مو لازم تلعب

 

[noo7a]

مو من صجه يحبس يهال عشان اهو يلعب لوول

انزين ليش ما تشاركينه انتي شوفي الالعاب الي يحبها و حاولي تتعلمين تلعبين معاه

و ترى اليهال يحبون هالسوالف بعد خليه يعلم عيالج يلعبون معاه

اذا عندج بيبي عمره 3 سنوات خليه يلعب معاه لا تقولين صغير و ما يفهم مشالله عليهم عيال الحين بو سنه ونص عندهم ايبودات و يلعبون احسن منا بعد

 

[الشيخة@]

الله المستعان

 

[انا لحبيبي .]

لا حول ولا قوة الا بالله العلي العظيم ،

الله يهدي البال ويصلح الحال ،

 

[بنت التمايمة]

ياحياتي والله ماتنلامين انا نفسك واعظم منك
انا زوجي يجونه الربع بالمجلس ويقفل الباب علشان مايدخلون عليه اليهال
ونفس الشي عالx poxو بلاي ستيشن انا من اول ماتزوجته على هالحاله بس بعد 3شهور من الزواج وانا جالسة لحالي بالشقه لا ويواصل ما اشوفه غير عالنوم يعنى بس مع الربع والله عيشه ممله الله يعينك ويعينا معك

 

[MiSS B.K]

الله يعينج

 

[أم شيوووخة]

ياسلام .. يعني لو مرة بالأسبوع عادي بس كل يوم مو حالة
بعدين ماله داعي تنحبسين خلي اليهال برة حتى لو عصب مرة مرتين بعدين بيتعود
أو قعدوا انتوا لعبوا معاه بعد وإذا مو عاجبه يلعب تحت بس مو معقولة إنتوا تنحبسون عشان أهو يلعب

 

[جديده 1]

خربيها هههههههههههههههه

 

[Tom ♥ Jerry]

.،


لووول يحليلهم الرياييل يطلعون بطلعات عجيبه و غريبه !
قوليله يا تخلينا نقعد على كيفنا أو روح العب مكآن ثاني .،
يعني يهال مساكين ينحكرون بالساعات على مآ يلعب !!!!!!!!!


الله يهديه آن شاء الله ؛*

 

[Blueflower84]

جانزين اقدر اكسره و افتك منه( اقصد البليستيشن).. شكراً على ردودكم بنات:eh_s(17):

 

[بيتي بوب بس كويتيه]

أنا ريلي يلعب بليستيشن كل يوم
بس ما ننحكر بالغرفه والله قاعده علي قلبه

 

[دلوعة حمني]

حبيبتي قوليله هو ينحكر في الغرفة و انت و اليهال قعدوا في الصالة هذي غير شغلة؟؟؟

الله يعينج صاروا الرياييل علل!

 

[مناير ...!]

لعبي معاه

 

[غلاي 89]

لعبي وياه

 

[شغفـ]

عادي ..كلهم كذا بس يختلف ..ايفون او لاب توب او بلستيشن ..
بس السؤال : ليه تنحبسين ؟ عادي عيشي يومك وانسي انه يلعب وانه موجود ..منتي مجبوره تتربطين عشان يلعب !

 

[ga6wa90]

حبيبتي قولي الحمدلله لاهي باللعب مو لاهي بشي ثاني وميخالف كلها 3 ساعات يلعب وأنتي قضي وقتج

نطفي البيت وغسلي الملابس إلا رايح الوقت