الأمومة!!

[Pretty Petite]

السلام عليكم

اشلونكم؟

عندي مشكلة مادري شنو سببها!!

انا متزوجة صارلي 6 شهور.. أحب اليهال وااااااااايد وحدي متحمسه اني اييب بيبي.. زوجي طيب وايد ويحبني و وده ببيبي.. بس لما اختي ولدت صار عندي ردة فعل عكسية!! ما ودي احمل الحين!!! وزوجي العكس حده تحمس!!

اشوف اختي وايد مستانسه وتقولي احلى شعور.. وحتى زوجها طاير من الفرحة!!

بس انا حاسه بخوف مو طبيعي!! مادري احس المسئولية راح تكون كبيرة علي!! مع العلم اني مو صغيره عمري 26!! وناجحه بحياتي.. والكل يعتمد علي ويعتبرني شخص مسئول سواء عائليا ومهنيا..

شعور الخوف من الانجاب يقتلني!! احس حرام هالفكرة اتيي ببالي!! اخاف الله يحرمني من الامومه والسبة هالافكار!! بس بالمقابل ماقدر اتحمل فكرة اني حامل!!

شسوي؟؟؟ في احد مر باللي انا فيه؟؟ واشلون قدرتي تتخلصين من الخوف؟؟

 

[ام بديير]

حبيبتي بكل شي في مسؤوليه يت على البيبي ,., بالعكس حملي الحين واحلى شعور ولا تنسين انتي مو صغيره اللي تنطرين ,., وفرحي ريلج دام ان متحمس ويبي ,., الله يتمم عليكم ..

 

[جميله وجذابه]

العيال نعمه لا تقدر بثمن و ( المال والبنون زينة الحياة الدنيا )

شوفي الناس الي تعاني من العقم مستعدين ييسوون المستحيل في سبيل ان الله يرزقهم اعيال قاعدين يسافرون و يصرفون مبالغ كبيره عالعلاج غير التعب الي يتعبونه

فانصحج اذا ما كان فيج سبب يمنع الحمل انج اتحملين الحين علشان باجر اعيالج يكبرون جدامج و يصيرون كبرج و يكونون اصدقائج تستانسين معاهم مو اتحمين عقب ما تكبرين و بعدين ماتدرين ان المراه عندها سن معين تقدر تحمل فيه واذا فات الفوت ما ينفع الصوت

 

[الرأي الآخر]

الله يعرف كل شيء و يعرف ان افكارج السلبيه عن الامومه مصدرها الخوف الغير مبرر و ان من داخلج انتي مو قصدج..الله يعرف نيات الناس احسن من ما الناس يعرفون نياتهم.
كل والد تجربته تختلف مع اولاده فلا تعتقدين ان مصيرج مثل مصير اختج و ان عيالج بيصيرون نفسها .. ممكن اسوأ و ممكن أحسن.
احساسج بالخوف من المسؤولية معناته انج ناضجه و تقدرين و تستوعبين ان انجاب و تربية الاطفال مو مثل تمشيط و تلبيس باربي .. لا اهي مسؤوليه و تعب.
صدقيني محد يعرف شلون بيكون كالاب او ام الا لما فعلا يصير ابو او ام..
اذا كانت حالتكم الماديه تسمح .. و ظروف العمل و الحياة تساعد ..توكلي على الله ولا تحاتين .. اليهال يكبرون و يتعلمون يتعودوا على نفسهم .. اول شي حتى الاكل مايعرفون ياكلون بروحهم .. بعدين يتعلمون ياكلون و يمشون و يكبرون و يروحون المدرسه و السنين تركض بسرعه فتح غمض تلاقينهم كبروا و صاروا معتمدين على نفسهم.

 

[Pretty Petite]

أم بدير.. مشكوورة حبيبتي

جميلة وجذابه.. مشكوورة حبيبتي

الرأي الآخر.. مشكــــــــــــووورة وايد.. كلامج ريحني وايد وايد.. مادري يمكن هذا الرد اللي كنت ناطره اسمعه!! احس في شي تغير بداخلي!! والخوف انكسر شوي!! امبيه صج مشكووووووووورة حبيبتي.. حبيتج وايد :*

 

[غزالي وبس@@]

لا سبحان الله صدقيني انشاء الله لاربي كتب لج وحملتي بس من تدرين سبحان الله تحسين بشعور حلو وغريب شي بداخلج ومن زوجج وحبيبج شعور حلو وكل هالمخاوف بتروح وتقولين شلون فكرت جذيه في يوم من الايام مافيه احد نولد يعرف حق اليهال بس هذي فطره حنانج وخوفج وحبج للطفل الله لايحرمكم الضنى ويتوج زواجكم بالذريه الصالحه ويجعلج قره عين لزوجج ويالف بين قلوبكم يارب العالمين

 

[Pretty Petite]

غزالي

مشكووورة حبيبتي ع الكلام الحلو

والله يوفقج بحياتج ويرزقج ويحقق كل امانيج يا رب

 

[شواخي]

يبا الي يابوا مب احسن منج

هاي نضج و طبيعي في خوف بس والله العظيم احلى شعور لما تشوفين عيون ريلج لما تقولين له انا حامل

بيسويج يادهينه لا تنكتين و بيحبج زياده ،،،


ريلي قال لها لي ..يعني يت من ريال مو من مره ،،،ان الريال يموت في مرته ولما تحمل مايخليها ،،،لو هو ماسك لج كنز ماراح تحبينه؟ الا بتعشقينه من قلب عشان الكنز الي شايله ومتعبه عشانج

والله يتمم علينا ونييب يبيات حلووووووين يارب

 

[الرأي الآخر]

انا اعرف رياييل يطقون حريمهم و اهما حمل .. انا ما اؤمن ان الاطفال يقربون الازواج بالعكس احيانا يبعدونهم اكثر من ماكانوا بعاد ..لان الاطفال يحتاجون عنايه و تربيه و هذا شي يزيد الضغط على الازواج .. و يبين وقتها شكثر قوة شخصيتكم و زواجكم
اسوأ شيء ممكن تسويه المرا انها تييب يهال يحجة انهم يغيرون الريال .. انا من تجربتي و خبرتي و خبرة حريم العايله الاطفال ما غيروا طبع ريال شكاك او ريال اناني او ريال يطق .. حملي لما انتوا الاثنين تبون هالشي مو بس لان الباقي مو احسن منج .. هذي مو مسابقه!

 

[Pretty Petite]

شواخي.. شكرا حبيبتي والله يرزقج بالذرية الصالحة الحلوة

الرأي الآخر.. انا معاج بكل كلمة! انا ضد فكرة الاطفال يغيرون الريال!! الانسان ما يتغير الا اذا اهو يبي يتغير! وضد اني اسوي شي لانه الكل يسويه!! ومافي احد احسن من احد!!

بس اتوقع شواخ قالتها من باب التشجيع وقصدها i can do it

 

[.،:"$الـعـوبــــة$":،.]

يابنت الحلال بس توكلي على الله ، وأتحداك اذا حطوه بين ايدينك تقولين (حسافة ياليتني ماحملت)
ياحلو الجهال وربي ياحلوهم ،
وبعدين انا مثلك الكل يعتمد علي حتى إخواني وخواتي الكبار،
عيال أخوي الكبير 24 ساعة معاي مع إن أمهم موجودة ، حتى وربي إذا شافوا لعبة بإعلان يجون يقولون لي عمة اشتريها لنا ! مع إن أمهم وأبوهم يكونون موجودين ، بس تعودوا علي فديتهم ! وبالذات واحد فيهم هذا عاد كان شي ثاني بالنسبة لي !
للحين عندي بنت وولد ، والله العظيم للحين هالولد غير عندي !​

 

[Pretty Petite]

العوبة

والله انا بعد احب اليهال.. وعلاقتي قوية بعيال اختي..

كلامكم والله خفف من خووووفي وايد وريحني ..

مشكووورين حبايبي