اقري عني واحكمي...بكل صدق وامانه

[مشتاقة الى الله]

حياكم الله يا الكويتيات

اقري واعطيني رايج...بكل صدق وامانه...(حابه اعرف رايكم عني مو عشان شيء ثاني فلا يروح تفكيركم بعيد) يالله بدش بالموضوع

انا متزوجه عندي ولدين الله يحفظهم ويحميهم ان شاء الله ساكنه مع اهل زوجي وعندي غرفة فقط يعني انا وعيالي واغراضي واغراض عيالي والعابهم كله بغرفتي (تتخيلون الوضع كيف) المهم في نفس الوقت موظفة بالقطاع الخاص يعني ارد البيت على الساعه 5 في بعض الاحيان 6 يعني يعتمد على الزحمه... اول من اوصل البيت اقط العباية والشنطه بصوب وابتدي مشوار جديد وروتين يومي وراء العيال وتغير الحفاظات،،،العب وياهم،،،اعشيهم،،،نسولف نضحك في نفس الوقت اعطي زوجي حقه اجلس معه اسمع الي بخاطره اطبخله اذا تمنى شيء من يدي غير كذا الشغالة تطبخ،،،، اغسل الملابس... اجلس مع اهله هات واعطي من العلوم والاخبار... (حاسه بزحمه) هيهيه ما علينا بكمل...

انظف الغرفة وارتبها...انظف دورة المياه الله يعزكم...انيم ولدي الصغير عمره 5 اشهر...بعد نصف ساعه يقوم يبكي اجلس عنده ما يريد احد غيري...ولدي الكبير عمره سنه يغار لازم اوازن بين الاثنين...فاحاول بقدر المستطاع اعدل بين الاثنين ويجلسون كلهم الاثنين معي...فجاءة اشوف نظرات زوجي كانه يقول وينج عني يا الغالية...واهو بعد احاول ان ما اقصر معه ونجلس سوالف ضحك عتاب زعل كله على بعضه...تخيلوا هذا روتيني من السبت الى الاربعاء والخميس والجمعه عيالي من ساعه 6 صاحين وما يردون ينامون الا في وقت متاخر اخر اليل ادش غرفني منهكه ميتة تعبانه ما اقدر اشيل عمري لكن زوجي ينتظرني فاعطيه الي يريد وبساعه الواحده او ال 12 ونص انام وانا منتهيه واصحي الساعه 4 اعطي العيال حليب واتجهز للدوام واروح

باختصار... تهجون هل انا ناحجه ام فاشله؟
هل حياتي يريدلها تغير وتعديل ام مكتفيه بكذا؟ واذا نعم يريدلها تعديل فمن اي ناحيه وويش اضيف؟

يالله كويتيات انتظر ارائكم واتقبل نصائحكم لاني بالفعل حاسه نفسي امشي مع الموج وصحتي تتعب وتنهار

 

[ناتشوو]

الله يعطيج العافية

اذا عندج مجال تغيرين دوامج ابرك
واستفيدي من اجازات الامومة
ورعاية الاسرة
خاصة اذا حالتكم المادية وراتب زوجج زينين

عيالج منو مسؤول عنهم في غيابج؟
اذا خادمة لا تخلينها تنومهم نهائيا وانت بالدوام
بجذي تقدرين تنومينهم مبچر من السبع
عالعموم حتى لو ينام ساعه الظهر
ممكن ع ال٩ بالكثير نايم الكبير

طبعا غرفتج ماتاخذ وقت طويل بالتنظيف
وخلي التنظيف الدقيق لها نهاية الاسبوع
واذا كبيرة حطي حاجز بالنص
احتراما لوجود اطفال معاج بالغرفة

وبالاخير
كل وحدة وطاقتها وترتيبها لوقتها
الله يوفقج وييسر امورج

 

[دانة_ دبي]

الله يعطيج العافية
حاولي تسعين و ادورين ع وظيفة ثانية
و حاولي تغيييرين وقت نومة العيال
و ممكن تطلبين غرفة ثانية و تخلينه لهم لو اهل زوجج وافقوا
وحاولي تطلبين من زوجج يساعدج يعني لو انتي انشغلتي بالعيال ممكن هو يرتب السرير و يسوي اشياء بسيطة

 

[حبيبي مالكني]

الله يعطيج العافية
ماشاء الله عليج من كلامج انتي سوبر ماما
من كلامج انتي مو مقصرة بحق زوجج وعيالج
بس اذا في امكانية تغيرين وظيفتج ليش لا
اريح لج

 

[iLLuMinaTion]

يسلمووو

 

[Um Tuki]

ربي يسهل امورج و تحصلين لج مكان اوسع لان المكان له دور عالنفسية
و يارب تحصلين لج شغل ثاني غير هذا عالاقل لي ٢ الظهر

 

[الاسطورية]

يبيلج خدااااااااااااااااامه
اليهال لازم يقومون 7 وينامون 8 بليل وتفضون لبعض ولنفسج
وغرفه لليهال مايصير حاولي تفصلين العيال عنكم

 

[مهندسه مستقبل]

ب اختصار و نعمه الزوجه و ربي يرزقج الجنه ان شاء للله

 

[رو&الشقاوة&وح]

اليهال لاااااااااااااااااازم ينامون بدري ع ال8 اريح اريح اريح بكثير انا روتين حياتي الحمدالله خفيف بس والله لو يقعدون عيالي لي 10 استخف ما اقدر ضغط مو طبيعي

غير جذي في شغلات المفروض الخدامة تقوم فيها مو انتي .. مثلا التنظيف والغسيل .. بس طبعاا اذا جيتي من الدوام تسويهم لان الواضح من كلامج انها تمسكهم في غيابج ....

ممكن تدورين لولدج نادي العصر يفتح ومنها تخف الزحمة شوي وطاقته تخف ويكون نومه مريح اكثر

الوظيفه اذا مو محتاجتها خلاص قدمي استقالتج حالياااا وقعدي في البييت مني ليما يكبرون عيالج شوي ورديلها

حطيلج يوم في الاسبوع خاااااص لج تروحين لسبا يسويلج مساج او جيبي وحده تجي البيت تسوي لج مساج تريحج اكثر او تيبين صالونه للبيت تسوي لج حمام ومن هالحركات ... لان لها تأثير ايجابي على نفسيتج وصحتج

حاولي اذا مافيها مشاكل تاخذين غرفه زياااده لان جذي ضغط كلكم بغرفه وحده والاثاث والحاله ....

وعلى فكره الروتين المتعب هذا بيأثر بشكل سلبي على صحتج وحياتج فإنتبهي وحاولي تعطين الخدامة بعض المسئولياااااات

 

[مشتاقة الى الله]

اشكر كل غاليه يلي ردت على موضوعي باسلوب راقي ويبرد الفواد بالاصح يلي يحمس بعد
وان شاء الله يارب احصل على وظيفة بمكان ثاني يارب وارتاح
والله اني اتعب
الله يفرجها علي وعليكم جميعا

 

[امـ خــزامـى]

يعطيك العافيه حبيبتي

انت حيييييييل مضغووطه يكفي شغلك وغرفه وحده
ليش تضغطين على نفسك زوووووووود وتجيبين عيالك ورى بعض
ومافهمت واحد عمره سنه والثاني 5 شهور؟

ادري ان حريه شخصيه وادري ان ممكن حملتي بالغلط
بس انا اقولك انت ضغطتي نفسك بنفسك مع انك ادرى بظروفك وماشاءالله قدها وقدوووود

حاولي ياقلبي قدر المستطاع تنظظيمن نوم عيالك

صدقييييييييييييييني بتنحل مشكلتك وبترتاحين

وطبعا ضروووووووووووووووري غرفه لهم
حتى لو ناموا
كيف بتسهرين مع زوجك تسولفون تتابعون فيلم ؟


يعني حلك الوحيد غرفه
او على الاقل تفصلين غرفتك اذا كانت كبيره
وخلينها لعيالك


تقبليني بصدر رحب انت قلتي ابي رايكم فيني وانا هذا رائي

 

[ميس الحيدر]

الله يعينج خيتي..

لا لازم ترتاحين وتاخذين بريك وتدربين عيالج ان لهم وقت معين لاتعلمينهم يلزقون فيج ويعتمدون عليج بكل شي
مثلا اللعب خليهم مره عالرز ومره مع الخادمه اذا واثقه منها ومره عالاهل .. بيني وبينج لازم غرفة رخاصه للاطفال هذا
حقكم لازم تطلبينه .. انتي مو مكينه اسم الله عليج بس مجابله الكل وتعطين ومو محصله على ابسط حق الي اهو الخصوصيه بالبيت

وبالأخير كلامناا خليه بصووب وانتي وعقلج وقلبج اللي ترتاحين له وتحسين ان صح سويه مالج شغل بكلامنا احنا
كل وحده متربعه ورا الشاشه وتعطي رأي وعلى حسب شخصيتها وحالتها .. فا نصيحه ارتاحي وفكري اللي يريحج سويه

الله يقوويج ويعطيج الصحه والعافيه

 

[الله يعيني]

يعطيج العافيه صراحه سنعه بس حولي تحصلين وظيفه ساعات دوامها اقل اريح لج بس بسالج انا توظفت من شهرين و تقريبا نفسج مضغوطة دوام لي 2 و بيبي صغير و صراحه ما في وقت للتكشخ ستايلي بالبيت تغير عن قبل اللحين بس بجايم حلوه و مكياج خفيف و شعر مربوط بس بالويك اند اكشخ مكياج و لبس و بخور و حركات غيره ما اقدر انت شلون ستايلج

 

[نوف الصقعبي]

بالعكس ونعم الزوجه ونعم الإم يعطيج ألف عافيه وقواج الله حبيبتي

الله يفتح على زوجج من أوسع أبواب رزقه
ويغنيج عن الوظيفه
لأجل تتفرغين لزوجج وعيالج

إن شاء الله كلها مسألة وقت وتتعدل حياتج

وله ربنا سبحانه وتعالى

ليش قال

الجنه تحت آقدام الآمهات

موعشان إنتى تمثلين صوره حيه من هالآمهات

بارك الله فيج

ولاتحزنين

اللى انتى فيه طبيعي
ويارب تتعدل ظروفكم وتاخذون سكن مستقل للزوجيه

قولي آمين​

 

[Gifts&Occaions]

الله يعبنج

 

[jooosy]

,ماشاءالله عليج
انا قبل لا احمل قتله ماقدر علا شغل الشقه
مع انه دوامي بحكومه
الله يتمم عليج
بس لازم اتريحين موزين جذي كله راح يطلع عليج عقب هالتعب
وييبيلج خدامه اتساعدج واتغسل عنج
واحسن اتغيرين دوامج

 

[في سحابه]

انا اشوف ,, اذا تقدرين تبدلين الوظيفة بدليها ماقدرتي خلاص مش لازم


فية اشياء تقدرين تخففين على عمرج منها؟؟

مثل تنظيف الغرفة خلي الخدامه تنظف الغرفة والحمام الله يعزج وانتي لاعبي عيالج في الغرفة وهي تنظف ,,

والاشياء العادية مثل الحيب واكلهم هي تجهزة ,,

استفيدي من الاجازات مثل كلام الاخوات ,, زيدي خدامه اذا تقدرين عشان يخف الشغل عليج اكثر اذا حابـه يعني

زيدي غرفة اذا تقدرين مع انه عارفة حالتج يمكن بيتكم كبير وايد وعيالهم كثير ومافي مجال للتوسعه <<

كلمي زوجج شوفي شوة عنده شاكيـه اسئلية عن شوة يريد وشوة في خاطرة ؟؟

غيرو جو في اجازة الاسبوع طلعي شالية ولا مكان مع اليهال وزوج ,,

خليه يهتم هو بعد بالعيال يعني انتي تهتمين مرة في الصغير وفي اثناء ذالك يهتم بأبنه الاكبر بسنه عشان اهو يغار مثل ماقلتي


رأي و وجه نظر ان شاء الله تكون مفيده لج <<

تقبلي مروري يالغالية وبالتوفيق

 

[خالتي قموش]

انا قاعده اقرا برنامجج تعبت نفسيتي
الله يعينج
لا نوم ولا راحه
الواحد يستخف
يبا غيري دوامج
او اخذي اجازه
والعيال نوميهم بكير
لا تستمرين علبرنامج المرهق
شوفيلج حل

 

[زوجة عزيز]

الله يعينج وايد تعب عليج والمكان احس زحمه واغراض وايد بالغرفه حاولي تاخذين شقه اريح لج

 

[manoooram]

والله ونعم فيج حبيبتي ما شالله اذا كنتي تعطين وتسوين كل هذا ما شالله عليج
supere mama
وباذن الله مو مقصرة


حبيبتي اذا في مجال ببيت حمولتج خلي زوجج يطلب غرفه أو غرفتين زياده
لأن مو معقوله انتي وزوجج وعيالج وأغراضكم كلهم بغرفه وحده
شلون بتمارسين حياتج !!
وبما ان وضعكم المادي حلو ومرتاحين طلعو بشقه أفضل وأيسر
حتى اليهال اسم الله عليهم بتشوفينهم بيرتاحون بغرفتهم الخاصه
وبيلعبون على راحتهم
والله يسهل عليج أمورج