افيدوني بسويسرا خواتي

[ناسكة]

السلام بنات اخباركم
بسألكم يالغاليات شنو رايكم بسويسرا كشهر عسل بشهر ابريل وبنات اللي عندها فكره ابيها تسوي لي جدول للفنادق والمناطق حق 14 يوم وشلون طريقة حجزهم ومتى ابدا بالحجز وهل الحجز بالنت مضمون واللغه ما اعرف الا انجلش وسمعت ان لغتهم الالمانيه اكون شاكره لكم حبيباتي:tek:

 

[ناسكة]

رد : افيدوني بسويسرا خواتي

شدعوه بنات ولا وحده فيكم راحت لسويسرا?

 

[Samurai]

السلام اختي راح افيدج انشالله بس اللي راح يفيدج اكثر موقع المسافرون العرب قسم سويسرا منهم خططت لرحلتي ٢٠٠٩ بس اسمحيلي بتأخر شوي لان ما عندي لابتوب وما اخذ راحتي بالكتابه على الايفون بس انتو كم شخص ؟ وتحبين الطبيعه او المدينه ؟ وافضل شهر مايو لان الجو بيكون على الاقل اقل بروده من ابريل

 

[Om Ghalia]

مناطق سويسرا الحلوة اهي لوزان، مونترو، زيورخ، وانترلاكن ووايد مناطق ثانية بجبال الألب......... ومثل ما قالت ساموراي موقع المسافرون العرب معلوماتهم روووعة وانشاء الله تستفيدين منها...... شهر 4 يكون بارد شوي.... وكل صوب من سويسرا لغتها غير يعني المناطق اللي صوب فرنسا لغتهم فرنسية واللي جهة ألمانيا لغتهم ألمانية وجذي .. شوفي الخريطة واللغات:

​

 

[ناسكة]

رد : افيدوني بسويسرا خواتي

هلا فيج ساموراي مشكوره حبيبتي عالرد ..انا وريلي احب اماكن الطبيعه اكثر
مشكوره ام غاليه عالافاده الله لايحرمني منكم

 

[ناسكة]

رد : افيدوني بسويسرا خواتي

نسيت ساموراي تنصيحني بقروب ولا بسياره احلى مع العلم ان ريلي مايدل .. طيب فيه مضايقات للمنقبات ولا عادي

 

[In Geneva]

ألف مبروووك

والله يوفقكم ويسعدكم ويبارك لكم


سويسرا إختيار موفق وأنا تقريبا صارلي جم سنة كل صيف نقضي العطلة فيها

وسويسرا فيها مناطق حلوة وايد

والاهم إنها أكثر بلد نرتاح فيها أنا وعيالي

والشعب الاصلي معاملته وااايد حلوة

والافضل تاجرون سيارة

ترى السياقة سهلة

حتى آنا أسوق وبنات وايد يسوقون هناك خاصة اللي متعودين عليها وعندهم بيوت هناك

والصراحة والصراحة البركة في gpsجهاز الملاحة أخزن فيه الأماكن وهو يدليني



برجع وبكتب لك برنامج سياحي ورحلات مقترحة وأسواق ومحلات وبعض المطاعم


مناطق وايد حلوة فيها

مثل انترلاكن وفيلار و لوزان أموت فيها وبعد مونترو بس أزورها 5 ساعات وأرجع ما احب اسكن فيها نسكن في ديفون ولوزان غالبا


إن شاء الله برجع مرة ثانية

وأي سؤال بخاطرج تفضلي بجاوب باللي أقدر عليه

والنقاب بسويسرا عااادي لكن بعد تطبيق القرار في فرنسا ممكن تلاقين بعض الصعوبات في

المدن الفرنسية القريبة من جنيف

لكن ماعندي فكرة من اي شهر راح يبدي تطبيق قرار منع النقاب في فرنسا

بسألج وارد لج خبر

لأنه عندكم جم منطقة قريبة من جنيف مدن وقرى فرنسية وحلوة لكن مع القرار ما أدري شنو بيكون الوضع

وهذي القرى مثل آنسي وإيفيان ومجييف

 

[In Geneva]

خلي رحلتك آخر ابريل أول مايو يكون الجو حلو شوي


والله عادة نحجز بالانترنت ساعات من الفنادق مباشرة


أو موقع بوكينغ لحجز الفنادق

لكن لا بد انك تقرين شروط الحجز والإلغاء قراءة جيدة


بالنسبة للغة سويسرا عبارة عن ثلاث قطاعات تتكلم ثلاث لغات وللاسف ليس من ضمنها الانجليزية لكن يمشي الحال وبسهولة

المحلات والفنادق والمطاعم أغلبها يعرفون الانقلش


اللغات الاساسية والرسمية عندهم هي الألمانية والفرنسية والايطالية

 

[ناسكة]

رد : افيدوني بسويسرا خواتي

مشكوووووووره حبيبتي ان جنيفا مشكوره وايد طمنتيني

 

[Samurai]

السلام عليكم ..

شوفي اختي افضل انكم تأجرون سياره .. احنا كنا مثلكم ما ندل بس اعتمادنا الكلي على الله ثم على القارمن اشتريه من الكويت بس جطي اسم الاماكن او احداثياتها وامشو عليها بس ا\ا انتي منقبه ماتقدرين تروحين للمناطق الفرنسيه مثل انسي وشامونيه وايفيان وديفون ...
بس سويسرا تنفع قعدي كم يوم في انترلاكن ومنها انطلقي زياره من الصبح ال العصر اي منطقه تبينها .. منترو لوزان زيورخ لوزيرن جنيف لوقانو (بعيده شوي وطريجها يخرع شوي ) وروحي الاوتليت فوكس تاون في لوقانو وطبعا لا تطوفين القرى اللي حوالين انترلاكن والبحيرات والعاصمه بيرن ويقولون بازل بعد حلوه بس انا ما رحت لها .. شوفي روحي قوقل ماب وحطي في الاتجهات المنطقه من "انترلاكن" والمنطقه الى اي منطقه من اللي كتبتهم وشوفي كم المسافه ..وخططي من الحين احسن وانا افضل انج تقعدين ب لوقانو كم يوم لانها رومانسيه وحلوه وقريبه من ميلانو بس ساعه .. وافضل فندق في لوقانو Hotel Lugano Dante Center
وتقدرون بعد تروحون اليورب بارك مدينة الملاهي في المانيا تبعد تقريبا ساعتين عن انترلاكن

 

[Samurai]

واي نسيت لا تنسين رحلة الثلج قمة اوروبا غاليه ,, بس يقولون في قمه ثانيه رخيصه تبعد ساعه عن انترلاكن يم لوزيرن يمكن اسمها قمة تاتلس ارخص منها ..

 

[ناسكة]

رد : افيدوني بسويسرا خواتي

مشكورة حبيبتي ...يعطيج الف عافيه ماقصرتي يالغالية

 

[rawona]

رد : افيدوني بسويسرا خواتي

شهر 4 الجو بارد .. انا رحت آخر 4 اول 5 اول يوم وصلت فيه كان حر مووت .. وثاني يوم لبست شتوي !!

المشكلة في البرد ان حتى الجبال ما تقدرين تروحين لها لأن الجو مو زين وماتقدرين تشوفين شي وتستمتعين


انا رحت الصوب الالماني من سويسرا ( زيورخ - لوزيرن - انترلاكن- زوغ- وهم جم منطقه قريبه حيل من المانيا نسيت اساميهم بالوقت الحالي)

الحلو فيها التمشي والكافيهات والبحيرات بس اذا بتروحين نفس الحزة اللي رحت فيها فالمطر راح يخرب عليج وماراح تقدرين تاخذين قارب في البحيرة وصوب شالالات الراين عفسه ولويه من المطر ..

الاماكن السياحية

قمة جبل يونغفراو

جبل تتلس

جبل سانتوس

زيارة لمدينة هايدي والريف السويسري

شلالات الراين

لوزيرن وبحيراتها

انترلاكن

زيارة لمصنع الكاكاو والجبن

وفي بالجانب الايطالي منطقه وايد يمدحونها اسمها لوقانو تبعد تقريباً 3 ساعات بالقطار عن زيورخ

وبالجانب الفرنسي عندج جنيف - لوزان - مونترو - وميدنة ايفيان الفرنسية قريبة والعاصمة برن

وموفقة والف مبروك

​

 

[شنوووفه]

رد : افيدوني بسويسرا خواتي

وناااسه انشالله انا بعد بسويلي جدول حق شهر 5 ادعووولي واي معلومات اشنالله باخذها من عندكم
وانشالله مايقصروون معانه البناات :>

 

[لازورديه]

موفقه

 

[تاجي الفضيلة]

بنات بسالكم عن وضعهم المادي غاليه ولا عاديه

 

[dantella]

من بعد الاذن من صاحبه الموضوع .. انا حبيت اسئل جم سؤال
شرايكم بسويسرا وخصوصا زيورخ بنص شهر 11 ؟ شلون بكون الجو
وهل اقدر ازور من زورخ مصنع الكاكاو والجبن؟
ووين تنصحوني اروح بزيورخ غير باهنهوف ستريت؟
انا زرت سويسرا قبل سنتين بس كان بشهر 8 يعني بالصيف ورحت زيرمات وكان الجو حده عجيب ومحد كان يستغرب من الحجاب
بس مادري عن الوضع الحين مع الحجاب والعرب ... تحسونهم تغيرت نظرتهم ولا عادي؟ يعني هل ممكن نلقا مضايقات؟
ناطره ردكم فديتكم