السلام عليكم ورحمة الله وبركاته
حياكم الله يا بنات
هذا الموضوع دايماً يطري علي ، موقف يتكرر ولابد النقاش فيه .. ماعتقد موضوع هيّـن خصوصاً لا صار فيه ظلم ..
الولد لا بغى يتزوج يقول لاهله امه وخواته ويحدد الشروط اللي يبيها بالأصح يحدد الصفات اللي بخاطرة ومن حقه بصراحة ،،
الأهل بدورهم يبدون يشوفون ويدورون ويوصون ويسألون وعادة ينقوه نقوه ويبون الشي الزين لولدهم يبون البنت اللي تلبق معاهم ومع ولدهم في الغالب ..
يخطبون بنت فيها أغلب هالصفات ، يشوفونها الاهل ويشوفها الولد
تعجبهم ، بس ما تدش خاطر الولد! يدري انها بنت ناس سنعة وخوش بنية وجميلة بس سبحان الله القلب ما يرتاح لها وما يصير في قبول معنوي من ناحيته ..
بعد نا يخلصون من الشوفة اهني يبدي دور أهله يضغطون عليه وافق وخوش بنية وين تلقى مثلها مل تطوف ادب واخلاق وجمال ، كلمة مني وكلمة مني لما يستسلم ويوافق ..
يا جماعة لا تقولون مافي جذي بهالوقت والريال باسه قوي ومحد يأثر عليه
احنا نشوف نماذج من الواقع والمحيط اتحصل وينتهي بالإنفصال لانه مو مقتنع ومو متقبل ومجبور واحيانا يكون مغصوب غصب ..
البنت الضحية ما تدري عن شي على نيّتها
وانا انحطيت بهالموقف أم صديقتي وايد حابتني وبغتني لولدها بس اهو ما يبي نهائيا والحمد لله اني أدري عن كل شي والرفض تم من عندنا ..
يا أهل امهات وخوات خلوا الصبي يقرر ويتخذ قرار بنفسه لا تأثرون عليه ، انتو عليكم تدورون وتسعون له وهو اللي يتخذ القرار من غير تأثير او اجبار ،،
اذا أجبرتوه بيوافق ويسكتكم وتبدي مشاكله مع بنت الناس ويمكن توصل لطريج مسدود ويتم الانفصال
بيي يلومكم مو انتو تبونها وبغيتوها وضغطتوا علي لين خذيتها؟!
هذا واقع قاعد يتكرر
لازم الاهل يعرفون وياخذون الموضوع على محمل الجد
.gif)
.gif)
