اشتقت لكم وايد ويايتكم بسؤالين مشبين راسي !!

[~{غلاتي}~]

قوة يا امهات المستقبل والله يتمم على كل حامل ويرزق كل اللي ماعندهم

طبعا في بعضكم يذكرني وفي لا لاني من ولدت وانا مادري عن المنتدى مووووليه

تدروون التربيه مو سهله كلش وتاخذ نص وقتكم

المهم مابي اطووول عليكم

بصراحه اول سؤال مادري وين المفروض ينحط بس حطيته هني عشان في خبيرات باللامور

ماشاءلله

بنتي سمله عليها من اول مايبتها نويعمه والحين عمرها 9 شهور سمله على عمرها
يوم كانت 7 شهور حاشها التهاب في الرئه ودخلت المستشفى وضعفت خصلت
وليي يومكم هذا وهي ضعيفه ويها جنه لقمه مايبين انها ام 9 شهور والحيين عزكم الله
حايشها سهال وهمن ضعفت وخقت

:bbbiu:

مادري شسوي ابي اكل يسمنها شوي ابي هالخديدات يطلعون صايره صفره ترا انا ماعرف
جم مره اعطيها وجبه

انا اعطيها بالغدا والعشى فواكه او بسكوت !! :eh_s(10): هالشي كافي طبعا من رضعاتها

عفيه ابي طريقتكم عشان الياهل يتربرب


والسؤال الثاني ممممم والله مستحيه

انا وريلي متفقين انه اهو اللي يمنع لاني ماتوالم مع الحبوب وهو رافض فكرتهم
قبل جم يوم قص عليه ابليس وقالي بدووون ... قلت اخاف احمل وجذي قالي لا اقدر اتحكم بنفسي

ورضخت للامر الواقع :eh_s(16): اللي ابي اعرفه السائل الشفاف يحمل ؟ ولالا انه يدعي ماقذف داخل


وسوري قرقت على راسكم

انطر اجابتكم يا عزيزاتي

 

[أحـلام * ورديـة]

حبيبتي مو بس تعطينها فواكه وبسكوت

سوي لها شوربه تتكون من صدر دياي قطعه صغيره ويا خضار طبعا كله مسلوق ومهروس

وحطي لها بالمميه بسكوت مع الحليب

وعطيها ماي التمر زين يمتن الياهل ويعطيه صحه

حطي لها بالماي اللي تسوين لها فيه الحليب شويه حلبه لانه يفتح شهية الياهل


بس السؤال الثاني ما ادري انشالله البنات يفيدونج

 

[om_saleem]

الله يخليها لج وتفرحين بشوفتها عروس

طبعا هالاكل مو كافي

عطيها هالاكل الي بقولج عليه وخلال شهر ان ما زادة اكثر من كيلوين لج الي تبينه

سلقي بطاطه مع جزر وكوسه وخمطة عيش وحطي عليها نتفة بهارات وملح
وتالي ضربيهم بالخلاط مع اي نوع عصير انا افضل يكون مخلوط مثل جزر وبرتقال الي ينباع بقسم الاطفال

هذا يوميا غداها

واذا تسوون هريس او يريش عطيها منه لانه مفيد لها


ووقت العشى طبعا عشاها يكون مبجر 7 انتي موكلتها يكون سيريلاك الي بالقمح او الفواكه

او انتي سويلها خلطة فواكه مثل نص تفاحه مع موزه مع عصير برتقال وعطيها بس تاكدي اول بنتج مافيها حساسيه من اي نوع من الفواكه الموجوده

وريوقها عطيها بسكوت وجاي او سيريلاك

وبين الوجبات ذوقيها كل شي تاكلين منه بكميه قليله لان بنتج اسم الله عليها 9 اشهر

انا ولدي كنت اوكله عيش ومرق بهالعمر

وانصحج بالحليب تحطين معاه نص او ربع بسكوته لانه يمتن ويعطي صحه

يمكن اول الايام ترجع بس لاتخافين لان معدتها صغيره ولازم تتعود

حرام تكون بهالعمر وبس تشرب حليب لان الياهل سنه ونص بس تقطعينه من المميه

 

[kuwatiya]

الله يخليهاا لج وتشوفينهااا عروس

مادري ماعندي خبره بس بستفيد ويااااج​

 

[om_saleem]

نسيت اجاوبج على السؤال الثاني

لا حبيبتي ان شالله ماتحملين دام كل شغلكم بره

انا اول ماتزوجت سنتين وكل شغلنا بره والحمدلله محملت الا وقت لما انا قلت الحين لازم يكون عندنا بيبي وخلينا كل شي طبيعي وماطولت بنفس الشهر حملت

 

[Diva-Q8]

ماشالله ام 9 المفروظ توكلينها كل شي (لحم دياي فواكه عيش خضار)

اهم شي وجبة الغدا فوحيلها شوية عيش وصدر ديايه نتفه ومعاها كوسه ولا جزر ولا بطاطه ولا بروكلي ولا زهره ولا قرع
وعندج الهريس او اليريش وممكن تسوين لها تشريبه خبز رقاق وبطاط وشوية من مرق غداكم بس مايكون في فلفل

وهرسيهم وحطي معاهم شويه من ماي العيش عشان يصير لين وحطي ملحج خفيف ووكليها

العشى ممكن روب وخيار قشري الخياره وطحنيها وبعدين خلطيها مع روب او عيش وروب

انا ماحب اعطي الياهل بهل عمر بسكوت وجاي اعطي بسكوت وحليب افود له من الجاي

اذا بتعطينها بسكوت ولا فواكه خليها الظهر او العصر لا تعطينها بليل لانه الحلويات تعطيها طاقه وتظل سهرانه ماتنام

اهم شي لا تعطينها مجموعة خضار بيوم واحد كل يوم نوع او نوعين عشان اذا فيها حساسيه من واحد فيهم تعرفين شنو كنتي موكلتها

ونفس الشي بالنسبة حق الفواكه يوم تفاح اخصر مهروس يوم موز يوم منجه يوم بطيخ

واهم شي بهل عمر الخضار لانه عمر تسنين كثري منها وقللي الفواكه لانه فيها سكر لازم تطلع ظروسها مرتبه وقويه الفواكه مااتخليها تنمو بشكل صحي

----------

السؤال الثاني السائل الشفاف مايحمل

بس انتبهوا مره ثانيه واذا صارت لالغلط قومي بسرعه غسلي بغسول داخلي يقتل ام الحيوانات المنويه

 

[@سيدة نفسي@]

بالنسبة حق السؤال الأول البنات كفوا ووفوا

أما الثااااااااااااااني

فآنا أخالفهم وأقول ممكن يصير حمل ,, والسائل الشفاف تطلع منه

حيوانات منوية ولو انها قليييييييييييييييييييلة باللحظات اللي تسبق القذف

هذا شي انا قاريته من زمااان والدليل الحريم اللي يحملون ع العزل ’’

 

[قوتشـي]

بالنسبه لخبرتي واهتمامي في عيالي بالشهور ... من فضل الله ماينشالون من العافيه اسم الله عليه

بس عيب عيالي بعد ما يسنن يبدا يخق ويخق اكثر لا مشى


المهم ..


بقول لج طريقتي .. وان شالله تنفع معاج واذا ما انفعت في بنتج هذي .. تنفع للمولود الجديد بعدين


احرصي على تغذيت بنتج من الولاااااااااده ... سوا تعطينها صدرج ولا صناعي

اذا شربت رقم .. بعد ساعه عطيها رقم ... لا تنطرين ساعتين

بعد الاربعين .. ضروري تشرب بين الرضعات ( ماي وتمر : تذوبين تمرتين او ثلاث بماي دافي وتشخلينهم بالمميه )

وتشرب اعشاب ... ( الاعشاب لازم يكون فيها شوية حلبه ) طبعا اذا تمت ٣ شهور وفوق


بالنسبه للاكل ...

انا ابدي اوكل عيالي من الرابع << ادري بتقولين مبجر بس ماعليه يتعود )

طبعا تبدين بوجبه وحده باليوم

سيريلاك او روب او لبنه او بطاطه مهروسه وزيدي مايها عشان تصير خفيفه مو ثقيله ( اذا طلعتيها من الماي اخذي منه واهرسي البطاطه عدل

في البدايه يكون اكلج بمقدار بسيط لا تكثرين

وكل ما اكل عدل ثاني يوم زيدي الجرعه شوي

واذا كملت خمس شهور بلشي بالوجبتين

والوجبات لازم تكون مطبوخه ومهروسه عدل بالخلاط

ومثل ماقالو البنات ... عيش وبطاط وجزر ... وما انصحج بالبهارات معاها .. كافي ملح وشوي بعد

ويفضل العيييييييييييش المصري ( صنوايت ) عن تجربه لانه يسمن ويفيد الجاهل

وبالنسبه للكوسا انا عيالي ماكانو يحبونها ف ما احطها مع العيش

جزر وبطاط كافي

والسيريلاك تصير وجبة ريوق او عشا ..

و روب او لبنه

والعصاري ... فواكه ( موز او تفاح بالخلاط )

لا تاخذين الفواكه المعلبه ... سويه فرش احسن

وفي عصاير لاطفال ٦ شهور اشتريها .. عصير واحد باليوم كافي

نسيت لا اقول لج ... من يكمل الاربع شهور .. بين رضعه ورضعه حطي فيها كسرة فارليز بس لازم تخففين الحليب


يعني اذا تشرب ٦ ارقام .. حطي ملعقتين ونص حليب وكسرة فارليز

وانتبيه لقياس حلمه الرضعه لازم تكون اوسع شوي عشان ما تسد الفارليز بس مو وسيعه حيل عشان ما تشرق

وبالنسبه للحليب .. عيالي كلكم على حليب سيميلاك


ومن ٨ شهور وفوق ..

ريوقها ( سيريلاك / لبنه / بيضه وحده او اي شي تحبه بنتج )

غداها ( عيش مصري وخضار او ساده مع روب / عطيها لبن بس خففيه بشويه ماي / تشريبه / جريش / هريس / صدر دجاج مهروس مع بطاط وجزر / شوربة كريميه او شوربة عدس اذا مافيها حساسيه من العدس ملوخيه مع عيش )


عشاها خليه خفيف ( بطاط وجزر مهروس ... فاكهه بالخلاط ... فارليز ذوبيه بحليب / شوربه )


عطيها بسكوت لتسنين .. اذا بدت تسنن ... على شكل اعواد ... بين الوجبات او العصر

وضروري تشرب الاعشاب ومنقوع التمر ... حتى لو كملت سنه

والاعشاب انا اخذهم من مره وتحط فيهم حلبه وحبة البركه ومرميه وزعتر واعشاب ثانيه





والاهم من هذا كله .. احرصي على بنتج لا تمررررررض ... حاولي ماتعرضيها لهوا بارد وهوا حار بنفس الوقت

حاولي وقت السبوح ما اتعرض للهوا وقت ما تبدلينها وتخلين جو الغرفه معتدل

انا في بيتي التكيف وحدات .. اسكر الوحده اذا بغيت اسبحها او ابدلها




ان شالله اكون فدتج ... ومابي منج الا الدعوه الحلوه

والله يحفظ عيالي ويخليهم لي ويحفظ بنتج ويصلحها يارب

 

[قوتشـي]

بالنسبه للسؤال الثاني ..

مثل ماقالو البنات ..ان شالله ماراح يصير حمل اذا الشغله هذيك بالنهايه صارت برا

 

[muslima88]

الصراحة حبيبتي ومن تجربة في حملي الاول واللي انتهى باجهاض ما كنت ناوية احمل، واكتفينا بطريقة العزل، ولا مره حصل قذف للداخل. وحملت عالسائل الشفاف. هذه تجربتي وان شاء الله تفيدك حياتي.

 

[~{غلاتي}~]

مشكووورييييين ماقصرتوااا ومشاءلله على خبرتكم وله انا ويني ويين هالامور

انزيين بالنسبه حق الحلبه ماتعطلع رييحه بالياهل !!!!

والحيين حررر استغفر الله

 

[sara_77]

http://www.q8yat.com/t836940-5.html

ممكن تدشين الموضوع وراح يفيدج حق بنت واكلها وشوفى تجارب البنات

 

[أم حمودي**MALL**]

حبيبتي مو بس تعطينها فواكه وبسكوت

سوي لها شوربه تتكون من صدر دياي قطعه صغيره ويا خضار طبعا كله مسلوق ومهروس

وحطي لها بالمميه بسكوت مع الحليب

وعطيها ماي التمر زين يمتن الياهل ويعطيه صحه

حطي لها بالماي اللي تسوين لها فيه الحليب شويه حلبه لانه يفتح شهية الياهل


بس السؤال الثاني ما ادري انشالله البنات يفيدونج

نفس الشي