اسلوب ضرب اليهال مع او ضد ؟؟؟

[قطرة مطر83]

السلام عليكم و رحمه الله و بركاته

في شي اشوفه بأغلب العوايل انهم يستعملون اسلوب الطق في تربيه اليهال

و انا اشوف هالشغله انها مو زينه و فيها اضرار وايد على الياهل ...

و غير انه الرسول صلى الله عليه و سلم وصى عليهم .

و اللي ابيه منكم انكم تبدون رايكم بالموضوع هل انكم مع او ضد هالشغله و ليش ؟؟؟


موفقين

 

[قطرة مطر83]

رد : اسلوب ضرب اليهال مع او ضد ؟؟؟

اتمنى التفاعل يا بنات و هالموضوع انا اشوفه مهم وااايد

 

[فطومه]

اكيد ضد ضد ضد

وعليه الياهل انسان ضعيف ليش اطقه المفروض افهمه واعلمه الصح من الغلط حتى الطق الخفيف انا ضده

ويما اشوف حريم يكفخون عيالهم بالشارع وبصراحه اغلبهم سوريات مادرى ليش وامس بالذات شفت باليوتيوب مدرسه فى سوريا

يطقون اليهال بوحشيه ياليت تشوفونه بالمسطره وحيل على ايد اليهال وريولهم طق موطبيعي مادرى شلون ساكتين عنهم


بالنهايه انا ضد ومشكوره موضوعج يشوق

 

[قطرة مطر83]

رد : اسلوب ضرب اليهال مع او ضد ؟؟؟

العفو حبيبتي
و صح كلامج مع احترامي للجاليات العربيه اشوفهم اكثر الناس اللي تطق الياهل و شوف عيني .

 

[blue diamond]

الضرب بالنسبة لي اهوا آآآآآآخر الحلول المطروحه ومو اي ضرب الخفيييف اللي مايعور ولا يؤدي إلى عاهه مستديمه
افضل اسلوب الثواب والعقاب للطفل:
لانه يكون حافز ومشجع له انه يكون احسن ومن تلقاء نفسه من بعد ما يفكر بالحوافز
وهالشي وايد زين على الاقل يخلي الطفل من اهوا صغير يعرف الصح من الغلط ويخليه يفكر بمصلحته

مشكوره على الموضوع :aha:​

 

[ما تخيلتك حبيبي]

رد : اسلوب ضرب اليهال مع او ضد ؟؟؟

طبعــــا ضد ..

الطق موو اسسلووب ابداا لا مع كبير ولا مع صغير ..

والطفل بيعاند بالطق .. الطفل يمشي بالهداوه والكلمة الحلوه .. حتى الصرااخ انا ضده .. ما انكررر اني اتنرفز مرات واصررخ بسس ابداا مو اسسسلوب ..

اتضاايق لا شفت ابوو ولا ام يطقون عيالهم : ( ..

ومشكوووره ع الموضووع ..

 

[om deaj]

الضرب بالنسبة لي اهوا آآآآآآخر الحلول المطروحه ومو اي ضرب الخفيييف اللي مايعور ولا يؤدي إلى عاهه مستديمه
افضل اسلوب الثواب والعقاب للطفل:
لانه يكون حافز ومشجع له انه يكون احسن ومن تلقاء نفسه من بعد ما يفكر بالحوافز
وهالشي وايد زين على الاقل يخلي الطفل من اهوا صغير يعرف الصح من الغلط ويخليه يفكر بمصلحته

مشكوره على الموضوع

وانا بعد الضرب اخر الحلول بس وايد اصرخ واعصب عليه>>>لاني احرق بنفسي عشان لا امد ايدي

 

[توته شيطونه]

الضرب مو الحل لانه في ياهل بيعاند والله يصلح العيال يارب

 

[أو عبوش]

الله يهديني صايره بس اصررخ وعقبها امد ايدي لا شعوري بس مو طق اللي يسبب عاهه......

لا ممكن على كتفه طقه


صااايره عصبيه وادري موزين بس احاول امنع نفسي ماقدر

اذا انتي عايشه بيت حموله يعني الجاهل مايكتسب اسلوب حياته منج انتي فتلقينه ياخذ كل شي من الاطفال اللي اهوه معاهم الزين والشين وتعالي عاد كل شوي عيدي التربيه وهالكلمه موزينه وهالشي لا تعيده واهوه قاعد يقلد اللي يشوفهم من اطفال حوله

 

[مهرة البيد]

رد : اسلوب ضرب اليهال مع او ضد ؟؟؟

لا والف لا

يوجد اكثر من وسيله واسلوب نستطيع استعماله من اجل العقاب

وعن نفسي اجد

قليل الحيله هو من يتبع اسلوب الضرب


نحن لم ننجب ابنائنا كي نعذبهم


تقبلوا مروري​

 

[قطرة مطر83]

رد : اسلوب ضرب اليهال مع او ضد ؟؟؟

 

[حجيه هيونه]

رد : اسلوب ضرب اليهال مع او ضد ؟؟؟

احيان الواحد يضطر يلجأ لاسلوب الضرب بس على شغلات جايده جدا

اما بالدشه وبالروحه فابد مو اسلوب واصلا الطفل يتعود ويصير عادي عنده الطق

 

[بنت الفوزان]

رد : اسلوب ضرب اليهال مع او ضد ؟؟؟

اكبر غلط ان الياهل ينطق

 

[ma3moolah]

خنت يلي هاليهال يعورون قلبي من كثر الطق
يعني ناس مو حاصل لها الضنا وناس طايحة طق بعيالها

الياهل بعادته يكتسب عاداته من أهله اللي حوالينه فشي طبيعي لو الام أو الأبو يسبون أكيد راح تلقين الياهل يسب نفس أهه يعني إهو بباله ان هالشي طبيعي
نفس الشي الياهل لمن يشوف أهله يطقون ببعض راح يصيير نفسهم يمشي ويطق بعيال الاوادم
فالأول والتالي الغلط من الأهل نفسهم يعني لازم اهم يضبطون من سلوكهم عشان عيالهم يتعلمون منهم
وبس هاذي وجهة نظري الله يهدي الكل حق عياله
و اكييييد آنا ضد ضرب الأطفال

 

[بائعة الورد]

بالطبع ضد الضرب
الضرب وسيله غير تعليميه البعض يعتبرها وسيله سهله لوقف الازعاج المؤقت
لكن الافضل اننا نبحث عن السبب الحقيقي لسلوك الطفل ومحاوله تصليحه وفي الغرب لو الام ما قدرت تفهم الطفل بتلجأ لاخصائية اجتماعية
لكن لازم يكون في اسلوب مشدد لبعض السلوك الغير سوية ويكون عقاب قوي وبدون تهاون فيه
ويستحسن العقاب في نفس الوقت بدون تأجيل
مثال / اما يجي ابوك راح يوريلك
وكمان عدم ربط الخطأ بالصح
مثال / انت نتيجتك كانت ممتازه روح العب براحتك
المفروض اللعب والمذاكره كله له وقت يلتزم فيه
وسوري لو ثرثرت كتير لاني دراستي تربيه الطفل وما صدقت اكتب واشارك في موضوع تخصصي

 

[monmon12]

خل نكون واقعيين

أهالينا قبل أبهاتهم كانو يخوزرونهم ويكفخونهم وساعات لما تسمعين سوالفهم تضحكين خاصة لما يحذفون النعل وانتو بكرامه

بس كانو قبل لما يطقون مو من حقد بس لجهل منهم انه هذا ايهي التربية الصحيحة سنعهم يتسنعون

وما شاء الله جيل السيتينات والسبعينات على التهزأ الي كلوه بس بس ايهم عصر النهضه

صراحة الحين العيال كله ديمقراطيه وما ينطقون وكله نتفاهم وياهم

بس للأسف عندهم مشاكا عجيبه وغريبه ويتعقد اذا ما شريتله تلفون بقيمة 300 دينار ويشم مخدارت عشان قتله البس دشداشه

والبنت عشان امهما اشوي لهت عنها تكلم الف واحد واعتقد المشاكل الاجنماعيه متروسه

وفعلا هذا الجيل أنا أؤيد ضربه لأنه محتاج طراق يصحيه من نومه وغفلته

ولكن مع هذا انا لا أؤيد الضرب المبرح او الضرب الي يكون من حقد او غل على طفل

مثلا كالحرق او التعذيب

اصلا لا أؤيد الضرب بكل انواعه بس هم اذا ما تبون تطقون عيالكم ربوهم عدل

تربية الدلع والتطلب وولدي ماكو منه اثنين ولحد يحاجيه

هذا خلا الجيل بايض

 

[dnyay_mll]

رد : اسلوب ضرب اليهال مع او ضد ؟؟؟

ما انكـر اني امد ايـدي واطق بس مو الطق اللي يعـور مجرد اخرعهم بس ومو دايما الحمدلله

اقدر اسيطر على عيالي بدون طق

والتفاهم حلو

حتى لو كانو صغار احاورهم باسلوب يفهمونه والحمدلله عيالي مو مأذيني بهالسوالف ربي لك الحمد

واسلوب الثواب والعقاب وايد مهم لتربية الاطفال

وبديل عن الضرب

والله يحفظ عيالنا ويطرح فيهم البركه ويجعلهم من الذريه الصالحه والباره لنا

 

[** حليوة **]

رد : اسلوب ضرب اليهال مع او ضد ؟؟؟

اكييييييييد أن ضد الضرب بس أوقات الواحد ما يقدر
يسيطر على أعصابه حتى لو مب أسلوبه ...
يعني مثال أنا ضد وضد وضد الضرب بس مرة بنت أخوي
سوت شي غلط ونبهتها عليه وخبرت عليها
أمها وقالت توبة ما أعود لهذا الغلط بس اكتشفت إنها
مستمرة عليه وبينت لها إني أعرف وهددتها بأبوها إني بخبره
إذا لاحظت أو إكتشفت إنها ردت لسوالفها بس طبعا هي استقوت عليه لما
واجهتها ويلست تحلف لي أياميييين إني بريئة وإني ظالمتنها بس أنا كنت متأكدة
إنها تكذب وطلبت منها ما تحلف كذب لأن كل الأدلة على غلطها عندي ولما شفتها مستقوية مشعتها بشرها
وضربتها بصراحة غمضتنيبس كان لازم أسوي هالشي لأن ما فادتها ولا طريقة .... ما أقول غير الله يهديها

 

[شوشو الشقيه]

هههههههه عينج خطيره
ما يقدر واحد يحط عينه فيها
امبيه حطيت عيوني في صوره رمزيه مالتج
ما قدرت احط عيوني فيها وجعتني
هههههه ليكون فيها سحر

المهم انا ضد والله

 

[كيكه توفي]

ماعندي عيال ولا متزوجه بس في يهال يقولون ألفاظ جايده شنو الحل اذا مانفع الكلام ولا اي شي وضطريتي تمدين ايدج ؟؟؟؟