استفساراتي عن الدعاء واستجابته

[][ sarah ][]

السلام عليكم

شلونكم يابنات ؟!

في موضوع شاغل بالي وايد ومهما ابحث وادور احس المعلومات ماترضي فضولي
عندي تساؤلات واستفسارات وايد عن الدعاء

انا ادري ان الدعاء عباده ، وان استجابته ممكن تطول او تكون بسرعه ويمكن مايستجاب بعد

واهم شي الانسان يصر ويكون عنده يقين

بس استفساراتي وتساؤلاتي !!!

الحين الواحد لما يدعي بشي مده طويله ويتسهل هالشي فتره حيل بسيطه بعدين يتعقد حيللللللل ، ويكمل الانسان دعاء ويصر وهم تصيرله شغلات تعطيه امل ان هذي بدايه استجابه الدعاء ، بس هم يرجع يتعقد الموضوع

ويستمر هالموال وبعدين ممكن يوصل لمرحله ان يكمل دعاء بس يحس مو قاعد يصير اي شي يعطيه امل

للامانه انا هالشي قاعد يصيرلي

بس هل يعتبر اللي قاعد يصير اشاره من ربي ان هالشي ماراح يتحققلي وان بس اوقف دعاء !!! والا هذي وساوس ابليس !!

يعني ممكن ان تكون في اشارات تبشر العبد ان دعائك راح يستجاب او العكس !!!

وشغله ثانيه بالنسبه للاشارات والدعاء والاحلام .. ممكن الله يبشرنا بقرب الاستجابه بالاحلام !!!

وشلون اعرف اذا كان هذا حلم او اضغاث احلام

خاصه ان الشغله اللي ادعي فيها صارلي مده طويله ادعي وافكر فيها ليل ونهار ، ويقولون اللي يفكر بشي يحلم فيه


ادري كلامي حوسه لاني قاعده اكتب من التلفون
بس بلخصلكم اياه

انا صارلي مده طويله ادعي بشغله وبالواقع قاعد يقرب الهدف مني فتره بسيطه بعدين يبعد بعيد ويتعقد حيل واحس جنه ربي يبعده عني بس مازلت ابيه وحاليا الوضع متعقد والامل شبه مفقود بس املي بربي كبير

وبنفس الوقت الحمدلله احلامي تبشرني بالخير ، بس انا خايفه تكون اضغاث احلام

احس اني مشتته ، وافكر باشياء مادري شلون صايره
ساعات اقول يمكن ربي يبي يختبر صبري
ومرات اقول يمكن ربي بينلي ان هالشي مو زين بس انا ماافهم
وبنفس الوقت اقول لو كان مو زين ليش ربي مايشيل هالشي من بالي ، ليش كل يوم اتعلق اكثر بالهدف اللي في بالي !!!

وغير هالشي ، ادعي ويصيرلي عكس اللي دعيته بالضبط

حاسه بيأس واحباط ، بس بنفس الوقت لما اتذكر ان تحقيق هدفي بيد الله اتفاءل

ياريت القى عندكم اجابات تريحني على تساؤلاتي
وسامحوني عالطواله

 

[mf6nt el3lat]

الله يحقق اللي فبالج ..

 

[الغنج والدلع]

وضعج اللي تمرين فيه نفس وضعي بس انا اقول الدعاء مجاب ان لم يكن بالدنيا بالاخر وهاذي وساوس شيطان الانسان يدعي ويصبر موسي عليه السلام كان يدعي ع فرعون ولم تتحقق الاجابه الا بعد 40 عام وكذلك يعقوب عليه السلام وهم انبياء الله فكيف نحن بشر ذنونبنا ومعاصينا كثر لكن الله حليم ورغم ذلك يحقق لنا مانريد الحمدلله ع نعمه الايمان يارب يحقق لج مرادج ومرادي يارب

 

[بوغاتي88]

الله يحقق اللي فبالج

 

[الريشة]

ممكن تشوفين في الرؤيا شيء يدل إن الله راح يحقق لك اللي تبينه
بس إذا كانت رؤيتك في المنام فيها شيء يبشرك بتحققها ، لازم بعدها على طول تلتزمين بالطاعات و العبادات (مثل الصلاة بوقتها و تصلين السنة و النافلة و الشفع و الوتر و تتصدقين وايد و تقرين قرآن و ما تغتابين أحد) عشان الله يحقق لك هالرؤيا بسرعة.....
أما إذا ارتكبتي المعاصي بعد الرؤيا ، ممكن انها تتأخر بالتحقق أو ما تتحقق.
و إذا كنتي تطلبين شيء من ربك مثلاً : الزوج - الوظيفة...الخ) ما عدا الإنجاب، فلازم إنك تصلين صلاة استخارة حق هالشيء...
يعني مثلاً انتي حاطة في بالك ودك تتزوجين شخص معين ، فالأفضل لك تصلين صلاة الاستخارة لأنك ممكن انتي تتمنين هالرجل بس اهو مو خيرة لك تاخذينه و ممكن فيه عيوب و انتي مو شايفتها ، فالاستخارة أفضل لك لأن الله يعلم و أنتي لا تعلمين.
أما بالنسبة لطلب الحمل فلا ينصح لك بالاستخارة ، لكن الأفضل لك أن تلحي بالدعاء بأن الله يرزقك بالذرية الصالحة الكاملة الخلقة و الخلق.

 

[][ sarah ][]

بوغاتي , mf6nt el3aat

حبايبي عسى ربي يحقق اللي في بالكم بعد ..



الغنج والدلع , الله يبعد عنا وساوس الشيطان ويارب يستجاب دعائنا..
والله كلامج اقوله حق نفسي بس احس اني قاعده اضعف حيييل , وكل ماتحوشني هالحاله اقرا عن الدعاء وقصص الناس مع الدعا عشان احس بأمل وتفاؤل

مشكوره حبيبتي على كلامج ويارب يتحقق اللي في بالج قبلي , من كل قلبي ادعيلج




الريشه كلامج وايد مريح وحلو , قريت ردج كذا مره
ونبهتيني عالاستخاره , فعلا شي غافله عنه


يارب يستجاب دعاؤنا وتتحقق امانينا

 

[][ sarah ][]

انزين بنات الحين الريشه نبهتني عالاستخاره
لو صليت صلاه الاستخاره واللي ابيه كان شر عني .. الله راح يبعده عني اكيد
يعني معناته اصرف النظر عن هالشي حتى لو ابيه , واوقف دعاء !!!

ياربي وايد اشياء في بالي داشه في بعضهاااا مو قادره اوصلها لكم , ابي احد يفهمني ويريحني

 

[ملح الدنيآ.]

شنو يعني اضغاث احلام ؟؟

حبيبتي كثري من الدعااء والاستغفآآآر وماتدرين متى يتحقق الي تبين يمكن رب العامين ماكتب هالشي يصيرلج هالفتره

خلج لحوحه بالدعآآآآآء وعسى الله يوفقج وييسر امورج وتتحقق بأسرع وقت ​

 

[ملح الدنيآ.]

ايي وبعد بزيد شغله قيمي الليل ,,

وقولي هالدعائين (( يآرزآق يآ ذا القوه المتين ارزقني ))

((حسبنآ الله سيؤتينآ الله من فضله إنا الى الله رآغبون ))

وكثري من الدعاء بالسجوود ​

 

[][ sarah ][]

ملح الدنيا حبيبتي اجمعين يارب

اضغاث احلام اللي اعرفه ان اذا فكرتي بشي وايد وحلمتي فيه هذا مايكون منام يكون اضغاث احلام
وهم حسب اللي قريته ان اذا نسيتي الحلم هم يسمونه اضغاث احلام

 

[brettey]

نفس بالضبط الي قاعد يصير لي نفسج بالضبط شغله ابيها وبقوه ادعي وادعي واحسها تتسهل واستانس واستمر بالدعاء وعقب تتعقد وتتصعب وتتسكر في ويههي ومحتاره ليش هالشي يصير انا بحيره بامري اكمل دعاء بهالشي الي ابيه ولا اوقف استغفر الله اعصابي تلفت تلفت
ووايد ناس يقولون فقدي الامل خلاص الله مو كاتب
واقول الله قادر يقولون صح قادر بس يمكن مايبي يعطيج اياه لانه مو خير لج
واقول الله يقدر يقلبه خير لي عيل ليش يتسهل وعقب يتعقد وعلى هالحال
ونفسج احلم احلام مبشره كل تفاسيرها فرج وراحه
والله وكيلي ووكيلج اموري تتعقد وهمومي ومشاكلي ومصايبي تزيييييد
مادري محتاره وااااااايد
وانا وايد ادعي لحوووووووووحه واقيم الليل واستغفر وكله اقول حسبنا الله سيؤتينا الله من فضله انا الا الله راغبون وللامانه فادني بالرزق المادي
والمشكله وساوس ابليس لاعبه فيني لعب

الله يحقق لج مرادج ويسهل امورج عاجلا غير اجلا

 

[الريشة]

حبيبتي انتي صلاة الاستخارة بالشيء اللي تبينه و كرريها كل أسبوع مثلاً
و سبحان الله إذا خيرة لك هالشيء راح يتيسر لك
أما إذا شر لك راح الله يبعده عنك و راح تتعطل الأمور و توقف.
و إذا الله أبعده عنك لا تزعلين بالعكس فكري إن الله وخره عنك لأنه مو خيرة لك و ربك يحبك

 

[قلب فصوااالي]

الله يحقق لك ويحقق لي ماتمني يارب ولجميع المسلمين

 

[طموحه بزياده]

هلا اختي


اي انا نفسج بالضبط بالضبط

تتسهل الامور فجأة واحس خلاص الحين بيصير هالشي اللي ابيه

وفجأة تتعقد الاموووووووور



انا من رايي ان هالشي اشاره ان اللي تبينه راح يتحقق بأذن الله بس راح يطول الامر

وعشان ما يصيبج يأس واحباط وحزن من المدة الطويله اللي تدعين فيها ولا يتحقق

تأتي هذه الاشارات عشان تنبهج ان هالامر راح يصير ويوريج هالاشارات عشان تحرك الامل في قلبج وعقلج


وترد الامور تتعقد



وانا عن نفسي هالاشارات تعطيني امل مع ان الامور تتعقد اكثر من سابقها


تعطيني يقين الله سامع دعائي ويستجيب لي



انا انصحج كمليييييييييي دعائج ولا تيأسين



خليج على يقين وكملي كملي


انا مثلج شي في بالي شاغلني ليل نهار والله ما يمر ساعه الا وافكر بالشي اللي ابيه اقعد اكل اشرب امشي كله افكر بالشي اللي ابيه


وسالفه الاحلام


مرات يكون اضغاث احلام

ومرات ممكن تكون رؤى

حتى لو انج تفكرين فيه

حسب الحلم

اكو حلم مبين خرابيط

واكون حلم هو اصلا رؤيا لان تحلمين فيه بطريقه اشاره مو شي مباشر ان اللي تبينه راح يتحقق


والله يحقق لج اللي في بالج ويرزقج يارب

 

[حكآية ليل ~]

حبيبتي تأكدي بالبدايه ان الدعاء لازم لازم يُستجاب
وان الله تكفل بـ إجابته وقال تعالى ( وقال ربكم ادعوني أستجب لكم )
ماقال يمكن استجيب او لا استجيب !!؟
لا الله أأكد ان جزاء الدعاء الاجابه مهما كان طالت الدنيا او قصرت
لكن انظري كيف يستجيب الله لكِ دعائك بثلاث حالات
اولاً / إما ان يستجيب دعائك الله كما دعوتي ويعطيك الاجابه بالدنيا
مثال ذالك / لو دعيتي الله تعالى بالزوج الصالح وألحيتي على الله بالدعاء
وتقربتي الى الله اكثر استجاب الله لك ذالك واعطاكِ سؤالك حتى لو طالت المده

ثانياً / اما ان يرد الله بدعائك شر كُتب لك
مثال ذالك / لو دعيتي الله ان يرزقك فلان من الناس زوجاً صالح او دعيت ان
يرزقك زوجاً صالح بدون لاتحددين الرجل وألحيتي على الله بالدعاء والتقرب اليه
ترجين إجابة دعوتك فلم تستجب اليس كذالك !؟ ولم تتزوجيه ؟؟
لا بال ان الله أجاب دعوتك ورد عنكي شر هذا الرجل الذي تمنيتيه بمعنى انك طلبتي فلان زوجاً صالح لك ولكن الرجل ليس صالح فا ابعده عنك ولو لم يستجب دعائك لكنتي تزوجتيه وعشتي
معه بنكد وشقاء

ثالثاً / يحفظ الله لك دعائك الى يوم القيامه وهذا الذي نروجوا من الله

مثال ذالك / دعوتي الله طويلاً ولم يستجب لك فا اعلمي ان الله يدخر لك الخير والاجابه ليوم القيامه
سمعت احد محاضرات الشيخ العريفي يقول فيما معناه ان الله يوم القيامه يأمر ملائكته
ان يعرض حسنات العباد عليهم فيأتي احدهم وقد امتلئ كتابه بالحسنات ويقول يارب
من اين لي كل تلك الحسنات التي تزن الجبال فيقول هذهي دعواتك ادخرتها لك في الاخره
فينعم بجنات الله حتى اننا في الاخره نتمنى ان الله لايستجيب لنا بالدنيا حتى نرا مثل تلك الحسنات
الكثيره بالاخره



عزيزتي ادري طولت عليك لكن حبيت اقولك لا تيأسين من رحمة الله
ولا تطفشين بعدم إجابة الدعاء
إعلمي ان الله أخذ عهد على نفسه امام عباده ان يستجيب لهم ولو بعد حين
اكثري الدعاء وجددي الامل عندك

واللهم ياعالم بكل شي يامسخر القلوب ويا ملين الحديد ويا مثبت الجبال الراسيات
أجب دعائكي يارب


اسفه ع الاطاله ويمكن كلامي مش مرتب كثير ​

 

[EL-je3da]

حبيبتي نفس اللي قاعد يصير معاي و مع البنات و انا بعض المرات امل و اقوول لا خلاص ماكو امل و بعدها قالتلي رفيجتي انها سامعه من داعيه ان الوقت اللي تدعين فيه و بعدها الشيطان يوسوسلج يقولج بس وقفي ماكو امل هني وقتها لا توقفينو كملي و خلي ايمانج بالله قوي ان ربي راح يستجيب دعوتج كوني متفائله و الله قاعده احس فيج لاني قاعده امر بهالشي كل يووم و مازلت مستمره و كلي ثقه بان الله سبحانه و تعالى راح يستجيب دعائي انشاءالله الله يوفقج و يرزقج و يحققلج اللي ابالج و تصدقي وايد و انويها بنيه الشي الي تبينه يصير و الله يتقبل منا و منج انشاءالله لما تخلصين دعائج تدعين قولي " اللهم انت ربي لا اله الا انت خلقتني وانا عبدك وانا على عهدك ووعدك مااستطعت و اعوذ بك من شر ما صنعت و ابوء لك بنعمتك علي و ابوء لك بذنبي فاغفرلي فانه لا يغفر الذنوب الا انت" و قولي " اللهم تقبل مني انك انت السميع العليم"
الله يوفقج حبيبتي

 

[][ sarah ][]

Pretty وصفتي وضعي وحالتي بالضبططططططط ، والله نفس الشي ونفس كلامي لما احد يقولي خلاص الله مو كاتبه لج
حتى عبالي انا اللي كاتبه هالكلام وقاعده ارد على وحده
والله انا بحيره ومشتته حيل واقول اذا كان هالامر شر. ليش ربي مايصرف قلبي وعقلي عنه !!! ليش كل يوم اتعلق اكثر :'(


الريشه حبيبتي بسوي اللي قلتي عليه باذن الله واتمنى اذا كان شر ربي يشيله من عقلي لاني تعبت حيل :'(



قلب فصوالي اجمعين حبيبتي


طموحه عسى ربي يريح بالنا ويحقق امالنا
كلامج عطاني امل ودافع , لان هاليومين صارتلي اشياء مو طبيعيه وحيلللل يائسه وانا مااحب ادعي وانا بهالحاله
الله يبشرج ويريحج ، ويارب اللي اشوفه بالاحلام مايكون اضغاث احلام .. لان يقولون اذا مرت ٣ ايام ومازلتي متذكره المنام فهذا مايكون اضغاث احلام


حكايه ليل ياحلو كلامج والله ، لاطولتي ولاشي
جدد الامل فيني والله
كل ماحسيت بيأس بدخل الموضوع واقرا الردود




بنات كلكم والله ماقصرتوا ، ريحتوا قلبي وبالي
يارب ياقادر تستجيب دعاء خواتي اللي ردوا علي قبل استجابه دعائي
يارب الكل يتحققله اللي يبيه

 

[][ sarah ][]

الجعده مشكوره حبيبتي ويارب يستجاب دعائنا
تصدقين انا سامعه بهالمعلومه بعد ان من تملين معناته قرب موعد الاستجابه والشيطان يوسوسلج عشان لاتكملين ومايستجابلج
بس انا جزء من احباطي ان قاعد يصير العكس او الامور تنعفس فوق تحت
وهالشي مضايقني ومخليني اوسوس واقول ربي عطاني عقل ويمكن قاعد يبينلي ان عالشي شر لي بس انا ماافهم !!!

ماادري ياربي
الله يعطينا الامل ويستجاب دعاءنا

 

[قلبي يتبعك]

كأنج قاعدة تتكلمين عن حالتي =)

الله كرييم يا اختي

 

[خوخه بارده]

احسني الظن بالله وقولي هذا الشي بصير لا ن احسنت الظن بربي وتوكلي ع الله وراح تشوفين الشي الي احسنتي الظن برب العالمين
( انا عند ظن عبدي بي وانا معه حيث ما يكون )سبحان الله ما ارحمه