اختكم من الامارات تطلب فزعتكم

[بنت الاماارات]

مرحبا ببنات الكويت

والله قريت ردودكم علي مواضيع نفس مشكلتي اللي بطرحها حسيت للامانه براحه فظيعه كلاكم يبرد القلب ...


مشكلتي مشكله متردده للمليون في مجتمعنا الخليجي


في واحد من 2010 اعرفه يعني كملنا ثلاث سنوات تقريبا...
كان يحبني بشكل ماقدر اوصفه ... كان لاصق لاصق لين انا تعلقت فيه... واتذكر يومها قلتله توعدني تتم لي سند في حياتي .. قالي والله اوعدج... احس بفراغ عاطفي ابوي ماعشت معاه من انا صغيره .. ماعندي اخوان .. حسيت بحنان وكل الفراغ انسد.. كنا نكلم بعض 25 ساعه ليل نهار .. وفي كذا موقف كان يلمح لي انه يبغي ياخذني ... واخر شي اكتشفت انه كذب بالمنطقه اللي ساكن فيها وقبيلته ووايد اشيا.. يوم عرف اني عرفت قلب الدنيا و حرقها.. وكان جدا شكاك و خواف بس تعلقي فيه عما هالاشيا كلها عن عيوني..
و حرمه اخوي طلعت ربيعه اخته وهالشي خوفه اكثر كان وايد يخاف.. بس نفس ماقلتلكم تعلقه فيه وتعلقي فيه .. ماركزت في هالامور... والله كنت اروح مكه ادعي الله لو فيه خير يكون حلالي .. بس هاللي اتمناه


بعد فتره قالي فلانه ترا لو تزوجت اهلي بيختارو لي !!! تخيلو بعد سنه ونص من العلاقه بعد ماتشبع ومل .. شو رايكم !! وقسم بالله ماقدر اقولكم شعوري حزتها بكيت لين روحي طلعت ... ماكنت ادوام بالجامعه..
يوم شاف رده فعلي تغير اكثر وصار قاسي وانا كنت اخاف فراقه وكل يوم ابكي.. تميت معاه فتره وعقبها اكتشفت خياناتها مالها نهايه وروحاته مع البنات الفنادق ... كنت اعرف من حجوزاته للفنادق ومن ارقام البنات ف تلفوناته...


بعدين ترجاني سامحته وتمينا كم شهر بس اعوذ بالله كل حياتي صارت نكد نكد اسمع صوته اتخدر .. لكن هالمره خطب صدق وقالي فلانه انا صج خطبت واباج تسمعيني بعين العقل بودرج شهرين بالظبط وبردلج عقبها انهرت صحت كنت شوي وبنتحر كنت اكلمه ويجرحني اكثر بكلامه يقول اكيد مابفضا لج هالوقت انا ارتب بيتي اليديد.. ولازم احبب حرمتي فيني ... تعرفين شو يعني حرمتي !! يعني حرمتي!! وانا ابكي ابكي ابكي وهو طاف

وملجته كانت قبل يوم سمعت من حرمه اخوي كان عندهم ملجه...


بنات ارجوكم كيف ماخليه يي في بالي ابدا ارجوكم ساعدوني

اقوم الصبح وانا ابكي ... يوم اتخيل انه انتهي من حياتي ابكي

رغم بداخلي شي يقول افتكيتي منه عيشي حياتج طبيعي

صرت كل يوم اقرا سوره البقره ابتعدت عن الاغاني اصلي في وقتها كله ادعي الله
وابكي لاني استحي من نفسي المفروض ابكي من ذنوب مب من فقدانه
احس استحي من ربي
بس في نف الوقت احس براحه لانه الله معاي
يوم اذن احس براحه انش اصلي علي طول
الحمدلله انه نحن مسلمين



ارجوكم ادعولي من قلبكم انساه و الله يعوضني برجل صالح
دخيلكم ادعولي اتوفق ويثبت قلبي علي دينه
وريحوني بكلامكم

واللي مرت بقصه نفسي تكلمني ع الخاص :eh_s(17)::eh_s(17)::eh_s(17):

 

[لمسة ايد]

يأحياتي ﷲَ يوفقج ويشيل حبه ﻣ̲̌ﻥ̴‏​‏​‏​​‏​​ قلبج ويبدله ربي بزوج أحسن منه وارحم منه
يعوضج عن كل اللي فقدتيه اللهم أمين اللهم صل على محمد وعلى آل محمد ♡♡

 

[queen92]

عمري انتي الله يريح قلبج و تنسينه ويرزقج الزوج الصالح اللي يخاف عليج و يداريج والله مايسوى عيشي حيااااتج توج روحي طلعي قعدي مع اهلج شغلي نفسج بأي شي و صدقيني بتنسينه لاتقعدين كلش بروحج عشان ماتفكرين فيه واستغفري و ربي بيعوضج ان شاء الله

 

[noooor2012]

هذا مو حب اسمحي لي اقولج اخبال ارخصتي نفسج حيل لواحد حقير مثله مافيه ذره رجوله انتي عنده مجرد تسليه وبس اهو ضبط حياته ويبي يكون اسره وبيتزوج وانتي ابكي علي الاطلال انتي ماتحبينه انتي تحبين الاهتمام الي اهو محسسج فيه انتي فاقده احد يهتم فيج يسال عنج وصدقيني هالشي بتلقينه بانسان يطق الباب ويخطبج ويكون زوجج مو شخص مثل هذا تافه ووصخ نصيحه اقطعي علاقتج بالمره فيه وفكري بحياه جديده

 

[مريااانه 4]

الله يوفقج ويشيل حبه من قلبج ويرررزقج بالزوووج الصااااااالحه الي يحبج ويخااااف عليج ويرزقج بالذريه الصصالحه

 

[noor salam]

الحمدالله على كل حال ولعل هذه تجربة تطلعين منها قوية على مواجهة الدنيا
حبيبتي الحمدلله انج عرفتي بخطاك وتوجهتي الى الله سبحانه وتعالى
انصحك باللجوء الى الله سبحانه وتعالى و كملي دراستك الجامعية
وان شاءالله ربي يرزقج بالزوج الصالح الوفي المخلص
يااااااااااااارب

 

[تحت ظلك]

اتفلي عن يسارج ثلاث واحمدي ربج انه بعد عن طريقج
لإنه مو كغو ،،
لإنه كان بس يستغل مشاعرج للحرام ومو باغي الحلال فعلاً ،،
ياحبيبتي مشاعرج لاترخصينها لرخيص احفظيها لوقتها
وأسأل الحي القيوم أن يغنيج بحلاله عن حرامه وبفضله عمن سواه


انتبهي لاتردين له لا تردين له قوي قلبج وتعلقي بربج يعوضج خير.

 

[عـيّــآره]

كتبتي مشكلتج وعرفتي اخطائج ولقيتي الحل​

الايام بتنسيج هالانسان وحرام اقول عنه انسان ودي اسبه لكن بترفع ​

بصارحج بشي ولاتزعلين انتي رخصتي نفسج وايد ومن بعض التفاصيل اللي كتبتيها وضحت لي انه ما كانت ​

علاقتكم بس حب بالتلفون كنتو تشوفوون بعض وانتي شعرفج على الفنادق والحجوزات ​

سنين طويله قضيتوها بس بالتلفون ؟ انا مابي اضايقج بس صدقيني اللي يشوفج بمكان فندق او سياره او ​

حتى مطعم وهو ريال غريب لاخطيب ولا زوج بيخليج بنفس هالمكان ويروح عنج وبيشوف مستقبله مع بنت ​

مايعرف شي عن ماضيها حتى لو كان عندها ماضي بس الريال يحب يتزوج وحده ياخذها ويعرفها من بيت اهلها ​

مو بفندق او شات او تلفون ​

هاذي تجربه وصديقيني بتعدي وبتنسينه خصوصا انه مو ريال وتخلى عنج ف عيوبه بتساعدج ​

ترا مافيه حب بهالزمن خلاص اصحو بنات مشاعركم مو لعبه ليش تحطون نفسكم بمواقف تجرحكم سنين ​

 

[انتظر فرج الله]

اختي بنت الامارات بقولج هالسالفة .سمعتها في برنامج فتاوي للشيخ عبدالله المصلح
وحدة سعودية دقت على الشيخ تسأله :تقول ياشيخ انا دعيت على شخص بالشلل .والله استجاب دعائي فانشل هالشخص شلل كامل .هل ياشيخ على ذنب او اثم ؟
شنو سالفتها؟؟؟ سالفتها نفس سالفتج بالضبط .تقول ياشيخ حبيت شخص سبع سنين .وكل ماطلبت منه يتقدم لي يقول لما اخلص دراستي. وكان يتقدمولي ناس وايد ويقولي رفضيهم .خلص دراسته الجامعية .وقلت يالله تقدم لي . قال ميخالف نطري ليما اخلص دراستي العليا .خلص دراسته العليا وضغطت عليه لان وضعي كان محرج جدام اهلي .لاني ارفض ناس وايد يتقدمولي . تدرون شنو رده لها ؟؟قالها : تبيني انا اتزوجججج ؟؟؟؟؟؟ انتي مصدقه عمرج ؟؟؟؟
تقول كان رده صدمة عمري ؟ماكان جدامي الا رب العالمين قلت حسبي الله عليه ونعم الوكيل ودعيت عليه بالشلل . وانشل ياشيخ شلل كامل . وانا الحين احس بالذنب ياشيخ هل علي اثم ؟؟؟

هذا جزاء من يستهين بمشاعر واعراض الناس

اختي بنت الامارات لم يبق لك إلا ‏صدق اللجوء إلى من يجيب المضطر إذا دعاه، وليطرح نفسه بين يديه على بابه، مستغيثاً به، ‏متضرعاً متذللاً، مستكيناً، فمتى وفق لذلك، فقد قرع باب التوفيق
قولي: اللهم انت ملاذي عند حاجتي فرج كربتي بك اصول وبك اجول ولاحول ولاقوة الا بالله

اكثري من الاستغفار واقرئي القران واكثري من السجود .املئي قلبك بحب الله عز وجل فهو من يستحق حبج وتفكيرج وطاعتج وكل جوارحج . راح ينمحي حبه من قلبج .لانه مايستاهل دمعه واحده من عيونج . شخص بلا رجوله ولاكرامة ولااخلاق .دوسي على الماضي تحت ريولج .واحسني الظن بالله .واصلحي امورج مع الله راح ربي يعوضج باللي احسن منه .اهم شي وكلي وفوضي امورج كلها لله مع الطاعه والتفاؤل بالله . من يتق الله يجد له مخرجا. وكثري من اسم الله الفتاح ."انا فتحنا لك فتحا مبينا .ليغفر لك الله ماتقدم من ذنبك وما تأخر .ويتم نعمته عليك ويهديك صراطا مستقيما.هو الذي انزل السكينة في قلوب المؤمنين ليزدادوا ايمانا مع ايمانهم ولله جنود السماوات والارض وكان الله عليما حكيما "
عليج باول 6 ايات من سورة الحديد واخر 3 ايات من سورة الحشر
اللهم انت ملاذي عند حاجتي .فرج كربتي .بك اصول وبك اجول ولاحول ولاقوة لي الا بك.
حسبي الله لااله الا هو عليه توكلت وهو رب العرش العظيم .اللهم اني اسالك من فضلك .ان ربي ذو فضل عظيم
خلى عندج قوة وعزيمة .كافي السنين الي ضاعت من عمرج علشانه. هل يستاهل انج تضيعين باجي عمرج علشانه .انتي الحين عايشة بدوامة ماخذ تفكيرج وتحسرين عليه وعايشه بحزن وكأبه .اختي وين كبريائج وين شموخج وين عزتج .رفعي راسج فووووق ولاتطالعين ورا .كان يتسلي فيج ليما تعدي هالسنين ويستقر مع البنت اللي اختارها .كرامتج اهم من كل شي .استمدي القوة والعزة من الله "اللهم اسالك بعزك وذلي بين يديك ان تزيدني عزا وكرامة وبقوتك وضعفي بين يديك ان تزيدني قوة وصبرا" .لاتعيشين بحزن وكأبه علشان واحد حشرة
اهو عايش حياته ولاسال عنج .كنتي مجرد محطة من محطات حياته وتعداها.كنتي مجرد تقزيرة يتسلى فيها .للاسف هذا تفكيرهم قلوبهم بدون مشاعر ولايحسبون لاي مشاعر. اسمحيلي اقولج الكلام القاسي علشان تصحين من الدوامه تنقذين نفسج وتمدين ايدج لها وتقولين كرامتي وعزتي فوق كل شي .قولي الحمدالله ربي يحبني لانه انقذني من انسان مخادع بدون اخلاق ولاكرامه ولامروءة ولا مشاعر . مايستاهل قلبي ولامشاعري .وربي اكيد بيعوضني واحد احسن منه بس تمسكي بالصبر لانه مفتاح الفرج.
ربي قادر على انه يمحي اي اثر له في قلبج وجوارحج .ان ربي على كل شي قدير

اختي مثل ماقلت لج رفعي راسج فوووق وقولي

لا تظن مالي شموخ وكبرياء.. من حياتي تمسحك جرة قلم


لا تظن مالي شموخ وكبرياء.. من حياتي تمسحك جرة قلم


لاتظن مالي شموخ وكبرياء ...... من حياتي تمسحك جرة قلم
فيني عزة احرقت جمرة الاشواق...وفيني هيبة بعثرت عزة انسان
من باعني برخص بالتراب ينباع .. من عافني كل جوارحي تعافه
اموت واحيا وعزتي راس مالي عهد على نفسي خذيته..من باعني بعته ولو كان غالي.. وليا شراني عقبها ماشريته
انا حرة مكاني فووق عالي ...جبل مايهزه من الناس واطي مثلك
ديري بالج ترديله اذا فكر في يوم من الايام يرجع لج (اهو صفعج صفعه قويه, لازم تكون صفعتج اقوى)
صفعتج = عزتج , كرامتج , شموووخج . ماضي دوسي عليه لاترديله مهما كانت الاسباب

اللي انتي فيه مو حب , اللي انتي فيه تعودتي على اهتمامه واول واحد فجر مشاعرج , شلون تشوفينه يجرح مشاعرج وماقدرتي تمسحينه من قلبج, والله امسحه من قلبي وادوس عليه , يقولج هذي حرمتي يعني هذي لها كرامه بس انتي بدون كرامه , هذا قصده, صدقيني عقب الزواج هم راح يواصل معاج ( يعني انتي سبير له ) اصحي وانفضي الذل والاهانه اللي انتي فيها , ارفسيه بدون رجعه ,وخلي كل ذكرى له تثير فيج الاشمئزاز من صفات الشخص, اياني واياج ترجعيله , ديري بالج , راح يرجع لج بتمثيليه ثانية يستغل فيها مشاعرج وحبج له عشان تضعفين وترديله, احذرج من الشخص, تدرين شنو تفسير تصرفاته ( انا خذيتج تقزيرة اتسلى فيج والا انتي مو كفوا تصيرين زوجتي, اسمحيلي هذا تفكيره هالحقير ( حشرة دوسي عليها )
اسمحيلي انتي ذليتي نفسج عنده وتمادي لانه شاف انسانه ماتهمها عزتها وكرامتها , فطحتي من عينه ,
وين كرامتج يقولج انا بنشغل عنج شهرين عشان اجهز نفسي للزواج ولحرمتي وانتي انطريني اقزرها بعدين عليج
يخسي ويعقب والله
طلعي من الدوامة اللي انتي فيها .. افا عليج بس .. النهاية شنوووو .. اهانة كرامتج -احتقارج -يتسلى فيج - يخونج
انسان بالصفات والحقارة شنو عاجبج فيه ومعلقج فيه . بسج تنازلات
ارحمي نفسج وعزيها كثر ماتقدرين عزيها . لاترضين بالذل . رفعي راسج فووووووق وخليج الاقوى
لاتطالعين وراااااااااااااااااااااااااااااااااااااااااااا لانه حشرة ودستيها , لايمكن تطير مرة ثانية
هذا اذا كان عندج كبرياء وعزة نفس وشخصية قووووية . مابي بعد اليوم تنزل دمعة وحدة عشانه

 

[انتظر فرج الله]

ملاحظة : من جعل رضا انسان همه , جعل الله ذله بين عينيه , لان القلب المفروض مايتعلق الا برب العالمين, وانتي علقتي قلبج بانسان ,المفروض تجعلين رضا رب العالمين همج , مو رضا الانسان الحقير , من جعل الاخرة همه اتته الدنيا من حيث لايحتسب
واذا انتي غلطتي بحق رب العالمين , فهذا جزائج وعقابج من رب العالمين وهو الذل والاحتقار والعذاب

 

[شــــــــــــــوقــــه]

الرجل اساسا خصوصا الي مثل هذا ما يسوى تتضايقين عليه

بعد فتره بتحسين انج ارخصتي نفسج و تقولين انا شلون سويت جذي

 

[عـيّــآره]

من جعل رضا انسان همه , جعل الله ذله بين عينيه


خوفتني هالجمله


ماشاءالله عليج يا انتظرفرج الله كفيتي ووفيتي

جزاج الله الف خير
​

 

[Patcholli]

حبيبتي فكري بسلبياته
هالانسان شنو خذيتي منه
جذب خيانه اوهام ؟
حتى الكلام الحلو الي كان يقوله لج جذب وتمثيل
وانتي كنتي مخدوعه
هالاحساس كافي ان يكرهج فيه وتلوع جبدج منه
انسان لعب فيج وبوقتج وطلع جذاب
واخرتها قسى عليج وتزوج ولاهميتيه
مثل ماشاف نفسه وعاش حياته
شوفي نفسج وعيشي حياتج
والله يوفقج ويثبتج استمري بذكر رب العالمين اهو الي راح يمسح على قلبج
وباجر تكبرين وتنسين وتتزوجين وتلهين ويا ريل وعيال وبيت
وراح تشوفين كل هالماضي اوهام
لاتقولين ماقدر
لان غيرج قدرو بس الصبر اهو علاجج ورب العالمين وكلامه وذكره اهو شفاج وقوتج

 

[نونه المنكوشه]

انا مع اختي انتظارفرج الله كفت ووفت والله ينسيج ويعوضج باللي احسن منه مليووووون مره

 

[granted]

شوفي بالبدايه بتبجين وااايد وتتعبين ووو بس بالنهاية بتنسيينه بس ساعدي نفسج عطي قلبج اجازة وخل عقلج اهو الي يتصرف غيري ارقامج وايميلج وكل شي يوصله لج ويوصلج له ولا تعتقدين انج بتموتين بدونه بالعكس بتعيشين بدون واحد خاين نفسة

ولو ضعفتي وبتردين له تذكري انه لعب فيج سنه ونص وتزوج غيرج يعني ماعنده امانه على بنات الناس
وبجذي ماراح يصونج وتفكيرة نفس الشاب الشرقي احاجيه احب فيها بس مااتزوجها
يلعبون بالبنات بس مايتزوجونهم مالت عليهم
فهالاشكال مو محل ثقة

 

[muhrat uboha.]

ربي ينسيج و يعوضج ان شاءالله

 

[ام القمرات]

السلام عليكم ورحمة الله وبركاته شلونكم حبيباتي ؟ اسال الله تكونو بخير, قلبي صاحبة المشكله اولا اسال الله ان تكون توبتك لله عزوجل وان ياجرك عليها .احس انك وصفت المشكله بكل وضوح لدرجة اني حسيت بحبك وبنفس الوقت حسيت بقهرك احمدي الله ان الموضوع ما تعمق اكثر فعلى مافهمت انك ما طلعتي معاه هذا اللي فهمته .عموما اللي سويتيه كان خطأ شي طبيعي ميول الانثى للذكر هذه فطره بين البشر ولذلك الله جعل هذه الطبيعه خاضعه لقوانين ربانيه ومنها عدم الاختلاط وعدم التحدث مع الرجال الا لضرورة عموما مابي ادخل بهالامور الان لان المشكله صارت وانتهت الا عليك بالثبات وان تدعي الله يغفرلك ماتقدم من ذنبك وتقولي هذا الدعاء :اللهم اجرني في مصيبتي واخلف لي خيرا منها .وادخلي الانترنت واكتبي فيه فضل هذا الدعاء وشوفي رحمة الله كيف !!حبيبتي ما رح اقولك انسيه ودوسي على قلبك وماادري شنو من هالكلام لا بقولك وبخاطبك كانسانه انثى جرحت كرامتها وين كرامتك؟ رجل لعب فيك وضحك عليك وصافيتيه وعطتيه مشاعرك كلها واخلصتيله بالسر والعلن وماخنتيه وتشهدي الله على هالشي ونهايته رماك مثل فردة الحذاء اسمحيلي اقسى شوي ولاني شعرت بطعنته لك اقولك هالكلام ,وين كرامتك ؟؟؟وين كرامة اهلك لما الرجال مثلا يشوف اخوك ,ابوك, زوج اختك مثلا في الشارع والا في المناسبات ,ما فكرتي شبقول في نفسه وكيف بسخر من هالرجال اللي بشوارب وبداخله يقول لعبت في بنتكم لعب ؟؟؟؟ والا منتوبرجاجيل ؟؟؟كيف هانو عليك ؟؟بلاش كيف هانت عليك نفسك؟ يااختي والله انا كرهته بس لمجرد قريت شسوى معاك ويشهدالله شلون انتي ؟؟؟لاتقولين احبه ...لان الحب احترام, رحمة ,ود,عطاء مو انانيه , ولذلك تلاقين الوحدة منا اذا زوجها تزوج عليها كرهته ولدرجة ان البعض تطلق منه وهي تموت عليه فقط لانه شعرت بالاهانه بغض النظر اذا كان التصرف صحيح والا لا, انا وحدة من الناس امووووت على التراب اللي يمشي زوجي عليه لكن ياااويله اذا اهاني بيوم وهو جرب مرة كرهته موت ماعاد اواطن يقرب جنبي الى ان يعتذر او بطريقته عاد ينسيني الكلمه والا السواه هذا وهو زوجي اللي حلاله واللي انا اعرف ان الدنيا ماتجي دايما عالرخا فكيف بالرجل الاجنبي عني مهما حبيته وتنازلتله لكن يقطني ويتزوج علي ثانيه ؟؟؟؟بصراحه انتي عار عالانوثه اسمحيلي حبيبتي وين كبرياءك رجل كان يعلم فيك الحب وتركك اي حب الان اللي للحين يشغلك فيه ,حبيبتي اذا ارخصتي عمرك وانتي اللي اهنتي نفسك لاتطلبين ياامي منه يغليك ويقدرك انتي بعت اهلك اللي يحبونك ويغلونك اكثر ماتغلين هالحشره فهل الجزاء الا من جنس العمل !!!!هذا عدل الله ارفعي نفسك وعزيها وخليك بنت ابوك ولاتحطين راس اهلك في الطين وخافي الله قبل كل شي اللي عصيتيه وكيف بتوضعي بقبر مالك فيه ونيس ولا انيس غي عملك اللي كنت بالدنيا تسويه, اتق الله وخافي من وحشة القبر ياينتي والله ثم والله هذا رجل المفروض لويجي يحبي على وجهه حيبي بيرجعلك ومن شوقه وحبه وندمان ويبي يتزوجك وترك خطيبته والله ماترجعيله ولو موته برفضك .اي انسانه انت تعلمي انه وجدك رخيصه وما تستاهلين تكونين زوجه له ونعم يحبك لكن عشيقه ماتشرفينه كزوجه ولابد عنده ربع ومكلمهم عنك لكذا مايبي يتزوجك عشان ربعه عارفينك وسواء قالهم والا لا اي رخيصه انتي لتقبلي ان تكوني صاحبته وتسولفين معاه مجبور عالزواج والامضغوط عليه والا ايش ماكان كيف تعطيه اللذه انه يشعر بانك ترمين نفسك عليه ويفتخر ويمكن يسوي لمحادثاتكم نسخ ويتشيحط عند الجماعه ويبيك تستمرين معه ماسالتي نفسك شذنبهم هلك اللي صغرتيهم بعينه وبعين الناس اللي دروا ويش ذنب المسكين اللي بيتزوجك وانت خنتيه قبل لايجي وارخصتي نفسك لغيره تخيلي وانت متزوجه وشافك مع زوجك وشفتيه شوبيقول عن الرجل الواقف معك وشونظرته وانتي شو موقفك .اسمعي حبيبتي مثل ماقالو من باعنا بعناه وبارخص الاثمان ويابيعه مرخصها .امسحي دموعك وارفعي راسك واشعري بغلاك وبثمنك وارجعي لله اللي اكرمك واستغفريه واحقري هالانسان الخاين لاهله ولزوجته وله يوم بينتقم منه الله ان ماتاب هذا عدل الله وانتي لوحاول باي طريقه يرجعك او حتى يوعدك بالزواج ولو بكى وتندم لاتراسليه ابد ولاتناقشيه ولاتردي على كلامه ولا اسئلته ولاتخوني الله اللي يراك ويرى صدق توبتك حتى لو لجا للتهديد ابدا لاتردي عليه ولا بكلمه امسحي رقمه وحطيله بلوك وانهي اللي صنعتيه لنفسك يبي يخبر اهلك خليه لاتخافي والله وليك لكن ابدا لاتراسليه لا بخير ولابشلر هذه نصيحتي واعتذر عن الاطاله

 

[blue ocean]

حيالله بنت الامارات الغاليه ..

ان شالله راح تنسينه حبيبتي​

لأنه ماكان كفو هالحب .. كان يتسلى فيج وانتي الله يهداج صدقتيه​

كنتي بالنسبه له مجرد تقزوره لين يتزوج .. ان شالله راح تنسينه لأنه هالاشكال​

مايحتاج الانسان يشقي عمره تفكير عليها .. اللي يستاهل الحب على الاقل ناس حبت من قلب​

لكن هذا مايستاهل ذرة حب .. اللحين هو عايش ومستانس وناسيج وانتي مقطعه نفسج بجي عليه .. ليش ؟؟​

لا ياحبيبتي الله يعوضج خير ان شالله كوني مع رب العالمين واخلصي النيه وصدقيني رب العالمين مايتخلى عنج​

بس بعدي عن هالطريج .. والله يعوضج ان شالله اللي احسن منه الف مره .. هذا مايحتاج ترخصين عليه​

دقيقه من وقتج .. ادري الكلام اسهل من الفعل بس صدقيني لو اقنعتي نفسج ان ماتفكرين فيه قدر الامكان يعني تتناسينه​

وتلهين بحياتج .. بيجي يوم ومن غير لا تحسين وبتنسينه .. الله يوفقج حبيبتي​

 

[Muhrah]

حبيبتي انتي الله يعوضج بولد الحلال اللي يستاهلج صجوانتي قلتي كل مواصفاته السيئه وسوالفه البطاليه اهو استغل حبج مثل كل الصبيان يبي يلعب ويقزر وقت لكن اذا بيخطب عمره مابيفكر بالبنت اللي حبها وكلمته
وانتي المفروض وقت قال بخطب انهيتي العلاقه .. بدلي رقمج ولا تسمحين لروحج تفكرين فيه
اشغلي وقتج وامليء فراغج وصدقيني حوبتج مابتعداه
واهم شيء ماخسرتي شيء ولا قص عليج اكثر .. والله مايستاهل دمعه منج

 

[بنت الاماارات]

يزاكم الله خير علي ردودكم ماقصرتوا كلكم

الله يوفقكم ان شالله


علي رغم قسوه البعض الا انني اعتبرتها نصيحه من خواتي في الله


والله اني ارتحت يوم فضفضت لكم