احب في الكويت التميز بكل شي

[مهندسة مكياج]

مرحبا خواتي

شخباركم؟؟؟


انا من البحرين وناويه ان شاء الله ايي الكويت هالاسبوع

وبغيت اخذ لبس لولدي عمره سنتين ونص للقرقاعون شي يكون تراثي ومميز فهل اروح لسوق المباركية والا في سوق غير ووين بالضبط هالاماكن وشسم المحلات خبركم اللي مو من الديرة لازم بالتفصيل


والله يسلمكم بعد انا من قبل كنت يايه للقمصان الطويلة فرحت للنقرة الشمالي والجنوبي وشفت محل اكسجين و الستي سنتر فمادري في اماكن ثانيه عندهم ملابس حلوة ومو ماركات مثل اللي بالمجمعات الي ذكرتهم ونفس السؤال لثياب اليهال ثياب حلوة ومو ماركات حته لو غالية الماركات عندي بالبحرين ونشتري منهم علطول يعني لاحظت النقرة الشمالي ملابس النسوان روعه ومو ماركات واسعارهم اوكي ففي اماكن غير احصل ولليهال بعد جذي بهالمستوى

وهل فتحوا مول 360 والا ليلحين؟؟؟


ادري مللتكم بالاسئلة بس بعد ابي اسأل عن اغراض الولادة ملابس الام ومفرش البيبي وهالسوالف الحلوة مو العادية وين القى؟؟



وسامحوني على الاطالة ومشكورين

 

[ام منور]

ياهلا ومرحبا باهل البحرين والله

سؤالج عن لبس القرقيعان الفناتق تلقينها بالمعارض وعندج
بيت ديفا كاريزما وسدره هذول تلقينهم يم مستشفى الاميري قدام سوق شر مفتوحين طول الاسبوع بس احسن من الاربعة الى السبت تلقين وايد عارضين عكس باقي الايام

اما الملابس القمصان انا اعرفت قصدج عدل عندج مجمع كويت مجك وايد فيه محلات مو ماركات تقريبا بمسوا اكسوجين و ريفا واحلا شغلات عمليه واسعارها زينه بمنطقة ابو حليفه وهم فيه العاب ومطاعم فوق ومو بعيد عنه مجمع يديد توه ماصارله وايد فاتح اسمه البيرق بمنطقة العقيله فيه محلات اطفال حلوه بس اشوي غالي من 20الى 40

انشاء الله البنات يفيدونج بعد

 

[ام منور]

نسيت اقولج انه البيرق فيه محلات للنساء يعني بتلقين لج قمصان حلوه وفساتين وهما في سينما ومطاعم بس العابهم موذاك الزود
العاب كويت مجك احلى بوايد

 

[مهندسة مكياج]

مشكووووووره ام منور

بس شلون عن مستوى اسعار ديفا وسدره وهذيلا للقرقيعان لولدي مو بنيه بعد

 

[zahoora304]

حبيبتي تنورينا حياج الله يا قلبي روحي المعارض و الحين راح يفتح معرض القادسية روحي شوفي 4_8 ان شاء الله روحي القي نظرة اهو صاير بنطقة القادسية يم الجمعية في صالة افراح اهو داخل الصالة ونفس الاخت الي قالت بيت ديفا وكاريزما روحي شوفي و روحي الافنيوز و افتحوا مول 360 بس ترى كلهى ماركات بس روحي تمشي فيه وقاعات السينما وااايد حلووة وروحي سوق شرق لتمنى لك اجازة سعيدو بين اهلج

 

[FOZQ8]

رد : احب في الكويت التميز بكل شي

امبيه ما ودي تروحين معارض عشان ما يستغلونج ..
بس اذا تبين قمصان حلوه وعمليه ورخيصه عندج سيتي سنتر فيه محلات شكثر يبيعون على خمس دنانير هالقمصان في بعضهم هلاقه وخري عنهم بس في وايد اطيح على شغلات عمليه خصوصا للسفر
وعندج الايوب والسندس بعد

واذا تبين شي راقي عندج ريفا وتشويس نفس الشركه اهما واعتقد اوكسجين تابع لهم بس البضاعه تختلف عن بعض شوي
وروشيه نوار بالمهلب والبيرق ... اي روحي البيرق في جم محل مو موجدين بالمجمعات الثانيه ومسوين سيل الحين لحقي عليهم

 

[ريـــم إلغـــلآ]

للرفع

 

[مملوحة_الوصايف]

رد : احب في الكويت التميز بكل شي

للقريقيعااااااان روحي مجمع الاوقاف
واذا هدووم عندج 360 فتح والافنيوووز حلوو

 

[حرم يوسف بيك]

رد : احب في الكويت التميز بكل شي

هلا وغلا بأهل البحرين تبين قمصان اسعارهم حلوووة وموديلات واشكال والوان وشكثر اشوف خليجات اهناك النقرة الشمالي والنقرة الجنوبي وروحي المهلب بعد في حولي مايسوى تروحين فحيحيل ونفسهم في حولي وعندج بعد ستي سنتر السوق الاحمر. بالسالميه عند الدوار بعد اسعارهم زينه وقمصانهم حلووه يمكن اغلى قميص ب١٥ دينار وعندج بعد تبين القمصان موجودين بالفروانيه بمجمع العربيد بلازا ويمه مجمع الحمرا مول بس واسعارهم حلووووه و٣٦٠ فتح لكن كله ماركات ونفس محلات البحرين محل ديسجوال وبيبي وماركس سبنسر ومانجو وماركه بالي بربري الفيرو مارتيني الخ مايسوى اتعنين ومثل محلاتكم واذا. تبين ملابس قرقيعان روحي المباركيه احسنلج لان طحت على جم وحده يشترون من المباركيه ويركبون عليه اكسسوارت من بو١٠٠ ويعرضونة بالمعارض دبلات الدبلات

 

[fnooon]

هلا باهل البحرين وحياج الله بالنسبه للقرقيعان عندج مجمع النمران بالفروانيه قريب يم مطحنة الفوز وماكدونالز تحت بالسرداب فيه لبس قرقيعان وهم مجمع الاوقاف والقمصان الطويله في بالفروانيه بالعربيد مول والفنار الي بالسالميه وهم ستي سنتر اوفر

​

 

[Un-6be3iya]

مادري عن اسألتج بس ضروري ضروري تودين ولدج مجمع ديسكفري لانه كلللله العاب وراح يستانس وااايد

 

[مهندسة مكياج]

حبايبي والله تسلمون انا صج جم يوم مادشيت المنتدى لالان كان عندنا عرس
بس تفاجأت من ردودكم ماتقصرون


بس الي قالت لي بالمباركية للقرقيعان وين القى يعني يم الي يبيعون الملابس التراثية والا في اسماء محلات معينه

وماشوف احد قالي عن اغراض الولادة

شكله مجمع 360 نفس مجمع مودا مول عندنا كل الي فيه (( فندي - بربري - قوتشي - ارماني - ديور وربعهم |)) يعني للتمشي بس مثل ماقلتوا يعني اروح المارينا والافنيوز بس؟؟؟

 

[ام ورود مول]

مجمع كويت ماجيك اسعاره زينة وبضاعته حلوة..ومجمع البيرق وسيتي سنتر

 

[tolay]

بالنسبه حق القرقيعان عندج المعارض يفنتكون بس غالي شوي

انتي روحي قسم كويتيات مول وراح تلقين معارض عن القرقيعان شكثر

 

[مهندسة مكياج]

مشكورين بنات اللي ردوا

فدتوني والله

 

[مهندسة مكياج]

للرفع

 

[مهندسة مكياج]

يعني شكله مجمع البيرق من نوعية المجمعات الراقية مو العادية لان القمصان الي ابيها مو اغلى من 15 دينار لان اذا حولناه بحريني يطلع وايد

وهل بمجمع الاوقاف فيه لبس قرقيعان للصبيان والا لا ؟؟؟ او اروح المباركيه واشوف صوب الملابس الشعبية واخذ له من هناك

وهل مجمع دسكفري يصلح لولدي عمره سنتين ونص بس و الالعاب عوده عليه؟؟

وابي اعرف اسعار القمصان تقريبي بكويت مجك و الايوب والسندس عشان لا اتعنى ويطلع غالي


بليييييييييييييييييييييييز جاوبوني باجر باروح الكويت

 

[شعلة مضيئة]

مجمع دسكفري الألعاب اللي في منااااسبة جدا لولدج من سنتين لي خمس سنوات ما يدخلون أكبر ... الكبار لهم مكان ثاني ..

 

[مهندسة مكياج]

مشكورة (( شعلة مضيئة ))

زين حصلنا لنا مكان حلو


محد بيجاوبني على باقي الاسئلة

 

[::كيك وعسل::]

لرفع
....