اتمنى تراعوون نفسيتي انا حيل حساسه ودقيقه تكفوون ابي نصايحكم

[تمنيته]

السلام عليكم
بنات انا دشيت هالقسم وودي اسال سؤال واحد
بس اتمنى تفهموووني .. انا مومغروره ولا يهمني بالرجال الا طيبه ورجولته
بس كلللش ماتوقعت اني انحط بهالموقف
انا بنت وحمدلله موقاصرني شي
تقدم لي واحد بس انصدمت لما شفته . شين . بنات انا مابي مزيون بس عالاقل ابي واحد مقبوول. وماودي ارده علشان هالسبب . بس بنااات انا حدي اعاف :eh_s(2):

سؤالي ؟ منوووو فيكم قد خذت واحد موعاجبها شكلاااااا . وشلونها الحين مستانسه ولا ندمانه؟؟؟


.. قصدي عادي اخذه ؟ انا خايفه اكتئب ​

 

[الصواني]

والله قرار صعب ان احد يجاوبج عليه الزواج مو لعبه هذي مشاركه طول العمر فاستخيري انا انصحج

 

[CHANGE]

اهم شي بالزواج القبول

صلي استخاره .. ولا تضغظين على نفسج .. ولا توافقين بس عشان زواج وبس .. لازم تفكرين لي جدام

واشلون بتعيشين معاه طول عمرج

 

[بنت الاحلام]

انتي ملكتي او لا .؟

شوفي اذا مو مرتاحه له نفسيا لا توافقين هذا زواج مو لعبه

عرفتي

وانصحج صلي استخاره

 

[!witcha!]

والله الجمال مو كل شي اهم شي اخلاقه
صلي استخارة ؟؟
اعرف وايد ماخذين جياكر و عااادي حياتهم طبيعية ,, اهم شي بريايل هالايام اخلاقهم
موفقة حبيبتي

 

[تمنيته]

لا ماملجت بس خطبه ماردينا للحين
مشكورين حبايبي .. اكيد ماراح اوافق لين ارتاح ومن جذي انا بشوف البنات منو مرت نفس حالتي

 

[منيرة خالد]

الجمال والجكر مو مقياس للرجل >>> اهم شي الراحه النفسيه لما شفتيه ، يمكن انتي ما ارتحتي لما شفته علشان جذي ما تقبلتي جكره



استخيري ولا تستعجلين


والله يوفقكج

 

[تمنيته]

الله يجزاكم خير

 

[الـــغـــلآ]

بس حبيت اقول ماله علاقه بالراحه لاني انا ما كنت مرتاحه و شكثر بنات بعد ما كانو مرتاحين بس سبحان الله طلع خير لي

ثاني شي اذا الرجال ملتزم بصلاته و طيب و اخلاق لا تردينه صدقيني الجمال مو كل شي و لا حتى يكون مقبول انا اعرف وحده وربي مزيووووونه مشالله اخذت واحد جيكر الحمدلله على خلقة الله بس كلش يعني مادري شلون بتعيش معاه
و شوفي الحين تتدلع عليه و تموت فيه و هو بعد يموت فيها لانه بمجرد ما انها عاشت معاه خلاس صار ملك جمال بالنسبه لها

 

[! Miss.Q8 !]

التقبل شرط اساسي للزواج

يعني اذا انتي حاسه انج ما راح تتقبلينه لا توافقين

لأن هالشي راح يأثر على علاقتكم

صج الجمال شي نسبي بس الراحه مطلوبه لانها عشرة عمر مو يوم ولا يومين

 

[Angel_store]

صلي صلاه استخاره و الله يكتب لج الخير

 

[اشكي]

عن تجربه حبيبتي كنت عايشه قصة حب مع واحد ملك جمال نسخة مهند عيون خضر وشعر اشقر وماشاء الله اللون واحد

ومزيون ماشاء الله عليه حيل وسنتين مع بعض وتحملت طبايعه الخايسه وخبلاته وجنونه وطبايعه حطي عليهم اكس خبل خبل شوي عليه وتحديت اهلي عشانه وكسرت كلمة ابوي ويوم خطبني وابوي طرده لانه شاف انه مايناسبني بولا شي مع اني حلوة وموناقصني شي بس كان كله ينتقدني ويطلع فيني عيوب غصب طيب وشايف نفسه علي مع اني ماتقولون جيكره ههه بالعكس حيل ناعمه وحلوة صج موشقره مثله هههههههههه المهم ابوي رفضه وقالي ياأنا ياهو ماارضى عليج واغضب عليج وأنا حيل روحي بأمي وأبوي قلت خلني اجربه قبل لااظلمه شفت انه جبان وخاف من أبوي واخواني قلت له خلاص أنا بوافق على الي ابوي اختاره قام يبجي صج وتحطم نفسيا بس شنو مورجال جماله مانفعه ولا نفعني تركنا بعض وخذيت زوجي شكله عادي واسمر وانا احلى منه بمليون مره بس ماشاء الله عليه أدب وأخلاق وطيب وانسان فاهم وصج صج رجال تحدا الكون عشاني اشتراني والمزيون باعني
نصيحه من أخت لاتاخذين واحد أنتي تحبينه ولا واحد مزيون اختاري الي أهلج يبونه ترى رضى الوالدين مافي منه عسى الله يخليهم لنا ويبارك لج بخطوبتج واستخيري حبيبتي والجمال موكل شي فكري فكري والله محد دايم لج....

 

[مهرهـ]

هي مو ع الزين..هي ع الاسلوب..اانا كان طليقي مزيون بس اسلوبه الله يستر عليه
ترا البنت ماتبي الا اللي يراعيها وحنون..
وبالنهايه هو قبول ..ياحظج عندكم شوفه شرعيه حنا نشوفه بالبطاقه كككككككككككككك
وبتوفيق

 

[عنود مطير]

اهم شي بالزواج القبول

صلي استخاره ولا تضغظين على نفسج ي قلبي بعدين هذاا زواج مو لعبه يعننننننني مسستقبل

 

[تمنيته]

تسلمووون حبايبي .. واللي قالت شوفه شرعيه ماعندنا بس هو جاينا قريب المغرب وطليت من الدريشه وشفته .. هو ماشافني.. اخووي يمدحه ويمدح ابوه بس للحين يسألون عنه .. الله ييسر اللي فيه الخير
بنات هو موعادي وانا مابي مزيون مغرور .. بس هو شين مسكين قريب للقبيح .. وانا حلوه بس عيبي بطوطه شوي .. والله كاسر خاطري حيل ..

 

[ديانا سبنسر]

اذا مومتقبلته لاوالله لاتوافقين هذا عمر واهم شي راحتج

 

[pinkoosha]

ياقلبي صلي استخاره احنا ماراح نفيدج بهالشي,, استعيني برب العالمين واستخيري

 

[مسـك]

حبيبتي اهم شي فالزوااااج القبوووول مبدئياااا


اذا ماحصل قبول للاسف نسبة نجاح الزواج ضعييفه جدااا

استخري ووكلي امرج لربي وادعي

 

[تمنيته]

مشكووورين حبايبي .. انشالله

 

[beren saat]

اهم شي الاخلااااااااااااااااااااااق صدقيني

والله يوفقج . . ​