ابي رايكم بالزواج في السن 21

[احلا كويت]

السلام عليكم حبايبي ...
بناااات انا الحمدالله طموحة و دايما اقول ماكو زواج الا بعد الجامعة لو شنو .. تعرفون هالشعور لما تحسين انتي حرة مو حرة حرة لاا اقصد حرة ان ما عندج التزاماات الخ ..
و فعلا لما الناس تسأل عني خلاص بنفس اللحظة اهلي يقولون لاا البنت صغيرة على الزوااج و هذا انا الي قلت لهم , المهم بنااات انا حيييييييل محتارة و خاصتا زوااج !!! اختي فاتحتني بالموضوع و قالت لي فكري و ترى الرجال محترم و شارييج الخ يعني الحمدلله حده زيييين و صج فكرت و استخرت الحمدالله المهم ماني داشه بالتفاصيل ...
ابي رايكم بالزواج و خاصتا ان ليلحين انا بالجامعة , هل هذا راح يعييق دراستي ؟ وابي تجارب البنات الي تزوجوا و اهما بالجامعة ...
اتمنى انكم تفيدوني لان والله محتااارة و هذا اصعب قرارر ..​

 

[اميره بكلمتي]

اول شي اقول الله يكتبلج اللي فيه الخير ياارب

وثانيا اقولج اذا انتي قادره تنظمين وقتج مابين البيت والجامعه ومسؤولية الزوج وافق
وإذا مو قادره لا فهذا الشي راجعللج انتي

وهاذي وجهة نظري وشوفي البنات شيردون عليج
بس اهم شي واهي النقطه الاهم استخيري والله يوفقج

 

[جوانا2010]

استخيري والله يكتبلك اللي فيه خير لك.......
وبالنسبه لي تزوجت بعد ماخلصت جامعه ....
بس كان فيه من صديقاتي متزوجات وعادي ماشاءالله قادرين يوفقون بين البيت والجامعه
بس اكيد لازم يكون فيه شويه ضغوطات عليهم موزي البنت....
والله يوفقك

 

[ملكةجمال]

أنا كان لي صديقات بالجامعة و تزوجوا و هم ما زالو يدرسون و بالعكس الحياة تكون أحلى و النفسية تقبل عالدراسة بشكل أكبر بس لا بد من التفاهم على تأخير مشروع الإنجاب لأنج ما زلت تدريس و تكون رغبتج عن قناعة بعدم الإنجاب حاليا كي لا تتعبين نفسيا (البنت من تتزوج تحلم بأن يكون بين يديها طفلا و تشعر بإحساس الأمومة ... طبيعي هادي فطرة) و تمتعي بالحياة الزوجية قبل الإرتباطات و الواجبات الأسرية. هدا واحد أوكي؟ ثانيا: المشكلة الوحيدة اللي جفتها بصديقاتي و كانوا طالبات علوم ها؟ يعني مختبرات و تأخير بالجامعة ... مشاكلهم دوم كانت حول كيفية ترتيب الوقت تفاديا للضغوط .. كأن متى تدرس لامتحان معين و باجر جمعتهم أو معزومين أو الزوج يحس إنه left-out يعني مهمل. نصيحتي: بالتفاهم تقدرين تدمجين دراسة و زواج و لا تحاتين الكل راح يكون متفهم ظروفج ... وحدة من رفيجاتي حملت و هي بالجامعة و هي مستااااااانسة عالآخر و كان هو يجيبها و يردها حرصا عليها أثناء الحمل و وحدة أعرفها من البنات بس تزوجت تخرجت و سافرت تكمل دراستها برة. شرايج؟ الزواج مو عائق حبيبتي و لا تسمعين كلام اللي يقول لج لوية و عوار راس .... كله بالتفاهم أثناء فترة الخطوبة .... إدا هو شاريج بالفعل أكيد بيصبر و بعدين هادي فترة دراسة و تعدي و اطلبي الدعم منه و اوعديه بإجازة عسل حقيقية بعد التخرج و وراها على طول نونو صغير. لا تحاتين و لا تسمحين لأحد يدبب فيج القلق.
توكلي على الله ... مو كل يوم يجينا واحد شارينا! و مبرووووووووك مقدما! كللللللللللللللللللللشششششششششششش! هب السعد ...إلخ ....

 

[ميشووو]

الله يوفقك

وبالعكس السن مناسب


بس انتي نظمي وقتج مع الدراسه

 

[GaLbI t7aWaL]

يا حبيبتي والله لا تحاتين

آنا عمري ١٩ وعندي بنت

وادرس

وبدون خدامه @@

بس التساهيل من ربج

 

[احلا كويت]

حبايبي و الله ما تقصرون ريحتوني ... انا مثل اي بنت ما كانت تتمنى ان تتزوج و اهي بالجامعة و انا هذي كانت فكرتي وياما رديت ناس على بونا هالفكرة و فعلا .. بس والله امسكوني خواتي و انصحوني اني افكر و استخير انا بالنسبة لهم اصغر وحدة اتزوج بينهم خواتي تزوجوا على 23 و 25 وانا توني صغيرة .. بس الحمدالله استخرت و ارتحت بشكل مو طبيعي و غير هذا حتى اهو ما يبي عيال الا لما اتخرج يعني متفهم والحمدالله ..
انا الي مخوفني اني اصغر وحدة ,, و حيييييل اعتمد على اهلي بشكل مو طبيعي ,, و كل شي ابيه عندي ,, يعني احس انا ليلحين صغيرة على المسئولية و على بيت بس قالولي ان الزواج يغير المراة ..
ادري فريت راسكم بس صج هذا اصعب قرار مريت فيه ..
ما تقصرون حيييييييييييييل ريحتوني ​

 

[عادت ذكرياتي]

توكلي على الله بعد الاستخارة ...

السن مناسب

 

[Dr.Nouf]

حسب الكُلية الي تدرسين فيها .. صعوبتها - تقدير دكاترتها-ادارتها !

انا رفيجاتي الي تزوّجوا واهما يدرسون .. ماكلين هوا! بس يمكن لانهّم بالتعّش؟ 18-19 ؟

فكري عدل ..

 

[بدوردا الأموره]

على حسب شخصيتج أنتي مو على حسب العمر لأن في بنات اعمارهم 15 و 16 ويقدرون يتحملون مسؤولية البيت والدراسه وفيه بنات أعمارهم 30 سنه ماتقدر تتحمل نفسها

وعلى حسب بعد الريال اللي بتتزوجينه اذا كان متفهم ويراعي ظروفك

انتي فكري وشوفي وصلي استخاره

 

[مسك حياتي]

اممممممم احسه عمر حلو ومناسب للزواج ...

بس هالشي بياثر على دراستج فملجي و خلي الزواج بعد التخرج ...

او قبل الزواج تفاهمي معاه عن امور دراستج و جذي ...

الله يوفقج و يكتبلج الخيره حبيبتي ...

 

[الكوويت حره]

وعليكم السلام

أنا أقول توكلي على الله ووافقي والفرصه ما تجي دوم
اذا الرجال زين وأخلاق ويوافق انج تكملين دراستج خلاص وافقي

وحاولي تنظمين وقتج بين الدراسه والزواج

الله يوفقج حبيبتي وييسر أمورج

 

[برستيجي مآركة]

الله يوفقك يابعدي واهم انك تقولين استخرتي وارتحتي بس توكلي على الله ولاصار ماصار انتي بتتعودين وتتأقلمين ع الحياة الجديدة والله يوفقك ان شاءالله ويوفق بنات المنتدى..

 

[manoooram]

عندي وجهة نظر بموضوع الزواج أثناء فترة الدراسة
حلاته تكملين دراستج وتتخرجين
وبعدها تتزوجين وطبعا بالأول هذي توافيق من رب العالمين وقسمة ونصيب
على قولة بعض الحريم الكبار تخرجي شهادتج بيمينج والريل بيسارج جنه ناطرني عند باب الكليه لوووووووول

 

[PuPa^^SWeeT]

والله الافضل تتزوجين قبل لا اتخرجين

لأنج توج صغيرة و حلوو ببداية حياتج اتاسسين بيتج


عيالج اتيبينهم و اتخلصينهم قبل لا اتكملين ال30 ههه والله جد

و همن الريال يتعود يشيلج ويدري انج صغيرة و يصرف عليج

مو اول اتوظفين و تتزوجين يطالع معاشج



وهمن مهما كبرتي يفكر انج ليلحيين طالبة ليلحين صغيرة


مادري

انا اقولج الريال زين توكلي على الله


الريال سالو عنه


اما موضوع صغيرة و جامعة لا العكس حلاتج صغيرة و اهوا اللي يشتغل



يبقى تقسيمتج انتي لوقتج

حالها حال المتوظفة اتاقلم نفسها

 

[اميره بعيونه88]

مافيها شي رفجتي متزوجه وعندها اعيال وتدرس بالجامعه

انتي استخيري ودام خووش ريال وشاريج مافيها شي

 

[Ms.Candy]

انا برأي ان بعد ما تخلصين جامعة تزوجين يعني ليش ما اتم احين الخطبة
وبعد ما تتخرجين تزوجون

 

[فوز السعودية]

توكلي على الله دامك ارتحتي انا مريت بنفس الشي وما وافقت بس تحسفت بعدين قد شعر راسي

الله يوفقك

 

[خفايا الروح93]

عن رأيي أقول إذا الرجال مناسب أتوكلي على الله ،،،رتبي أمورك وخليك واضحة معاه في أمورك من البداية وشوي شوي رح تتعودي على الوضع وبالعكس أحيانا الضغوطات تطلع مواهب مدفونة في الإنسان ما كان يعرف بوجودها....
الله يوفقك ويكتب لك الخير ،،،،ن وأهم شي الاستخارة واسألوا عن الرجال.....

 

[جيرازksa]

انااقول من رايي حلو الحين سن الزواج بس اذا انتي تحسي انك مو قادره توفقي بين دراسه وزواج حاولي تاجلي موضوع الحمل لبعد التخرج او انك تحملي قبل التخرج بكم شهر

اذا الرجال مافيه عيب وكويس لاتطوفيه واستخيري اكثر من مره ربي يوفقك