ابي رايكم,,الدكتورة بتدخلني ولادة وانا انحشت

[*فدك*]

قووه بنااات
انا هذا ثاني حمل لي
الحمدلله,,وطول الحمال كل شي طبيعي والياهل متاخر اسبوع بالسونار عن حسبة الدوره وهذا طبيعي لانه حملي يصير متأخر
مفروض على حسبة الدوره ولادتي 17/12
وعالسونار اخر مره 24/12

المهمممم رحت السبت الي طاف مراجعة وبعد عوار خفيف من اول شهري فحصتني والرحم مسكرررررررررررررررررررررر نهائياا :eh_s(2):
وقالتلي البيبي كبير ( واهو بحدود 3 وشي ) وبالسونار عالقياسات انتي وصلتي الاسبوع الاربعين,,ماقدر انطر اخاف يكبر وماتولدين طبيعي
شربي خروع قفشتين كل يوم وامشي ساعه وتعاليلي الثلاثا (الي اهو امس) اشوفج واسويلج دخول

انا تصروعت وطلعت ويهي اصفررررررررررررر
شلون الياهل لي المراجعه الي قبلها حجمه زين وموعدي عال 24/12 والحين بتولدني حتى قبل 17/12
وانا مو مفتوحة كلللللللللللللش
خفت اروح ويلعبون فيني وصناعي وبعدين الصناعي يتعب البيبي ويحولوني قيصريه لانها لمحت انه اذا طولت قيصريه او اذا كبر البيبي ماراح تقدرين تولدين طبيعي
لانه بجري كان اقل من جذي واستعملوا شفاطه فالحين اكثر وصعبه يطلع واخترعت

سويت تحاليلي وسكر والحمدلله كل شي طبيعي
ووايد قالولي عادي الياهل مو كبير وايد بس الدكتوره مخرعتج,,ونطري لما ييج عوااار روحي
واناا من بداية شهري عوار خفيف وبس جذي الرحم مسكر والحين ماكو شي نهائيا
وانا ببجري دخلوني غصب بس كنت مفتوحه
فماحسيت بالطلق الصجي


الحين شرايكم... انا قررت اعطي نفسي مجال لي الثلاثا الياي اروح كمراجعه واشوف شتقولي بس اتوقع تصر تدخلني

ادعولي لي الموعد الياي يكون الرحم فاتح وييني عوار طلق طبيعي,,حدي خايفه من القيصريه

وعطوني رايكم؟؟
وشسوي عشان ممكن يفتح الرحم
انا ماااافضل اشرب اشياء وانا مافيني عوار ولا مفتوح الرحم
شوروا علي هل اشرب اعشاب وشنو اهيا
ولا شسوي

شرايكم؟؟

 

[bubble.gum]

عليميه والده قيصريه .. ان شاء الله البنات يفيدونج ..
اب
اب
اب
اب
اب

 

[ناتشوو]

اول شي

اسمعي كلام الدكتورة
من ناحية كثرة المشي وشرب الخروع

ثانيا
احرصي على عمل التخطيط
بالحكومي يسوونه ع طول بدون تعقيدات
تتطمنين كل شي اوكي

ثالثا اخذي راي طبيبة ثانية
من ناحية الحجم

الله يهون عليج يارب

الله يعين انا مثلج
اكمل التاسع كله
صج شي يضيق الخلق
كل شي يطري عليج
وتخافين تستعجلين ع القيصري


اهم شي خليج متواصلة مع الاطبا لا تطنشين

 

[ام الحلوااات]

كــثـــرري مــن الــجــمـــاع والــمـــشــــي
واصــعــدي وانـــزلــي وااايـــد مــــن الـــدرج
وســبــحـــي بــمــاي دافــيء حــيـــل وركــزي عـلـى الـبـطـن والــظــهــر
بـــس انــتـــــي لا لا ثـــم ثــم تــــشـــربــيــن شـــي والـــرحــم مــو فــاااتـــح
بـــس يــفــتــــح اشــربـــي دااارســـيـــن ​

اللــــــه يـــســهــل عــــلــيـــج وتــولــديــن طــبــيــعــــي يــــاااارب

 

[ام عفراء]

ماعندي خبرة

بس اللي دايما يحرصون عليه وحتى الدكاترة يقولون

انه لا تشربين شي والرحم مو فاتح .. لانه راح تتعقد الامور

فغريبة انه دكتورتج تقولج شربي خروع وانتي الرحم مو فاتح وباقي على موعدج

...

الله يسهل عليج يارب وتولدين طبيعي بصحة وسلامة وطفل معافى

 

[درة التاج]

سلام عليكم
اختي فدك شلونك؟
حبييتي استخدمي الحمام العربي مو الافرنجي هذا يفتح لك الرحم باذن الله
انا انصحك تروحين وتدشين المستشفى لان العوار فيك فيك والبيبي ترا كل اسبوع يزيد وزنه والي اعرفه منك دكتورتك زينة استخيري وتوكلي علا الله وروحي وحتا لو تحولك قيصري افهمي ان كل الي يصير لك خيرة لك
ايهو احسن تولدين قيصري وتكونين انتي والبيبي بخير ولا تولدين طبيعي والبيبي يكون مريض؟

 

[درة التاج]

يارب يهونها عليك وتقومين بالسلامة

 

[درة التاج]

ان شاء الله تقومين انتي والبيبي:eh_s(7): بالسلامة

 

[اخت خالتهم]

انا اقول روحي اي مستشفى الهادي
او دار الشفا
مراجعه عادية او المواساة

و دشي عليهم قولي بتطمن على البيبي والوزن
و ان اذا وزنه طبيعي او لا
اذا صج قالولج مبين بالاسبوع الاربعين ردي حق دكتورتج

 

[ناتشوو]

الخروع اصلا ماله شغل بالرحم
بس انه مرخي وملين للبطن
وبالتالي تتاثر العضلات
وتتسهل الولادة

 

[hano0oda]

الله يقومج بالسلامه انتي والبيبي

 

[انجبر قلبي]

حبيبتي لاتستعيلين زين انج انحشتي



لان اكيد بتعطيج طلق صناعي و هذا راح يتعبج و يتعب اابيبي



يعني طلق صناعي و رحمج مصكر بصراحه عذاب



فانتي ماشاللله عليج فطينة انجشتي عشان لا يلعبون فيج


ترا الطلق انشالله ياي ياي لاتحاتين خليها طبيعي من الله



انا انصحج لان ولادتي الاولي طلق صناعي ثلاث تجاميل لمه اللي ببطني تعبت و بغا يوقف نبضها و حولوني بسرعه قيصري والحمدالله علا كل جال

 

[ملوكة الامورة]

احسن اسمعي كلام الدكتورة
ودخلي المستشفى
والله يقومك بالسلامة
بشرينااااااااااااااااا

 

[أخاف اجرح]

واااي انانفسج بعد وعندي موعد الأحد خفت يقولي ولاده واناتوني داشه التاسع والسونار مجدمني سبوعين الله يستر ويسهل علينا يارب

 

[موت وميلاد]

عادي شربي يخروع انا اخلص شهري يوم السبت
شربت خروع غرشه كامله بس ماسوتلي
ومشيت وشرب كل انواع الاعشاب والاناناس والجماع ولا ياني طلق
وسكلي اخرتها طلق صناعي مو اول ولا اخر وحده

 

[m'3rOoOra]

عليج بالتمر والدارسين انتي طحنيه وشربيه عجيب لفتح وسهوله الولاده ان شاءالله

 

[مضاد حيوي]

استخيري ربج ... ما خاب من استخار الخالق
و بعدين الخروع عادي تشربينه . في بعض الحريم يفتح لهم رحمهم و بعضهم ما يأثر فيهم
غير الاسهال و انتي بكرامه

 

[سنتر الزين]

الله يسهل عليج بس حاولي ما تاكلين حلو أو كاكاو والدهون بعدي عنها لانها تكبر الحبيبي حيل

 

[*فدك*]

مشكوووورين حبايبي عالردود
طمنتوني

انا استخرت اني اشرب خروع وماكان زين فماااشربت

وقررت اروح الاسبوع الياي مراجعه عاديه واشوف ان شااء الله اكون مفتوحه وساعاتها اشرب كل شي عادي وادش وامري لله

انا اخذت راي دكتورة ثانيه قالتلي عادي لانها ولاده ثانيه فالرحم يربي وممكن البيبي يطلع كبير بس مو مقياس للقيصريه
واذا خلصت شهرها واهو كبير هني نولدها غصب
بس ادعولي بالولاده الطبيعيه والطلق الطبيعي
انا مجربه الصناعي وعادي اخذه بس ادري وجربت يتعب نبض البيبي واخاف يحولوني قيصريه
بوكل امري لله واروح الاسبوع الياي وخلاص بعد مااعتقد راح اقدر انحاش اكثر

اليوم ياني مغص كل نص ساعه واختفى خلاص ولا كأنه فيه شي,,, ان شاء الله يكون تجاديم او الرحم يفتح مو مثل قبل ييني عوار وماكو شي كلش

مشكورين كلكم كلامكم وايد يريحني واحس بالمساندة الي احتاجها منكم

ادعولي

 

[انجبر قلبي]

حبيبتي الله يهون عليج يارب و تولدين ولاده طبيعية سهلة ميسرة انشالله