فزعة من ثلاثينية
أول شغلة لاتخترعون من عمر ال 30 لأنكم راح تكون فأكثر المراحل العمرية جمال و مرحلة اكتمال ونضج الملامح والجسد ، و كلام أقوله عن قناعة وتجربة وأي ثلاثينية بتقارن صورها فالعشرينات والثلاثينات بتلمس الفرق وبتعرف معنى الاكتمال والنضج .
لكن الفرق بين العشرينات والثلاثينات ، فالعشرينات مايبيلج هذاك التعب على نفسج ، لكن الثلاثينات لازم تكونين منتبهة ومهتمة لجسمج لعنايتج فنفسج وإذا حرصتي على هالشي ، النتيجة بتكون مرضية جدا ، وبتشوفين نفسج أحلى من لما كنتي بالعشرينات .
الوزن : بالنسبة للجسم فالثلاثينات يبدأ ينخفض معدل الحرق فيه ، والرجيم بتكون نتائجه جدا بطيئه معاه بعكس العشرينات ولازم تحاولون تحافظون على الوزن المناسب .
الترهل : اذا حافظتوا على أوزانكم ماراح تظهر لكم مشكلة الترهل بشكل باكر ، لكن لو عرضتوا نفسكم للسمنة والنحافة راح تشوفون ترهل بالجسم بشكل سريع ومفاجئ ، لأن مطاطية وليونة الجلد انخفضت و يأثر عليها تراوح وتفاوت الوزن . والحرص على الرياضة لو 3 مرات فالأسبوع ، خصوصا رياضة الأثقال الخفيفة لأنها تحافظ على تماسك العضلات وبالتالي تأخر الترهل .
الترطيب : ترطيب الجسم مو بس ترطيب الوجه وخلوه روتين مرتين فاليوم مو بس حزة الاستحمام ، والأهم من الترطيب الخارجي ، الترطيب الداخلي الماي والعصيرات ، وحاولوا تكثرون من الأغذية اللي تحتوي على فيتامين سي لأنها تحفز انتاج الكولاجين في الجسم واللي ينخفض انتاجه عادة في عمر الثلاثينات .
كريمات البشرة والعناية : بخصوص كريمات التجاعيد وخصوصا مضاد التجاعيد ، كثير يعتقدون انو ما نستعملها إلا لما تظهر لنا التجاعيد واستعمالها بشكل مبكر يضر بشرتنا ، وهذا اعتقاد خاطئ ، التجاعيد تكون حافرة وخاطة بالطبقات الجلد الداخلية بوقت قبل لاتظهر على البشرة الخارجية وبيكون الوقت تأخر ومعالجتها أصعب . في المرحلة هاذي الحرص على الكريمات اللي تحتوي الريتينول وفيتامين سي لأنها تحفز انتاج الكولاجين .
التقشير : فعمر الثلاثينات يبدأ تجدد البشرة و التخلص من الخلايا الميتة ينخفض ، ويصير التقشير السنوي أو كل 6 أشهر في العيادة ضروري .
الأناقة : للحين لازلتوا شابات تلاحقوا أعماركم واكسروا القواعد والمالوف وسووا اللي نفسكم فيه لأنكم بعد فترة بتحسبون حساب العمر وبتشتهون أشياء وتقولون مو مناسبة لأعمارنا . وعادة اللي يقيد نفسه بهالعمر تصير فيه مراهقة متأخر بالأربعينات .
وهذا اللي عندي الحين وإذا طرى علي شي جديد جيت وكتبته :bye22:.
