ابي اصير ادمية مثل الأوادم @ساعدوني بتقسيم معاشي@

[زينة البحرين]

هلا وغلا بخواتي الغاليات
عند مشكلة وصراحه عويصة ومسببه لي أزمة نفسية حادة ومزاجي دايم خربان واحتي مانام وهي:0bee2e8d89:معاشي ماوفر منه ش مايبقى منه شي لا وأطر من بوالشباب ...
انا مدرسه(10سنوات)وراتبي الحمدلله700 لكن موزع بهالطريقة194قسط 120جمعية 72للفيزا كارد(مضيعتها عشان ماستعملها)وفاتورة الموبايل .ان شاءالله بسكن بيتي قريب وصراحة ماساهمت مع زوجي بشي وفلوسي تروح على خرابيط وهدايا المناسبات الأجتماعية والله خواتي تمر شهور ماروح اتسوق مثل الناس او اشتري شي افرح به:0bee2e8d89:حتى لوتصير عندي مناسبة فجأة اتوهق ,,,,,والأدهى اني تعلمت اتسلف من أمي او أختي مما زاد الطين بلة:cxxxp:
والحين وصلت لمرحلة متأزمة لأني احس مافرح براتبي أصلا مايي الأ راح في طريقة اشوف اللي حولي اللهم لاحسد مستانسين ويروحون ويون الأ انا
ارجوكم لقولي حلا جزاكم الله جنات النعيم باموت وعيني طالع لا تبخلون علي

 

[غرشة عطر]

رد: ابي اصير ادمية مثل الأوادم

انا مثل حالتج موظفه من 10 سنوات ومعاشي فيزا واقساط وحالتنا يعلم فيها ربي بس عندي هوايه خلط العطورات ففكرت لي متي انا جذيه ابي اسوي مشروع وكان حلم بالنسبه لي وغيره فدبرت لي جم فلس من وحده قلت ارجعها لها لاتحسن حالي وجزاها الله الف خير
واحنا دمارنا اهي الواجبات والهدايا والحريم يولدون واحنا نبتلش حتي زوجي يهاوشني يقول وتاليتها مع هالهدايا اللي تتسلفين عشانهم اقول فشله يعطوني وماعطيهم وماحب اكون رديه جدام احد وماحب احد يدري بظروفي خاصه اهلنا

والحمدلله خلطاتي ماشيه ومطلوبه وتوني جديده باشترك بكذا معرض وانتي شوفي البنات بهالقسم حاطين كذا موضوع وفيهم الخير التاجرات يساعدون ويعطونج بضايع بسعر الجمله
جرررررررربي
اتمني اني فدتج

 

[زينة البحرين]

رد: ابي اصير ادمية مثل الأوادم

هلا حبيبتي انا تسلفت من الوالد جزاه الله خير الف وسويت مشروع جلابيات من سنتين ونجحت الحمدلله والعام سويت مانجحت مع ان اسعاري وايد معقولة من 15 بحريني الى 60 وللأسف كاهم طايحين بجبدي وماردت الدين للحين واخاف اجازف وافتح خياط يكلفني فوق 7الأف ومافيني اتحمل اكثر مع اني امووت عالجلابيات بس مالي حظ:0bee2e8d89:

 

[kuwaitya_zoGaa]

رد: ابي اصير ادمية مثل الأوادم

حبيبتى اول شغله
انتى راقبي نفسج معاشج على شنو يروح ؟؟؟
اول شغله حسبي جم التزاماتج ونقصيهم من الراتب الاساسى اوكى
وبعدين شوفى روحج وين فلوسج تروح فيه ؟؟؟ اذا رحتى تشترين اشياء فكري قولى انا محتاجته ؟؟؟
فتحي حساب توفير وحاولى تحطين فيه مبلغ صغير لو 10 دنانير
واخر شى دوري مدخول ثاني حاولى اتاجرين والله يوفقج
واكثري من الاستغفار

 

[النويرة]

رد: ابي اصير ادمية مثل الأوادم

اقولج شي بس ما تزعلين

ترى السالفة سالفة بركة والفلوس لو هي مليون ومافيها بركة عمرج ما راح تتهنين فيها

انتي حاولي تراجعين نفسج ... شوفي حياتج شنو فيها .... يمكن عليج دين او حلف او ذنب سويتيه او او او

وطلعي كل شهر صدقة واكثري الاستغفار
وربي يوفقج بمصدر ثاني للدخل

 

[زينة البحرين]

رد: ابي اصير ادمية مثل الأوادم

جزاك الله خير اختي النويرة الواحد مايقول بس الحمدلله انا عندي مبلغ كفالة يتيم وبفضل الله اتصدق قد ماأقدر لاني دائما في بالي مانقص مال من صدقه وبعد سبحان الله ماأوفر وترى هذي مو بس مشكلتي الوالده مثلي ابي اغير اسلوبي صرفي لأن اذا تمت هالشكل ليما اتقاعد وانا ماعندي شي

 

[موزة ام فارس]

رد: ابي اصير ادمية مثل الأوادم

انا لاحظت كثرة الطلعات تزيد المصاريف *____*

مثال على هالشي .. المطاعم والكافيهات والعصير
لا تقولين نص دينار او دينارين اشويه !!!!

ترا دينار على دينار على دينار صاروا 3
والعشر على عشر تصير 20 _03BA:

القناعة كنز والكنز محد يحصله بالسهولة بوقتنا *_*

قبل لا تشترين شي سألي نفسج انا محتاجة له !!! اذا ما اخذته شنو يصير فيني بموت ؟!!! :eh_s(1):

ومن خلال سؤال النفس هذا والله وصدقيني تدش القناعة داخلج
واشوي اشوي بتقل مصروفاتج وبتلاحظين اخر الشهر ان عندج مبلغ محترم *____*



صرخة بداخلي واسمحي لي فيها اختي موجهة للكل :
ترا احنا مو مخربنا الا هالالتزامات الاجتماعية اللي ماتخلص
ياجماعة خلوا الهدايا بس على الزواج واول ياهل بس .. ليش كل مولود له هدية :eh_s(14):
ليش كل دشة مستشفى فيها صينية حلو مو اقول من 16 دينار ومايترس عينهم هالناس الا المحلات الغالية :eh_s(14):
ليش الزيارة ماتعتبر احترام وموده اكثر من تقديم الهدية اللي صارت الزامي حتى على اللي مايقدر :cxxxp:
كل وحده بالدوام بتتقاعد حطوا لها حطه !!!
كل وحده بالدوام حتى لو مو بقسمي لازم احط .. شكوووو !!!!!!
كل وحده عيد ميلادها قرب حطوا لها او لازم اشتري هديه لها !!!
كل وحده بنفاسها وبطلعتها منه ونزلتها منه لازم هدية شالسالفه !!!

مو تحسبوني بخيله ولا احب اقدر ولا اعطي ديروا بالكم هااااا :dddds:
بالعكس اللي احبه اعطيه عيوني والله بس صج مصخت السالفة عندنا
البنات مو قادره تيمع شي بسبب هالالتزامات والمصاريف اللي فوق طاقتهم

قايمين وقاعدين هديه اللي حتى الواحد كره يزور الناس بسبب هالهدايا والعطايا اللي مالها معنى :eh_s(14):


----> صرت انطوائية بسبب هالالتزامات




سوري سامحيني حبيبتي من الحره اللي بقلبي

عفية سامحيني لأني اعاني مثلج والله ويوم صرت انطوائية يالله افتكيت وعرفت حق نفسي عدل

 

[اطياب طيبه.أم عبدالله]

رد: ابي اصير ادمية مثل الأوادم

الله يسهلج يا اختي
واذا حابه اتتاجرين معاي حياج الله
انا توظفت الحين وصرت مو فاظيه حق النت والتجاره
راسليني على الخاص للتفاصيل
تحياتي

أكثري من الاستغفار اختي

 

[ترانيم العود]

رد: ابي اصير ادمية مثل الأوادم

سوي استقطاع لو مبلغ بسيط

وكل راس شهر راجعي احساباتج وشوفي اللي يلزمج واذا في اشياء مو ضروريه الغيها

 

[wrooood]

رد: ابي اصير ادمية مثل الأوادم

اقول لكم على طريقة يا بنات انجحت معاي ومع اختي

اهي طريقة الاظرف.... اذا تعودتوا عليها راح تتنظم حياتكم المالية

اول شي سوي جدول بقيمة مصروفاتج الثابته مثل :فواتير تلفون- اقساط - جمعية - بانزين - سوق - صالون...
بعدين حطي مصروفاتج الطارئة مثل: مصروف سيارة(لاسمح الله صار شي مفاجئ) - استقطاع حتى لو 20

بعدين حطي كل مبلغ بظرف وكتبي عليه نوع المصروف وبجذيه انتي امنتي روحج من ناحية الضروريات

والباجي من الراتب خليه حق المواجيب واللعب والطلعات وانتي مرتاحة

ونصييييحة يا بنات وخروا عن الفيزا والماستر تراها آفة تاكل المعاش اكال

انا مرتاحة مع هذي الطريقة وان شاء الله تستفيدون منها بعد بالاول شوي صعبة بعدين راح تصير سهللللة

بالتوفيق

 

[زينة البحرين]

رد: ابي اصير ادمية مثل الأوادم

جزااكم الله خير خواتي بروح استقطع من راتبي لو 10 عالأقل 10 على 10يصير شي واحسن من لاشي ياعمري يعلكم موفقين في الدنيا والأخرة ... وان شاءالله جميعن نوفر للزمان الياي

 

[[الغريبة]]

رد: ابي اصير ادمية مثل الأوادم

السلام عليكم ورحمة الله وبركاته
عزيزتي الله يجزاك خير خصصي جزء من راتبج للصدقة فهى البركة
[[[[فقليل متصل خير من كثير منقطع ]]]]
وراح تشوفين الفرق وأنا أقولها لج من تجربة شخصية

 

[كـ غلا ــلي]

رد: ابي اصير ادمية مثل الأوادم

انا صار لي سنه متوظفه ولا فلس يمعت .. ومرات واايد اتم لين قبل اسبوعين من نهايه الشهر الا الراتب بححح

طاااار ادري الغلطه مني اشري اب هالهدوم والجناط ومكرم السامع جواتي كل الالوان عندي والله بدون مبالغه حفيز

مو شقه ومن الصوب الثاني على قوله وحده من الخوات الهدايا وما ادراك ما الهدايا قولي الاهل واجب وجبورين فيهم

وهم الاصدقاء لكن العله زملاء الدوام شكو اللي يوم تسلم لين لها خلق و10 لا سلام ولا كلام والنفسيه يالله من فضلك

سوت عمليه ولا والده اوكي بعد عيد ميلاد وتقاعد اشماله اولا عيد ميلادها لها احنا شكو فيها هذا مصرف سنوي

وتقاعد احنا شكو نعطيها مو احنا بعد موظفين نقبض حالنا من حالها لا احنا رؤساء اقسام ولا مدره اشفيها لين

سلمنا عليها وكتبنا جم كلمه الا نحط هالحطات اللي تهد الحيل ولا فوق هاذا ما نعود نشوف الادميه هاذي كلش يعني

بالعربي ما ارح تدري عنا ولا ندري عنها بس صرف عالفاضي

انا اكره ما علي حطااات الدواام اهيا اللي غاثتني لانه احنا مو ربع الظروف بس حطتنا بمكان واحد واللي اليوم رفيجتي

باجر عدوتي وهذا غير الحش اللي ماله والي .. احنا والتوفير وين ليدام مجتمعنا فيه المظاهر وبلاوي الحطات

 

[انفاسي]

صراحه ما اقدر اساعدج بفكره باب النجار مخلع انتي عايزه فلوس انا كمان ياليت نلاقي حد يدينا

 

[أغادير]

والله انا نفس الحالة يطير معاشي ياليت على شي يسوى لو اطلع بجنطة ماركة او جوتي ماركة كان زين بس المشكلة

يطير على المطاعم والطلعات والعزايم كل يوم عازمة وحدة بمطعم هذا اللي يحر ابي اطلع بشي يسوى!!!!!!!

 

[اصوله بنت ابوها]

اي والله انا للحين ماتزوجت وجذي بعدين شلون
الله يستر

 

[kuwaitya_zoGaa]

استغفر الله ... للرفع

 

[Shima-Style]

رد: ابي اصير ادمية مثل الأوادم

الله يسهلج يا اختي
واذا حابه اتتاجرين معاي حياج الله
انا توظفت الحين وصرت مو فاظيه حق النت والتجاره
راسليني على الخاص للتفاصيل
تحياتي

أكثري من الاستغفار اختي

انا ودي اتاجر معاج يا ام عبدالله وشفتج بمعرض صباح السالم
ماشاء الله عليج تهبلين ونفسج حلووووه

 

[ابيار علي]

ياجماعه الخير مايخرب المعاش و مايطير بركته غير الفيزا والسلف والقروض انتهبوا على فلوسكم اشوي المسألة يبيلها تحكيم عقل

 

[maanooora]

والله انا مهندسه وصار لي سنتين ونص اشتغل وماعندي التزامات والمعاش مايعيش عندي لدرجة اني انسى الرقم السري مال البنك ههههههههههههههههههه... بس اللي فادني هالايام الجمعيات دخلت فيهم وشوي صار عندي جم فلس _03BA: بسافر فيهم ان شاء الله وبيطيرون :RoadRunner: ... صج هذي مشكله والله اخاف من عقوبة الله على هالاسراف :yaaaaaarb:​

​

[/SIZE]